मुख्यमंत्री-बैठक
मुख्यमंत्री विष्णुदेव साय ह रईपुर के मुख्यमंत्री निवास कार्यालय म सरगुजा संभाग के जम्मों विधायक अउ सरगुजा सांसद के संग बइठका करीन। बइठका म ओमन सरगुजा के विकास बर जुल मिलके काम करे बर कहिन हे। मुख्यमंत्री ह कहिन कि राज्य सरकार ह विकसित छत्तीसगढ़ के जउन विजन तियार करे हे, ओमा छत्तीसगढ़ के संगेसंग आदिवासी बहुल बस्तर अउ सरगुजा संभाग के मुख्य भूमिका होही। श्री साय ह सबो जनप्रतिनिधि मन ले गोठबात करत उंखर क्षेत्र म होवत विकास काम के जानकारी लीन। संगेसंग लोगन ले जुड़े सुभीता के कामकाज ल पूरा करे अउ सरलग निगरानी राखे बर किहीन। पर्यटन के संभावना ल देखत मुख्यमंत्री ह सरगुजा संभाग म रद्दा बनाय के संगेसंग अवई-जवई के सुभीता बने बर किहीन।
टेनिस हॉकी अकादमी
राज्य सरकार ह रईपुर म टेनिस अउ राजनांदगांव म हॉकी अकादमी सुरू करे के मंजूरी दे देहे। एखर सुरू होय ले इहां के खिलाड़ी टेनिस अउ हॉकी के क्षेत्र म देस म छत्तीसगढ़ के नवा पहिचान बना सकही। टेनिस अउ हॉकी अकादमी म अंतर्राष्ट्रीय स्तर के आधुनिक खेल सुभीता संग सबले बने कोच घलो होही, जिहां खिलाड़ी मन ल उच्च स्तरीय प्रशिक्षण मिलही। ए खेल अकादमी के बने ले राज्य म खेल के विकास बर एक नवा संभावना बनही। छत्तीसगढ़ के खिलाड़ी राष्ट्रीय अउ अंतर्राष्ट्रीय स्तर म बने प्रदर्सन करके प्रदेस अउ देस के नाव रोसन करही। रईपुर म बनइया टेनिस अकादमी बर तेरह नवा पद अउ राजनांदगांव के हॉकी अकादमी खातिर चौदह नवा पद के मंजूरी राज्य सरकार ह देहे।
स्वास्थ्य मंत्री-बैठक
स्वास्थ्य मंत्री श्याम बिहारी जायसवाल ह मंत्रालय म स्वास्थ्य विभाग के बड़का अधिकारी मनके बइठका लीन अउ एच.एम.पी.वी. वायरस ल लेके जरूरी दिसा-निरदेस दीन। ओमन किहीन कि ए वायरस ले निपटे खातिर स्वास्थ्य विभाग के टीम तियार हे। श्री जायसवाल ह बतईन कि स्वास्थ्य विभाग म बिसेसज्ञ मनके टीम सरगल ए वायरस के संबंध म निगरानी राखत हे अउ एखर लक्षण अउ प्रभाव के संबंध म जानकारी लेवत हे। संगेसंग ओमन लोगन ले साफ-सफाई राखे के अपील करीन।
वित्त मंत्री-रायगढ़
वित्तमंत्री ओ.पी. चौधरी ह रायगढ़ जिला के बाघाडोला, नवापारा-अ अउ छपोरा म सत्तर लाख रूपिया ले जादा के आने-आने विकास काम के लोकार्पण करीन। ए मउका म श्री चौधरी ह किहीन कि राज्य सरकार गांव, गरीब, किसान समेत सबो वरग के विकास बर प्रतिबद्ध होके काम करत हे। ओमन किहीन कि सरकार गठन के बाद अट्ठारह लाख प्रधानमंत्री आवास निर्माण ल मंजूरी दे गेहे। ए घर बनाय के काम तेजी ले कराय जात हे। ओमन अधिकारी मन ले किहीन कि सबो निर्माण काम समय-सीमा के भीतरी गुणवत्ता के संग करे जाय। श्री चौधरी ह लोगन ल महतारी वंदन योजना, कृषक उन्नति योजना अउ रामलला दर्शन योजना म करे जात सरकार के कामकाज के जानकारी घलो दीन।
