रईपुर म आज ले भारतीय सड़क कांग्रेस के तिरासीवां वार्षिक अधिवेसन सुरू होत हे। निर्धारित कारीकरम अनुसार केंंद्रीय सड़क परिवहन अउ राजमार्गा मंत्री नितिन गडकरी एखर आज संझा सुभारंभ करहीं। ग्यारा नवंबर तक चलइया अधिवेसन म सड़क निर्माण अउ सड़क सुरक्षा ले जुड़े देस भर के दू हजार ले जादा बिसेसज्ञ, वैज्ञानिक अभियंता अउ अधिकारी सामिल होवत हे। अधिवेसन के सुभारंभ कारीकरम म सड़क निर्माण तकनीक अउ सामग्री ले जुड़े तीन ठन गाइड लाइन अउ एक ठन मैनुअल घलो जारी करे गीस।
ए मउका म तकनीकी प्रदर्सनी घलो लगाय गेहे, जेमा आने-आने कंपनी मन डहार ले इंहा लगाय गे स्टाल म सड़क निर्माण ले जुड़े तकनीकी, मटेरियल, डिजाइन, टेक्नालॉजी मनके प्रदर्सन करे जाही।
बतादन कि भारतीय सड़क कांग्रेस के वार्षिक अधिवेसन छत्तीसगढ़ म पहिली घांव होत हे।
माओवादी-मुठभेड़
बीजापुर जिला म आज सुरक्षा बल अउ माओवादी मनके बीच होय मुठभेड़ म दू झन माओवादी मन मारे गेहे। मिले जानकारी के अनुसार कोबरा बटालियन अउ डीआरजी के जवान जिला के उसूर-बासागुड़ा-पामेड़ क्षेत्र म माओवादी मनके मौजूदगी के सूचना म सर्चिंग अभियान म निकले रिहीन। इही दौरान रेकावाया के जंगल म जवान अउ माओवादी मनके बीच मुठभेड़ होइस। ए मुठभेड़ म दूनो माओवादी मनके मउत होगे। सुरक्षा बल मन मारे गे दूनो माओवादी मन के सव बरामद कर लेहे। एखर अलावा घटना स्थल ले एस.एल.आर., अउ बड़का संख्या म दूसर हथियार अउ गोलाबारूद बरामद करे हे। इलाका म तलासी अभियान अभी घलो जारी हे।
मुख्यमंत्री-लोकार्पण
मुख्यमंत्री विष्णुदेव साय ह आज बलौदाबाजार के दशहरा मैदान म साठ करोड़ बीस लाख रूपिया के आने-आने विकास कार्य के भूमिपूजन अउ लोकार्पण करीन। ए मउका म मुख्यमंत्री ह बलौदाबाजार म बीएड कालेज खोले अउ ट्रांसपोर्ट नगर बनाय के घोसना करीन। मुख्यमंत्री ह कारीकरम म प्रधानमंत्री आवास योजना के तहत स्वीकृत मकान म ले दू हजार एक सौ हितग्राही मन ल आवास के स्वीकृति पत्र अउ इंक्यावन हितग्राही मन ल घर के चाबी दीन। ओमन जिला म संचालित ‘‘हम होंगे कामयाब अभियान‘‘ के अंतर्गत इंक्यावन युवा मन ल सम्मान पत्र दीन। कारीकरम म किसान मन धान खरीदी बर मुख्यमंत्री के आभार जतइन।
उपचुनाव-रायपुर
रईपुर दक्षिण विधानसभा बर होवत उपचुनाव के तहत भारतीय जनता पार्टी अउ कांग्रेस समेत आने-आने राजनीतिक पार्टी मन प्रचार अभियान तेज कर देहे। भाजपा प्रत्यासी सुनील सोनी के पक्ष म सांसद बृजमोहन अग्रवाल समेत मंत्री टंकराम वर्मा, लखनलाल देवांगन, पूर्व मंत्री अजय चंद्राकर अउ राजेश मूणत हे काली रईपुर दक्षिण विधानसभा क्षेत्र के आने-आने वार्ड मन म जनसंपर्क करीन। ए दौरान रोड-सो के आयोजन घलो करे गीस।
दूसर कोति, कांग्रेस प्रत्यासी आकाश शर्मा के पक्ष म नेता प्रतिपक्ष डॉक्टर चरणदास महंत समेत कांग्रेस के कई नेता मन जनसंपर्क करीन। ए दउरान ओमन लोगन मन ले कांग्रेस प्रत्यासी बर मतदान करे के अपील करीन। नौ अउ दस नवंबर के पूर्व मुख्यमंत्री भूपेश बघेल अउ पूर्व उप मुख्यमंत्री टी.एस. सिंहदेव कांग्रेस प्रत्यासी के पक्ष म प्रचार करही।
बतादन कि ए सीट म तेरह नवंबर के मतदान होही।
उपचुनाव-आयोग
इही बीच, दक्षिण विधानसभा निर्वाचन बर नियुक्त व्यय प्रेक्षक कनुप्रिया दमोर ह प्रत्यासी मनके खरचा मनके निरीक्षण करीन। ओमन जम्मो प्रत्यासी मनके रैली अउ दूसर कारीकरम के खरचा मनके जानकारी लीन। कनुप्रिया दमोर ह सोसल मीडिया म होवत प्रचार के अवलोकन करीन। ओमन प्रत्यासी मन ल निश्चित समय म खरचा के जानकारी निर्वाचन आयोग के व्यय साखा ल दे के निरदेस दीन।
