भारतीय जनता पार्टी ह सत्ताईस साल के बाद दिल्ली म सरकार बनाही। ओमन आम आदमी पार्टी ल हराके करीबन दू तिहाई बहुमत पा लेहे। सत्तर ठिन वाले दिल्ली विधानसभा चुनई परिणाम म अब तक साठ विधानसभा के नतीजा घोषित होगे हे। भाजपा ह चालीस ठिन सीट जीतके बहुमत म आ गेहे।
नगरीय निकाय चुनाव-प्रचार
प्रदेस म होवइया नगरीय निकाय चुनाव के तहत काली संझा पांच बजे प्रचार अभियान रूक जही। एखर पहिली, आज जम्मों प्रमुख दल के संगेसंग निर्दलीय प्रत्याशी मन ह जोरदरहा चुनाव प्रचार करीन।
मुख्यमंत्री विष्णुदेव साय ह राजधानी रईपुर अउ जगदलपुर म भाजपा प्रत्याशी मनके पक्ष म रोड शो करीन। ओमन रायपुर नगर निगम के महापौर प्रत्याशी मीनल चौबे अउ पार्षद प्रत्यासी मनके पक्ष म प्रचार करीन।
दूसर कोति, पूर्व मुख्यमंत्री भूपेश बघेल ह दुरूग जिला के अमलेश्वर नगर पालिका म अध्यक्ष अउ पार्षद प्रत्याशी मनके पक्ष म रोड शो करीन।
भाजपा-आरोप पत्र
भारतीय जनता पार्टी ह रायपुर नगर निगम म कांग्रेस के पाछु पन्द्रह साल के कामकाज ल लेके आरोप पत्र जारी करे हे। आज रईपुर स्थित प्रदेस भाजपा कार्यालय म राखे गे एक ठिन पत्रकारवार्ता म पार्टी के प्रदेस महामंत्री संजय श्रीवास्तव ह पन्द्रह ठिन बिन्दु उपर आरोप पत्र जारी करत किहीन कि कांग्रेस ह पाछु पन्द्रह साल के कामकाज म भ्रष्टाचार के नवा कीर्तिमान बनाय हे। ओमन किहीन कि सहर म पार्किंग अउ यातायात व्यवस्था गड़बड़ा गेहे। साफ-सफाई ल लेके घलो कांग्रेस उपर आरोप लगाय गीस।
मतदाता जागरूकता
नगरीय निकाय अउ त्रिस्तरीय पंचायत चुनई के तहत मतदाता मन ल वोट डारे बर जागरूक करे के उद्देश्य ले प्रदेस म कतकोन कारीकरम चलत हे। इही कड़ी म ‘‘जागव वोटर‘‘ अभियान के तहत काली रईपुर के माना कैम्प स्थित वृद्धाश्रम ले मतदाता जागरूकता रैली निकाले गीस। समाज कल्याण विभाग के संचालक रोक्तिमा यादव अउ जिला पंचायत के सीईओ विश्वदीप ह हरा झंडी दिखाके रवाना करीन। रैली म स्लोगन, गीत अउ पोस्ट के माध्यम ले लोगन मन ल सत-प्रतिसत वोट डारे बर केहे गीस। रैली म करीबन छह सौ दिव्यांग, सियान अउ तृतीय लिंग समुदाय के सदस्य सामिल होइन।
मतदान-अवकाश
राज्य शासन ह नगरीय निकाय अउ त्रिस्तरीय पंचायत चुनई के तहत प्रदेस म आने-आने तारीख मन म कर्मचारी मन बर छुट्टी के घोसना करे हे। सामान्य विभाग डहार ले जारी आदेश के मुताबिक ग्यारह, सत्रह, बीस अउ तेईस फरवरी के होवइया निर्वाचन क्षेत्र मन म कर्मचारी मन बर छुट्टी रइही। त उहें, अइसन कारखाना जेमा हफ्ता म पूरा दिन काम होथे, उहां पहिली अउ दूसर पाली म मजूर मन ल वोट डारे बर दो-दो घंटा के छुट्टी दे जाही।
