नगरीय निकाय चुनाव-परिणाम-01
छत्तीसगढ़ म होय नगरीय निकाय चुनई म एक सौ तिहत्तर नगरीय निकाय म ले भारतीय जनता पार्टी ह एक सौ छब्बीस अउ कांग्रेस ह तीस म जीते हे। प्रदेस के जेन दस नगर पालिक निगम म चुनई होइस ओ सबो म महापौर पद उपर भारतीय जनता पार्टी के प्रत्यासी मन जीते हे। उहें, उनचास नगर पालिका म ले पैंतीस म भारतीय जनता पार्टी, आठ म कांग्रेस, एक म आम आदमी पार्टी अउ पांच म निर्दलीय प्रत्यासी मन ह अध्यक्ष चुने गेहे। उहें, एक सौ चौदा नगर पंचायत म ले इकयासी म भाजपा के अउ बाईस म कांग्रेस के प्रत्यासी मन अध्यक्ष बने हे। एखर अलावा एक नगर पंचायत म बहुजन समाज पार्टी अउ दस म निर्दलीय प्रत्यासी मन अध्यक्ष निर्वाचित होय हे।
बतादन कि ए दारी नगर पालिक निगम के महापौर, नगर पालिका परिषद अउ नगर पंचायत के अध्यक्ष के चुनई प्रत्यक्ष तरीका ले होय हे। फेर पाछू दारी अप्रत्यक्ष प्रणाली ले चुनई होय रिहीस। पिछला चुनई म जेन एक सौ इंक्यावन नगरीय निकाय म चुनई होय रिहीस, ओमा ले सौ निकाय म कांग्रेस अउ इकतालिस म भाजपा उम्मीदवार मन महापौर अउ अध्यक्ष चुने गे रिहीस। उहें, ग्यारा निकाय म आने उम्मीदवार मन जीते रिहीन।
नगरीय निकाय चुनाव-परिणाम-02
प्रदेस के जउन दस नगर निगम म चुनई होय हे, ओमा रईपुर नगर पालिक निगम म महापौर पद म भारतीय जनता पार्टी के मीनल चौबे ह कांग्रेस के दीप्ति दुबे ल एक लाख तिरपन हजार ले जादा वोट ले हराय हे। मीनल चौबे ल तीन लाख पदं्रह हजार आठ सौ पैंतीस अउ दीप्ति दुबे ल एक लाख बासठ हजार पांच सौ पैंतालिस वोट मिले हे। उहें, रईपुर के पिछला महापौर एजाज ढेबर ह अपन पार्षद पद के चुनई पंद्रह सौ ले जादा वोट ले हार गेहे।
कोरबा नगर पालिक निगम के महापौर पद बर भाजपा के संजू देवी राजपूत ह निर्वाचित होय हे।
जगदलपुर नगर पालिक निगम म भाजपा प्रत्यासी संजय पांडेय ह महापौर के रूप म जीत हे। ओमन कांग्रेस के मलकीत सिंह गैदू ल आठ हजार छै सौ ले जादा मत ले हराय हे।
बिलासपुर नगर पालिक निगम ले महापौर पद म भाजपा उम्मीदवार पूजा विधानी ह जीते हे। ओमन कांग्रेस प्रत्यासी प्रमोद नायक ल हरइन हे।
रायगढ़ नगर निगम म भाजपा के जीवर्धन चौहान ह महापौर चुने गेहे। ओमन कांग्रेस के जानकी काटजू ल हराय हे।
उहें, राजनांदगांव नगर पालिक निगम म भाजपा उम्मीदवार मधुसूदन यादव ह कांग्रेस प्रत्यासी निखिल द्विवेदी ल हराके महापौर पद के चुनई जीते हे।
अंबिकापुर नगर पालिक निगम के महापौर पद म भाजपा उम्मीदवार मंजूषा भगत ह कांग्रेस के अजय तिर्की ल हराइन हे।
नगरीय निकाय चुनाव-परिणाम-03
एखरे जइसन, दुरूग नगर पालिक निगम म भाजपा के अलका बाघमार ह कांग्रेस के प्रेमलता पोषण साहू ल हराके महापौर पद म जीते हे।
उहें, चिरमिरी नगर पालिक निगम म भाजपा के रामनरेश राय ह कांग्रेस के विनय जायसवाल ल हराइन हे।
ऐति, धमतरी नगर पालिक निगम म भाजपा के रामू रोहरा ह अड़तीस हजार ले जादा वोट ले महापौर चुने गीस। इंहा कांग्रेस के प्रत्यासी के नामांकन रद्द होय के बाद आठ झन निर्दलीय उम्मीदवार मन चुनई मतदान म रिहीन।
निकाय चुनाव प्रतिक्रिया-01
