प्रदेस म त्रिस्तरीय पंचायत चुनाव म आज दूसर चरण म राज्य के तिरालीस विकासखंड म वोट डारे गीस। मतदान बिहनिया सात बजे ले मंझनिया तीन बजे तक होइस। कुछेक मतदान केंद्र म वोटर मन के मतदान केंद्र के भीतर रहे के सेति तीन बजे के बाद घलो वोटिंग जारी रिहीस। उहें, बस्तर संभाग म बिहनिया छै बजके पैंतालीस मिनट ले मंझनिया दू बजे तक वोट डारे गीस। आज होय दूसर चरण के मतदान स्थानीय सरकार चुने बर मतदाता मन म भारी उत्साह देखे गीस।
दूसर चरण म पंच पद बर पैंसठ हजार सात सौ सोलह, सरपंच पद बर पंद्रह हजार दू सौ सत्रह, जनपद सदस्य बर तीन हजार आठ सौ पचयासी अउ जिला पंचायत सदस्य बर छै सौ निन्यानवे प्रत्यासी मन ह चुनाव मैदान म हवय। संगेसंग छब्बीस हजार नौ सौ अठयासी पंच, तीन हजार सात सौ चौहत्तर सरपंच, आठ सौ निन्यानवे जनपद सदस्य अउ एक सौ अड़तीस जिला पंचायत सदस्य के निर्वाचन बर मतदान होइस।
त्रिस्तरीय पंचायत चुनाव म तीसर अउ अंतिम चरण के मतदान तेईस फरवरी के होही।
रेखा गुप्ता-दिल्ली मुख्यमंत्री
भारतीय जनता पार्टी के विधायक रेखा गुप्ता ह आज दिल्ली के रामलीला मैदान म दिल्ली के मुख्यमंत्री के रूप म सपथ लीन। दिल्ली के उपराज्यपाल विनय कुमार सक्सेना ह ओमन ल पद अउ गोपनीयता के सपथ देवाइन। मुख्यमंत्री के संग छै कैबिनेट मंत्री-प्रवेश साहिब सिंह, आशीष सूद, मनजिंदर सिंह सिरसा, रवींद्र इंद्राज सिंह, कपिल मिश्रा अउ पंकज कुमार सिंह ह घलो सपथ लीन।
प्रधानमंत्री नरेंद्र मोदी, केंद्रीय गृह मंत्री अमित शाह, रक्षा मंत्री राजनाथ सिंह अउ कतकोन केंद्रीय मंत्री मन ए मउका म मौजूद रिहीन। कतकोन राज्य के मुख्यमंत्री अउ उपमुख्यमीं मन के घलो मौजूदगी रिहीस।
रेखा गुप्ता के मुख्यमंत्री पद के सपथ ले म छत्तीसगढ़ के मुख्यमंत्री विष्णुदेव साय ह ओमन ल बधई अउ सुभकामना दीन हे। ओमन किहीन कि प्रधानमंत्री नरेंद्र मोदी के मार्गदर्सन अउ उंखर अगुवई म दिल्ली म सरलग विकास होही।
राज्य जल मंत्री-सम्मेलन
केंद्रीय जल सक्ति मंत्री सी.आर.पाटिल ह छत्तीसगढ़ म जल संचयन बर जनभागीदारी ले करे जावत प्रयास के तारिफ करीन हे। ओमन राजस्थान के उदयपुर म होवत राज्य जल मंत्री मनके सम्मेलन म किहीन कि छत्तीसगढ़ जल संरचना के निर्माण म पूरा देस म अग्रणी स्थान म हे अउ जल संरक्षण के क्षेत्र म राज्य के नवाचार मॉडल दूसर राज्य मन बर अनुकरणीय हे। ओमन यहु घलो किहीन कि छत्तीसगढ़ म अभी तक दू लाख उनतीस हजार ले जादा जल संग्रहण संरचना के निर्माण करे जावत हे, जेखर ले जल संसाधन बाढ़त हे।
केंद्रीय जल सक्ति मंत्रा डहार ले छत्तीसगढ़ के तारिफ म मुख्यमंत्री विष्णुदेव साय ह किहीन कि राष्ट्रीय स्तर म प्रदेस के तारिफ होना गौरव के बात हे। छत्तीसगढ़ सरकार के नीति जल संरक्षण अउ सतत विकास उपर केंद्रित हे। राज्य सरकार प्राकृतिक संसाधन मनके संरक्षण अउ भावी पीढ़ि बर जल सुरक्षा निश्चित करे बर सरलग काम करत हे।
