रायपुर दक्षिण-परिणाम-01
रईपुर नगर दक्षिण विधानसभा उप चुनाव म भारतीय जनता पार्टी के प्रत्यासी सुनील सोनी ह जीत हासिल करीन हे। ओमन ह अपन प्रतिद्वंदी कांग्रेस प्रत्यासी आकाश शर्मा ल छियालिस हजार ले जादा वोट ले हराइन। ए उप चुनाव म भाजपा प्रत्यासी सुनील सोनी ल नवासी हजार उनसठ, कांग्रेस प्रत्यासी आकाश शर्मा ल बयालिस हजार नौ सौ सतहत्तर वोट मिलिस। उहें, नोटा म ग्यारा सौ पैंतालिस वोट पड़िस। विजयी प्रत्यासी भाजपा के सुनील सोनी ल रिटर्निंग अधिकारी पुष्पेन्द्र शर्मा ह प्रमाण पत्र दीन।
रईपुर नगर दक्षिण विधानसभा उप चुनाव बर मतगणना आज बिहनिया आठ बजे ले सेजबहार के शासकीय इंजीनियरिंग कॉलेज म सुरू होइस। सबले पहिली पोस्ट बैलेट के गिनती करे गीस। एखर बाद ईव्हीएम मसीन म दर्ज वोट के गिनती करे गीस। भाजपा प्रत्यासी सुनील सोनी ह पहिलीच राउंड ले बढ़त बनाय रिहीन, जउन ह आखिरी राउंड तक बने रिहीस। मतगणना बर चौदह ठन टेबल लगाय गे रिहीस। ईव्हीएम के गिनती उन्नीस राउंड म पूरा होइस।
खबर के मुताबिक रईपुर नगर दक्षिण विधानसभा उप चुनाव म कुल तीस झन प्रत्यासी मन ह मैदान म रिहीन। ए उपचुनाव म पचास प्रतिसत ले जादा मतदान दर्ज करे गे रिहीस। बृजमोहन अग्रवाल के रईपुर लोकसभा क्षेत्र ले सांसद चुने जाय के बाद रईपुर नगर दक्षिण विधानसभा सीट खाली होगे रिहीस
रायपुर दक्षिण-परिणाम-02
रईपुर दक्षिण विधानसभा उपचुनाव म भाजपा के जीत के बाद पार्टी पदाधिकारी अउ कार्यकर्ता मन ह फटाखा फोड़के अउ मिठाई बांटके जस्न मनाइन। मुख्यमंत्री विष्णुदेव साय राजधानी रईपुर के एकात्म परिसर के भाजपा कार्यालय म जीत के जस्न म सामिल होइन। ए मउका म ओमन ह किहीन कि रईपुर दक्षिण विधानसभा के चुनाव परिणाम पार्टी के नीति के जीत हे। ओमन ह ए जीत बर पार्टी कार्यकर्ता मन ल धन्यवाद दीन अउ किहीन कि ए जीत राज्य अउ केंद्र के भाजपा सरकार के सुशासन उपर जनता के मुहर हे। ओमन किहीन कि राज्य सरकार ह प्रदेस म लोकतंत्र बर जनता के भरोसा ल बहाल करीन हे। मोदी के गारंटी ल राज्य सरकार ह कुछेच महिना म पूरा करे के काम करे हे, ए ओखर जनादेस हे। मुख्यमंत्री ह विजयी प्रत्यासी सुनील सोनी के संग पार्टी कार्यकर्ता, चुनाव प्रभारी श्याम बिहारी जासवाल, सांसद बृजमोहन अग्रवाल, शिवरतन शर्मा सबो मंत्री, विधायक अउ पदाधिकारी मन संग क्षेत्र के जनता ल बधई दीन हे। ओमन ह ए जीत बर प्रधानमंत्री नरेंद्र मोदी के आभार व्यक्त करीन हे।
उहें, भाजपा प्रत्यासी सुनील सोनी ह आकाशवाणी समाचार ले गोठबात करत अपन जीत के श्रेय प्रधानमंत्री नरेंद्र मोदी, मुख्यमंत्री विष्णुदेव साय अउ पार्टी कार्यकर्ता मन ल दीन हे। ओमन किहीन कि मतदाता मन ह राज्य के भाजपा सरकार के विकास काम बर जनादेस दीन हे। ओमन ह हमेसा रईपुर दक्षिण विधानसभा क्षेत्र के विकास बर काम करत रइही।
