छत्तीसगढ़ विधानसभा के सीतकालीन सत्र के आज समापन होगे हे। विधानसभा म आज सून्यकाल के दउरान कांग्रेस विधायक मन डहार ले प्रदेस म बिगड़त कानून बेवस्था ल लेके स्थगन प्रस्ताव लाय गीस। जेला उप मुख्यमंत्री अउ गृहमंत्री विजय शर्मा के वक्तव्य के बाद विधानसभा अध्यक्ष डॉक्टर रमन सिंह ह अग्राह्य कर दीन। स्थगन प्रस्ताव के ग्राह्यता उपर चर्चा के दउरान सत्ता पक्ष अउ विपक्ष के नोक-झोंक होइस। हल्ला-गुल्ला के बीच विधानसभा अध्यक्ष ह सदन के कार्रवाई पांच मिनट बर स्थगित कर दीन। सदन के कार्रवाई दुबारा सुरू होय म कांग्रेस विधायक उमेश पटेल अउ दूसर कांग्रेस विधायक मन विधानसभा अध्यक्ष ले स्थगन प्रस्ताव ल ग्राह्य करे के मांग करत गर्भगृह म पहुंच के नारे बाजी करे लगिन। विधानसभा के नियम के अनुसार ए जम्मो विधायक खुदे निलंबित होगिन। बाद म विधानसभा अध्यक्ष ह जम्मो कांग्रेस विधायक के निलंबन ल समाप्त कर दे गीस, लेकिन कांग्रेस विधायक मन विधानसभा परिसर स्थित महात्मा गांधी के मूर्ति करा धरना दीन अउ बांकी बांचे कार्रवाई म हिस्सा नइ लीन।
भाजपा विधायक धरमलाल कौशिक ह सदन म आज ध्यानाकर्षण प्रस्ताव के जरिया पाछू राज्य सरकार के दउरान दवा खरीदी म वित्तीय अनियमितता के मामला उठाइन। एमा स्वास्थ्य मंत्री श्याम बिहारी जायसवाल ह छत्तीसगढ़ मेडिकल सर्विसेज कॉर्पोरेशन कोति ले करे गे दवा के खरीदी म वित्तीय अनियमितता के जांच आर्थिक अपराध अन्वेषण ब्यूरो-ईओडब्ल्यू ले जांच कराय के घोसना करीन।
विस-समाचार-02
प्रश्नकाल के दउरान कांग्रेस विधायक लखेश्वर बघेल ह आदिवासी क्षेत्र मन म आश्रम -छात्रावास अउ पोटोकेबिन म लइका मनके मउत के मामला उठाइन। अपन लिखित जवाब म मंत्री रामविचार नेताम ह बतइन कि पाछू बारह महिना म अलग-अलग कारण के सेति चौदह लइका मनके मउत होय हे। एमा श्री बघेल ह किहीन कि ए साल म पच्चीस ले तीस लइका मनके मउत हो चुके हे। ओमन बतइन कि ओखर करा एखर पूरा सूची हरय। एमा मंत्री श्री नेताम ह जम्मो मामला मनके जांच कराय के घोसना करीन अउ किहीन कि जउन भी दोषी पाय जाही ओखर उपर कड़ा कार्रवाई करे जाही।
विधानसभा म आज उप मुख्यमंत्री अउ पंचायत अउ ग्रामीण विकास मंत्री विजय शर्मा ह छत्तीसगढ़ पंचायत राज संशोधन अध्यादेस-दू हजार चौबीस ल सदन के पटल म राखिन। उहें, भाजपा सदस्य अजय चंद्राकर ह प्रस्तुत अशासकीय संकल्प म प्रदेस म स्थापित पोहा उद्योग मन म मंडी सुल्क दू रूपिया प्रति सैकड़ा के जघा एक प्रतिसत याने एक रूपिया लेके प्रस्ताव ल ग्राह्य करे गीस।
