बारिश-02
मोहला-मानपुर जिला के गट्टेगहन गांव के नंदिया म साल भर पहिली बने पूल भारी बरसा के सेति टूट गेहे, जेखर ले महाराष्ट्र के सीमा ले लगे संबलपुर गांव समेत बुकाअरका अउ सुडियार ले संपर्क टूट गेहे। उहें, संबलपुर गांव म बनाय गे पुलिस कैंप ले रद्दा संपर्क टूटे ले कैंप म तैनात सुरक्षाबल के जवान उहें, फंसे हे, जेखर जिला मुख्यालय ले कोनो कीसम संपर्क नइ हो पात हे।
राष्ट्रीय वन शहीद दिवस
मुख्यमंत्री विष्णुदेव साय ह आज राष्ट्रीय वन शहीद दिवस के मउका म रईपुर के राजीव स्मृति वन पहुंच के वन शहीद मन ल श्रद्धांजलि दीन। ओमन वन सहीद मनके सुरता म वन शहीद स्मारक के अनावरण करीन। ए बेरा म मुख्यमंत्री ह किहीन कि वन शहीद मनके सहादत हमन पर्यावरण संरक्षण के महत्ता अउ ओला सुरक्षित राखे के सुरता देवाथे। ए मउका म मुख्यमंत्री, वनमंत्री केदार कश्यप अउ राजस्व मंत्री टंकराम वर्मा ह अपन पिता जी के सुरता म पौधारोपण करीन।
राष्ट्रीय पोषण माह
राष्ट्रीय पोषण माह म काली ले लेके तेइस सितंबर तक प्रदेस के सबो आंगनबाड़ी म वजन तिहार मनाय जाही। वजन तिहार के दौरान लेगे लइका मनके वजन समेत आने जानकारी ल महिला अउ बालविकास विभाग के मोबाइल ऐप म दरज करे जाही। अइसने पोषण माह के बेरा सुपोषण चौपाल, अन्न प्राशन दिवस, परिवार चौपाल, पोषण मेला, व्यंजन प्रदर्सन जइसन कतकोन कारीकरम पंचायत अउ सहरी क्षेत्र म करे जात हे। पोषण कोति लइका मन ल जागरूक करे खातिर स्कूल मन म नारा, लेखन, निबंध, चित्रकला असन कतकोन प्रतियोगिता होवत हे।
खबर के मुताबिक प्रदेस म एक ले तीस सितंबर तक राष्ट्रीय पोषण माह चलाय जावत हे। एमा पोषण उपर धियान दे जावत हे।
अभनपुर/जशपुर-नगर पालिका
राज्य शासन कोति ले रईपुर जिला के अभनपुर नगर पंचायत ल नगर पालिका परिषद गठित करे के संबंध म अधिसूचना जारी कर दे गेहे। ए संबंध म नगरीय प्रशासन अउ विकास विभाग कोति ले राजपत्र म अधिसूचना के प्रकासन कर दे गेहे। अधिसूचना के मुताबिक नगर पंचायत अभनपुर के सीमा ही नगर पालिका परिषद अभनपुर के सीमा होही।
उहें, जशपुर जिला के नगर पंचायत पत्थलगांव ल नगर पालिका बनाय बर अधिसूचना जारी कर देहे। जारी अधिसूचना म नगर पंचायत पत्थलगांव के सीमा ही नगर पालिका के सीमा होही। ए संबंध म लोगन ले इक्कीस दिन के भीतरी दावा आपत्ति मंगवाय गे हे।
पीएम-आवास योजना राशि
केन्द्रीय ग्रामीण विकास मंत्री शिवराज सिंह चौहान ह किहीन हे कि प्रधानमंत्री नरेन्द्र मोदी ए महीना के पन्द्रह तारीख के झारखंड के जमशेदपुर म महत्वाकांक्षी पीएम आवास योजना के लाखों लाभार्थी मन ल दू हजार सात सौ पैंतालीस करोड़ रूपिया के किश्त जारी करही। ओमन बतईन कि ए मउका म सबो लाभार्थी मन ल मंजूरी पत्र घलो बांटे जाही। कार्यक्रम म बड़ संख्या लोगन संघरही अउ लाखों लोगन ऑनलाइन जुड़ही।
भाजपा-बैठक
रईपुर के कुशाभाऊ ठाकरे परिसर म स्थित प्रदेस भाजपा कार्यालय म आज रईपुर संभाग के सदस्यता टोली के बइठका होइस। ए बइठका म क्षेत्रीय संगठन महामंत्री अजय जामवाल, संगठन महामंत्री पवन साय, रईपुर संभाग प्रभारी सौरभ सिंह समेत बड़का पदाअधिकारी सामिल होइन।
