मुख्यमंत्री विष्णुदेव साय ह काली नई दिल्ली म केंद्रीय गृहमंत्री अमित शाह ले भेंट करीन। ए दउरान मुख्यमंत्री ह गृहमंत्री ल बस्तर ओलंपिक के समापन अउ पुलिस आवार्ड कारीकरम म सामिल होय बर नेवता दीन, जेला गृहमंत्री ह मंजूर कर लीन। मुख्यमंत्री ह बतइन कि अभी तक बस्तर ओलंपिक म एक लाख पैंसठ हजार ले जादा युवा भाग लेवत हे। ए ओलंपिक म हॉकी, फुटबॉल, ओलंपिक, कबड्डी अउ वॉलीबॉल समेत ग्यारा ठिन पारंपरिक खेल ल सामिल करे गेहे। भेंट के बेरा मुख्यमंत्री ह केंद्रीय गृहमंत्री श्री शाह ल राज्य म माओवादी विरोधी अभियान के स्थिति अउ बस्तर संभाग म चलाय जात विकास काम के संबंध म बतइन। मुख्यमंत्री ह किहीन कि राज्य सरकार अउ सुरक्षा बल के मेलजोल के सेति बस्तर संभाग म माओवादी घटना म कमी आय हे। मुख्यमंत्री ह भरोसा जतइन कि बछर दू हजार छब्बीस तक छत्तीसगढ़ ल माओवाद ले छुटकारा मिल जही। ओमन केंद्रीय गृहमंत्री ल बतइन कि आत्मसमर्पण करइया माओवादी अउ परभावित परिवार के पुनर्वास बर योजना ल प्राथमिकता दे जावत हे। प्रधानमंत्री आवास योजना म पंद्रह हजार मकान बनाय के निर्माण काम ल जल्दी पूरा करे के निरदेस दीन हे। जेखर ले परभावित परिवार ल सुरक्षित अउ सम्मान जनक जीनगी दे जा सकय। ए मउका म मुख्यमंत्री अरूण साव अउ विजय शर्मा घलो मौजूद रिहीन।
राज्य निर्वाचन आयुक्त-बैठक
राज्य निर्वाचन आयुक्त अजय सिंह ह राज्य म आरक्षण के कार्रवाही समय सीमा म करे के निरदेस दीन हे। ओमन किहीन कि परिसीमन अउ आरक्षण के काम चुनाव बर महत्ता के होथे। राज्य निर्वाचन आयुक्त के अगुवई म आज नगर पालिका अउ स्त्रिस्तरीय पंचायत चुनाव बर समान्य प्रशासन विभाग नगरीय, प्रशासन अउ पंचायत विभाग के बड़का अधिकारी मन के बइठका होइस।
उहें, काली कांकेर म बस्तर संभाग म नगरीय निकाय अउ त्रिस्तरीय पंचायत चुनाव के तियारी के संबंध म समीक्षा बइठका राखे गीस। बइठका म बस्तर संभाग के आयुक्त डोमन सिंह, पुलिस महानिरीक्षक सुंदरराज पी. समेत सबो जिला के कलेक्टर, पुलिस अधीक्षक अउ उप जिला निर्वाचन अधिकारी सामिल होइन। ए दउरान राज्य निर्वाचन आयुक्त ह सबो अधिकारी मन ल बस्तर संभाग म सातगोई अउ निष्पक्षता के संग सांतिपूर्ण चुनाव के तियारी सुरक्षा व्यवस्था, मतदान केंद्र के स्थिति अउ चुनाव ले जुड़े काम के समीक्षा करीन।
हाईकोर्ट पुलिस आरक्षक भर्ती
छत्तीसगढ़ उच्च न्यायालय ह पुलिस आरक्षक भर्ती काम म लगे रोक हटा देहे। हाईकोर्ट म काली ए मामला के सुनवई न्यायाधीस राकेश मोहन पाण्डेय के बेंच म होइस। सुनवाई के बाद बेंच ह अपन फैसला म पुलिस करमचारी मनके लइका मन ल मिलइया छूट ल हटा देहे। उहें, शहीद पुलिस करमचारी मन के लइका अउ माओवाद परभावित क्षेत्र म काम करइया जवान के लइका मन ल छूट देके फैसला लेहे। कोर्ट ह एला आर्टिकल चौदह अउ सोलह के उल्लंघन मोन हे, जेखर ले सामान्य पुलिस करमचारी मनके लइका मन बर छूट के फायदा असंवैधानिक माने गीस। अब भर्ती के काम फिजिकल टेस्ट के बाद आगू बढ़ही।
राज्यपाल-धमतरी
राज्यपाल रमेन डेका ह काली धमतरी जिला के दउरा के बेरा जिला स्तरीय अधिकारी मनके बइठका लेके शासन के फ्लैगशिप योजना के समीक्षा करीन। बइठका म राज्यपाल ह किहीन कि पात्र हितग्राही मन ल शासन के आने-आने योजना के फायदा देवाय जाय राज्यपाल ह जिला म जल अउ पर्यावरण संरक्षण बर करे जात परयास के जानकारी लीन। ओमन जिला म ‘‘एक पेड़ मां के नाम‘‘ म लगाय गे पउधा के जानकारी लेवत किहीन कि लगाय गे पउधा ल जीवित राखे बर लोगन ल जागरूक करंय। बइठका म राज्यपाल ह जिला म चलाय जात टी.बी. उन्मूलन कारीकरम प्रधानमंत्री आवास योजना, एनसीसी अउ सड़क सुरक्षा समेत कई ठन बिसय म गोठबात करीन।
माओवादी मुठभेड़-पूर्व सरपंच हत्या