विस-समाचार-03
छत्तीसगढ़ विधानसभा सत्र समापन मउका म अपन उदबोधन म विधानसभा अध्यक्ष डॉक्टर रमन सिंह ह बतइन कि ए सत्र म विनियोग विधेयक समेत सात विधेयक के सूचना मिलीस अउ जम्मो विधेयक चर्चा के बाद पारित होगे।
सत्र के दउरान करीबन इक्कीस घंटा चर्चा होइस। ए स्थगन प्रस्ताव के सूचना के ग्राह्यता उपर चर्चा कराय गीस।
परीक्षा पे चर्चा
प्रधानमंत्री नरेंद्र मोदी के ‘‘परीक्षा पे चर्चा‘‘ के आठवां संस्करण ए बछर नई दिल्ली के भारत मंडपम म आयोजित करे जाही। ए कारीकरम विद्यार्थी, शिक्षक अउ पालक मन ल परीक्षा संबंधी तनाव कम करे अउ शिक्षा ल एक सकारात्मक अनुभव बनाय के उद्देस्य ले हर साल आयोजित करे जात हे।
छत्तीसगढ़ म ए कारीकरम के आयोजन बर स्कूल शिक्षा सचिव सिध्दार्थ कोमल सिंह परदेशी ह जम्मो जिला कलेक्टर मन ल निरदेस दीन हे। ए साल प्रदेस के सब्बो जिला मन म ‘परीक्षा पे चर्चा‘ म जादा ले जादा भागीदारी सुनिश्चित करे बर व्यापक प्रचार-प्रसार के योजना तियार करे गेहे। जम्मो स्कूल मन ल निरदेस दे गेहे, कि ए कारीकरम के जानकारी विद्यार्थी, शिक्षक अउ पालक मन तक पहुंचाय। जम्मों स्कूल हैशटैग पीपीसी-दू हजार पच्चीस के उपयोग करके खुद के पोस्टर, क्रिएटिव वीडियो तियार करके साझा करय। चयनित क्रिएटिविटी ल माईजीओवी प्लेटफॉर्म म दिखाय जाही।
‘परीक्षा पे चर्चा‘ के तहत प्रतियोगिता के आयोजन शिक्षक, विद्यार्थी अउ पालक मन बर चौदह दिसंबर ले आगू बछर के चौदह जनवरी तक करे जात हे। प्रतियोगिता म बहुविकल्पीय प्रश्न माईजीओवी के प्लेटफॉर्म म पूछे जाही। जम्मो प्रतिभागी मन ल सर्टिफिकेट दे जाही अउ चयनित प्रतिभागी मन ल प्रधानमंत्री के संग गोठबात करे के मउका मिलही।
रेल-टर्मिनल
दक्षिण पूर्व मध्य रेलवे के रईपुर रेलमंडल के अंतर्गत आज नवा रईपुर म नवा गति शक्ति रेल मल्टीमॉडल कार्गो टर्मिनल के सुभारंभ करे गीस। ए टर्मिनल के बने ले प्रदेस म उद्योग के निवेस ल बढ़ावा मिलही। संगेसंग परिवहन बर माल जिनिस के रख-रखाव आसान अउ सुरक्षित होही।
रोजगार मेला
केंद्र सरकार डहार ले तेईस दिसंबर के देस के पैंतालिस ठन जघा मन म दूसरइया चरण के रोजगार मेला के आयोजन करे जाही। एमा केंद्र सरकार के आने-आने मंत्रालय अउ विभाग म चयनित युवा मन ल नियुक्ति पत्र दे जाही। रईपुर के आरंग स्थित केंद्रीय रिजर्व पुलिस बल के केंद्र म घलो रोजगार मेला के आयोजन करे जाही। एमा मुख्य अतिथि के रूप म केंद्रीय आवास अउ सहरी राज्य मंत्री तोखन साहू सामिल होही। ए दउरान केंद्र सरकार अउ दूसर विभाग के विभागाध्यक्ष कोति ले चार सौ ले जादा केंद्रीय सशस्त्र बल अउ दूसर विभाग म चयन होय अभ्यर्थी मन ल नियुक्ति पत्र बांटे जाही।
