बजट सत्र के पहिली मुख्यमंत्री विष्णुदेव साय के अगुवई म आज मंत्रालय म कैबिनेट के एक ठिन बड़का बइठका होइस। जेमा चार ठिन विधेयक मनके प्रारूप के अनुमोदन करे गीस। जेमा बछर दू हजार चौबीस-पच्चीस के तीसर अनुपूरक अनुमान बर छत्तीसगढ़ विनियोग विधेयक, बजट दू हजार पच्चीस-छब्बीस के अनुमान बर छत्तीसगढ़ विनियोग विधेयक, छत्तीसगढ़ लोकतंत्र सेनानी सम्मान विधेयक अउ भारतीय स्टाम्प अधिनियम संशोधन विधेयक सामिल हे। ए विधेयक चौबीस फरवरी ले सुरू होवइया छत्तीसगढ़ विधानसभा के बजट सत्र म पेस करे जाही। बइठका म बजट सत्र म राज्यपाल के अभिभाषण के अनुमोदन करे गीस।
त, उहें, कैबिनेट के बइठका म किसान मन ल उन्नत अउ बढ़िया बीजा देवाय खातिर छत्तीसगढ़ राज्य भंडार क्रय नियम म संशोधन करे के फइसला ले गीस, जेमा अब बीज निगम डहार ले सबले पहिली राज्य के पंजीकृत बीज उत्पादक किसान मनले बीजा बिसाय जाही। ओखर बाद जरूरत के मुताबिक राज्य के बीज उत्पादक सहकारी समिति, केंद्र अउ राज्य सरकार के बीज उत्पादन करइया उपक्रम, नाफेड, मध्यप्रदेस बीज महासंघ के समिति, अउ केंद्र सरकार डहार ले सेंट्रल नोडल सीड एजेंसी के रूप म चुने संस्था मन ले बीजा बिसाय जाही।
उहें, खरीफ विपणन बर्ष दू हजार चौबीस-पच्चीस बर समर्थन मूल्य म किसान मनले बिसाय गे धान के बांचे पइसा ल दे बर तैंतीस सौ करोड़ रूपिया के अनुमोदन करे गीस। एखर अलावा मंत्रीमंडल के बइठका म छत्तीसगढ़ कैडर के अपर प्रधान मुख्य वन संरक्षक जउन मन तीस साल के सेवा पूरा कर चुके हे, ओमन ल प्रधान मुख्य वन संरक्षक के बरोबर तन्खा देबर जरूरी फइसला ले गीस।
पंचायत चुनाव-तीसरा चरण
त्रिस्तरीय पंचायत चुनई के तीसर अउ आखिरी चरण म काली तेईस फरवरी के राज्य के पचास ठिन विकासखंड मन म वोट डारे जाही। बस्तर संभाग ल छोड़के जम्मो जघा बिहनिया सात बजे ले मंझनिया तीन बजे तक वोट डारे जाही। बस्तर संभाग के मतदाता मन बिहनिया छै बजके पैंतालिस मिनट ले मंझनिया दू बजे तक वोट डार सकथे।
निर्वाचन आयोग के मुताबिक काली तीस हजार नौ सौ नब्बे पंच, तीन हजार आठ सौ दू सरपंच, एक हजार एक सौ बाईस जनपद सदस्य अउ एक सौ पैंतालीस झिन जिला पंचायत सदस्य के पद मन बर वोट डारे जाही। ए चुनई म पंच पद के छिहत्तर हजार एक सौ निन्यानवे, सरपंच पद के सत्रह हजार एक सौ निन्यानवे, जनपद सदस्य के चार हजार छै सौ उनसठ अउ जिला पंचायत सदस्य के आठ सौ उनचालीस प्रत्यासी मन चुनई लड़त हे। अधिकारी मन बतइन कि तीसर चरण के मतदान बर ग्यारा हजार चार सौ तीस मतदान केंद्र बनाय गेहे। जिहां तिरपन लाख अट्ठाईस हजार ले जादा मतदाता मन अपन मत के परयोग करही।
मतदान दल-रवाना
त्रिस्तरीय पंचायत चुनई म काली जउन जघा मतदान होना हे, ओमा अतिसंवेदनसील जिला नारायणपुर जिला घलो सामिल हे। जिला के ओरछा विकासखंड के छत्तीस ठिन ग्राम पंचायत मन म काली वोट डारे जाही। कलेक्टर अउ जिला निर्वाचन अधिकारी प्रतिष्ठा ममगाई ह बतइन कि ओरछा विकासखंड म मतदान बर सैंतीस ठिन केंद्र बनाय गेहे। दू ठिन अतिसंवेदनसील क्षेत्र कस्तुरमेटा अउ मोंहदी मतदान केंद्र बर मतदान दल मन ल हेलीकाप्टर ले भेजे गेहे। रिटर्निंग अधिकारी ह बतइन कि इंहा छै बजके पैंतालीस मिनट ले मंझनिया दू बजे तक वोट डारे जाही। पुलिस अधीक्षक प्रभात कुमार ह बतइन कि जम्मो जघा म सुरक्षा के तगड़ा बेवस्था करे गेहे। त ओति, कोंडागांव जिला के अतिरिक्त पुलिस अधीक्षक कौशलेन्द्र पटेल ह बतइन कि केशकाल विकासखंड के ईरागांव अउ विश्रामपुरी विकासखंड के संगेसंग जम्मों संवेदनसील जघा के मतदान केंद्र मन म सुरक्षा के बड़का व्यवस्था करे गेहे।
