आज दिनभर के खबर ल अपन गुरतुर छत्तीसगढ़ी भाखा म पढ़व

मध्यान्ह भोजन-कुकिंग काॅस्ट
राज्य सरकार ह स्कूल मन म चलत मध्यान्ह भोजन कार्यक्रम के तहत लइका मन बर खाना बनाए के खर्चा म बढ़ोत्तरी करे हे। ये आदेश पाछू एक अप्रैल ले लागू माने जाही। अब प्राथमिक स्कूल मन म मध्यान्ह भोजन बर हरएक छात्र रोज के दर ले पांच रूपिया उन्नीस पइसा दे जाही।
अइसने माध्यमिक स्कूल मन बर सात रूपिया पैंतालिस पइसा हरएक छात्र के हिसाब से दे जाही। राज्यसरकार ह एलपीजी रसोई गैस के परयोग करइया प्राथमिक स्कूल मन बर बीस पइसा अउ माध्यमिक स्कूल मन बर तीस पइसा हरएक छात्र रोज के हिसाब ले दे जाय के आदेश जारी करे हे।
कोरोना मरीज
छत्तीसगढ़ म कोरोना संक्रमण के मामला सरलग बाढ़त जात हे। आज घलो आने आने जिला ले कोरोना संक्रमित नवा मरीज मिले हे।
राजधानी रायपुर म पूर्व मुख्यमंत्री रमन सिंह के पत्नी के कोरोना जांच रिपोर्ट पाॅजीटिव आय हे। उंखर परिवार ह आइसोलेशन म हवय।
उंहें बेमेतरा जिला म दयालदास बघेल  ह कोरोना पाॅजीटिव होय हे। जिला म काली चैदा नवा कोरोना पाॅजीटिव मिले हे। दुर्ग जिला म आज मंझनियंा तक सात नवा कोरोना संक्रमित मरीज के पुष्टि होय हे।
उंहें महासमुंद जिला म आज पिथौरा अउ तुमगांव म एक-एक झिन कोरोना मरीज मिले हे। ओति राजनंादगंाव जिला म पाछू रतिहा तीस झिन नवा कोरोना  संक्रमित मरीज के पहिचान करे गेहे। जेमा सतरा झिन आईटीबीपी के जवान हरय।
एति कोंडागांव जिला म काली चैदा कोरोना पाॅजीटिव मरीज पाये गीस। इही बीच राजधानी म पाछू रतिहा एम्स म भर्ती एक झिन कोरोना मरीज ह तीसरा मंजिल ले कूद के आत्महत्या कर लीन।
चिकित्सक नियुक्ति
प्रदेश के आने आने सरकारी अस्पताल मन म अब सत्तर झिन नवा विशेषज्ञ डॅाक्टर अपन सेवा दीही। राज्य सरकार ह ए साल जून म आने आने चिकित्सा स्नातकोत्तर एम.डी., एम.एस. अउ डिप्लोमा पाठ्यक्रम के आखरी परीक्षा म सामिल नवा विशेषज्ञ डॅाक्टर मनके नियुक्ति के सूची जारी कर देहे।
स्वास्थ्य विभाग ह छै स्नातक एमबीबीएस डॅाक्टर मनके घलो नियुक्ति करे हे। ओमन ल आने आने जिला मन म नियुक्त करे जाही। स्वास्थ्य मंत्री ह सरकारी अस्पताल मन म सेवा के संग अपन कैरियर के शुरूआत करइया जम्मों नवा डॅाक्टर मन ल बधाई अउ शुभकामना दे हवय।
रासायनिक उर्वरक-जब्त
रासायनिक खातु के गुणवत्ता, भंडारण अउ बंाटे उपर धियान राखे बर कृषि विभाग डहार ले बनाये गे टीम ह काली राजधानी रायपुर के उरला स्थित चार ठिन रासायनिक कंपनी म छापामार कार्रवाई करीन। ए दउरान ओम केमिकल्स म उर्वरक नियंत्रण आदेश के उल्लंघन करे जाय उपर छियालिस ठन रासायनिक खातु जिंक सल्फेट जब्त करे गीस। कंपनी उपर रासायनिक उर्वरक जिंक सल्फेट के भंडारण अउ बेचे उपर रोक लगा दे गेहे।
