भारत के पूर्व प्रधानमंत्री डॉक्टर मनमोहन सिंह के काली नई दिल्ली म अखिल भारतीय आयुर्विज्ञान संस्थान एम्स म निधन होगे। ओमन बयानवे बछर के रिहीन अउ लंबा बेरा ले बीमार रिहीन।
राष्ट्रपति द्रौपदी मुर्मु, उपराष्ट्रपति जगदीप धनखड़ अउ प्रधानमंत्री नरेंद्र मोदी ह पूर्व प्रधानमंत्री डॉक्टर मनमोहन सिंह के निधन म शोक जतइन हे। राष्ट्रपति, उपराष्ट्रपति अउ प्रधानमंत्री ह आज नई दिल्ली म डॉक्टर रमन सिंह ल ओखर आवास म श्रध्दांजलि दीन।
छत्तीसगढ़ के राज्यपाल रमेन डेका, मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह, नेता प्रतिपक्ष डॉक्टर चरणदास महंत, पूर्व मुख्यमंत्री भूपेश बघेल अउ प्रदेस कांग्रेस अध्यक्ष दीपक बैज ह पूर्व प्रधानमंत्री डॉक्टर मनमोहन सिंह के निधन उपर गहरा दुःख व्यक्त करीन हे। राज्यपाल ह राजभवन म राखेगे शोकसभा म डॉक्टर सिंह के फोटू उपर पुष्पांजलि अर्पित करके श्रध्दांजलि दीन। राज्यपाल ह किहीन कि डॉक्टर मनमोहन सिंह के जवई ह पूरा देस बर एक ठिन अपूरणीय क्षति हरय। ओमन किहीन कि डॉक्टर सिंह ह भारतीय राजनीति अउ अर्थव्यवस्था म महत्वपूर्ण भूमिका निभइन। ओमन दू हजार चार ले दू हजार चौदह तक भारत के प्रधानमंत्री रिहीन अउ ओखर कार्यकाल म देस म कई ठिन आर्थिक सुधार होइस।
मुख्यमंत्री विष्णुदेव साय ह किहीन कि पूर्व प्रधानमंत्री, प्रख्यात अर्थशास्त्री डॉक्टर मनमोहन सिंह के निधन के समाचार अत्यंत दुखद हरय। ओमन किहीन कि डॉक्टर मनमोहन सिंह अर्थशास्त्र के ओ दिग्गज म ले एक रिहीन, जउन ह देस के वित्त मंत्री, रिजर्व बैंक के गवर्नर अउ योजना आयोग के प्रमुख जइसे महत्वपूर्ण पद मन म रिहीन।
राज्य सरकार ह पूर्व प्रधानमंत्री डॉक्टर मनमोहन सिंह के सम्मान म छब्बीस दिसंबर ले एक जनवरी तक सात दिन के राजकीय शोक के घोसना करे हे। ए अवधि म प्रदेस के सरकारी कार्यालय अउ संस्थान मन म राष्ट्रीय ध्वज आधा झुके रिही अउ कोनो आधिकारिक मनोरंजन के कारीकरम नइ होही। ए संबंध म सामान्य प्रशासन विभाग ह जम्मो विभाग, राजस्व मंडल के अध्यक्ष, जम्मो विभागाध्यक्ष, संभागायुक्त, कलेक्टर अउ संयुक्त कलेक्टर मन ल पत्र लिखे हे।
इही बीच, राज्यपाल रमेन डेका ह राष्ट्रीय शोक के अवधि म अपन जम्मो पहिली के निर्धारित कारीकरम स्थगित कर दीन हे।
नगरीय निकाय/पंचायत चुनाव
