केंद्रीय खाद्य अउ सार्वजनिक वितरण तथा उपभोक्ता मामला के मंत्री प्रहलाद जोशी अपन एक दिवसीय छत्तीसगढ़ प्रवास के दउरान आज रईपुर पहुंचिन। रईपुर म एक ठिन पत्रकारवार्ता ल संबोधित करत ओमन ह केंद्रीय बजट म बारह लाख रूपिया तक इनकम टैक्स म छूट ले छत्तीसगढ़ के लोगन ल घलो लाभ मिले के बात किहीन।
श्री जोशी ह किहीन कि अनुसूचित जाति अउ अनुसूचित जनजाति के माईलोगिन मन बर केंद्रीय बजट म दू करोड़ रूपिया के टर्मलोन देके संग कौशल विकास योजना ले प्रदेस के दस लाख युवा मन ल रोजगार मिले के संभावना हे। ओमन किहीन कि छत्तीसगढ़ म सौ प्रतिसत विद्युतीकरण के काम पूरा हो गेहे अउ वर्तमान म छत्तीसगढ़ म रेलवे के कतकोन परियोजना चलत हे। एक ठिन सवाल के जवाब म श्री जोशी ह किहीन कि छत्तीसगढ़ ल जेन संसाधन के जरूरत होही, ओला केंद्र सरकार डहार ले पूरा करे के कोसिस करे जाही। पत्रकारवार्ता म उपमुख्यमंत्री अरूण साव अउ खाद्य मंत्री दयालदास बघेल घलो उपस्थित रिहीन।
एखर बाद केंद्रीय मंत्री श्री जोशी ह रईपुर म बुध्दिजीवी सम्मेलन ल घलो संबोधित करीन। ए दउरान ओमन ह केंद्रीय बजट के बारे म लोगन ल जानकारी दीन।
नगरीय निकाय चुनाव-मतदान प्रतिशत
राज्य निर्वाचन आयुक्त अजय सिंह ह सांतिपूर्ण मतदान बर लोगन के आभार जतात बतइन कि प्रदेस के दस नगर निगम, उनचास नगर पालिका परिषद अउ एक सौ चौदह नगर पंचायत संग एक सौ तिहत्तर निकाय मन म काली होय मतदान म बहत्तर दसमलव चार -आठ प्रतिसत मतदान दरज करे गेहे। सबले जादा चौरासी दसमलव नौ-सात प्रतिसत मतदान कोरिया जिला म दरज करे गीस। उहें, सबले कम मतदान इंक्यावन दसमलव तीन-सात प्रतिसत बिलासपुर जिला म होइस। निकाय चुनाव म ए बखत तिहत्तर दसमलव सून्य-चार प्रतिसत पुरूष मतदाता अउ इकहत्तर दसमलव छै-छै प्रतिसत महिला मतदाता मन ह अपन मताधिकार के परयोग करीन। उहें, तीसरा लिंग समुदाय के उन्नीस दसमलव सात-पांच मतदाता मन ह वोट डालिन।
नगरीय निकाय चुनाव म उनयासी महापौर प्रत्यासी संग दस हजार एक सौ दस प्रत्यासी मन के भाग्य इलेक्ट्रानिक वोटिंग मसीन-ईव्हीएम म कैद हो गेहे। ए चुनाव म छै सौ चार प्रत्यासी अध्यक्ष पद बर अउ नौ हजार चार सौ सत्ताईस प्रत्यासी पार्षद पद बर चुनाव लड़त हे। एखर संगेसंग तीन वार्ड मन म होय उपचुनाव म छै प्रत्यासी मनके भाग्य घलो ईव्हीएम म कैद हो गीस। मतगणना पंद्रह फरवरी के होही अउ इही दिन परिणाम जारी करे जाही।
बछर दू हजार उन्नीस म होय पाछू नगरीय निकाय चुनाव के मुकाबला म ए बखत पांच दसमलव दू प्रतिसत मतदान जादा होय हे। पाछू चुनाव म सड़सठ दसमलव तीन-पांच प्रतिसत मतदान दर्ज करे गे रिहीस।
राजिम कुंभ कल्प मेला
माघी पुन्नी के अवसर म आज ले महानदी, पैरी अउ सोंढूर नदी के त्रिवेणी संगम म राजिम कुंभ कल्प मेला के आयोजन करे जात हे। आज बिहनिया त्रिवेणी संगम म कतकोन श्रध्दालु मन ह आस्था के डूबकी लगइन। राज्यपाल रमेन डेका ह आज संझा राजिम कुंभ कल्प मेला के आज सुभारंभ करही। उद्घाटन कारीकरम म पार्श्व गायिका मैथिली ठाकुर बिसेस प्रस्तुति दीही। ए बखत देसभर ले संत महापुरूष राजिम कुंभ कल्प म आही। राजिम कुंभ कल्प मेला महाशिवरात्रि छब्बीस फरवरी तक चलही।
मेला के सांतिपूर्ण आयोजन अउ धार्मिक महौल बनाय राखे बर जिला प्रशासन ह राजिम ले लगे जिला अउ तीर-तखार के सराब दुकान ल पंद्रह दिन बर बंद राखे के आदेस जारी करे हे।
उहें, जांजगीर-चांपा म घलो आज ले शिवरीनारायण मेला के सुरूआत होगे हे। आज बिहनिया श्रध्दालु मन ह महानदी के त्रिवेणी संगम म स्नान करके भगवान नर-नारायण के दर्सन करीन। उहें, साधु संत मन ह राजेश्री महंत रामसुंदर दास के संग महानदी म शाही स्नान करीन।