अइसने अल्फा क्राॅफ साइंस, माधव एग्रो इण्डस्ट्रीज भनपुरी अउ संगम इस्पात लिमिटेड सरोरा के कंपनी म जाके खातु अउ कीटनाशक दवई मन ल जांच बर प्रयोगशाला भेजे गेहे।
गृहमंत्री समीक्षा बैठक
गृहमंत्री ताम्रध्वज साहू ह काली गौरेला-पेण्ड्रा-मरवाही के जिला मुख्यालय पेण्ड्रा म पुलिस अधिकारी मनके बइठका लेके जिला म कानून-व्यवस्था के समीक्षा करीन। ए मउका म गृहमंत्री ह कीहिन कि पुलिस विभाग के कामकाज अइसे होना चाही कि लोगन के मन म पुलिस बर सम्मान जागे अउ अपराधी के मन म डर समाये। ओमन अपराध ल रोके बर पुलिस बल ल एकदम तियार रहिके काम करे के निर्देश दीन।
बइठका म कलेक्टर डोमन सिंह अउ पुलिस अधीक्षक सूरज सिंह परिहार ह गृहमंत्री ल जिला म कानून व्यवस्था अउ अपराध ल रोके बर करे जात काम के जानबा दीन। पुलिस अधीक्षक ह बताइन कि स्पंदन कार्यक्रम के तहत पुलिस अधिकारी अउ कर्मचारी मन ल तनाव ले दूरिहा करे बर हरएक मंगलवार अउ शुक्रवार के योगाभ्यास कराये जाथे।
माओवादी मुठभेड़
सुकमा जिला म आज होय सुरक्षा बल अउ माओवादी मनके बीच होय मुठभेड़ म चार झिन माओवादी मारे गीस। मउका ले हथियार अउ आईईडी बरामद करे गेहे।
पुलिस अधीक्षक शलभ सिन्हा ह बताइन कि कोबरा बटालियन, केंद्रीय रिजर्व पुलिस बल-सीआरपीएफ अउ डिस्ट्रिक्ट रिजर्व गार्ड-डीआरजी के संयुक्त टीम ह तलाशी अभियान म निकले रीहिन। इही दउरान जगरगुण्डा के जंगल म पहिली ले घात लगाए बइठे माओवादी मन ह सुरक्षा बल मन उपर फायरिंग शुरू कर दीन। जवाबी कार्रवाई म चार झिन माओवादी मारे गीस। घटना वाले जगा ले थ््राी नाॅट थ्री के संगेसंग चार हथियार बरामद करे गेहे।
एति, राजनंादगंाव जिला म छत्तीसगढ़ के सीमा ले लगे दर्रेकसा-मुरकुटहो के बीच माओवादी मन डहार ले लगाये गे आईईडी ल सुरक्षा बल मनके टीम ह बरामद करके मउकाच म निष्क्रिय कर दीन।
ओति नारायणपुर जिला के छोटेडोंगर थाना जगा म सुरक्षा बलके आमदई कैम्प म आज बंदूक के सफई करत हुरहा गोली चले ले एक झिन जवान घायल होगे। घायल जवान ल रायपुर के अस्पताल म भर्ती कराय गेहे।
डीजीपी वीडियो कॅान्फे्रसिंग
पुलिस महानिदेशक डीएम अवस्थी ह आज वीडियो कॅान्फे्रंिसग के माध्यम ले आई जी अउ जम्मों जिला के पुलिस अधीक्षक मनके संग अपराध ल रोके बर समीक्षा बइठका करीन। ए दउरान श्री अवस्थी ह लंबा रूके प्रकरण मन ल पंद्रा दिन के भीतर निपटाय के निर्देश दीन।
डीजीपी ह कीहिन कि जम्मों पुलिस अधीक्षक मन ह थाना मनके खुदे निरिक्षण करय अउ केस डायरी देखयं। ओमन यहू कीहिन कि पुलिस के खिलाफ शिकायत ल गंभीरता ले लेवय अउ तुरते जांच करके कार्रवाई करय।
