नगरीय निकाय चुनाव-01
संझा चार बजे तक प्रदेसभर म अड़सठ प्रतिसत ले जादा मतदान दर्ज होय हे।
मतदान के समय बिहनिया आठ बजे ले संझा पांच बजे तक निर्धारित रिहीन। मतदान ल लेके बिहनिया ले ही मतदाता मन म बड़ खुसी देखे गेहे अउ पोलिंग बूथ के बाहिर मतदाता मन के लंबा लाइन देखे गेहे। उहें, कई ठन मतदान केंद्र मन म ईव्हीएम मसीन मन के खराब होय के सेति लोगन मन ल घंटो लाइन म खड़े होय बर पड़िस। फेर कई जघा मतदान केंद्र मन म मतदाता मन ल भटकना पड़िस। रायपुर के रविशंकर शुक्ल वार्ड म नौ सौ लोगन मनके नांव मतदाता सूची म नइ होय ल मतदाता मन ह हंगामा करीन।
रायपुर, बिलासपुर, कोरबा, रायगढ़, अंबिकापुर, चिरमिरी, धमतररी,दुर्ग, राजनांदगांव अउ जगदलपुर नगर निगम म उनयासी प्रत्यासी महापौर पद बर अउ पांच सौ बयालीस वार्ड बर एक हजार आठ सौ चौंसठ प्रत्यासी पार्षद पद के चुनाव लड़त हे। रायपुर नगर निगम म सबले जादा सोलह प्रत्यासी महापौर पद बर चुनाव मैदान म हवय। फेर, सबले कमती दू प्रत्यासी दुरूग नगर पालिक निगम म हे।
नगरीय निकाय चुनाव-02
राज्य निर्वाचन आयुक्त अजय सिंह ह अपन परिवार के संग रायपुर के मठपुरैना स्थित प्राथमिक शाला म बनाय गे केंद्र म मतदान करीन। उहें, मुख्य सचिव अमिताभ जैन ह सपरिवार देवेन्द्र नगर स्थित मतदान केंद्र म अपन मताधिकार के परयोग करीन।
रायपुर नगर निगम के भाजपा के महापौर प्रत्यासी मीनल चौबे ह चंगोराभाटा स्कूल पानी टंकी के तीर केंद्र म मतदान करीन। उहें, कांग्रेस के महापौर प्रत्यासी दीप्ति प्रमोद दुबे ह आनंद समाज वाचनालय स्थित मतदान केंद्र म अपन वोट डालिन।
ओति, बस्तर रेंज के पुलिस महानिरीक्षक सुंदरराज पी. ह जगदलपुर के शहीद भगत सिंह उच्चतर माध्यमिक विद्यालय म बनाय गे मतदान केंद्र म पहुंचके मतदान करीन।
मतदान-उत्साह
नगरीय निकाय चुनाव के तहत आज होय मतदान के दउरान मतदाता मन बर पोलिंग बूथ मन म जरूरी सुविधा मुहैया कराय गीस। ए दउरान सियान मन बर व्हीलचेयर, रैम्प अउ पिये के पानी के बेवस्था करे गे रिहीस।
धमतरी जिला म स्काडट-गाईड अउ रेडक्रॉस के वॉलिंटियर्स ह मतदाता मित्र बनके सियान अउ दिव्यांगजन मन ल मतदान केंद्र तक ले जाय म उंखर मदद करीन। सुभाष नगर वार्ड निवासी बुजुर्ग दंपत्ति इतवारी राम देवांगन अउ अनुसूईया देवांगन घलो लोकतंत्र के महापरब के हिस्सा बनिन।
उहें, महासमुंद के वार्ड क्रमांक-सत्ताईस के दिव्यांग मतदाता उषा बाई कन्नौजे ह मतदान कर जागरूकता के संदेस दीन।
रायपुर के बूढ़ापारा स्थित शासकीय माधवराव सप्रे विद्यालय मतदान केंद्र म चौरासी बछर के नरेंद्र कुमार जैन ह अपन मताधिकार के परयोग करीन। ए दउरान ओमन मतदान केंद्र म करे गे बेवस्था के बड़ई करीन।
उहें, कांकेर के जवाहर वार्ड के सियान मतदाता कुंवर बाई धु्रव व्हीलचेयर म बइठके मतदान केंद्र पहुंचिन अउ वोट डारिन।
जेपी नड्डा-स्वास्थ्य सुधार कार्यक्रम
केंद्रीय स्वास्थ्य मंत्री जगत प्रकाश नड्डा ह संसद म बतइन हे कि छत्तीसगढ़ के आदिवासी बहुल क्षेत्र-बीजापुर, कांंटा, नारायणपुर, बस्तर अउ दंतेवाड़ा म स्वास्थ्य संकेतक मन म सुघ्घर सुधार होय हे। ए क्षेत्र मन म केंद्र अउ राज्य सरकार के मदद ले मातृ-शिशु स्वास्थ्य सुधार कारीकरम के सेति ए संभव हो पाय हे। ओमन किहीन कि स्वास्थ्य मंत्रालय डहार ले अपनाय गे बहुत अकन रणनीति मन ले ए सुधार ल गति मिले हे, अउ ए प्रयास ल स्थाई बनाय बर स्वास्थ्य सेवा मन के गुणवत्ता म सरलग सुधार करे जाही।