गैर-संक्रामक रोग स्क्रीनिंग अभियान
केंद्र सरकार ह आज ले एक ठन बिसेस गैर-संक्रामक रोग स्क्रीनिंग अभियान के सुरूआत करीन हे। जेखर उद्देस्य तीस बछर अउ ओखर ले जादा उमर के लोगन के स्क्रीनिंग करना हे। केंद्रीय स्वास्थ्य मंत्रालय ह केहे हे कि एखर उद्देस्य गैर-संक्रामक रोग जइसे मधुमेह, उच्च रक्तचाप अउ तीन सामान्य कैंसर- मुंह, स्तन अउ गर्भाशय ग्रीवा के कैंसर बर लोगन के स्क्रीनिंग करना हे। ए अभियान, आयुष्मान आरोग्य योजना म देसभर म आने-आने स्वास्थ्य केंद्र अउ मंदिर मन म, राष्ट्रीय गैर-संचारी रोग रोकथाम अउ नियंत्रण कारीकरम के अंतर्गत चलाय जाही। चालीस दिन तक चलइया अभियान म प्रशिक्षित आसा अउ फ्रंटलाइन कार्यकर्ता मन ह लोगन के घर जाके स्क्रीनिंग करही। ए अभियान के दउरान पारदर्सिता अउ जिम्मेदारी निश्चित करे बर फॉलोअप के डेटा हर दिन राष्ट्रीय पोर्टल म अपलोड करे जाही।
बस्तर वन आवरण-रिपोर्ट
इंडिया स्टेट ऑफ फॉरेस्ट रिपोर्ट ल देहरादून के फॉरेस्ट सर्वे ऑफ इंडिया डहार ले प्रकासित करे गेहे, जेमा बस्तर संभाग के कतकोन जघा म वन आवरण म वुध्दि बताय गेहे। छत्तीसगढ़ के प्रधान मुख्य वन संरक्षक अउ वन बल प्रमुख व्ही. श्रीनिवास राव ह आकाशवाणी समाचार ल बतइन कि ए रिपोर्ट म बताय गे हवय कि क्षेत्र म हरियाली ल बढ़ाय बर कतकोन उपाय बताय गे हवय।
माओवादी ग्रामीण-हत्या
बीजापुर जिला के बारसूर थाना क्षेत्र के तोड़मा गांव म माओवादी मन ह मुखबिरी के सक म एक झन शिक्षादूत अउ एक झन ग्रामीण के हत्या कर देहे। जिला के पुलिस अधीक्षक ह घटना के पुष्टि करत बतइन कि पाछू रतिहा माओवादी मन ह शिक्षादूत वामन कश्यप अउ ग्रामीण अनिशराम के घर पहुंचिन अउ ओमन ल अपन संग जंगल डहार लेगिन, जिहां दूनों के गला घोटके हत्या कर दीन।
ऑपरेशन साइबर शील्ड
रईपुर जिला म म्यूल बैंक अकाउंट बर फर्जी सिम कार्ड बेचइया तेरह झन पीओएस एजेंट ल पुलिस ह गिरफ्तार करे हे। उंखर मन तीर ले जब्त सात हजार ले जादा सिम कार्ड ल अपराध ले जुड़े पाय गेहे। उहें, पांच सौ नब्बे मोबाइल के पहिचान घलो करे गेहे। आरोप हवय कि इंखर मन डहार ले जारी करे गे सिम ल यूनाइटेड अरब अमीरात, श्रीलंका, नेपाल अउ म्यांमार म उपयोग करे जावत रिहीस हे, जेखर सबूत घलो मिले हे। ए मामला म अभी तक अंठानवे झन आरोपी मनके गिरफ्तारी होय हे।
दुर्घटना
रईपुर के विधानसभा क्षेत्र म आज मुंधरहा एक ठन तेज रफ्तार कार ह अंतेतंते होके खंभा ले टकरा गे। ए हादसा म कार म बइठे दू झन युवक मन के मउकाच म मउत होगे। ए दूनों युवक शंकर नगर इलाका म किराय के मकान म राहत रिहीन।