नारायणपुर जिला म काली सुरक्षा बल अउ माओवादी मनके बीच होय मुठभेड़ म डीआरजी के प्रधान आरक्षक वीरेन्द्र कुमार सोरी के मउत होगे हे, ओखर पार्थिव सरीर ल आज नारायणपुर के पुलिस लाइन लाय गीस, जिहां बस्तर आईजी सुंदरराज पी. अउ जिला के पुलिस अधीक्षक प्रभात कुमार, कलेक्टर बिपिन मांझी ह जवान ल श्रध्दांजलि दीन। एखर बाद जवान के पार्थिव सरीर ल उंखर गृहग्राम कांकेर जिला के भरीम पानी बर भेजे गीस।
खबर के मुताबिक पाछू तीन दिसंबर के नारायणपुर ले डीआरजी अउ बीएसएफ के टीम अबूझमाड़ क्षेत्र के सोनपुर अउ कोहकामेटा बर निकले रिहीन, इही दउरान काली सुरक्षा बल अउ माओवादी मनके बीच मुठभेड़ होइस, जेमा डीआरजी के प्रधान आरक्षक के मउत होगे।
मुख्यमंत्री विष्णुदेव साय ह सोशल मीडिया प्लेटफॉर्म एक्स म पोस्ट करके घटना म दुःख जतइन हे। ओमन प्रधान आरक्षक वीरेन्द्र कुमार सोरी के सहादत ल नमन करीन हे।
इही बीच, बीजापुर जिला म माओवादी मन ह आज दू पूर्व सरपंच के हत्या कर देहे। पाछू दू नवंबर के भैरमगढ़ थाना क्षेत्र के पूर्व सरपंच सुकलू फरसा अउ नैमेड़ थाना क्षेत्र के कडेर के पूर्व सरपंच सुखराम अवलम के आने-आने जघा ले अगुवा करे रिहीन।
राजभवन-स्थापना दिवस
‘‘एक भारत श्रेष्ठ भारत‘‘ कारीकरम म आज राजभवन म छत्तीसगढ़ समेत मध्यप्रदेस, पंजाब, हरियाणा अउ केंद्रशासित प्रदेस चंडीगढ़ के स्थापना दिवस मनाय गीस। ए मउका म राज्यपाल ह किहीन कि ‘एक भारत श्रेष्ठ भारत‘ कारीकरम के उद्देस्य सिरिफ सांस्कृतिक मेलजोल तक सीमित नइ हे। ए कारीकरम हमर देस के आने-आने राज्य म बसे मन ल एक सूत्र म पिरोय के सुघ्घर परयास हे, जेखर ले भारत के एकता अउ अखण्डता अउ जादा मजबूत होही। कारीकरम म आने-आने विश्वविद्यालय के पढ़ईया लइका मन ह सबो राज्य के संस्कृति लोक परंपरा म आधारित सांस्कृतिक कारीकरम प्रस्तुत करीन।
तेंदुआ-भालू हमला-मौत
धमतरी जिला के सिंगपुर-मड़ेली गांव म तेंदुआ ह घर म सुते सियनहिन उपर हमला कर दीस, जेमा ओखर मउत होगे। घटना के सूचना मिलतेच वन विभाग के टीम मउका म पहुंचिस अउ ओखर परिवार ल छै लाख रूपिया आर्थिक मदद दे के बात किहीन। एखर पहिली परन दिन नगरीय ब्लाक म हाथी हमला म तीन बछर के नोनी के मउत होगे। उहें, सरगुजा जिला म उदयपुर वन परिक्षेत्र के गांव खम्हरिया म भालू के हमला म एक सियान गंभीर रूप ले घायल होगे हे। घायल सियान के इलाज मेडिकल कॉलेज अस्पताल म होवत हे।
अउ अब मौसम के हाल…
मौसम विभाग ह प्रदेस के कुछेक जिला म आठ अउ नौ दिसंबर के बरसा होय के संभावना जतइन हे। मौसम विभाग के मुताबिक प्रदेस म उत्तर कोति ले आवत ठंडा अउ सुष्क हवा अउ बंगाल के खाड़ी ले आवत नमी के सेति बस्तर संभाग म छूटपुट बरसा या फेर छींटा बौछार होय के संभावना हरय। अवइया दू दिन म सरगुजा संभाग अउ ओखर ले लगे जिला के न्यूनतम तापमान म तीन ले चार डिग्री सेल्सियस तक कमी आ सकत हे। उहें, मध्य छत्तीसगढ़ म दू ले तीन डिग्री सेल्सियस तक गिरावट होय के संभावना जताय हे।
अउ अब थोरकुन समाचार सार म –
– राज्यपाल रमेन डेका ह आज राजभवन म सीमा सुरक्षा बल- बीएसएफ कमांड मुख्यालय के बिसेस महानिदेसक रामप्रसाद मीना ह भेंट करीन।
– छत्तीसगढ़ उच्च न्यायालय ह सराब घोटाला के आरोपी पूर्व आईएएस अनिल टूटेजा के जमानत याचिका ल खारिज कर देहे।
– राज्य शासन ह रईपुर जिला के महादेवघाट एनीकट परिक्षेत्र के सुरक्षा, विकास अउ सौंदर्यीकरण खातिर करीबन अट्ठारा करोड़ रूपिया ले जादा के रकम मंजूर करे हे।
– काली भारत रत्न बाबा साहब डॉक्टर भीमराव अंबेडकर के पुण्यतिथि हे- ए बेरा मुख्यमंत्री विष्णुदेव साय ह ओमन ल नमन करीन हे।
अउ
– जिला रोजगार अउ स्वरोजगार मार्गदर्शन केंद्र नारायणपुर कोति ले काली छै दिसंबर के बिहनिया ग्यारा बजे ले प्लेसमेंट कैंप लगाय जाही।