छत्तीसगढ़ उच्च न्यायालय के मुख्य न्यायाधीश न्यायामूर्ति रमेश सिन्हा ह उच्च न्यायालय अउ राज्य के जम्मो जिला न्यायालय मन बर ऑनलाइन आर.टी.आई. वेब पोर्टल के सुभारंभ करीन। ए पोर्टल के माध्यम ले सूचना के अधिकार के तहत आवेदन मन ल प्रस्तुत करे जा सकत हे, अउ ओमन ल रियल टाईम ट्रैक करे जा सकत हे। एखर माध्यम ले सूचना के अधिकार के तहत लगने वाला सुल्क के भुगतान घलो करे जा सकत हे। एक आर.टी.आई. वेब पोर्टल के माध्यम ले कोनो भी जघा ले सूचना पाय बर आवेदन पेस करे जा सकही।
सुभारंभ सत्र ल संबोधित करत मुख्य न्यायाधीश श्री सिन्हा ह किहीन कि ए ऑनलाइन पोर्टल पारदर्सिता जवाबदेही अउ नागरिक सशक्तिकरण के दिसा म मील के पत्थर साबित होही। ओमन किहीन कि ए वेब पोर्टल के उद्देस्य सूचना प्राप्त करे के प्रक्रिया ल प्रभावी, पारदर्सी अउ आसान बनाना हरय। ए मउका म मुख्य न्यायाधीश ह एके संग तीन सौ ले जादा न्यायिक कर्मचारी मन ल पदोन्नत घलो करीन।
केंद्र सरकार ह आमदनी अउ योग्यता म आधारित राष्ट्रीय छात्रवृत्ति योजना के अंतर्गत बछर दू हजार चौबीस-पच्चीस चुने गे प्रतिभासाली विद्यार्थी मन बर आवेदन करे के समय-सीमा ए महिना के तीस तारिख तक बढ़ा देहे। केंद्रीय शिक्षा मंत्रालय ह केहे हे कि ए योजना के अंर्तगत आर्थिक रूप ले कमजोर वर्ग के प्रतिभासाली विद्यार्थी मन ल छात्रवृत्ति दे जाथे, जेखर ले कक्षा आठ के बाद स्कूली शिक्षा बीच म छोड़े के समस्या उपर रोग लगाय जा सकही।
नेशनल एग्जिट परीक्षा
केंद्रीय आयुष मंत्री प्रतापराव जाधव ह किहीन कि आयुर्वेद, यूनानी, योग अउ होम्योपैथी चिकित्सा बर नेशनल एग्जिट परीक्षा दू हजार इक्कीस-बाईस बैच अउ ओखर ले आगे के बैच मन बर अनिवार्य होही। काली नई दिल्ली म मीडिया ल संबोधित करत श्री जाधव ह किहीन कि ए मामला म छात्र मनके चिंता के समीक्षा बर गठित समिति के सिफारिस म ए निर्णय ले गेहे।
भाजपा सदस्यता
भारतीय जनता पार्टी के सदस्यता अभियान आज ले मतदान केंद्र स्तर म घलो सुरू होगे हे। मतदान केंद्र मन म सदस्यता अभियान सुभारंभ कारीकरम के मउका म मुख्यमंत्री विष्णुदेव साय रईपुर उत्तर विधान सभा क्षेत्र के खम्हारडीह मंडल म, प्रदेस भाजपा अध्यक्ष किरण सिंह देव जगदलपुर विधानसभा क्षेत्र के जगदलपुर मंडल म अउ प्रदेस संगठन महामंत्री पवन साय रईपुर ग्रामीण के विधानसभा क्षेत्र के माना कैम्प क्षेत्र म स्थित टीटी कॉलोनी मतदान केंद्र म मौजूद रिहीन।
ए मउका म मुख्यमंत्री श्री साय ह किहीन कि आज ले बूथ स्तर म सदस्यता अभियान के सुभारंभ होय हे। ए अभियान दू महिना तक चलही। ए अभियान ल जिला मंडल अउ बूथ स्तर म चलाय जाही। एखर तहत पार्टी डहार ले पचास लाख सदस्य बनाय के लक्ष्य राखे गेहे।
गांजा-जब्त
दुरूग पुलिस ह गांजा तस्करी करइया एक ठिन अंतर्राज्यीय गिरोह के पर्दाफास करत पांच झिन आरोपी मन ल गिरफ्तार करीन। एमन करा ले पैंतालिस किलो अवैध गांजा जब्ती करे गेहे। जब्ती गांजा के कीमत करीबन साढ़े चार लाख रूपिया बताय जात हे। दुरूग पुलिस ह नार्कोटिक्स कंट्रोल ब्यूरो के सहयोग ले गांजा तस्करी के फॉरवर्ड लिंक अउ बैकवर्ड लिंक ल स्थापित कर ए आरोपी मन ल गिरफ्तार करे हे।
आकाशीय बिजली-मौत
दंतेवाड़ा जिला म गाज के चपेट म आय ले दू जवान मनके मउत होगे हे। मिले जानकारी के अनुसार बारसूर म संचालित नक्सल विरोधी प्रसिक्षण केंद्र म आकाशीय बिजली गिरे ले केंद्रीय रिजर्व पुलिस बल-सीआरपीएफ एक सौ ग्यारहवां बटालियन के दू जवान महेंद्र कुमार अउ एस. शहुअट आलम गंभीर रूप ले घायल होगे। ए दूनो घायल जवान मन ल इलाज बर तुरते एम्बुलेंस ले जिला अस्पताल दंतेवाड़ा लाय गीस, जिहां डॉक्टर मन जांच के बाद ओमन मन ल मृत घोसित कर दीन। ए दूनो जवान उत्तर प्रदेस अउ झारखंड के रहवासी रिहीन।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ म ए बखत राष्ट्रीय शिक्षक सम्मान ले सम्मानित दुरूग जिला के शिक्षिका के. शारदा ले लेगे भेंटवार्ता प्रसारित करे जाही। ए कारीकरम आकाशवाणी केन्द्र रायपुर ले काली सात सितंबर के बिहनिया साढ़े दस बजे ले प्रसारित होही। एला छत्तीसगढ़ स्थित आकाशवाणी के जम्मो केन्द्र रिले करही।