ऐति, खैरागढ़-छुईखदान-गंडई जिला के गंडई स्थित म नर्मदा मंदिर म चार दिवसीय नर्मदा महोत्सव के सुरूआत हो गेहे। इंहा माघी पुन्नी के मउका म हर बछर मेला लगथे अउ एखर पौराणिक मान्यता दूरिहा-दूरिहा तक बगरे हे।
राष्ट्रीय खेल
उत्तराखंड म चलत राष्ट्रीय खेल म आज शूटिंग म छत्तीसगढ़ के परमपाल ह रजत पदक जीते हे।
एखर पहिली, काली छत्तीसगढ़ महिला मलखंभ टीम ह कांस्य पदक जीते रिहीन। ए टीम म नारायणपुर जिला के संताय पोटाई, मोनिका पोटाई, दुर्गेश्वरी कुमेटी, अनिता गोटा, सरिता पोयम अउ जांजगीर-चांपा जिला ले शिक्षा दिनकर सामिल हे। अड़तीसवां राष्ट्रीय खेल म छत्तीसगढ़ ह अब तक पांच स्वर्ण, तीन रजत अउ नौ कांस्य संग कुल सत्रह पदक पाय हे।
विंटर स्कूल प्रशिक्षण-समापन
रईपुर के राष्ट्रीय जैविक स्ट्रैस प्रबंधन संस्थान-आईसीएआर म इक्कीसवां दिवसीय विंटर स्कूल प्रसिक्षण के समापन होगे हे। ए प्रसिक्षण कारीकरम म आने-आने राज्य के कृषि विश्वविद्यालय के विद्यार्थी आईसीएआर के सहायक प्रोफेसर अउ वैज्ञानिक मन ह भाग लीन। कारीकरम के उद्देस्य नैनो-प्रौद्योगिकीय म ज्ञान म बढ़ोत्तरी करना रिहीस। एमा पउधा संरक्षण अउ संधारणीय प्रथा उपर बिसेस धियान दे गीस। समापन कारीकरम म मुख्य अतिथि के रूप म भारतीय कृषि वैज्ञानिक चयन मंडल के पूर्व सदस्य अउ आईसीएआर के सहायक महानिदेसक डॉक्टर पी.के. चक्रवर्ती सामिल होइन। ओमन ह फसल के पैदावार म सुधार अउ रोग के प्रकोप ल कम करे म प्रौद्योगिकीय मनके भूमिका के संगेसंग कृषि निर्यात ल बढ़ाय अउ जैव सुरक्ष उपाय ल मजबूत करे उपर जोर दीन।
विश्व रेडियो दिवस-कार्यक्रम
विश्व रेडियो दिवस के मउका म ओल्ड लिसनर्स गु्रप डहार ले रईपुर के वृंदावन हॉल म बिहनिया दस बजे ले मंझनिया दू बजे तक कारीकरम राखे गेहे। ए मउका म मुख्य अतिथि के रूप म आकाशवाणी रईपुर के सहायक निदेशक श्री पंकज मेश्राम अउ विशिष्ट अतिथि आकाशवाणी के पूर्व डायरेक्टर श्री लखनलाल भौर्य सामिल होही।
विशेष कार्यक्रम
विश्व रेडियो दिवस म प्रादेशिक समाचार एकांश रईपुर डहार ले प्रस्तुत बिसेस कारीकरम के प्रसारण काली तेरह फरवरी के बिहनिया नौ बजे ले नौ बजके पंद्रह मिनट तक करे जाही। ए कारीकरम के प्रसारण छत्तीसगढ़ के सबो आकाशवाणी केंद्र एके संघरा करही।
एजाज ढेबर-पूछताछ
सराब घोटाला के मामला म आज पूर्व महापौर एजाज ढेबर ले आर्थिक अपराध अन्वेसन ब्यूरो-ईओडब्ल्यू ह पूछताछ करीन। खबर के मुताबिक एजाज ढेबर के बड़े भाई अख्तर ढेबर अउ कुछेक रिस्तेदार मन ल घलो ए मामला म पूछताछ बर बुलाय गे रिहीस। ए मामला म अनवर ढेबर पहिली ले ही जेल म बंद हे।
अरूणपति त्रिपाठी-जमानत
सराब घोटाला अउ मनी लॉन्ड्रिंग मामला म जेल म बंद अरूणपति त्रिपाठी ल सुप्रीम कोर्ट ले जमानत मिल गेहे। फेर अभी घलो जेल ले बाहिर नइ निकल पाही। खबर के मुताबिक पूर्व के कांग्रेस सरकार के कार्यकाल म आबकारी विभाग के एमडी रिहीन, अरूणपति त्रिपाठी उपर दू हजार करोड़ रूपिया के जादा के सराब घोटाला अउ मनी लॉन्ड्रिंग के आरोप हे।
अउ अब पेस हे मौसम के हाल….
मौसम विभाग डहार ले अवइया दू दिन म उत्तर ले आने वाला ठंडा हवा के असर ले न्यूनतम तापमान म करीबन तीन डिग्री सेल्सियस तक के गिरावट हो सकत हे। मौसम विज्ञानी एच.पी.चंद्रा ह आकाशवाणी समाचार ल बतइन कि पश्चिमी विक्षोभ के प्रभाव कम होय ले एक बार फेर प्रदेस के कुछेक जघा मन म ठंड होही।
अउ अब थोरकुन समाचार सार म –
– कांकेर जिला के पखांजूर थाना क्षेत्र के माटोली चौक म तेज रफ्तार ट्रक ह मोटरसाइकिल सवार पिता-पुत्री ल टक्कर मार दीस। ए हादसा म पुत्री के मउत होगे। उहें, पिता ल गंभीर चोट आय हे।
अउ
– राजधानी रईपुर के वीआईपी रोड स्थित बेबीलॉन टॉवर के सातवां मंजिल ले कुदके एक झिन युवक ह आत्म हत्या कर लेहे।