प्रदेस म नगरीय निकाय अउ पंचायत चुनाव एके संग होही अउ दूनों चुनई म वोट बैलेट पेपर ले डाले जाही। उपमुख्यमंत्री अरूण साव ह आज रईपुर निवास कार्यालय म पत्रकार मनले चर्चा करत ए जानकारी दीन। ओमन किहीन कि चुनाव कराय के तियारी राज्य निर्वाचन आयोग ह पूरा कर लेहे। उपमुख्यंत्री ह बतइन कि बोर्ड परीक्षा ले पहिली पंचायत अउ नगरीय निकाय चुनाव होही। श्री साव ह बतइन कि नगरीय निकाय मन म सात जनवरी तक अध्यक्ष अउ महापौर पद बर आरक्षण के प्रक्रिया पूरा करे जाही। जइसे ही आरक्षण के प्रक्रिया पूरा होही। ओखर सूचना चुनाव आयोग ल भेजे जाही अउ ओखर बाद चुनाव कारीकरम घोसित करे जाही।
श्री साव ह बतइन कि पहिली मतदाता सूची साल म एक घांव तियार करे जात रिहीस, अब हर तीन महिना म सूची बनाय के निर्णय ले गेहे, ताकि नवा मतदाता मन ल अपन नांव जोड़वाय म आसानी होवय।
इही बीच, पंचायत चुनाव बर वार्ड मनके आरक्षण के प्रक्रिया तीन जनवरी ले सुरू होही अउ ग्यारा जनवरी तक पूरा कर ले जाही। पंचायत आरक्षण के कारीकरम म दूसरइया बार बदलाव करे गेहे।
भाजपा-बैठक
भाजपा के प्रदेस कार्यालय कुशाभाऊ ठाकरे परिसर म प्रदेस प्रभारी नितिन नबीन अउ प्रदेस अध्यक्ष किरण सिंहदेव ह आज संगठन चुनाव के समीक्षा करीन। एखर अलावा ए परिसर म नगरीय निकाय अउ त्रिस्तरीय पंचायत चुनाव बर महामंत्री अउ संभाग प्रभारी के घलो बइठका आयोजित करे गीस। ए दउरान प्रदेस प्रभारी नितिन नबीन, क्षेत्रीय संगठन महामंत्री अजय जामवाल अउ भाजपा प्रदेस अध्यक्ष किरण सिंह देव मौजूद रिहीन।
उच्च न्यायालय-जल जीवन मिशन
छत्तीसगढ़ उच्च न्यायालय ह जल-जीवन मिशन के काम म होवत लापरवाही ल गंभीरता से लेहे। उच्च न्यायालय के मुख्य न्यायाधीश रमेश सिन्हा ह मीडिया रिपोर्ट ल संज्ञान म लेवत पहिली घांव सीतकालिन अवकास के दिन जनहित याचिका के सुनवाई करीन। चीफ जस्टिस रमेश सिन्हा अउ जस्टिस रविन्द्र अग्रवाल के डिवीजन बेंच ह जनहित याचिका के सुनवाई के बाद मुख्य सचिव अउ लोक स्वास्थ्य अउ अभियांत्रिकी विभाग के सचिव ल नोटिस जारी करके जवाब पेस करे बर किहीन हे। अगला सुनवाई बर कोर्ट ह आठ जनवरी के तारीख तय करे हे।
उहें, एक दूसर जनहित याचिका म घलो सुनवाई करत काली उच्च न्यायालय ह बस्तर के सुकमा अउ तीर-तखार के एक सौ नब्बे गांव मन म सोलर स्ट्रीट लाईट फर्जीवाड़ा ल लेके ऊर्जा विभाग ले जानकारी मांगिन। सुनवाई के दउरान चीफ जस्टिस ह राज्य शासन ले पूछिन कि बिना टेंडर के गांव मन म सोलर स्ट्रीट लाईट कइसे लग गे। संबंधित विभाग के पत्र अउ आपत्ति के बाद भी सोलर स्ट्रीट लाईट काकर अनुमति ले लगाय गीस। डिवीजन बेंच ह ऊर्जा सचिव ल नोटिस जारी करके सपथ पत्र के संग जवाब पेस करे के निरदेस दीन हे। डिवीजन बेंच ह राज्य सरकार ले अट्ठारा करोड़ रूपिया के ब्यौरा देबर किहीन।