भाजपा के प्रदेस अध्यक्ष किरण सिंह देव ह किहीन हे कि रईपुर दक्षिण के जनता ह एक घांव फेर बता देहे कि प्रदेस अउ सहर के विकास सिरिफ भाजपा के सरकार ही कर सकत हे। ओमन ह भाजपा प्रत्यासी सुनील सोनी ल जीत के बधई दीन अउ किहीन कि क्षेत्र के जनता ह मोदी के विश्वसनीयता अउ प्रदेस सरकार के नीति ले परभावित होके एक घांव फिर भाजपा उपर विस्वास जताय हे।
मुख्यमंत्री धान-खरीदी
मुख्यमंत्री विष्णुदेव साय ह किहीन हे कि मोदी के गारंटी के अनुसार ए बछर घलो किसान मनले प्रति एकड़ इक्कीस कुंटल धान के हिसाब ले धान खरीदी करे जावत हे। ओमन किहीन कि किसान मन ल ए मामला म कोनो भी प्रकार के भ्रम नइ होना चाही। ए संबंध म भ्रम फैलाने वाला मन के खिलाफ कड़ा कार्रवाई करे जाही।
मुख्यमंत्री ह किहीन कि धान खरीदी राज्य सरकार के सर्वोच्च प्राथमिकता हे। किसान मनके हित ल धियान म राखत खरीदी केंद्र के माइक्रो एटीएम ले दू हजार ले दस हजार रूपिया तक निकाले के सुविधा दे गे हवय। एखर ले किसान मन ल धान बेचे बर अउ आय-जाय बर मोटर गाड़ी के किराया अउ मजदूर मनके भुगतान करे म सुविधा होही।
प्रधानमंत्री- मन की बात
प्रधानमंत्री नरेंद्र मोदी काली बिहनिया ग्यारा बजे आकाशवाणी ले ‘मन की बात‘ कारीकरम म देस-विदेस के लोगन संग अपन बिचार साझा करही। ए मासिक रेडियो कारीकरम के एक सौ सोलहवां कड़ी होही। ए कारीकरम आकाशवाणी अउ दूरदर्शन के जम्मो नेटवर्क, आकाशवाणी समाचार वेबसाइट अउ न्यूज ऑन एआईआर मोबाइल ऐप म प्रसारित करे जाही। एमा आकाशवाणी समाचार, डी.डी. न्यूज, प्रधानमंत्री कार्यालय या सूचना अउ प्रसारण मंत्रालय के यूट्यूब चैनल म घलो सीधा प्रसारित करे जाही। हिंदी म प्रसारण के तुरते बाद क्षेत्रीय भाखा मन म घलो ए कारीकरम ल प्रसारित करे जाही।
हेलन केलर अवॉर्ड
धमतरी जिला के कुरूद निवासी दिव्यांग समाज सेवी अउ चित्रकार बसंत साहू ल हेलेन केलर अवॉर्ड ले सम्मानिक करे गेहे। श्री साहू ल दिव्यांग मन के अधिकार के रक्षा अउ समाज म सामान मउका देवाय बर करे गे सुघ्घर काम बर ए अवॉर्ड दे गे हवय।
मुख्यमंत्री विष्णुदेव साय ह फोन करके श्री साहू ल अवॉर्ड दे जाय म बधई अउ सुभकामना दीन हे। मुख्यमंत्री ह किहीन कि प्रदेस आपके भावना अउ उपलब्धि ले गौरव महसूस करत हे।
समाजसेवी अउ चित्रकार बसंत साहू ह अपन कला के माध्यम ले छत्तीसगढ़ के लोककला, परंपरा अउ सामाजिक मुद्दा ल जीवंत राखे हे। उंखर चित्र मन म छत्तीसगढ़ी लोकनृत्य, पारंपरिक वेशभूषा अउ समाज के समस्या दिखथे।
‘विकसित भारत चैलेंज‘
केंद्र सरकार के युवा कारीकरम अउ खेल मंत्रालय ह ‘विकसित भारत युवा नेता संवाद‘ के तहत ‘विकसित भारत चैलेंज‘ प्रतियोगिता कराय जाही। नेहरू युवा केंद्र संगठन रईपुर के जिला युवा अधिकारी अर्पित तिवारी ह आज रईपुर म राखेगे एक ठन पत्रकार वार्ता म बतइन कि ए प्रतियोगिता चार चरण म कराय जाही, जेमा पंद्रह ले उनतीस बछर के युवा मन ह भाग ले सकही। इंखर पंजीयन अवइया पच्चीस नवंबर ले पांच दिसंबर तक ‘माय भारत डॉट जीओवी डॉन इन‘ म करे जाही। ए प्रतियोगिता जिला, राज्य अउ राष्ट्रीय स्तर म आयोजित करे जाही।