ओजोन परत संरक्षण दिवस
छत्तीसगढ़ पर्यावरण संरक्षण मंडल कोति ले सोलह सितंबर के अंतर्राष्ट्रीय ओजोन परत संरक्षण दिवस के मउका म रईपुर के दीनदयाल उपाध्याय ऑडिटोरियम म पोस्टर अउ इन्वायरोथॉन प्रतियोगिता राखे जाही। ए बछर के थीम ‘‘मॉन्ट्रियल प्रोटोकॉल-एडवासिंग क्लाइमेंट एक्शन‘‘ राखे गेहे। ए प्रतियोगिता म स्कूल अउ महाविद्यालय के पढ़ईया छात्र-छात्रा मन भाग लीहीं। पोस्टर प्रतियोगिता के विषय ‘‘जलवायु परिवर्तन के कारण और निदान‘‘ राखे गेहे। उहें, इन्वायरोथॉन प्रतियोगिता के विषय ‘‘ट्रैस टू ट्रेजर‘‘ राखे गेहे।
सरगुजा प्लांट हादसा-मुआवजा
सरगुजा जिला के सिलसिला गांव म चलत एल्युमीनियम प्लांट म पाछू आठ सितंबर के होय हादसा म मउत होय लोगन के परिवार वाले मन ल पंद्रह-पंद्रह लाख रूपिया के मुआवजा रासि देके घोसना करे हे। उहें, घायल मन ल तीन -तीन लाख रूपिया दे जाही। कंपनी के अधिकारी काली परिवार वाले मन ल ए रकम सौंपही। कलेक्टर ह आज जांच दल संग ए प्लांट के जांच करीन अउ अधिकारी मन ल हादसा म मउत अउ घायल परिवार ल मुआवजा देके निरदेस दीन। ओमन बतइन कि जांच दल कोति ले प्लांट म सुरक्षा के कड़ाई ले जांच होवत हे। कलेक्टर ह किहीन कि प्रशासन ले मंजूरी के बिना प्लांट ल फेर ले नइ चलाय जा सकही।
मुख्यमंत्री-कार्टून फेस्टिवल
मुख्यमंत्री विष्णुदेव साय काली रईपुर म राखे गे कार्टून फेस्टिवल म सामिल होइन। कारीकरम म बोलत श्री साय ह किहीन कि कार्टून एक अइसन कला हे, जेखर सेती थोरकुन जघा म जम्मों बात स्पष्ट रूप ले व्यंगात्मक तरीका ले बताय जाथे। कभू-कभू संपादकीय म जउन बात ल आधा पेज म लिखे जाथे, ओला सिरिफ एक कार्टून ले बता दे जाथे। कारीकरम म मुख्यमंत्री ह इंदौर के कार्टूनिस्ट स्माइल लहरी ल कार्टून क्षेत्र म उंखर बिसेस योगदान खातिर सम्मानित करीन। संगेसंग कार्टून फेस्टिवल म संत श्री तुलसीदास जी के दोहा म आधारित कार्टून पुस्तक ‘‘तुलसी सुंगध‘‘ के विमोचन करीन।
कारीकरम म विधानसभा अध्यक्ष डॉक्टर रमन सिंह अउ सांसद बृजमोहन अग्रवाल, कार्टून वाच के संपादक त्रयम्बक शर्मा समेत कतकोन कार्टूनिस्ट अउ पत्रकार मौजूद रिहीन।
बिलासपुर-गौवंश
बिलासपुर जिला के धूमा-सिलपहरी रद्दा म पाछू सोलह जुलाई के रद्दा दुर्घटना म मारेगे नौ गौवंश के मालिक के तलास म पुलिस जुटे हे। पुलिस ह पसु मालिक मन के पता बतइया मन ल पांच हजार रूपिया इनाम दे के घोसना करीन हे। उहें, जउन गाड़ी ले ए हादसा होय रिहीस, ओखर ड्राइवर ल पुलिस ह गिरफ्तार करके गाड़ी ल जब्त कर लेहे। जिला के पुलिस अधीक्षक रजनेश सिंह ह रद्दा म गौवंश ल छोड़े अउ सुध नइ ले म मवेसी मालिक मन उपर कार्रवाई करे के बात किहीन हे।
अडाणी फाउंडेशन कोति ले रईपुर म ‘‘एक पेड़ मां के नाम‘‘ अभियान म पौधा रोपे के कारीकरम राखे गीस। अडाणी ग्रुप कोति ले मोहरेंगा म पांच हजार पौधा लगाय के लक्ष्य राखे गेहे। पहिली पारी म मोहरेंगा के गौठान म पच्चीस सौ पौधा लगाय गीस। ए दउरान गांव के लोगन अउ प्लांट के कर्मचारी मन ह अपन कोति ले लगाय गे पौधा के रक्षा करे के सपथ लीन।