तीसर चरण म काली बस्तर जिला के तोकापाल, बास्तानार अउ बकावंड विकासखंड म वोट डारे जाही। उहें, रायगढ़ जिला के लैलूंगा, घरघोडा़ अउ तमनार विकासखंड म काली होवइया मतदान बर आज मतदान दल मन ल जम्मों जिनिस दे गीस।
स्वच्छता दीदी/सफाई मित्र-अवकाश
मिशन क्लीन सिटी के तहत काम करइया स्वच्छता दीदी अउ सफाई मित्र मन ल अब रोटेसन के आधार म हफ्ता म छुट्टी मिलही। संगेसंग उंखर मनके काम के बेरा आठ घंटा तय करे गेहे। नगरीय प्रशासन अउ विकास विभाग ह, ए बारे म जम्मो नगरीय निकाय मन ल निरदेस जारी कर देहे। विभाग ह जम्मों स्वच्छता दीदी अउ सफाई मित्र मन ल श्रम विभाग म पंजीयन कराय के निरदेस देहे। अब हर महिना स्वच्छता दीदी अउ सफाई मित्र मनके स्वास्थ्य जांच करे जाही। ओमन ल वर्दी, दस्ताना, मोजा, मास्क, जूता, टोपी अउ रेनकोट घलो दे जाही। ए नवा दिसा निरदेस रईपुर, भिलाई अउ रिसाली ल छोड़के जम्मों नगर निगम, नगर पालिका अउ नगर पंचायत मन म लागू होही।
नारायणपुर नीति आयोग पुरस्कार
कृषि ग्रामीण अर्थव्यवस्था अउ सुघ्घर विकास म बढ़िया प्रदर्सन करे खातिर आकांक्षी जिला नारायणपुर ल नीति आयोग ह दस करोड़ रूपिया के इनाम देहे। जानबा के मुताबिक नारायणपुर म खेती ल उन्नत बनाय, लोगन मन ल नवा रोजगार दे अउ गांव मन म जरूरी सुविधा बढ़ाय बर खास योजना चलाय जात हे। किसान मन ल नवा तकनीक दे जात हे, जेखर ले ओखर मनके फसल अच्छा होय अउ मुनाफा बाढ़य। संगेसंग गांव मन म रद्दा, बिजली, पानी अउ शिक्षा जइसन बुनियादी सुविधा के बिस्तार करे जात हे।
भाजपा-निगम सभापति पर्यवेक्षक
भारतीय जनता पार्टी के प्रदेस अध्यक्ष किरण सिंह देव ह जम्मो दस नगर पालिक निगम म सभापति के चुनई बर पर्यवेक्षक मनके नियुक्ति कर देहे। बिलासपुर बर सांसद संतोष पांडेय ल पर्यवेक्षक बनाय गेहे। त अइसने कोरबा म पुरंदर मिश्रा, रायगढ़ म ललित चंद्राकर, अंबिकापुर म शिवरतन शर्मा, चिरमिरी म गोमती साय, रईपुर म धरमलाल कौशिक, धमतरी म मोतीलाल साहू, दुरूग म संजय श्रीवास्तव, राजनांदगांव म रूपकुमारी चौधरी अउ जगदलपुर म नारायण चंदेल ल पर्यवेक्षक पद के जिम्मेवारी दे गेहे।
त उहें, जम्मो पांच संभाग मन म नगर पालिक परिषद म उपाध्यक्ष ल चुने बर घलो भाजपा ह पर्यवेक्षक मनके नियुक्ति कर देहे।
अनिल टुटेजा-जमानत याचिका खारिज
अउ अब पेस हे मौसम के हाल…
छत्तीसगढ़ के मौसम म ए बेरा बदलाव होवत हे। मौसम विज्ञानी एच.पी.चन्द्रा ह बतइन कि अवइया दू दिन के दउरान न्यूनतम तापमान म करीबन दू डिग्री सेल्सियस तक के गिरावट होय के संभावना हे, त उहें अधिकतम तापमान म कोनो बिसेस बदलाव नइ होवय। बस्तर संभाग के दक्षिणी भाग म बादर छाय रहि सकथे।
– त्रिस्तरीय पंचायत चुनई के तीसर चरण के निर्वाचन काम म लापरवाही बरते के आरोप म कोरिया कलेक्टर उप अभियंता अिंमत चौधरी ल निलंबित कर देहे।
– कोंडागांव जिला के बोरेगांव अउ फरसगांव के बीच एक ठिन कार ह अंतेतंते होके पलट गे ए घटना म दू झन लोगन के मउकच म प्राण छूट गे। ए जम्मों लोगन मन प्रयागराज ले वापिस लहुटत रिहीन।
– शहडोल पंडरिया रद्दा उपर गांव तरच के तीर काली एक ठिन कार ह खाई म गिरगे। ए घटना म एक झिन माईलोगिन के मउत होगे अउ छै झिन आने लोगन मन घायल होगे।
अउ
– धमतरी जिला के कोड़ेबोड़ गांव के तीर आज कार अउ ट्रैक्टर के बीच होय टक्कर म एक झिन महिला के मउत होगे अउ चार झिन आने लोगन मन घायल होगे।