प्रतियोगिता के पहिली चरण म अवइया पांच ले दस दिसंबर तक ऑनलाइन क्विज प्रतियोगिता कराय जाही।
कोंडागांव नसबंदी-पखवाड़ा
प्रदेस के आने-आने जिला संघरा कोंडागांव जिला म इक्कीस नवंबर ले नसबंदी पखवाड़ा सुरू होगे हे। जिला के मुख्य चिकित्सा अउ स्वास्थ्य अधिकारी डॉक्टर आर. के. सिंह ह प्रचार-प्रसार बर बनाय गे ‘सारथी‘ रथ ल हरा झंडा दिखाके रवाना करीन।
हल्बी/गोण्डी-समाचार बुलेटिन
सुनइया मन ल बतादन कि काली ईतवार के हल्बी अउ गोण्डी बोली म समाचार बुलेटिन प्रसारित करे जाही। ए दूनों बुलेटिन आकाशवाणी जगदलपुर ले प्रसारित करे जाही, जेला बस्तर संभाग म सुने जा सकही। हल्बी म समाचार बुलेटिन बिहनिया साढ़े सात बजे ले अउ गोण्डी म समाचार बुलेटिन संझा साढ़े छै बजे प्रसारित करे जाही।
कोरिया-छात्र शव/आत्महत्या
कोरिया जिला म पटना थाना क्षेत्र के ग्राम चंपाझर ले पाछू तीन दिन ले लापता कक्षा सातवीं के छात्र के सव ह जंगल म मिले हे। उहें, छात्र के गुमशुदगी के रिपोर्ट के बाद पुलिस डहार ले दूसर स्कूली लइका मन ले पूछताछ करे गीस। जेखर बाद एक झन छात्र ह अपन घर म फांसी लगाके आत्महत्या कर लेहे। घटना के सूचना मिले के बाद बैकुंठपुर डीएसपी कविता ठाकुर अउ पटना थाना के प्रभारी विनोद पासवान ह फॉरेंसिक एक्सपर्ट अउ डॉग स्क्वॉड के टीम के संग मउका म पहुंचिन अउ घटना के जांच सुरू कर देहे। उहें, सव ल पोस्टमार्टम बर भेज दे गेहे। रिपोर्ट आय के बादेच मउत के कारण के पता चल सकही।
बस्तर बटालियन
मुख्यमंत्री विष्णुदेव साय ह बस्तर म माओवाद खतम करे के दिसा म सुघ्घर काम करे बर बस्तर बटालियन अउ केंद्रीय रिजर्व पुलिस बल-सीआरपीएफ के जवान मन ल बधई अउ सुभकामना दीन हे। ओमन ह सोसल मीडिया एक्स म ट्वीट करके किहीन हे कि पाछू ग्यारा महिना म जवान मन ह अपन बहादुरी ले इतिहास रचे हे। देस के आगू छत्तीसगढ़ महतारी के माथा उचाय हे। जवान मन के सफलता म प्रदेसवासी मन ल गर्व हे। श्री साय ह किहीन कि पहिली बस्तर ह सांति के टापू कहे जात रिहीस, एला फेर सांति अउ विकास के सेतु बनाय जाही।
बिलासपुर-लूट
बिलासपुर म कोनी के आईटीआई के ज्वॉइंट डायरेक्टर अवनीश सोनी ले अज्ञात आरोपी मन ह साढ़े तीन लाख रूपिया लूट लीन। मिले जानकारी के अनुसार श्री सोनी ह बैंक ले पइसा निकाले के बाद ओला झोला म रखके पैदल सदर बाजार कोति जावत रिहीन, इही दौरान मोटर साइकिल म बइठे दू झन लूटेरा मन ह उंखर बेग ल छिना के भाग गीन। बैग म साढ़े तीन लाख रूपिया रिहीस। लूट के खबर मिलते साठ पुलिस के टीम ह मउका म पहुंचिस अउ सहर के आने-आने चौक-चौराह म नाकाबंदी करके आरोपी मनके तलास सुरू कर देहे, फेर अभी तक कोनो ल नइ पकड़े गेहे।