सरपंच प्रत्याशी-निधन
कोरबा जिला के ग्राम पंचायत धतूरा के सरपंच प्रत्याशी बुधवार सिंह के हार्टअटैक ले निधन होगे। जानबा के मुताबिक इंखर मनके चुनाव प्रचार के दउरान हुरहा तबीयत खराब होगे, जेखर बाद एमन ल तुरते जिला मेडिकल कॉलेज ले जाय गीस, जिहां उंखर मनके मउत होगे।
जहरीली शराब-मौत
बिलासपुर जिला म जहरीला सराब पीये ले सात झिन लोगन के मउत होगे। त उहें, बीस झन ले जादा लोगन मन बीमार होगे हे, जेमा ले चार झिन के हालत गंभीर बताय जात हे। जम्मों बीमार लोगन मन ल सिम्स अस्पताल म भर्ती कराय गेहे।
मिले जानबा के मुताबिक कोनी थाना क्षेत्र के गांव लोफन्दी म दू दिन पहिली महुआ सराब पीये ले तीन झिन लोगन के मउत होय रिहीस, जेखर बाद पाछु रतिहा चार झिन अउ लोगन के मउत होगे। घटना के जानबा मिलतेच पुलिस अउ जिला प्रशासन के टीम ह मउका म पहुंचीन अउ जांच म जुट गेहे। जम्मों मृतक मनके सव ल पोस्टमार्टम कराय गीस। पुलिस अधिकारी मनके कहना हे कि पोस्टमार्टम के रिपोर्ट आय के बाद मउत के सही कारण के पता चलही।
ओति, गांव के लोगन मनके कहना हे कि चुनई के दउरान सराब बांटे गीस, जेला पीये के बाद लोगन मनके तबीयत ह बिगड़े लागीस।
ऐति, कांग्रेस ह ए घटना के जांच बर विधायक दिलीप लहरिया के अगुवई म छह सदस्सीय जांच समिति बनाय हे। पार्टी ह जहरीला सराब ले मउत बर भाजपा सरकार ल जिम्मेदार ठहराय हे।
परीक्षा पे चर्चा
‘‘परीक्षा पे चर्चा‘‘ कार्यक्रम के आठवां संस्करण नई दिल्ली के भारत मंडपम म दस फरवरी के बिहनिया ग्यारह बजे ले सुरू होही। ए दउरान प्रधानमंत्री नरेन्द्र मोदी ह पढ़ईया छात्र, पालक अउ सिक्षक मनके संग गोठबात करही अउ संगेसंग परीक्षा के तियारी, एखन ले जुड़े तनाव अउ खुद के विकास उपर मार्गदर्शन दीहीं। परीक्षा पे चर्चा कार्यक्रम ए बार खेल अउ अनुशासन, मानसिक स्वास्थ्य, पोषण, प्रौद्योगिकी अउ वित्त जइसन कहानी उपर केन्द्रित रइही।
इस्पात नगरी भिलाई म परीक्षा पे चर्चा कार्यक्रम ल देखत इहां के प्राईवेट स्कूल मन ल कतकोन कारीकरम करे जाही। भिलाई स्थित शंकराचार्य स्कूल के छात्र मन ह कार्यक्रम म सामिल होही। स्कूल के प्राचार्य विपिन देशमुख ह आकाशवाणी समाचार ल बतईन कि लइका मन म परीक्षा के तनाव ल दूरिहा भगाय के बढ़िया प्रयास हरय।
