प्रदेस म नगरीय निकाय चुनाव बर आज अधिसूचना जारी कर दे गेहे। एखरे संग प्रदेस के दस नगरीय निकाय मन म नामांकन पत्र दाखिल करे के सिलसिला सुरू होगे हे। उपमुख्यमंत्री अरूण साव ह किहीन कि निकाय चुनाव ल लेके लोगन मन म कतकोन उछाह हे। ओमन किहीन कि पाछू एक बछर म भाजपा सरकार ह जनता के आकांक्षा ल पूरा करे के काम करे गेहे। श्री साव ह किहीन कि भाजपा समय म प्रत्यासी मनके चयन कर लिही अउ प्रत्यासी मन डहार ले समय म नामांकन दाखिल करे जाही। नगरीय निकाय चुनाव बर नामांकन भरे के आखिरी तारीख अट्ठाईस जनवरी हे। नामांकन पत्र के जांच उनतीस जनवरी के करे जाही। अभ्यर्थी मन डहार ले इकतीस जनवरी तक नांव वापस ले जा सकही। मतदान ग्यारा फरवरी के होही। मतगणना अउ चुनाव परिणाम के घोसना पंद्रह फरवरी के करे जाही।
इही बीच, रईपुर कलेक्टर अउ जिला निर्वाचन अधिकारी डॉक्टर गौरव कुमार सिंह ह नगरीय निकाय अउ पंचायत चुनाव के संबंध म मीडिया प्रतिनिधि मन ले चर्चा करीन। ओमन ह बतइन कि आदर्श आचार संहिता बीरगांव नगर निगम ल छोडके पूरा रईपुर जिला म लागू होगे हे। एखर अलावा पच्चीस अउ छब्बीस जनवरी के छुट्टी होय के कारण नामांकन पत्र जमा नइ करे जाही।
बेटी बचाओ-बेटी पढ़ाओ-सुकन्या योजना
‘‘बेटी बचाओ-बेटी पढ़ाओ‘‘ अभियान के आज दस बछर पूरा होय म प्रधानमंत्री नरेंद्र मोदी ह किहीन कि ए अभियान म समाज के सबो वर्ग के भागीदारी रहे हे। ओमन किहीन कि बेटी बचाओ-बेटी पढ़ाओ अभियान ह लड़का-लड़की के भेदभाव ल दूर करे म मदद करीन अउ लड़की मनके शिक्षा अउ सशक्तिकरण के मार्ग प्रशस्त करीन। केंद्र सरकार ह किहीन कि देस म सुकन्या समृध्दि योजना म चार करोड़ ले जादा खाता खोले गेहे। ए योजना म वर्तमान म आठ दसमलव दू प्रतिसत के दर ले ब्याज दे जावत हे।
उपराष्ट्रपति-रायपुर
उपराष्ट्रपति जगदीप धनखड़ अपन एक दिन के छत्तीसगढ़ के प्रवास के दउरान रईपुर म ‘कल्पनाएं : बेहतर भारत की‘ बिसय म होवइया कारीकरम म सामिल होइन। उपराष्ट्रपति ह राष्ट्रीय प्रौद्योगिकीय संस्थान- एनआईटी, भारतीय प्रौद्योगिकीय संस्थान-आईआईटी अउ भारतीय प्रबंधन संस्थान-आईआईएम के विद्यार्थी मन ल संबोधित करत हुए किहीन कि विकसित भारत के सपना ल साकार करे म युवा मन के महत्वपूर्ण भूमिका हे। ओमन ह किहीन हे कि भारत, युवा मनके बदौलत फेर विश्वगुरू बने बर आगू बाढ़त हे। ओमन ह छात्र मनले स्वदेसी वस्तु के उपयोग करे के आह्वान करीन। ए बेरा म उपराष्ट्रपति ह एनआईटी परिसर म बनइया गर्ल्स हॉस्टल के आधारसिला घलो राखिन।
कारीकरम ल संबोधित करत हुए राज्यपाल रमेन डेका ह किहीन कि युवा मन ल वैश्विक चुनौती बर तियार करे उद्योग-संबंधी शिक्षा अउ अग्रणी अनुसंधान संस्था मन ल बढ़ावा देना होही। उहें, मुख्यमंत्री विष्णुदेव साय ह किहीन कि अच्छा भारत के निर्माण बर हमन ल देस के चुनौती मन ल समझना होही। ओमन किहीन कि हमर देस ह तेजी ले आत्मनिर्भर होय के दिसा म कदम बढ़ाय हे।
गरियाबंद मुठभेड़-शव बरामद
गरियाबंद जिला म पाछू दू दिन तक होय मुठभेड़ म सुरक्षाबल मन ह दू अउ माओवादी मनके शव बरामद करे हे। संगेसंग घटनास्थल ले एके- फोर्टी सेवन ऑटोमैटिक हथियार घलो बरामद करे गेहे। ए मुठभेड़ म सुरक्षा बल मन ह अब तक कुल सोलह माओवादी मनके शव बरामद करे गेहे, जेमा छै माईलोगिन माओवादी घलो सामिल हे। माओवादी मनके शव के पोस्टमार्टम रईपुर स्थित अंबेडकर अस्पताल म करे जात हे।
ए ऑपरेसन के नेतृत्व करइया जिला के पुलिस अधीक्षक निखिल राखेचा ह बतइन कि ए अभियान म छत्तीसगढ़ अउ ओडिसा पुलिस के संगेसंग सीआरपीएफ के जवान घलो सामिल रिहीन। ओमन ह बतइन कि इलाका म अभी भी तलासी अभियान चलत हे।
माओवादी कैम्प-कब्जा/ आईईडी बरामद