ओति, जशपुर जिला म गम्हरिया स्कूल के तीर आज बिहनिया ट्रक अउ पिकअप गाड़ी के टकराय ले होय दुर्घटना म दूनों गाड़ी के चालक मन ल गंभीर चोट आय हे। घायल मन ल जिला अस्पताल म भर्ती कराय गेहे।
देवेन्द्र यादव-जमानत
बलौदाबाजार हिंसा मामला म पाछू सत्रह अगस्त ले रईपुर जेल म बंद भिलाई विधायक देवेंद्र यादव ल सुप्रीम कोर्ट ले जमानत मिल गेहे। विधायक देवेंद्र यादव छै महिना ले जादा समय तक जेल म रिहिन।
खबर के मुताबिक पाछू बछर दस जून के बलौदाबाजार म सतनामी समाज के विरोध प्रदर्सन के दउरान कलेक्टर अउ एसपी कार्यालय म तोड़फोड़ अउ आगजनी करे गे रिहीस। ए मामला म भीड़ ल भड़काय, आंदोलनकारी मनके संग देके के आरोप म कांग्रेस विधायक देवेंद्र यादव उपर केस दर्ज करे गे रिहीस।
नारायणपुर-माता मावली मेला
नारायणपुर जिला के ओरछा म काली ले पांच दिन के माता मावली मेला सुरू होगे हे। मेला के सुरूआत माता मावली मंदिर म पारंपरिक पूजा- अर्चना अउ परघांव के परंपरा के संग होइस। ए दउरान तीर-तखार के गांव ले आय स्थानीय देवी-देवता के प्रतीक रूप डंगई, लाठ, डोली अउ छत्र के संग जुलूस निकाले गीस। मेला स्थल म पहुंच के ढाई परिक्रमा के रसम ल पूरा करे गीस, जेमा श्रध्दालू मन ह पारंपरिक रीति-रिवाज के संग पूजा-पाठ करीन। तेईस फरवरी तक चलइया ए मेला म हर दिन सांस्कृतिक कारीकरम के आयोजन करे गीस।
अबूझमाड़ पीस हाफ मैराथन
नारायणपुर जिला म दू मार्च के अबूझमाड़ पीस हाफ मैराथन के आयोजन करे जाही। ए मैराथन म पांच हजार ले जादा प्रतिभागी मन भाग लिही। एमा इक्कीस किलोमीटर, दस किलोमीटर अउ पांच किलोमीटर के श्रेणी म प्रतिभागी मन दौड़ लगाही। ए मैराथन के उद्देस्य स्थानीय प्रतिभा ल मंच देना, शारीरिक स्वास्थ्य ल बढ़ावा देना अउ क्षेत्र के प्राकृतिक सुंदरता के बारे म लोगन ल जानकारी देना हे।
अउ अब पेस हे मौसम के हाल…
मौसम विभाग ले मिले जानकारी के अनुसार काली बस्तर संभाग के एक-दू जघा म गरज-चमक के संग छींटा पड़ सकत हे। मौसम विज्ञानी एच.पी.चंद्रा ह बतइन कि अभी प्रदेस म अधिकतम अउ न्यूनतम तापमान म कोनो बिसेस बदलाव होय के संभावना नइ हे।
मानवाधिकार आयोग-दुर्ग
राष्ट्रीय कुष्ठ उन्मूलन कारीकरम म नई दिल्ली ले पहुंचे राष्ट्रीय मानवाधिकार आयोग के टीम ह आज दुरूग-भिलाई कुष्ठ प्रभावी क्षेत्र के दउरा करीन। ए दउरान टीम के सदस्य मन ह स्वास्थ्य विभाग अउ जिला प्रशासन के अधिकारी मन संग बइठका करीन अउ जिला म कुष्ठ उन्मूलन कारीकरम के बारे म जानकारी लीन। ए मउका म राष्ट्रीय मानवाधिकार आयोग के बिसेस सदस्य प्रदीप नायक ह किहीन कि कुष्ठ प्रभावित लइका, गर्भवती माईलोगिन मन संघरा दूसर वर्ग के प्रभावित लोगन ल केंद्र अउ राज्य सरकार के योजना के फायदा देवाय जाय।