राष्ट्रीय गुणवत्ता आश्वासन मानक प्रमाण-पत्र
केंद्रीय स्वास्थ्य अउ परिवार कल्याण मंत्रालय ह उत्कृष्ट स्वास्थ्य सेवा अउ मरीज मन के बेहतर इलाज उपलब्ध कराय वाला राज्य के नौ ठिन स्वास्थ्य केंद्र मन ल राष्ट्रीय गुणवत्ता आश्वासन मानक प्रमाण पत्र प्रदान करे हे। एमा जांजगीर-चांपा, सूरजपुर, महासमुंद, दुरूग अउ बिलासपुर के स्वास्थ्य केंद्र सामिल हे। केंद्र सरकार ह राष्ट्रीय गुणवत्ता आश्वासन मानक मन उपर खरा उतरने वाला स्वास्थ्य केंद्र मन ल एनक्यूएएस प्रमाण-पत्र ले सम्मानित करे हे। स्वास्थ्य मंत्री श्याम बिहारी जायसवाल ह उत्कृष्टता प्रमाण पत्र हासिल करइया ए जम्मो अस्पताल मनके डॉक्टर अउ दूसर मेडिकल स्टाफ ल बधई दीन हे।
बतादन कि केंद्रीय स्वास्थ्य मंत्रालय के टीम ह ए साल नवंबर म ए नौ स्वास्थ्य केंद्र मन म मरीज मन बर उपलब्ध सेवा के गुणवत्ता के परीक्षण करे रिहीस।
सिलेंडर विस्फोट-मौत
राजनांदगांव जिला के भंवरमरा गांव म एक घर म सिलेंडर फूटे ले तीन लोगन मन के मउत होगे। मृतक म पति-पत्नी अउ उंखर बेटी सामिल हे। मिले जानकारी के अनुसार खाना बनाय के बेरा सिलेंडर फट गीस अउ घर म आगी बर गे। सूचना मिलतेच पुलिस अउ दमकल टीम मउका उपर पहुंचिस अउ आगी उपर काबू पाईस। पुलिस मामला के जांच करत हे।
युवक-मौत
दंतेवाड़ा के बारसूर थाना इलाका म इंद्रावती नदिया म बोहाय ले एक झिन तेरह साल के लइका लापता होगे हे। मिले जानकारी के अनुसार लापता बालक धमतरी के रहइया हे, जउन अपन संगी मन संग घूमे गे रिहीस। इंद्रावती नदी के सात धार जलप्रपात म फोटू खिचाय के दउरान ओखर गोड़ फिसलगे अउ ओहा गहरा पानी म गिर गे। समाचार लिखे जाय तक लइका के पता नइ चल पाय हे। पुलिस अउ गोताखोर के टीम लइका के पतासाजी म जुटे हे।
ऐति, जांजगीर-चांपा जिला स्थित देवरी म हसदेव नदी म नहात समय दू झिन युवक डूब गीन। एमा ले एक झिन युवक के मउत होगे। उहें, एक झिन दूसर युवक के खोज जारी हे। ए मामला पंतोरा थाना क्षेत्र के बताय जात हे।
बातों-बातों में
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत केंद्र सरकार डहार ले सुरू करे गे सात दिन कि राष्ट्रव्यापी टीबी उन्मूलन अभियान उपर डॉक्टर खेमराज सोनवानी ले लेगे भेंटवार्ता के प्रसारण करे जाही। ए कारीकरम काली अट्ठाईस दिसंबर के बिहनिया साढ़े दस बजे आकाशवाणी केन्द्र रायपुर ले प्रसारित होही। एला छत्तीसगढ़ के सबो आकाशवाणी केंद्र मन रिले करही।