बाल विवाह मुक्त भारत
केन्द्र सरकार ह आज नई दिल्ली म राष्ट्रीय अभियान ‘‘बाल विवाह मुक्त भारत‘‘ के सुरूआत करीन। केन्द्रीय महिला अउ बाल विकास मंत्री अन्नापूर्णा देवी ह अभियान के सुरूआत करत किहीन कि सरकार ह एक सौ तीस जिला के पहिचान करे हे, जिहां ए अभियान ल मुख्य रूप ले चलाय जाही। ओमन किहीन कि बाल विवाह एक अपराध हे। उहें, मानव अधिकार के उल्लंघन घलो हे। अन्नापूर्णा देवी ह किहीन कि बाल ‘‘बाल विवाह मुक्त भारत‘‘ अभियान सिरिफ दस अउ पन्द्रह दिन के नो हे, भलूक ये सरलग चलइया परयास हे।
ए कारीकरम के बेरा महिला अउ बाल विकास मंत्री ह ‘‘बाल विवाह मुक्त भारत‘‘ पोर्टल के अनावरण करीन। ए पोर्टल बाल विवाह ल रोके अउ अइसन किसम के घटना म सिकईत दरज कराय बर बनाय गेहे।
इको रेस्टोरेशन पॉलिसी
राज्य म जल्दीच इको रेस्टोरेशन पॉलिसी लागू करे जाही। वन विभाग कोति ले एखर ड्रॉफ्ट तैयार कर ले गेहे। छत्तीसगढ़, केरल के बाद देस के दूसर राज्य होही, जिहां इको रेस्टोरेशन पॉलिसी लागू होही। ए जानकारी वन मंत्री केदार कश्यप अउ वित्त मंत्री ओ.पी. चौधरी ह नवा रईपुर म ‘‘क्लाइमेट रेसीलिएंट छत्तीसगढ़ हरित अउ सशक्त भविष्य की ओर‘‘ विषय म राखे गे कार्यशाला म दीन। एखर उद्देश्य छत्तीसगढ़ अउ पूर्वी राज्य मन म जलवायु अनुकूलता अउ लो-कार्बन आधारित विकास ल बढ़ावा दे बर ज्ञान साझा करना अउ आने-आने लोगन के बीच गोठबात करवाना हे। कार्यक्रम म श्री कश्यप अउ वित्त मंत्री श्री चौधरी ह जलवायु परिवर्तन के गंभीर प्रभाव अउ ओखर ले निपटे खातिर विषय म गोठबात करीन।
शहरी आजीविका मिशन-कार्यवृद्धि
नगरीय प्रशासन विभाग ह केन्द्र कोति ले चलाय जात दीनदयाल अंत्योदय योजना-राष्ट्रीय शहरी आजीविका मिशन म तीन महीना के काम के बढ़वार करे गेहे। एखर ले मिशन के कामकाज ल इकतीस दिसंबर तक चलाय जा सकही। नगरीय प्रशासन विभाग ह ए संबंध म राज्य शहरी विकास अभिकरण ल परिपत्र जारी कर देहे।
बिजली-एमओयू
छत्तीसगढ़ राज्य बिजली उत्पादन कंपनी अउ एनटीपीसी के सहायक कंपनी मेसर्स एनटीपीसी ग्रीन एनर्जी लिमिटेड के बीच एमओयू होय हे। एखर मुताबिक ए दूनों कंपनी मिलके एक उपक्रम कंपनी बनाही, जेखर ले राज्य म करीबन दू हजार मेगावॉट क्षमता के सौर ऊर्जा परियोजना के विकास के काम करही। मुख्यमंत्री विष्णुदेव साय ह ए समझौता ल छत्तीसगढ़ म नवीकरणीय ऊर्जा के क्षेत्र म एक नवा युग के सुरूवात बताय हे। उहें, ऊर्जा सचिव अउ छत्तीसगढ़ स्टेट पावर कंपनीज़ के अध्यक्ष डॉक्टर रोहित यादव ह किहीन कि हमन नवीकरणीय ऊर्जा के क्षेत्र म गंभीरता ले काम करत एक नवा इतिहास रचबो। ए समझौता ज्ञापन म एन.जी.ई.एल. कोति ले महाप्रबंधक धीरेन्द्र जोशी अउ सी.एस.पी.जी.सी.एल. कोति ले मुख्य अभियंता गिरीश गुप्ता ह दस्तखत करीन। ए समझौता ले राज्य म हरित ऊर्जा स्त्रोत ले बढ़ मात्रा म रोजगार के मउका मिलही, जेखर ले बिजली के जरूरत के संगेसंग राज्य के विकास अउ अर्थव्यवस्था मजबूत करे म मदद मिलही।