दुर्घटना
जशपुर जिला के सिटी कोतवाली थाना क्षेत्र म पाछू रतिहा सड़क हादसा म दू झन युवक के मउत होगे। मिले जानकारी के अनुसार दूनों झन युवक मोटर साइकल ले जशपुर ले आस्ता कोति जात रिहीन। इही दौरान आस्ता संन्ना कोति ले आवत तेज रफ्तार पिकअप ह युवक मन ल जोरदार ठोकर मार दीस, जेखर सेति दूनो मनखे के मउकच म मउत होगे। पुलिस ह आरोपी वाहन चालक के तलास करत हे।
उहें, रायगढ़ जिला के ग्राम परसदा करा एक ठिन ट्रेलर ह एक मोटरसाइकिल ल जोरदार टक्कर मार दीस। ए घटना म बाईक सवार एक ग्रामीण के मउकच म मउत होगे, जबकि एक झन दूसर मनखे गंभीर रूप ले घायल होगे। जेला अस्पताल म भर्ती कराय गेहे।
उहें, जांजगीर-चांपा जिला के हथनेवरा गांव म कार ह बाइक सवार बाप-बेटा ल टक्कर मार दीस। ए हादसा ले दूनो ल गंभीर चोट आय हे, अउ ओमन ल इलाज खातिर चांपा के अस्पताल म भर्ती कराय गेहे।
कुकर बम-बरामद
कोंडागांव जिला म सुरक्षा बल ह छै ठन कुकर बम बरामद करे हे। मिले जानकारी के अनुसार धनोरा थाना क्षेत्र ले पुलिस के जवान नियमित गस्त म निकले रिहीन। इही दौरान माड़गांव करा जंगल ले छै ठिन कुकर बम बरामद करे गीस। एला माओवादी मन सुरक्षाबल ल नुकसान पहुंचाय के इरादा लगाय गे रिहीस। ए कुकर बम ल बम निरोधक दस्ता के टीम ह मउकच म नष्ट कर देहे।
तीज/गणेश चतुर्थी
सुहागिन मनके पवित्र तिहार हरितालिका तीजा आज प्रदेसभर म श्रध्दा अउ भक्ति के संग मनाय जात हे। छत्तीसगढ़ एला तीजा के रूप म मनाय जाथे। ए दिन तिजहारिन मन निर्जला व्रत रखके अपन पति के लंबा उमर के कामना करथे। राज्यपाल रमेन डेका अउ मुख्यमंत्री विष्णुदेव साय ह हरितालिका तीज के बधाई अउ सुभकामना दीन हे।
काली गणेश चतुर्थी हरय। विघ्नहर्ता भगवान श्री गणेश काली विराजही। ग्यारा दिन तक चलइया गणेश उत्सव के तियारी जम्मो जघा सरलग चलत हे। राज्यपाल रमेन डेका मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह प्रदेसवासी मन ल गणेश चतुर्थी के बधाई अउ सुभकामना दीन हे। ओमन अपन संदेस म किहीन कि ए उत्सव सामाजिक समरसता के अनूठा उदाहरण हरय।
चक्रधर समारोह
रायगढ़ के रामलीला मैदान म काली सात सितंबर ले उनतालीसवां चक्रधर समारोह के आयोजन करे जाही। सोलह सितंबर तक चलइया ए समारोह के सुभारंभ मउका म पद्मश्री हेमा मालिनी नृत्य नाटिका राधा रासबिहारी के प्रस्तुति देइही। उहें, ग्यारा सितंबर के मीनाक्षी शेषाद्री के भरत नाट्यम अउ समापन समारोह म डॉक्टर कुमार विश्वास कविता पाठ करही। दस दिन तक चलइया ए समारोह म देस अउ प्रदेस के प्रसिध्द कलाकार हरेक दिन अपन प्रस्तुति दिही।
अउ अब थोरकुन समाचार सार म –
– मुख्यमंत्री विष्णुदेव साय के पहल म जशपुर अउ पत्थलगांव क्षेत्र म सड़क बनाय के प्रशासकीय स्वीकृति प्रदान करे गेहे।
– उप मुख्यमंत्री अरूण साव ह काली मुंगेली जिला के लोरमी म नगर पालिका डहार ले करइया चार करोड़ सत्तर लाख रूपिया के लागत के अस्सी ले जादा काम मनके भूमिपूजन करीन।
अउ
– जांजगीर-चांपा जिला के अकलतरा स्थित शासकीय कन्या उच्चत्तर माध्यमिक विद्यालय म एनीमिया मुक्त अभियान के तहत जिला प्रशासन अउ यूनिसेफ के संयुक्त तत्वावधान म एनीमिया अउ खून जांच सिविर के आयोजन करे गीस।