तोखन साहू-राजिम
केन्द्रीय राज्यमंत्री तोखन साहू काली राजिम म राखे गे भक्त माता राजिम जयंती कार्यक्रम म संघरीन। ए मउका म प्रदेस साहू संघ ह मां कर्मा के नाव म टिकिट जारी करवाय खातिर केन्द्रीय राज्यमंत्री के सम्मान करीन। कार्यक्रम म बोलत ओमन किहीन कि राजिम माता के जीवन हमन ल भक्ति, त्याग, अउ समर्पण सिखोथे। ओमन यहू किहीन कि माता राजिम ह साहू समाज के गौरव होय के संगेसंग मानव समाज बर आदर्स हवय। जिखर सामाजिक संदेस आज घलो जाने जाथे।
राज्यपाल-परिवीक्षाधीन अधिकारी
राज्यपाल रमेन डेका ह आज राजभवन म भारतीय वन सेवा के दू हजार तेईस बैच के परिवीक्षाधीन अधिकारी मन ले भेंट करीन। श्री डेका ह एमन ल बधाई अउ सुभकामना देवत किहीन कि अपन कर्तव्य के पालन ईमानदारी अउ अनुसासन के संग करय। ओमन पर्यावरण संरक्षण म जोर देवत वन के सुरक्षा अउ रखरखाव ल देस के बिकास बर जरूरी बतईन। राज्यपाल ह परिवीक्षा अधिकारी मन ल अपन काम म नवाचार करे बर प्रेरित करीन।
राष्ट्रीय युवा महोत्सव
नई दिल्ली के भारत मंडपम म ग्यारह अउ बारह जनवरी के ‘‘विकसित भारत यंग लीडर डायलॉग‘‘ थीम म राखे जात राष्ट्रीय युवा महोत्सव म संघरे बर छत्तीसगढ़ ले चुने गे पचहत्तर युवा दिल्ली गीन। दिल्ली जाय के पहिली खेल मंत्री टंकराम वर्मा के रायपुर स्थित निवास म बिसेस कारीकरम राखे गीस, जेमा मुख्यमंत्री विष्णुदेव साय विधानसभा अध्यक्ष डॉक्टर रमन सिंह अउ भाजपा के प्रदेस अध्यक्ष किरण सिंह देव समेत मंत्री अउ विधायक सामिल होइन। ए मउका म मुख्यमंत्री ह युवा मन ले किहीन कि ‘‘छत्तीसगढ़िया सबले बढ़िया‘‘ के आत्मविश्वास संग युवा महोत्सव म सुघ्घर प्रदर्सन करय। ए सबो झन ल मुख्यमंत्री अउ विधानसभा अध्यक्ष समेत राज्य मंत्रिमंडल के सदस्य अउ विधायक मन ह अपन सुभकामना दीन।
अमित कुमार-राष्ट्रपति पुलिस पदक
छत्तीसगढ़ पुलिस म खुफिया विभाग के प्रमुख एडीजी अमित कुमार ल विशिष्ट सेवा बर राष्ट्रपति पुलिस पदक ले सम्मानित करे गेहे। बछर उन्नीस सौ अंठानवे बैच के आईपीएस अधिकारी अमित कुमार ल ए सम्मान काली नई दिल्ली म केन्द्रीय गृहमंत्री अमित शाह ह दीन। अमित कुमार ल ए सम्मान केन्द्रीय प्रतिनियुक्ति म राहत करे गे बने काम बर दे गेहे। श्री कुमार सीबीआई के संयुक्त निदेशक नीति के पद म घलो काम करे हे। ओमन मूलरूप ले बिहार के रहवइया हरय। छत्तीसगढ़ म रईपुर, बिलासपुर समेत कई जिला के पुलिस अधीक्षक रेहे के संगेसंग सीबीआई म बारह बछर तक आने-आने पद म काम करीन।
