नारायपुर जिला म आज माओवादी मन डहार ले करे गे आईईडी विस्फोट म भारत तिब्बत सीमा पुलिस बल आईटीबीपी के दू जवान सहीद होगे हे। उहें, दू आने जवान घायल होगे हे। हमर संवाददाता ले मिले जानकारी के अनुसार ओरछा थाना के क्षेत्र के मोहंदी अउ इरकभट्टी ले आईटीबीपी, बीएसएफ अउ डीआरजी के संयुक्त टीम तलासी अभियान बर निकले रिहीन। वापसी के दउरान जवान ग्राम कोडलीयर के तीर जंगल म माओवादी मन डहार ले लगाय गे आईईडी के चपेट म आगे। ए विस्फोट म आईटीबीपी के दू जवान अमर पनवार अउ के. राजेश सहीद होगे। अमर पनवार सतारा महाराष्ट्र अउ के. राजेश कडप्पा आंध्रप्रदेस के निवासी रिहीन। उहें, जिला पुलिस बल के दू जवान घायल होगे हे। घायल जवान मन ल अच्छा इलाज बर राजधानी रायपुर लाय गीस।
प्रधानमंत्री-महामाया एयरपोर्ट शुभारंभ
प्रधानमंत्री नरेंद्र मोदी काली बीस अक्टूबर के अंबिकापुर के दरिमा स्थित मां महामाया एयरपोर्ट के वर्चुअली सुभारंभ करही। दरिमा म आयोजित कारीकरम म राज्यपाल रमेन डेका अउ मुख्यमंत्री विष्णुदेव साय सामिल होही। ए एयरपोर्ट ल तिरालीस करोड़ रूपिया के लागत ले तियार करे गेहे। प्रदेस म राजधानी रायपुर के बाद रनवे के लंबाई के हिसाब ले ए दूसरा बड़का एयरपोर्ट हरय।
राष्ट्रपति पुलिस ध्वज-सम्मान
छत्तीसगढ़ पुलिस ल ‘‘राष्ट्रपति का पुलिस ध्वज‘‘ दे जाही। ए बिसेस ध्वज देस के गिने-चुने राज्य के पुलिस इकाई मन ल दे जात हे। जउन पच्चीस बछर के अनुकरणीय सेवा अउ राष्ट्र के प्रति समर्पण के प्रतीक हरय। छत्तीसगढ़ पुलिस ह नक्सल मोर्चा उपर साहस अउ दृढ़ता के संग कठिन चुनौती के सामना करत ए सम्मान अर्जित करे हे। ए सम्मान के संग पुलिस बल के जवान अब ए ध्वज के प्रतिकीर्ति ल अपन वर्दी उपर प्रतीक चिन्ह के रूप धारण कर सकही, जउन ओखर सौर्य अउ सेवा के प्रतीक रइही।
खबर के मुताबिक राष्ट्रपति ध्वज कोनो भी पुलिस अउ सैन्य बल बर सर्वोच्च मान्यता माने जात हे। मुख्यमंत्री विष्णुदेव साय ह ए उपलब्धि बर पुलिस बल ल बधई दीन हे। ओमन किहीन कि ए सम्मान छत्तीसगढ़ पुलिस के साहस, अनुसासन अउ देसभक्ति के प्रमाण हरय।
मुख्यमंत्री-समीक्षा बैठक
मुख्यमंत्री विष्णुदेव साय ह काली अपन रायपुर स्थित निवास कार्यालय म आयोजित बइठका म प्रदेस म कानून व्यवस्था के स्थिति के समीक्षा करीन। मुख्यमंत्री ह बइठका म अधिकारी मन ल निर्देसित करीन कि अपराधी अउ सामाजिक तत्व उपर सख्ती ले कार्रवाई करे जाय। ओमन किहीन कि पुलिस तुरते कार्रवाई करय अउ चौकन्ना रहय। श्री साय ह किहीन कि हर हाल म कानून अउ व्यवस्था बहाल रखना चाही। मुख्यमंत्री ह किहीन कि स्थानीय स्तर म होवइया घटना मन उपर पुलिस के पैनी नजर होना चाही अउ अपराध ल रोके बर नसा के अवैध व्यपार उपर अंकुस लगाय जाय।