इही बीच, रईपुर दक्षिण विधानसभा क्षेत्र बर उप चुनाव लड़इया आने-आने राजनीतिक दल के प्रत्यासी मन ल मतदान ले एक दिन पहिली विज्ञापन मनके प्रमाणन, मीडिया प्रमाणन अउ निगरानी समिति ले कराना जरूरी कर दे गेहे। ए संबंध म जिला निर्वाचन अधिकारी डॉक्टर गौरव सिंह ह निरदेस जारी कर दीन हे।
छठ पर्व-संपन्न
चार दिन के छठ परब आज बिहनिया उषा अर्घ्य के संग संपन्न होगे। छठ व्रती मन छठ महापरब के चौथा दिन आज बिहनिया उगत सूरज ल अर्घ्य दीन। बड़का संख्या म श्रध्दालु महादेव घाट पहुंचिन अउ उगत सूरज के पूजापाठ करीन।
छठ महापर्व आयोजन समिति महादेवघाट रईपुर के अध्यक्ष राजेश कुमार िंसंह ह बतइन कि चार दिन के छठ महापरब के चौथा दिन आज बिहनिया तीस हजार ले जादा मनखे मन महादेव घाट म खारून नदिया के किनारे जमा होइन। रईपुर म आने-आने जघा जइसे महादेवघाट, व्यास तलाब अउ दूसर तलाब मनके किनारे ए बछर घलो छठ परब उछाह ले मनाय गीस। बिलासपुर, भिलाई-दुरूग, कोरबा, बस्तर अउ दूसर सहर मन म छठ परब श्रध्दा अउ उछाह ले मनाय जाथे।
मुख्यमंत्री विष्णुदेव साय काली महादेवघाट म राखेगे छठ महापर्व कारीकरम म सामिल होइन। ए मउका म मुख्यमंत्री ह प्रदेसवासी मन ल छठ महापरब के सुभकामना दीन अउ किहीन कि सूर्य अराधना के परब छठ मनखे ल प्रकृति ले जोड़े के परब हरय। ए मउका म विधानसभा अध्यक्ष डॉक्टर रमन सिंह अउ सांसद बृजमोहन अग्रवाल घलो मौजूद रिहीन।
स्पेशल-ट्रेन
इही बीच, भारतीय रेल छठ परब के बाद यात्री मनके लहुटई ल सुविधाजनक बनाय खातिर पांच सौ ले जादा बिसेस रेलगाड़ी चलात हे। रेलवे बोर्ड ह बतइन कि आज ले लहुटइया यात्री मन बर समस्तीपुर, दानापुर अउ दूसर रेल मंडल ले अतिरिक्त रेलगाड़ी चलाय जात हे।
भारतीय रेल के अनुसार तिहारी सीजन म चार हजार पांच सौ इक्कीस ट्रेन मनले करीबन पैंसठ लाख यात्री मन ल अपन गंतव्य तक पहुंचाय गीस। रेल मंत्रालय ह किहीन कि ए महिना के एक तारीख ले पांच तारीख के बीच छै करोड़, पचासी लाख ले जादा यात्री मन ह बिहार, पूर्वी उत्तर प्रदेस अउ झारखंड बर रेल यात्रा करीन। यात्री मनके अवई-जवई ल सुचारू बनाय राखे बर रेलवे सुरक्षा बल अउ स्वयं सेवक मन ल घलो तैनात करे गेहे।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ म ए बखत तिहार के मउका म रेलवे डहार ले यात्री मनके सुविधा बर स्पेसल ट्रेन समेत आने-आने पहलू उपर बिसेस कारीकरम के प्रसारण करे जाही। ए कारीकरम आकाशवाणी केन्द्र रायपुर ले काली नौ नवंबर के बिहनिया साढ़े दस बजे ले प्रसारित होही। एला छत्तीसगढ़ स्थित आकाशवाणी के जम्मो केन्द्र रिले करही।
बस-निःशुल्क यात्रा
छत्तीसगढ़ म एचआईवी पीड़ित, दृष्टिहीन, दूनों गोड़ ले दिव्यांग अउ अस्सी बछर या ओखर ले जादा उमर के सियान नागरिक मन ल यात्री बस म मुफ्त यात्रा के सुविधा दे जात हे। एखरे संग नक्सलवाद ले प्रभावित अइसन मनखे जेखर करा प्रमाण पत्र हवय ओहू मन ल यात्री बस म सफर करे म किराया म पचास प्रतिसत के छूट दे जात हे।
इही बीच, परिवहन विभाग ह निर्धारित रासि ले जादा किराया वसूल करत पाय जात अउ बिना किराया दर सूची लगाय संचालित तीन सौ उनचास यात्री वाहन मन उपर चलानी कार्रवाही करके चार लाख सैंतालिस हजार ले जादा के जुर्माना लगाय हे।
अउ अब थोरकुन समाचार सार म –
– राजीव युवा उत्थान योजना के तहत प्रतियोगी परीक्षा मन बर निसुल्क कोचिंग बर रईपुर जिला के छात्र मन ले बीस नवंबर तक आवेदन मंगाय गेहे।
– जांजगीर-चांपा जिला के अकलतरा के लटिया रोड करा आज एक तेज रफ्तार एंबुलेंस अनियंत्रित होके खदान म गिर गे, जेमा सवार दू मनखे मन तउर के अपन जान बचाइन। हादसा के बेरा एंबुलेंस म कोनो मरीज नइ रिहीस।
अउ
– सक्ति जिला के हसौद के गैस एजेंसी करा आंगनबाड़ी कार्यकर्ता मन ल ले जावत मालवाहक अनियंत्रित होके पलट गीस। ए हादसा म तीन झन महिला मन ल गंभीर चोट आय हे। उहें, अट्ठारा झन महिला मन मामूली रूप ले घायल होय हे।