सशस्त्र झंडा दिवस-राशि
सात दिसंबर के सशस्त्र सेना झंडा दिवस मनाय जाही। एमा राज्यपाल रमेन डेका ह आज संचालनालय सैनिक कल्याण बोर्ड ल दू लाख रूपिया के रकम दीन। ओमन लोगन ले सशस्त्र सेना झंडा दिवस के मउका म भूतपूर्व सैनिक मनके कल्याण बर जादा ले जादा रकम देके अपील करीन हे। ए दउरान राज्यपाल ह पाछु दिन माओवादी हिंसा म घायल होय कांकेर जिला के दू झिन जवान खिलेश्वर गावड़े अउ हीरामन यादव के बने इलाज खातिर पच्चीस-पच्चीस हजार रूपिया के सहायता रकम दीन हे।
अरूण साव-पोर्टल
उपमुख्यमंत्री अरूण साव ह मुंगेली म राखे गे कार्यक्रम म नगरीय प्रशासन अउ विकास विभाग के नवा विभागीय पोर्टल के सुभारंभ करीन। ए बेरा म ओमन किहीन कि एखर ले सहरी प्रसासन अउ विकास के कामकाज ल बने ढंग ले बनाय बर अउ तुरते जांच के संग काम के बढ़वार के समीक्षा म सहुलियत होही। ए पोर्टल प्रधानमंत्री नरेन्द्र मोदी के डिजिटल इंडिया अउ बछर दू हजार सैंतालीस तक विकसित भारत के विजन के दिशा म बड़े कदम हे।
स्थानीय निकाय चुनाव-बैठक
प्रदेस म होवइया स्थानीय निकाय चुनाव के तियारी ल लेके राज्य निर्वाचन आयुक्त अजय सिंह के अगुवई म काली बिलासपुर म बड़का अधिकारी मनके समीक्षा बइठका राखे गीस। एमा बिलासपुर अउ सरगुजा संभाग के आयुक्त, पुलिस महानिरीक्षक, कलेक्टर, पुलिस अधीक्षक अउ उप जिला निर्वाचन अधिकारी सामिल होइन। बइठका म चुनाव के तियारी, सुरक्षा व्यवस्था, मतदान केन्द्र अउ चुनई ले जुड़े कतकोन महत्ता के बिसय म गोठबात करे गीस। श्री सिंह ह अधिकारी मन ल चुनाव के बेरा सांतिपूर्वक माहौल बनाय राखे, मतदाता मन म जागरूकता बढ़ाय अउ वोट डारे के काम ल निष्पक्ष अउ साफगोई बनाय के निरदेस दीन। बइठका म बताय गीस कि चुनाव के तियारी ल लेके उनतीस नवंबर के रईपुर अउ दुरूग संभाग अउ चार दिसंबर के बस्तर संभाग के बड़का अधिकारी मनके बइठका होही।
माओवादी-गिरफ्तार
बीजापुर जिला म पुलिस ह चार झिन माओवादी ल गिरफ्तार करे हे। खबर के मुताबिक जिला म चलाय जात माओवादी विरोधी अभियान म भैरमगढ़ थाना क्षेत्र ले जिला पुलिस बल के टीम पोदुंम कोति सर्चिंग बर निकले रिहीस। इही दउरान पुलिस ह पोदुंम के जंगल म घेराबंदी करके चार झिन माओवादी ल गिरफ्तार करीन। उंखर तीर ले टिफिन बम, कार्डेक्स वायर, बिजली के तार समेत माओवादी जिनीस बरामद करे गेहे।