राज्यपाल-अंतर्राष्ट्रीय सम्मेलन
राज्यपाल रमेन डेका ह आज रईपुर स्थित पंडित रविशंकर शुक्ल विश्वविद्यालय म राखेगे भौतिक विज्ञान के अंतर्राष्ट्रीय अकादमी के इकतीसवां सम्मेलन म सामिल होइन।
मउका म राज्यपाल ह पंडित रविशंकर शुक्ल विश्वविद्यालय के एनालॉटिकल इंस्ट्रमेंट लेबोरेटरी अउ नवप्रवर्तन प्रौद्योगिकी अउ उद्यमिता फाउंडेशन के उद्घाटन अउ शब्दकोश के विमोचन घलो करे गीस।
मंडी शुल्क-छूट
राज्य सरकार ह दलहन, तिलहन अउ गंहू उपर मंडी सुल्क अउ कृषक कल्याण सुल्क म तेरह मार्च दू हजार चौबीस ले इकतीस मार्च दू हजार छब्बीस तक पूर्ण छूट प्रदान करे हे। छत्तीसगढ़ चेंबर ऑफ कामर्स एंड इंडस्ट्रीज ह ए महत्वपूर्ण निर्णय बर मुख्यमंत्री विष्णुदेव साय के आभार जतइन हे।
जवान घायल
नारायणपुर जिला म माओवादी मन डहार ले करे गे आईईडी बिस्फोट म दू झिन जवान घायल होगे हे। मिले जानकारी के अनुसार जिला के कोहकामेटा स्थित पुलिस कैम्प कच्चापाल ले डिस्ट्रिक्ट रिजर्व गार्ड-डीआरजी अउ सीमा सुरक्षा बल-बीएसएफ के जवान मनके संयुक्त टीम सर्चिंग बर निकले रिहीस। आज बिहनिया ग्राम कच्चापाल ले तीन किलोमीटर दूर रद्दा म माओवादी मन डहार ले आईईडी ब्लास्ट करे गीस। ए घटना म डीआरजी के दू जवान-आरक्षक जनक पटेल अउ आरक्षक घासीराम मांझी घायल होगिन, जेमन ल प्राथमिक उपचार के बाद जिला अस्पताल लाय गेहे। दूनों जवान मनके हालत खतरा ले बाहिर हे।
अनुकम्पा नियुक्ति-स्वीकृति पद
राज्य सरकार ह प्रदेसभर के नगर निगम, नगर पालिका अउ नगर पंचायत मन म अनुकम्पा नियुक्ति बर तृतीय अउ चतुर्थ श्रैणी के कुल तीन सौ तिरपन नवा पद के स्वीकृति देहे। एमा भृत्य के दू सौ पचहत्तर, सफाई कामगार के इक्कीस, कुली के उन्नीस, तृतीय श्रेणी के सात, चौकीदार अउ माली के पांच-पांच, वाहन चालक के एक अउ बीस ठन दूसर पद सामिल हरय।
बातों-बातों में
सुनइया, मन ल बतादन कि प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत केंद्रीय आयुष मंत्रालय डहार ले चलाय जात देशव्यापी‘‘देश का प्रकृति परीक्षण अभियान उपर आयुष काउंसिल छत्तीसगढ़ के रजिस्ट्रार डॉक्टर संजय शुक्ला ले लेगे भेंटवार्ता के प्रसारण करे जाही। ए कारीकरम काली इक्कीस दिसंबर के आकाशवाणी केन्द्र रायपुर ले बिहनिया साढ़े दस बजे ले प्रसारित होही। एला छत्तीसगढ़ के सबो आकाशवाणी केंद्र मन रिले करही।