आज दिनभर के खबर ल अपन गुरतुर छत्तीसगढ़ी भाखा म पढ़व

कृषि मंत्रालय-संदिग्ध बीज पार्सल
केन्द्रीय कृषि मंत्रालय डहार ले विदेस के अवइया संदिग्ध बीज पार्सल के संबंध म जारी करे गे दिसा-निरदेस ल देखत हुए छत्तीसगढ़ के कृषि विभाग ह घलो अलर्ट जारी करीन हे। ए संबंध म कृषि विभाग ह अधिकारी अउ राज्य के किसान मन ले कोनो अनजान स्त्रोत ले मिलइया बीज के संबंध म सावधान रेहे के सलाह दीन हे। किसान मन ले अपील करे गेहे कि ओमन ह खुद के रखे हुए बीज या फेर राज्य के सहकारी समिति के माध्यम ले प्राप्त होय वाले प्रमाणित बीज के ही उपयोग करय। कृषि विभाग डहार ले रईपुर के इंदिरा गांधी कृषि विश्वविद्यालय अउ सबो जिला के उप संचालक मन ल ए संबंध म सतर्कता बरते अउ प्रदेस के किसान अउ आम मनखे मन ल जागरूक करे बर जरूरी प्रचार-प्रसार करे बर किहीन हे।
कोरोना-मरीज
छत्तीसगढ़ म कोरोना संक्रमण के मामला सरलग बाढ़त जात हे। आज घलो आने-आने जिला मन ले कोरोना संक्रमित नवा मरीज मिले के पुष्टि होय हे। दुरूग जिला म आज कोरोना संक्रमित इकतीस झिन नवा मरीज के पहिचान करे गीस, जेमा अमलेश्वर बटालियन के एक झिन जवान अउ झीट पाटन के सामुदायिक स्वास्थ्य केन्द्र के एक महिला स्वास्थ्यकर्मी घलो सामिल हे। उहें, भिलाई अउ पाटन म घलो पांच-पांच झिन कोरोना संक्रमित मरीज मिले हे।
उहें, रायगढ़ जिला म घलो आज कोरोना के नौ झिन मरीज मिलीन। जेमा एके परिवार के छह मनखे मन सामिल हे।
ओति, सुकमा जिला म सीआरपीएफ के एक झिन जवान सहित पांच झिन नवा कोरोना संक्रमित मिले हे।
इही बीच, कवर्धा म आज चार झिन कोरोना के मरीज मिलीन। जिला निगरानी अधिकारी डाॅक्टर केशव धु्रव ह बतईन कि कलेक्टर के निर्देश म पूरा जिलाभर म कोरोना संक्रमित मनखे मनके पहिचान करे बर सैंपल ले जात हे।
उहें, महासमुंद जिला म आज तीन झिन नवा मरीज मिलीन। पाछु रतिहा जिला ले चैदह झिन मरीज मिले रिहीन।
ऐति, जांजगीर-चांपा जिला म पाछु दू दिन म बीस झिन नवा कोरोना मरीज के पहिचान करे गेहे।
पाछु चैबीस घंटा म राज्यभर म कोरोना संक्रमण के चार सौ सत्ताईस ठिन मामला आगू आय रिहीस। उहें, तीन लोगन के मउत होय रिहीस।
विस मानसून-सत्र
छत्तीसगढ़ विधानसभा के मानसून सत्र अवइया पच्चीस अगस्त ले सुरू होही। अट्ठाईस अगस्त तक चले वाले ए सत्र म कुल चार ठिन बइठका होही। कोरोना संक्रमण ल देखत हुए सदन म ए दरी सोसल डिस्टेंसिंग के नियम के पालन करे जाही।
इही कड़ी म विधानसभा अध्यक्ष डाॅक्टर चरणदास महंत ह काली विधानसभा पहुंच के तैयारी के जायजा लीन। संगेसंग ओमन ह अधिकारी मन ल सदन अउ विधानसभा परिसर म करे जाय वाले उपाय अउ जम्मों बेवस्था ल बीस अगस्त तक पूरा करे बर कहिन हे।
माओवादी-मुठभेड़/गिरफ्तार
कोंडगांव जिला म आज सुरक्षा बल के संग होय मुठभेड़ म एक झिन माओवादी मारे गीस।
जिला के पुलिस अधीक्षक सिद्धार्थ तिवारी ह घटना के पुष्टि करत हुए बतईन कि केशकाल थाना क्षेत्र ले डीआरजी अउ एसटीएफ के संयुक्त टीम ह गश्ती म निकले रिहीन। इही बेरा कांकेर अउ कोंडागांव के बीच होनहेड के जंगल म माओवादी मन संग मुठभेड़ होईस। दूनों कोति ले होय जवाबी कार्रवाई म एक झिन माओवादी मारे गीस, जेखर सव ल बरामद कर ले गेहे अउ मउका ले एक ठिन थ्री नाॅट थ्री रायफल एक ठिन भरमार बंदूक समेत रोजमर्रा के जिनीस बरामद करे गेहे।
ऐति, छत्तीसगढ़ के सीमा ल लगे महाराष्ट्र के गढ़चिरौली म पुलिस ह एक झिन माओवादी दंपत्ति ल गिरफ्तार करीन। ए माओवादी दंपत्ति उपर अट्ठारह लाख रूपिया के इनाम घोषित रिहीस। पुलिस ह बतईन कि ए दंपत्ति ह महाराष्ट्र के टिपागढ़ दलम के डीवीसी सदस्य रिहीस।
जन्माष्टमी