बीजापुर अउ तेलंगाना के सीमा म स्थित भट्टिगुड़ा के जंगल मन म माओवादी मनके हाइटेक ट्रेनिंग कैम्प म कोबरा बटालियन के जवान मन ह कब्जा कर लेहे। संगेसंग उंहा बने स्मारक ल घलो ध्वस्त कर देहे। एएसपी चंद्रकांत गोवर्णा ह बतइन कि माओवादी मन ह ए हाईटेक ट्रेनिंग कैम्प ल एक रणनीतिक जघा म बनाय रिहीन। इंहा, माओवादी मन हथियार के प्रसिक्षण देवत रिहीस अउ नवा सदस्य के भर्ती करत रिहीन। कैम्प म पक्का बैरक, झोपड़ी अउ बुनियादी सुविधा मौजूद रिहीस। माओवादी मन ह इंहा गगनचुम्बी पेड़ मन ल घलो प्रसिक्षण बर तियार करके राखे रिहीन। ए पेड़ मनके इस्तेमाल माओवादी, सिविर म घुसपैट करे अउ सुरक्षा बल मन ल चकमा देबर करत रिहीन।
इही जिला, के गंगालूर थाना क्षेत्र सुरक्षाबल मन ह आने-आने जघा ले पांच -पांच किलो के आठ आईईडी बरामद करे हे। जवान मन ह ए आईईडी मुतवेंडी ले पीड़िया जाय वाले रद्दा ले बरामद करीन अउ बम निरोधक दस्ता के टीम ह आईईडी ल सफलता पूर्वक खतम कर देहे।
गणतंत्र दिवस-ध्वजारोहण
गणतंत्र दिवस म राज्य मंत्रिमंडल के सदस्य, सांसद अउ विधायक अपन-अपन प्रभार वाले जिला म ध्वजारोहण करही। मुख्यमंत्री विष्णुदेव साय सरगुजा जिला मुख्यालय म ध्वजारोहण कर परेड के सलामी लिही। उहें, केंद्रीय राज्य मंत्री तोखन साहू कोरबा, उपमुख्मंत्री अरूण साव रायगढ़ अउ विजय शर्मा बस्तर म झंडा फहराही। विधानसभा अध्यक्ष डॉ. रमन सिंह दुर्ग म, मंत्री रामविचार नेताम सूरजपुर म, दयालदास बघेल महासमुंद म, केदार कश्यप दंतेवाड़ा म, लखनलाल देवांगन जशपुर म, श्यामबिहारी जायसवाल गौरेला-पेण्ड्रा-मरवाही म ओ.पी.चौधरी बिलासपुर म, टंकराम वर्मा राजनांदगांव म अउ लक्ष्मीराजवाड़े बलरामपुर जिला मुख्यालय म होवइया गणतंत्र दिवस के मुख्य समारोह म झंडा फहराही।
इही बीच, राज्य निर्वाचन आयोग डहार ले मुख्य सचिव ल पत्र लिखके आदर्श आचार संहिता के दउरान गणतंत्र दिवस के मउका म होवइया जाने-माने कारीकरम के बारे म दिसा-निरदेस दे गेहे।
‘‘रिपब्लिक डे एट होम‘‘
नई दिल्ली म गणतंत्र दिवस के बेरा म ‘‘रिपब्लिक डे एट होम 2025‘‘ म सामिल होय बर देसभर के दू सौ पचास प्रतिष्ठित अतिथि अउ सरकारी योजना के लाभार्थी मन ल राष्ट्रपति द्रौपदी मुर्मू डहार ले आमंत्रित करे गेहे। एमा छत्तीसगढ़ के चुने गे पहुना घलो सामिल हे। ए अतिथि मन ल डाक विभाग डहार ले निमंत्रण पत्र बांटे गेहे। ए निमंत्रण कार्ड ल अशोक चक्र के संग एक बॉक्स म पैक करे गेहे, जउन राष्ट्रपति के निमंत्रण के प्रतीक हे अउ एमा कुछू हस्त निर्मित समान घलो हे। ए कारीकरम म सामिल होय बर रईपुर के कमल नारायण साहू, जांजगीर-चांपा जिला के नवागढ़ के हेमलता मनहार, राजनांदगांव जिला के पनेका गांव के मधुलिका रामटेके अउ कबीरधाम जिला के पंडरिया गांव के जगतीन बाई सामिल हे।
एट होम रिसेप्सन म सामिल होय बर राजनांदगांव के कुसमी गांव के लखपति दीदी दिव्या निषाद के घलो चयन करे गेहे। ए दउरान राष्ट्रपति ओमन ल सम्मानित करही।
आकाशवाणी ले चर्चा म दिव्या निषाद ह अपन लखपति दीदी बने के अनुभव ल घलो साझा करीन।
उहें, बिलासपुर जिला के किसान दंपत्ति-दिव्या वर्मा अउ ओखर पति जदुनंदन वर्मा ल परिवार के संग नई दिल्ली म होवइया गणतंत्र दिवस समारोह म बिसेस अतिथि के रूप म बुलाय गेहे। किसान दंपत्ति ल कृषि क्षेत्र म नवाचार अउ जैविक खेती के क्षेत्र म अच्छा काम करे बर नेवता मिले हे।
सीजीपीएससी मामला
राज्य शासन ह सीबीआई ल सीजीपीएससी परीक्षा म गड़बड़ी के मामला म पीएससी के पूर्व परीक्षा नियंत्रक आरती वासनिक अउ पूर्व मुख्यमंत्री भूपेश बघेल के ओएसडी चेतन बोरघनिया के गिरफ्तारी के अनुमति दे देहे। ए मामला म पहिली ही पीएससी के परीक्षा उपनियंत्रक ललित गणवीर के गिरफ्तारी हो चुके हे।