गांजा, अवैध सराब अउ ड्रग्स के तस्करी उपर मुस्तैदी ले कार्रवाई होवय। श्री साय ह किहीन कि नगरीय अउ ग्रामीण क्षेत्र मन म रतिहा म पुलिस के गस्त नियमित रूप ले होना चाही। पुलिस के आला अधिकारी घलो अनिवार्य रूप ले पेट्रोलिंग करय। सॉपिंग मॉल, दुकान अउ होटल मन ल निर्धारित बेरा म बंद करे के कार्रवाई करय। मुख्यमंत्री ह यहू घला किहीन कि साइबर क्राइम ल रोके बर प्रभावी कार्रवाई करे जाय। बइठका म उप मुख्यमंत्री अउ गृहमंत्री विजय शर्मा, मुख्य सचिव अमिताभ जैन, पुलिस महानिदेसक अशोक जुनेजा संग वरिष्ठ अधिकारी उपस्थित रिहीन।
जवान-आत्महत्या
एसईसीएल बिलासपुर के मेगा कुसमुंडा परियोजना म तैनात त्रिपुरा राइफल्स के जवान आजाद सिंह ह खुद ल गोली मारके आत्महत्या कर ले हे। एसईसीएल के जनसंपर्क अधिकारी ह बतइन कि मृतक जवान परिवारिक विवाद के चलते तनाव म राहत रिहीन। ओमन बतइन कि ड्यूटी के दउरान जवान ह अपन सर्विस राइफल्स एके-सैंतालिस ले खुदे ल गोली मार लीस। घटना के सूचना एसईसीएल के अधिकारी मन ल दे दे गेहे।
उहें, कुसमुंडा पुलिस ह मर्ग कायम कर जांच सुरू कर दे हे। मृतक प्रहरी राजस्थान के रहइया रिहीस।
उद्यमी-सम्मेलन
मुख्यमंत्री विष्णुदेव साय काली भिलाई म आयोजित क्षेत्रीय उद्यमी सम्मेलन म सामिल होइन। ए मउका म मुख्यमंत्री ह किहीन कि उद्यमिता के विकास अउ प्रदेस म नवा निवेसक ल आकर्षित करे बर लघु उद्योग भारती डहार ले सम्मेलन के आयोजन एक ठिन महत्वपूर्ण पहल हरय। श्री साय ह किहीन कि एक नवंबर ले प्रदेस म नवा उद्योग नीति लागू करे जाही। ए नीति म छोटे अउ मंझला उद्योग मन ल प्रोत्साहित करे बर बिसेस रूप ले प्रावधान करे जात हे। मुख्यमंत्री ह उद्यमी मनके मांग उपर नया रायपुर म भूमि अउ मध्यप्रदेस के जइसन छत्तीसगढ़ म घलो माइक्रो एण्ड स्मॉल मीडियम इंटरप्राइजेस-एम.एस.एम.ई. मंत्रालय के अधीन स्थापित करे के आस्वासन दीन।
प्रधानमंत्री जनऔषधि-केंद्र
राजनांदगांव जिला म जिला अस्पताल अउ सामुदायिक केंद्र मन के बाद अब गांव मन म संचालित प्राथमिक स्वास्थ्य केंद्र मन म घलो प्रधानमंत्री जनऔषधि केंद्र खोले के तियारी हे। ए केंद्र मन म मरीज मन ल सस्ता दर म जीवन रक्षक दवई मिलही। एखर संचालन रेडक्रॉस सोसायटी अउ जीवन दीप समिति के माध्यम ले करे जाही।
बस्तर दशहरा-समापन
पचहत्तर दिन तक चलइया विश्व प्रसिध्द बस्तर दसहरा परब के आज सक्तिपीठ दंतेवाड़ा ले आय मावली माता के डोली अउ मां दंतेश्वरी के छत्र के बिदाई के संग समापन होगे। राजपरिवार के सदस्य कमलचंद भंजदेव ह मावली माता के डोली अउ मां दंतेश्वरी के छत्र के विधि-विधान ले पूजापाठ करीन।