श्रीकृष्ण जन्माष्टमी के मउका म राज्यपाल अनुसुईया उइके, मुख्यमंत्री भूपेश बघेल अउ विधानसभा अध्यक्ष डाॅक्टर चरणदास महंत ह प्रदेसवासी मन ल सुभकामना दीन हे। राज्यपाल ह अपन संदेस म किहीन हे कि भगवान श्रीकृष्ण ह भगवत गीता के माध्यम ले लोगन मन ल जीये के सही रद्दा देखाईन।
उहें, मुख्यमंत्री भूपेश बघेल ह कहिन हे कि भगवान श्रीकृष्ण के उपदेस जीवन के हर परस्थिति बर प्रासंगिक हवय। विधानसभा अध्यक्ष ह प्रदेसवासी मन ल जन्माष्टमी के अवसर म बधाई देवत हुए कहिन कि भगवान श्रीकृष्ण के जिनगी ह उत्साह के संग जीये के सीख देथे अउ सामाजिक कल्याण बर प्रेरित घलो करथे।
बतादन कि कोरोना संकट के बाढ़त मामला ल देखत हुए ए दरी प्रदेस म जन्माष्टमी के बेरा म मंदिर अउ सार्वजनिक जघा म केन्द्र सरकार डहार ले जारी करे गे दिसा-निरदेस के पालत करत हुए आयोजन करे जाही।
मिनीमाता-पुण्यतिथि
छत्तीसगढ़ के पहिली महिला सांसद मिनीमाता के आज पुण्यतिथि हवय। ए बेरा म मुख्यमंत्री भूपेश बघेल ह आज रईपुर स्थित अपन निवास म मिनीमाता के चित्र म फूल-माला पहिना के ओमन ल श्रद्धांजलि अर्पित करीन। श्री बघेल ह वीडियो कान्फ्रेंसिंग के माध्यम ले न्यू राजेन्द्र नगर स्थित सांस्कृतिक भवन परिसर म करीबन चवालीस लाख रूपिया के लागत ले नवनिर्मित मिनीमाता स्मृति वातानुकूलित भवन के लोकार्पण करीन। ओमन किहीन कि मिनीमाता ह सामाजिक सुधार के प्रतीक रिहीन। ए बेरा म सामाजिक क्षेत्र म अच्छा काम करइया माईलोगिन अउ प्रतिभावान लइका मन ल सम्मानित करे गीस।
उहें, राजनांदगांव जिला म कांग्रेस कार्यालय अउ सतनाम भवन म घलो मिनीमाता के पुण्यतिथि म उंखर योगदान ल सुरता करत हुए श्रद्धासुमन अर्पित करे गीस।
दुर्ग-आपसी विवाद
दुरूग जिला के खुर्सीपार इलाका म पाछु रतिहा दू झिन परिवार के बीच होय आपसी लड़ाई-झगड़ा म दू मनखे मनके मउत होगे। जिला के अतिरिक्त पुलिस अधीक्षक रोहित झा ह बतईन कि पड़ोसी मनके बीच होय विवाद म एक परिवार के जवान लइका ह दूसर परिवार के मनखे मन उपर तलवार ले हमला कर दीस, जेखर ले घायल पति-पत्नी के अस्पताल म मउत होगे। उहें, इंखर लइका गंभीर रूप ले घायल होगे। फिलहाल आरोपी युवक अउ माता-पिता ल हिरासत म लेके पूछताछ करे जात हे। अतिरिक्त पुलिस अधीक्षक ह बतईन कि अवैध रूप ले सराब बिक्री ल लेके दूनों पक्ष के बीच म विवाद होय रिहीस।
स्वतंत्रता दिवस-पुलिसकर्मी सम्मानित
स्वतंत्रता दिवस के बेरा म प्रदेस के छह झिन पुलिसकर्मी मन ल सम्मानित करे जाही। रईपुर के पुलिस परेड मैदान म होवइया मुख्य समारोह म मुख्यमंत्री भूपेश बघेल ह ए जम्मांे पुलिसकर्मी मन ल सम्मानित करइया हे। पांच पुलिसकर्मी मन ल राज्य स्तरीय पुरस्कार अउ एक झिन पुलिसकर्मी ल पुलिस महानिदेशक पुरस्कार ले सम्मानित करे जाही।
मौसम
अवइया चैबीस घंटा म प्रदेस के ज्यादातर जगह म हल्का ले मध्यम पानी गिरे के या फेर गरज-चमक के संग बूंदाबांदी होय के संभावना हे। उहें, एक-दू जघा म भारी बारिस होय के चेतावनी घलो दे गेहे।
मौसम विभाग के अनुसार ए बेरा राजस्थान के बंगाल के खाड़ी तक एक ठिन द्रोणिका बने हे। एखर प्रभाव ले पाछु दू दिन ले प्रदेस के ज्यादातर इलाका म पानी गिरत हे।
उहें, पाछु चैबीस घंटा म राजधानी रईपुर सहित दुरूग, राजनांदगांव, बिलासपुर, रायगढ़, बस्तर, कोंडागांव अउ कांकेर जिला म आने-आने जघा म हल्का ले मध्यम बारिस होय के समाचार मिले हे। इही सेती नदिया-नाला के घलो जलस्तर बाढ़त हे।
पाछु कुछु दिन ले कोरबा जिला म पानी गिरे के सेती हसदेव-बांगो बांध के जलस्तर बाढ़े के सेती पाछु दिन बांध के तीन ठिन गेट ल खोल दे गे रिहीस। काली बांध के दू ठिन अउ गेट ल खोल दे गीस।