परीक्षा पे चर्चा कार्यक्रम बर एसो हरेक राज्य अउ केन्द्रसासित प्रदेस ले छत्तीस झिन छात्र मन ल चुने गेहे। ए छात्र सरकारी स्कूल, केन्द्रीय विद्यालय, सैनिक स्कूल, एकलव्य मॉडल आवासीय विद्यालय, सीबीएसई अउ नवोदय विद्यालय जइसन स्कूल ले हवय। जेमा ले कोनों-कोनों छात्र मन प्रेरणा स्कूल कार्यक्रम के पूर्व छात्र, कला उत्सव अउ वीर गाथा के विजेता हरय। ए छात्र मन सोझे प्रधानमंत्री ले जुड़े बर चुने गेहे। ए कार्यक्रम बर तीन करोड़ छह लाख छात्र, सिक्षक अउ पालक मन रजिस्ट्रेशन कराय हे। ए कार्यक्रम म कक्षा छठवीं ले बारहवीं तक के छात्र मन भाग ले सकथे।
केन्द्रीय मंत्रिमंडल-निर्णय
केन्द्र सरकार ह सफाई कर्मचारी मनके राष्ट्रीय आयोग के कार्यकाल ल इकतीस मार्च दू हजार अट्ठाईस तक बढ़ाय के मंजूरी दे देहे। काली नई दिल्ली म मंत्रिमंडल के बइठका के बाद संवाददाता मन ल जानबा देवत सूचना अउ प्रसारण मंत्री अश्वनी वैष्णव ह किहीन कि एखर ले सफाई कर्मचारी मनके सामाजिक अउ आर्थिक स्तर के संगेसंग साफ-सफाई के क्षेत्र म सुधार होही अउ खतरनाक जघा म सफाई करत बेरा कोनों प्रकार के दुर्घटना ले बाचे म मदद मिलही।
उहें, केन्द्रीय मंत्रिमंडल ह स्किल इंडिया कार्यक्रम म आठ हजार आठ सौ करोड़ रूपिया के मंजूरी देहे।
पेट्रोल पंप-वाहन प्रदूषण जांच
प्रदेस म अब पेट्रोल पंप म गाड़ी मनके प्रदूषण के जांच बर प्रदूषण नियंत्रण प्रमाण पत्र-पीयूसी सेंटर बनाय जाही। एखर बर पेट्रोलियम कंपनी ह अपन मंजूरी दे देहे। पेट्रोल पंप मन म ए जांच केन्द्र बने ले गाड़ी चलइया मन बर जांच कराय म आसानी होही। संगेसंग राज्य म पर्यावरण सुरक्षा के दिसा म घलो बड़का प्रयास होही।
महाकुंभ-स्पेशल ट्रेन
विशाखापट्टनम-गोरखपुर-विशाखापट्
अइसने, महाकुंभ मेला के सेती दुरूग ले छपरा तक चलइया सारनाथ एक्सप्रेस रेलगाड़ी ल ग्यारह अउ बारह फरवरी के दूसर रद्दा ले भेजे जाही। ए रेलगाड़ी प्रयागराज स्टेसन के जघा प्रयागराज छिक्की स्टेसन म जाही।
दुर्घटना
महासमुंद जिला म पाछु रतिहा एक ठिन सड़क दुर्घटना म दू झिन लोगन के मउत होगे अउ छै झिन आने मनखे घायल होगे हे। घायल मन ल तुमगांव के अस्पताल म भर्ती कराय गेहे। हमर संवाददाता ले मिले जानबा के मुताबिक एक ठिन गाड़ी म पन्द्रह झिन लोगन मन बइठ के जिला के बरभांठा ले ओडिसा के साराबोब बारात गे रिहीस। लहुटत खानी ए गाड़ी ह अनते-तनते होके पलट गे। ए घटना म दू झिन लोगन के मउकाच म परान छूट गे।
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल प्रदेस के जम्मों आकाशवाणी केंद्र मन ह एके संघरा रिले करही। ए दारी के अंक म ‘‘बस्तर‘‘ जिला के गतिविधि के उपर जानबा दे जाही।