वाहन चालक-सम्मान
‘अंतर्विभागीय लीड एजेंसी सड़क सुरक्षा‘ कोति ले प्रदेस म पहिली घांव ड्राईवर मनके सम्मान करे बर रईपुर म चौबीस जनवरी के ‘सारथी सम्मान समारोह‘ राखे जाही। अइसन ड्राईवर जिखर व्यवस्था बने हवय, उंखर सम्मान करे जाही।
राज्य स्तर सरकारी, प्राईवेट, व्यावसायिक अउ संस्थान ले बने सारथी-ड्राईवर मन ले पन्द्रह जनवरी तक अंतर्विभागीय लीड एजेंसी सड़क सुरक्षा के ई-मेल म प्रस्ताव मंगाय गेहे। जिला स्तर म क्षेत्रीय परिवहन अधिकारी अउ यातायात प्रभारी मन ल सम्मानित होवइया ड्राईवर मनके नामांकन भेजे जाही। खबर के मुताबिक प्रदेस म एक ले इकतीस जनवरी तक राष्ट्रीय सड़क सुरक्षा माह मनाय जात हे।
श्री नारायणन-इसरो अध्यक्ष
केन्द्र सरकार ह वी. नारायणन ल भारतीय अंतरिक्ष अनुसंधान संगठन-इसरो के नवा अध्यक्ष अउ अंतरिक्ष विभाग के सचिव बनाय हे। ओमन चौदह जनवरी के कार्यभार संभालीहीं। इसरो के अभी के अध्यक्ष एस. सोमनाथ के ओमन जघा लीही। श्री नारायणन अभी केरल के वलियामाला म इसरो के द्रव प्रणोदन प्रणाली केन्द्र-एल.पी.एस.सी. के निदेसक हवय।
माओवादी पहचान
नारायणपुर जिला म पाछु चार जनवरी के होय मुठभेड़ म मारे गए पांच झिन माओवादी के चिन्हारी कर ले गेहे। बस्तर रेंज के पुलिस महानिरीक्षक सुंदरराज पी. ह बतईन कि मारे गे माओवादी मन उपर इक्कीस लाख रूपिया के इनाम घोषित रिहीस। इंखर चिन्हारी पी.पी.सी.एम., पी.एल.जी.ए. प्लाटून नंबर-बत्तीस के सदस्य देवसिंह, दिनेश, सुमती, सुकमती अउ गट्टाकाल मिलिसिया कमांडर महेश के रूप म होय हे।
खबर के मुताबिक तीन जनवरी के नारायणपुर जिला के दक्षिण अबूझमाड़ क्षेत्र म माओवादी मनके होय के खुफिया जानकारी मिले के बाद स्पेशल टॉस्क फोर्स अउ डिस्ट्रिक्ट रिजर्व गार्ड के टीम तलाशी अभियान म निकले रिहीन। इही दउरान उंखर माआवोदी मन संग मुठभेड़ होगे। एमा पांच माओवादी मारे गे रिहीन। उहें, डीआरजी के एक हेड कांस्टेबल सहीद होगे रिहीस।
धान खरीदी
प्रदेस म किसान मन ले समर्थन कीमत म धान बिसाय के काम चलत हे। अभी तक करीबन एक सौ छह लाख मीटरिक टन धान बिसाय गेहे, जेखर बर साढे़ बीस लाख ले जादा किसान मन ल बैंक लिकिंग व्यवस्था म तेईस हजार सात सौ नब्बे करोड़ रूपिया ले जादा के भुगतान करे गेहे। किसान मन ले धान बिसाय के काम इकतीस जनवरी तक करे जाही।