उहें, पुलिस जवान मन ह माई जी ल इक्कीस तोप के सलामी दीन। एखर बाद मावली माता के डोली अउ मां दंतेश्वरी के छत्र ल फूल ले सजे वाहन म रखके दंतेवाड़ा बर रवाना करे गीस।
खबर के मुताबिक बस्तर दसहरा के सुरूआत सावन महिना के अमावस्या तिथि के पाट जात्रा विधान के संग होय रिहीस।
वन खेलकूद-प्रतियोगिता
रायपुर म चलत सत्ताइसवां अखिल भारतीय वन खेलकूद प्रतियोगिता म अब तक एक सौ एक मेडल जीत के छत्तीसगढ़ पहिली स्थान म हे। छत्तीसगढ़ नेइस प्रतियोगिता म अब तक इंक्यावन स्वर्ण, सत्ताईस रजत अउ तेइस कांस्य पदक जीत के अपन दबदबा कायम रखे हे। उहें, केरल साठ पदक के संग दूसर अउ मध्यप्रदेस के टीम सैंतीस पदक जीत के तीसरा स्थान म हे। ए प्रतियोगिता के समापन काली स्वामी विवेकानंद स्टेडियम कोटा म होही। समापन समारोह म ओलंपिक पदक विजेता मनु भाकर सामिल होही।
आज टेबल टेनिस, वॉलीबॉल अउ बैंडमिंटन संग आने मैच खेले गीस। ए प्रतियोगिता म उनतीस राज्य अउ दस केंद्र शासित प्रदेस मनके करीबन तीन हजार खिलाड़ी भाग लेवत हे।
केशकाल घाटी-मरम्मत
राजधानी रायपुर ले बस्तर ल जोड़इया केसकाल घाटी के सड़क के रख-रखाव के काम तुरते सुरू होही। एखर बर प्रशासन डहार ले रूट डायवर्ट के तियारी करे जात हे। केसकाल घाटी म सड़क रख-रखाव के काम पूरा होय तक डायवर्ट रद्दा ले ही अवई-जवई होही।
खबर के मुताबिक केसकाल घाटी के सड़क के हालत खराब होय के सेति आय दिन गाड़ी मनके लंबा-लंबा लाइन लगे रहिथे अउ सड़क मन म घंटा तक जाम लगे रहिथे।
ऑक्सीजन गैस सिलेंडर-गिरोह
दुरूग पुलिस ह ऑक्सीजन सिलेंडर चोरी करइया गिरोह के दस सदस्य ल गिरफ्तार करे हे। आरोपी मन के तीर एक सौ तीन नग ऑक्सीजन सिलेंडर जब्त करे गेहे। जब्त सिलेंडर के कीमत दस लाख रूपिया ले जादा बताय गेहे। आरोपी कंपनी ले सिलेंडर चोरी करके रायपुर म बेचत रिहीन।
अमन साहू-रिमांड
रायपुर के तेलीबांधा इलाका म होय एक ठिन गोलीकांड के मुख्य आरोपी झारखंड के अमन साहू ल पुलिस ह आज रिमांड खतम होय के बाद रायपुर के बिसेस अदालत म पेस करीन, जिहां ले अदालत ह ओला अट्ठाईस अक्टूबर तक जेल भेज देहे। बताय गेहे कि पुलिस ह अमन साहू के अउ रिमांड नइ मांगिस।
खबर के मुताबिक अमन साहू उपर दू मामला दर्ज हे। एमा पाछू अप्रैल महिना म तेलीबांधा इलाका म रोड निर्माण ठेका फर्म के संचालक मन उपर असफल हमला के घलो मामला सामिल हे। ए गोलीकांड के मामला ले संबंधित दस ले जादा आरोपी पहिली ले ही जेल म हे।