एखर बर सामान्य प्रसासन विभाग ह चौबीस जनवरी सुक्रवार बिहनिया ग्यारह बजे सपथ दिलाय बर सबो विभाग के सचिव, राजस्व मंडल बिलासपुर के अध्यक्ष, सबो विभागाध्यक्ष, संभाग आयुक्त अउ कलेक्टर मन ल परिपत्र जारी कर दे गेहे।
पराक्रम दिवस
आज पराक्रम दिवस हरय। ए दिवस ल नेताजी सुभाषचंद्र बोस के जयंती के मउका म मनाय जाथे। ए मउका म राष्ट्रपति द्रौपदी मुर्मू, उपराष्ट्रपति जगदीप धनखड़ अउ प्रधानमंत्री नरेन्द्र मोदी ह नेताजी ल श्रद्धांजलि अर्पित करीन हे। एक वीडियो संदेस म प्रधानमंत्री ह किहीन कि देस ह नेताजी सुभाष चन्द्र बोस ले प्रेरणा लेके विश्व के तीसर सबले बड़े अर्थव्यवस्था बने बर प्रतिबद्ध हे।
उहें, छत्तीसगढ़ के मुख्यमंत्री विष्णुदेव साय ह घलो नेताजी सुभाषचन्द्र बोस के जयंती म ओमन ल नमन करीन। श्री साय ह किहीन कि नेताजी कोति ले देस बर करे गे योगदान ल सम्मान दे बर उंखर जयंती ल पराक्रम दिवस के रूप म मनाय जाथे। भारत के स्वतंत्रता संग्राम म ओमन ह महत्वपूर्ण भूमिका निभाय हे।
पराक्रम दिवस-क्वीज प्रतियोगिता
नेताजी सुभाष चन्द्र बोस के जयंती, पराक्रम दिवस के मउका म देसभर के केन्द्रीय विद्यालय म राष्ट्रव्यापी ‘‘परीक्षा पे चर्चा‘‘ प्रश्नोत्तरी प्रतियोगिता के आयोजन होइस। स्कूली लइका मन म देसभक्ति के भावना जगाय बर अउ नेताजी के विरासत ल श्रद्धांजलि दे खातिर ए प्रतियोगिता करे गे रिहीस।
एखर चलत आज छत्तीसगढ़ के दुरूग जिला के केन्द्रीय विद्यालय म नेताजी सुभाष चन्द्र बोस के जयंती के मउका म पांच ठिन लघु फिलिम के प्रदर्सन होइस। ए लघु फिलिम तिलका मांझी, पीर अली खान, मंगल पांडेय, देवी अहिल्या बाई होलकर समेत खुदीराम बोस के जिनगी म आधारित रिहीस। इही बेरा म बीस ठन स्कूल के सौ झिन पढ़ईया लइका मन गुमनाम सहीद मनके जीवन उपर आधारित प्रश्नोत्तरी प्रतियोगिता म भाग लीन।
उहें, प्रदेस के कतकोन जिला के केन्द्रीय विद्यालय म घलो प्रश्नोत्तरी प्रतियोगिता होइस। जांजगीर-चांपा जिला के पीएमश्री केन्द्रीय विद्यालय म होय ए प्रतियोगिता म दस स्कूल के सौ झिन पढ़ईया लइका मन सामिल होइन।
गणतंत्र दिवस-झांकी
छिहत्तरवां गणतंत्र दिवस परेड के दउरान नई दिल्ली के लालकिला म होवइया भारत परब म देसभर ले छब्बीस झांकी ल तैयार करे गेहे। ए दरी झांकी के थीम हे – ‘‘स्वर्णिम भारत-विरासत और विकास‘‘। परेड म सोलह राज्य अउ केन्द्रसासित प्रदेस के संगेसंग दस मंत्रालय अउ कतकोन विभाग के झांकी घलो समिल होही।
एसो छत्तीसगढ़ कोति ले प्रस्तुत झांकी म प्रदेस के सांस्कृतिक विरासत अउ रामनामी समुदाय ल देखे बर मिलही। ए झांकी म प्रदेस के सांस्कृतिक विरासत ल दिखाए गेहे। राष्ट्रीय रंगशाला दिल्ली म काली होय प्रेस प्रिव्यू म छत्तीसगढ़ के झांकी ल राष्ट्रीय मीडिया कोति ले सराहय गीस। छत्तीसगढ़ के सांस्कृतिक धरोहर म जीवन, प्रकृति अउ अध्यात्मिकता के संबंध ल झांकी के माध्यम ले देखाए गेहे। झांकी के आगू के हिस्सा म निराकार राम के उपासना करइया रामनामी समुदाय के प्रतिनिधित्व करत स्त्री अउ पुरूष ल दिखाय गेहे। एखर सरीर अउ कपड़ा म ‘राम-राम‘ सब्द ह अंकित हे। एमन ल रामचरितमानस के पाठ करत हुए दिखाय गेहे। बीच के हिस्सा ह आदिवासी संस्कृति के पहनावा, आभूषण, कलाकृति अउ कला परंपरा ल दर्साय गेहे अउ पाछु म मोर ल दिखाए गेहे।
आईईडी बरामद-माओवादी आत्मसमर्पण
बीजापुर जिला म सुरक्षा बल ह करीबन पचास किलो के आईईडी ल बरामद करके ओला निष्क्रिय कर देहे। ए आईईडी ल माओवादी मन ह सुरक्षा बल मन ल नुकसान पहुंचाय खातिर बासागुड़ा-तिम्मापुर रद्दा म लगा के रखे रिहीन। जानबा के अनुसार डीआरजी, सीआरपीएफ अउ बीडीएस के संयुक्त टीम ह बासागुड़ा थाना क्षेत्र ले गश्त म निकले रिहीन। फेर, इही बेरा दुर्गा मंदिर करा ले ए आईईडी ल जब्त करे गीस।