इही बीच डीजीपी ह प्रदेश म पुलिस कर्मी मनके विभागीय समस्या ल दूर करे बर पुलिस कर्मचारी अउ उंखर परिवार वाले मनले गोठबात करही। ए बारे म छत्तीसगढ़ पुलिस के आधिकारिक ट्वीटर हेंडल म पोस्ट करे गेहे।
ब्राउन शुगर गिरप्तार
महासमुंद पुलिस ह करीबन डेढ़ करोड़ रूपिया के सात सौ तीस ग्राम ब्राउन शुगर के संग अंतर्राज्यीय तस्कर गिरोह के एक ठिन सदस्य ल गिरप्तार करे हे। आरोपी के तीर ले एक ठिन पिस्टल, दू मैगजीन अउ दू ठिन जिंदा कारतूस बरामद करे हे।
जानबा के मुताबिक मुखबिर के सूचना उपर जिला के साइबर सेल अउ सीटी कोतवाली के संयुक्त टीम ह महासमुंद अउ रायपुर के बीच नदी मोड़ के तीर नाकाबंदी करके फटफटी म अवैध रूप ले अब्बड़ अकन रखे ब्राउन शुगर के संग एक झिन मनखे ल पकड़ीन। पूछताछ म ओमन बताइन कि ए मनखे ह राजस्थान के जोधपुर जिला के रहइया हरय। अउ ए बेरा तेलीबांधा रायपुर म राहत हे। आरोपी के खिलाफ एनडीपीएस अधिनियम अउ आम्र्स एक्ट के तहत कार्रवाई करे जात हे।
गोबर विक्रेता भुगतान
गोधन न्याय योजना के तहत गौठान समिति मनले दू ले पंद्रा अगस्त तक बिसाय गे गोबर के भुगतान बीस अगस्त के करे जाही। ये भुगतान सोझे हितग्राही के खाता म भेजे जाही। बिलासपुर कलेक्टर ह बताइन कि गौपालक मनले गोबर खरीद के गौठान मन म कंपोस्ट खातु तियार करे जात हे।
ओमन कीहिन कि जउन सरकारी विभाग मन म खातु के जरूरत पड़ही ओमन ल गौठान ले खातु बिसाय बर पड़ही।
 श्रीकृष्ण जन्माष्टमी
भगवान श्रीकृष्ण के जनम के परब जन्माष्टमी आज भक्तिभाव के संग मनाये जात हे। मंदिर अउ घर मन म आज रतिहा भगवान श्रीकृष्ण के विशेष रूप ले पूजा पाठ करके ए परब ल मनाये जाही। राजधानी रायपुर म स्थ्ति कृष्ण मंदिर मन ल सुघ्घर ढंग ले सजाये गेहे। टाटीबंध के इस्कान मंदिर, समता कालोनी के राधा कृष्ण मंदिर अउ गोकुल चंद्रमा मंदिर बूढ़ापारा म बीहनियाच ले श्रद्धालु मन ह दर्शन करीन। प्रदेश के आने शहर मन म घलो जन्माष्टमी परब मनाये जाय के समाचार मिले हे।
कोरोना संक्रमण के सेती एसो मंदिर मन म भीड़ कमती हवय। राष्ट्रपति रामनाथ कोविंद, प्रधानमंत्री नरेंद्र मोदी, राज्यपाल अनुसूइया उइके अउ मुख्यमंत्री भूपेश बघेल ह जन्माष्टमी के मउका म लोगन मन ल बधाई दे हवय।
राम वनगमन पथ वृक्षारोपण
राम वनगमन पथ रोपण कार्यक्रम के तहत बिलासपुर वनवृत्त के एक सौ ग्यारा मीटर लंबाई म करीबन ग्यारा हजार पौधा लगाय गेहे। एमा वन विभाग डहार ले चार वनमंडल रायगढ़, जांजगीर, कोरबा अउ धरमजयगढ़ के आने आने रद्दा म फलवाले अउ लघु वनोपज प्रजाति के पौधा लगाय गेहे।