बीजापुर-मोबाइल टावर
नियद नेल्लानार योजना म बीजापुर जिला के छुटवाई गांव म मोबाइल टावर लगाय गेहे। मोबाइल टावर लगे ले छुटवाई, गुंडेम, कोडापाली, गगनपल्ली अउ मुरकीनार गांव के लोगन ल संचार के सुभीता मिले बर लगही। एखर ले गांव-गंवई के युवा मन ल ऑनलाइन फारम भरे अउ पढ़ई करे म मदद मिलही। ए गांव सुरक्षा व्यवस्था के संगेसंग पुलिस अउ प्रशासन कोति ले उठाय गे कदम ले ए क्षेत्र मन म अब संचार के सुभीता बहाल होगे हे।
आर्गेनिक दंतेवाड़ा कॉन्क्लेव
केन्द्र सरकार कोति ले चलाय जात वृहद क्षेत्र प्रमाणीकरण कार्यक्रम म दंतेवाड़ा जिला के एक सौ दस गांव ल जैवित खेती बर प्रमाणित करे गीस। ए सेती छह अउ सात दिसंबर के ‘आर्गेनिक दंतेवाड़ा कॉन्क्लेव‘ राखे जाही।
एखर पहिली गीदम म महिला समूह बर ‘परम्परागत देशी व्यंजन प्रतियोगिता अउ जैविक खेती प्रतियोगिता‘ राखे गीस। एमा सत्रह ठिन स्व-सहायता समूह के दीदी मन भाग लीन। संगेसंग जैविक खेती प्रतियोगिता म आठ ठिन स्व-सहायता समूह के माईलोगिन मन कोति जीवामृत, हांडी दवा, घनामृत, बीजामृत अउ गोबर खाद के बने उत्पाद ल देखाय गीस।
गिरीश पंकज-साहित्यकार सूची
छत्तीसगढ़ के प्रसिद्ध साहित्यकार गिरीश पंकज ल राही संस्थान कोति ले देस के सौ बड़े साहित्यकार के सूची म दसवां स्थान म सामिल करे गेहे। साहित्यकार गिरीश पंकज पाछु चालीस बछर ले सौ ले जादा किताब लिखे हे अउ एखर बर ओमन ल कतकोन पुरस्कार ले सम्मानित करे गेहे। मुख्यमंत्री विष्णुदेव साय ह ए उपलब्धि बर साहित्यकार गिरीश पंकज ल बधाई अउ सुभकामना दीन हे।
अब मौसम के हाल…
दक्षिण-पश्चिम बंगाल के खाड़ी के उपर एक अवदाब बने हे, जेखर अवइया बारह घंटा के दउरान अउ जादा प्रबल होके फेंगल चक्रवात के रूप म बने के संभावना हे। मौसम विभाग के मुताबिक ए चक्रवात के परभाव ले प्रदेस के दक्षिणी हिस्सा म छिटपुट बादर छाय हे अउ न्यूनतम तापमान म सरलग बढ़वार होय के संभावना हवय। उहें, प्रदेस के उत्तरी भाग म न्यूनतम तापमान म कोनों किसम के फेरबदल नइ होही। उहें, दक्षिणी छत्तीसगढ़ के कुछेक जिला म उनतीस तारीख ले बादर छाय रेहे के संभावना हवय। प्रदेस म न्यूनतम अउ अधिकतम तापमान म बढ़वार हो सकत हे।
कार्यशाला
छत्तीसगढ़ राज्य जलवायु परिवर्तन कोति ले नवा रईपुर म काली अट्ठाईस नवंबर के ‘‘सत्त आवास अउ कृषि क्षेत्र म राज्य जलवायु परिवर्तन कार्ययोजना के क्रियान्वयन‘‘ विषय म एक दिन के कार्यशाला राखे जाही। ए दउरान जलवायु परिवर्तन म एक डॉक्यूमेंट्री देखाय जाही। एखर संगेसंग जागरूकता पोस्टर अउ जलवायु परिवर्तन ले जुड़े पुस्तक के विमोचन करे जाही।