उहें, दंतेवाड़ा जिला के अरनपुर थाना क्षेत्र म समेली-बर्रेम के रद्दा म सुरक्षा बल मन ह दू किलो के आईईडी ल बरामद करे हे, जेला मउका म ही नष्ट कर दे गीस।
ऐति, नारायणपुर जिला म पांच झिन माईलोगिन समेत आठ झिन माओवादी मन ह आत्मसमर्पण करे हे। एमा ले एक झिन माओवादी उपर पांच लाख रूपिया अउ तीन झिन आने माओवादी मन उपर एक-एक लाख रूपिया के इनाम रिहीस। ए माओवादी मन ह नारायणपुर, बीजापुर अउ दंतेवाड़ा जिला म होय कतकोन माओवादी घटना म सामिल रिहीन। आत्मसमर्पण करइया माओवादी मन ल राज्य सरकार के पुनर्वास नीति के चलत पच्चीस-पच्चीस हजार रूपिया के प्रोत्साहन रासि दे गेहे।
मोहला-मानपुर/स्वास्थ्य शिविर
मोहला-मानपुर अंबागढ़ चौकी जिला के सीतागांव थाना क्षेत्र के मिचगांव म भारत-तिब्बत सीमा पुलिस बल-आईटीबीपी कोति ले निःशुल्क स्वास्थ्य सिविर के आयोजन करे गीस। ए सिविर म गांव वाला मनके स्वास्थ्य के जांच करके ओमन ल निःशुल्क दवाई बांटे गीस। संगेसंग ओमन ल पर्यावरण संरक्षण बर घलो जागरूक करे गीस। ए सिविर म आईटीबीपी के कमांडेंट विवेक कुमार पांडेय ह आंगनबाड़ी के लइका समेत उंखर महतारी मन ले भेंट करीन अउ लइका मनके खाय-पीये ल लेके गोठ करीस।
कोंडागांव-आरक्षक भर्ती प्रक्रिया
कोंडागांव जिला के पुलिस लाइन मैदान म सोलह नवंबर ले चलत पुलिस आरक्षक भर्ती प्रक्रिया ह अब खतम होगे हे। सात सौ चौदह रिक्त पद बर चलत सारीरिक दक्षता परीक्षा म नारायणपुर, कांकेर अउ कोंडागांव जिला के चालीस हजार आठ सौ इकचालीस अभ्यर्थी मन ह भाग लीन। जिला के पुलिस अधीक्षक येदुवेल्ली अक्षय कुमार ह बतईन कि सारीरिक दक्षता परीक्षा के बाद अब लिखित परीक्षा अउ दौड़ के आयोजन करे जाही।
विजय जागिड़-दौरा
अखिल भारतीय कांग्रेस कमेटी के सह सचिव अउ छत्तीसगढ़ सह-प्रभारी विजय जागिड़ ह काली चौबीस जनवरी ले छत्तीसगढ़ के तीन दिन के दउरा म रायपुर अवइया हे। ओमन ह तीन दिन तक नगरीय निकाय चुनई ले संबंधित कार्यक्रम म भाग लीहीं। संगेसंग छब्बीस जनवरी गणतंत्र दिवस म प्रदेस कांग्रेस के कार्यक्रम म सामिल होही।
ठग-आरोपी गिरफ्तार
जशपुर अउ अंबिकापुर म पइसा ल दोगुना करे के झांसा देके लोगन मन ले करोड़ों रूपिया के ठगी करइया चिटफंड कंपनी के डायरेक्टर दिलीप कुमार साहू ल पुलिस ह रायपुर ले गिरफ्तार कर लेहे। जशपुर जिला के पुलिस अधीक्षक शशिमोहन सिंह ह बतईन कि ए आरोपी ह रायपुर के एक ठिन निजी अस्पताल म चिकित्सा सहायक बनके काम करत रिहीस। पूछताछ म आरोपी ह बतईस कि बछर दू हजार तेरह म ओ ह अपन संगवारी मन संग मिलके ए कंपनी के सुरूवात करे रिहीस।
अउ अब मौसम के हाल…
प्रदेस म काली ले उत्तर ले ठंडा अउ सुष्क हवा के आय के संभावना बनत हे। एखर सेती न्यूनतम तापमान म गिरावट आ सकत हे। ए बेरा म मौसम के सुष्क रेहे के संभावना हे। मौसम विभाग के अनुसार प्रदेस के उत्तर अउ मध्य भाग म छब्बीस जनवरी तक अउ बस्तर संभाग के जिला म सत्ताईस जनवरी तक न्यूनतम तापमान म चार डिग्री सेल्सियस तक गिरावट के संभावना हे।
अउ अब थोरकुन समाचार सार म –
– बिलासपुर जिला के लिम्हा गांव म पाछु रतिहा एक ठिन ट्रेलर ह अनियंत्रित होके एक घर म जा घुसीस, जेमा चार बछर के एक लइका के मउत होगे। उहें, चार झिन लोगन मन गंभीर रूप ले घायल होगे हे। ऐति, पुलिस ह आरोपी ट्रेलर चालक ल गिरफ्तार कर लेहे।
अउ
– स्टील अथॅारिटी ऑफ इंडिया लिमिटेड-सेल के स्थापना दिवस के मउका म काली चौबीस जनवरी के भिलाई इस्पात संयंत्र म कतकोन कार्यक्रम करे जाही। इही कड़ी म भिलाई के जयंती स्टेडियम म पांच किलोमीटर पैदल दउड़ के आयोजन होही।