मुख्यमंत्री विष्णुदेव साय ह प्रदेस म होय नगरीय निकाय चुनई म भारतीय जनता पार्टी ल मिले जीत का ऐतिहासिक सफलता बताय हे। श्री साय ह आज रईपुर म पत्रकारवार्ता म गोठियात हुए किहीन कि नगरीय निकाय चुनई म प्रदेस के मतदाता मन ह भाजपा उपर बिस्वास करे हे। एखर बर ओमन प्रदेस के जनता अउ मतदाता मन के आभार जतइन हे। श्री साय ह किहीन कि सरकार के मंत्री विधायक, जनप्रतिनिधि अउ भाजपा कार्यकर्ता मन ह अब्बड़ मेहनत करे हे, जेखर नतीजा हे कि भाजपा ल ए ऐतिहासिक दिन देखे बर मिलिस हे। पार्टी के अटल विस्वास पत्र उपर प्रदेस के जनता ह भरोसा जताइस हे, एखर बाद अब एमा करे गे सब्बो वादा ल पूरा करे जाही। मुख्यमंत्री ह किहीन हे कि भारतीय जनता पार्टी ह सब्बो दस नगर पालिका निगम के संगेसंग तैंतीस नगर पालिका परिषद अउ चौरासी नगर पंचायत म घलो जीते हे। ओमन किहीन कि कांग्रेस के पाछू सरकार ह महापौर अउ अध्यक्ष पद के चुनई ल अप्रत्यक्ष कर दे रिहीस, जेला हमर सरकार ह प्रत्यक्ष तरीका ले करा के प्रदेस म लोकतंत्र ल लहुटाय हे।
उहें, केंद्रीय राज्यमंत्री तोखन साहू ह किहीन हे कि नगरीय निकाय चुनाव म पूरा प्रदेस के जनता के आसिस भारतीय जनता पार्टी ल मिले हे। सबो दस नगर पालिक निगम समेत नगर पालिक परिषद अउ नगर पंचायत मन म भाजपा के प्रत्यासी मन अब्बड़ अकन वोट ले जीत के आय हे। ओमन ए जीत के श्रेय प्रदेस के विष्णुदेव साय सरकार के सुशासन, मोदी के गारंटी अउ पार्टी कार्यकर्ता मन के मेहनत ल दीन हे।
निकाय चुनाव प्रतिक्रिया-02
दूसर कोति, कांग्रेस के मीडिया प्रभारी सुशील कुमार आनंद शुक्ला ह चुनई परिणाम उपर अपन प्रतिक्रिया देत हुए किहीन कि कांग्रेस, जनता के निर्णय ल स्वीकार करत हे। ओमन किहीन कि कांग्रेस ह ए पूरा चुनई ल सकारात्मक तरीका ले लड़िस अउ जनता के मुद्दा ल उठाइस।
दुर्घटना
उत्तरप्रदेस के मिर्जापुर-प्रयागराज हाईवे म पाछू रतिहा एक हादसा म छत्तीसगढ़ के दस मनखे के मउत होगे। उहें, उन्नीस झन घायल हे। मिले जानकारी अनुसार कोरबा जिला ले एमन चारचक्का गाड़ी म प्रयागराज महाकुंभ जावत रिहीन। मिर्जापुर-प्रयागराज हाईवे म एमन के गाड़ी अउ एक ठिन बस के आमने-सामने के टक्कर होगे, अउ छोटे गाड़ी म बइठे दस झन के मउका म ही मउत होगे। फेर बस म सवार उन्नीस झन घायल होगे हे, जेमन ल मलहम पट्टी बर रामनगर के सामुदायिक स्वास्थ्य केंद्र म भर्ती कराय गेहे। घायल सबो झन मध्यप्रदेस के राजगढ़ जिला के रहइया हे।
मुख्यमंत्री विष्णुदेव साय ह ए हादसा म दुख जतइन हे, अउ कोरबा जिला प्रशासन ल स्थानीय प्रशासन ले समन्वय बइठा के जरूरी बेवस्था करे के निरदेस दीन हे।
माओवादी-आत्मसमर्पण
दंतेवाड़ा जिला म दू महिला माओवादी समेत तीन इनामी माओवादी मन पुलिस के आगू आत्मसमर्पण करे हे। ए तीनो माओवादी मन उपर एक-एक लाख रूपिया के इनाम रिहीस। एमन उपर आने-आने माओवादी घटना म सामिल रहे के आरोप हे। आत्मसमर्पित माओवादी मन ल राज्य सरकार के पुनर्वास नीति म पच्चीस-पच्चीस हजार रूपिया के सहायता रासि समेत अउ आने सुविधा दे जाही।
एसीबी-कार्रवाही
एंटी करप्सन ब्यूरो माने एसीबी ह काली दू आने-आने कार्रवाई करत हुए दू सरकारी करमचारी मन ल घुस लेत हुए रंगेहाथ पकड़े हे। एसीबी के टीम ह सूरजपुर के जिला शिक्षा अधिकारी ल एक लाख रूपिया लेवत हुए पकड़िस अउ कोर्ट म प्रस्तुत करीस, जिहां ले ओला जेल भेज दे गेहे।
उहें, खरसिया म वन विभाग के एक रेंजर ल पंद्रह हजार रूपिया लेवत हुए एसीबी के टीम ह पकड़िस हे।