मुख्यमंत्री विष्णुदेव साय ह ए उपलब्धि ल केंद्र अउ राज्य सरकार के मदद के प्रमाण बतइन। ओमन किहीन कि सरकार ह न सिरिफ स्वास्थ्य सेवा मन ल सुघ्घर बनाय हे, बल्कि आदिवासी इलाका मन म स्वास्थ्य सुविधा मन ल सुदृढ़ अउ सरल बनाय बर घलो कड़ा कदम उठाय हे।
राजिम कुंभ कल्प-मेला
गरियाबंद जिला के राजिम म काली बारह फरवरी ले कुंभ कल्प मेला के आयोजन करे जाही। कुंभ के सुभारंभ कारीकरम म राज्यपाल रमेन डेका मुख्य अतिथि के रूप म सामिल होही। पैरी, महानदी अउ सोंढूर नदी के त्रिवेणी संगम म आयोजित होवइया कुंभ कल्प मेला ल लेके प्रशासन ह सबो तियारी ल लगभग पूरा कर लेहे। कुंभ कल्प मेला के तहत काली माघी पुन्नी स्नान होही। उहें, इक्कीस फरवरी के संत समागम अउ छब्बीस फरवरी के शाही स्नान करे जाही। राजिम कुंभ कल्प मेला महाशिवरात्रि छब्बीस फरवरी तक चलही।
महाकुंभ-माघी पूर्णिमा
प्रयागराज महाकुंभ म काली माघी पुन्नी म अमृत स्नान करे जाही। ए दिन स्नान के बिसेस महत्व हे, काबर कि ए कल्पवास करइया मन के बिसेस अनुष्ठान के समापन घलो हवय। ए बेरा के दउरान कल्पवासी संगम के घाट के तीर अस्थायी आवास म रहिथे। ए बछर महाकुंभ म दस लाख ले जादा लोगन ह कल्पवास करीन हे।
माघी पून्नी दिन ल धियान म राखत महाकुंभ जघा म यातायात ल रोके बर बिसेस बेवस्था करे गेहे। श्रध्दालु मन के सुविधा बर मेला क्षेत्र अउ शहर म ‘‘नो व्हीकल जोन‘‘ लागू करे गेहे। उहें, आज ले मेला क्षेत्र म गाड़ी मनके अवई-जवई म रोक लगा दे गेहे। संगेसंग बाहरी गाड़ी मन बर निर्धारित पार्किंग के बेवस्था करे गेहे।
महाकुंभ-स्पेशल ट्रेन
महाकुंभ के दउरान प्रयागराज अवइया यात्री मन ल जादा सुविधा प्रदान करे बर रेलवे डहार ले तीन हजार स्पेसल ट्रेन समेत तेरह हजार ले जादा ट्रेन चलाय जावत हे। इही कड़ी म पांच महाकुंभ स्पेसल ट्रेन ल परिचालन दक्षिण पूर्व मध्य रेलवे के गोंदिया, बालाघाट अउ नैनपुर स्टेसन ले करे जावत हे। उहें, दक्षिण पूर्व मध्य रेलवे डहार ले संतानवे फेरा बर स्पेसल ट्रेन चलाय जावत हे, जेमा ले अब तक उनसठ फेरा चल गेहे। ए स्पेसल ट्रेन मन ले कुंभ मेला जवइया रेल यात्री मन ल कन्फर्म सीट के सुविधा मिल सकही।
रायपुर-डकैती
मतदान के दउरान आज रायपुर स्थित अनुपम नगर के खम्हारडीह थाना क्षेत्र म दिनदहाड़े पचास लाख रूपिया के डकैती के मामला आगू आय हे। डकैत मिलिट्री ड्रेस पहिनके एक ठिन घर म घुसर के परिवार के सदस्य मन ल बंधक बनाके पचास लाख रूपिया लूटके भगा गे। ए घटना ले इलाका म हड़कंप मच गेहे। घटना के सूचना मिलतेच पुलिस के बड़का अधिकारी मउका म पहुंचिन अउ घटना के जानकारी लीन। पुलिस ह सहर म नाकेबंदी कर आरोपी मन के खोजबीन सुरू कर देहे।
आईईडी विस्फोट-जवान घायल
दंतेवाड़ा जिला के अरनपुर क्षेत्र म स्थित कमलपोस्ट के तीर म आज माओवादी डहार लगाय गे आईईडी के चपेट म आय ले केंद्रीय रिजर्व पुलिस बल-सीआरपीएफ के एक झिन जवान गंभीर रूप ले घायल हो गेहे। जिला के अतिरिक्त पुलिस अधीक्षक आर. के बर्मन ह बतइन कि घायल जवान मन ल सुघ्घर इलाज बर रायपुर लाय गेहे।