दंतेवाड़ा जिला म आज सुरक्षा बल मनके संग होय मुठभेड़ म नौ झिन माओवादी मारे गेहे। एमा छै झिन माईलोगिन माओवादी घलो सामिल हे, जिखर सव बरामद कर ले गेहे। मउका ले एसएलआर, थ्री नॉट थ्री रायफल अउ तीन सौ पन्द्रह बोर के बंदूक समेत भारी मात्रा म माओवादी सामान बरामद करे गेहे। बस्तर रेंज के पुलिस महानिरीक्षक सुंदरराज पी. ह बतईन कि दंतेवाड़ा अउ बीजापुर के सीमावर्ती क्षेत्र म माओवादी मनके मौजूदगी के सूचना मिलतेच डिस्ट्रिक्ट रिजर्व गार्ड-डीआरजी अउ केन्द्रीय रिजर्व पुलिस बल-सीआरपीएफ के सामलात टीम ल रवाना करे गे रिहीस। इही दउरान पहिली ले घात लगाय बइठे माओवादी मन ह सुरक्षा बल मन उपर गोलीबारी सुरू कर दीन। जवान मन डहार ले करे गे जवाबी कार्रवाई म नौ झिन माओवादी मारे गीस। उहें, ए अभियान म सामिल जम्मों जवान सुरक्षित हवय।
ए मुठभेड़ म नौ झिन माओवादी मनके मारे जाय म उपमुख्यमंत्री विजय शर्मा ह डीआरजी अउ सीआरपीएफ मनके जवान मन ल बधाई दीन हे। ओमन किहीन हे कि छत्तीसगढ़ म नक्सलवाद खतम होवत हे अउ ए ह हमर जवान मनके सेती संभव होवत हे। ओमन किहीन कि बस्तर म सांति स्थापित होवत हे अउ अवइया बेरा म छत्तीसगढ़ ह नक्सल मुक्त हो जही।
ऐति, बीजापुर जिला म सुरक्षा बल मन ह आने-आने क्षेत्र ले तेरह झिन माओवादी मन ल गिरफ्तार करे हे। एमा ले सात झिन माओवादी मन ल गंगालूर क्षेत्र ले अउ छह झिन माओवादी मन ल तर्रेम थाना क्षेत्र ले गिरफ्तार करे गेहे। इंखर तीर ले प्रतिबंधित माओवादी संगठन के प्रचार-प्रसार के सामान बरामद करे गेहे। ए कार्रवाई जिला पुलिस बल, सीआरपीएफ अउ डीआरजी के संयुक्त टीम ह करीन हे।
भाजपा सदस्यता अभियान
छत्तीसगढ़ म आज ले भारतीय जनता पार्टी के सदस्यता अभियान सुरू होगे हे। रईपुर के पंडित दीनदयाल ऑडिटोरियम म राखे गे कारीकरम म मुख्यमंत्री विष्णुदेव साय ह भाजपा के सदस्यता ग्रहण करीन। ए दउरान संगठन के बड़का नेता मन ह घलो मौजूद रिहीन। राज्य म इकतीस अक्टूबर तक ए अभियान चलाय जाही। एखर तहत हर ब्लॉक म दू सौ सदस्य बनाय के लक्ष्य राखे गेहे। कारीकरम म मुख्यमंत्री ह किहीन कि आज ले प्रदेस म संगठन महापर्व अभियान के सुरूवात होय हे।
एखर पहिली, काली प्रधानमंत्री अउ भाजपा के वरिष्ठ नेता नरेन्द्र मोदी ह नई दिल्ली म पार्टी के सदस्यता अभियान के सुरूवात करीन। ओमन ल पार्टी अध्यक्ष जगत प्रकाश नड्डा ह सदस्यता नवीनीकरण प्रमाण पत्र दीन। ए मउका म श्री मोदी ह किहीन कि भाजपा ह भारत के एकमात्र राजनीतिक पार्टी हरय, जउन ह अपन काम के विस्तार करत लोकतांत्रिक प्रक्रिया के पालन करत हे। ओमन किहीन कि पार्टी ह लोगन मनके अपेक्षा म खरा उतरे बर सुधार करत हे। श्री मोदी ह किहीन कि सरकार जन-मन योजना के माध्यम ले गांव के लोगन मनके जिनगी म बदलाव लानत हे।
शिक्षक-सम्मान
राष्ट्रीय शिक्षक दिवस के मउका म पांच सितंबर के देसभर के पचास सिक्षक मन ल राष्ट्रपति द्रौपदी मुर्मू ह नई दिल्ली म सम्मानित करही। एमा छत्तीसगढ़ के दुरूग स्थित खेदामारा के सासकीय स्कूल के सिक्षिका के. शारदा घलो सामिल हवय। के. शारदा राष्ट्रपति के हाथ ले सम्मानित होवइया छत्तीसगढ़ के एकमात्र सिक्षिका हरय। आकाशवाणी समाचार ले गोठबात करत के. शारदा ह बतईन कि कोविड-नाइंटीन के दउरान ओमन अत्याधुनिक सैक्षणिक तकनीक ल अपनईन। ई-कंटेंट बनाए अउ डिजिटल टूल्स के उपयोग करीन। संगेसंग गणित के नवा पुस्तक तैयार करीन अउ ओखर क्यूआर कोड जनरेट करीन, जेखर ले लइका मन आसानी ले बिना रूके सिक्षा ले सकय। ओमन बतईन कि नवा सिक्षा नीति के तहत बहुभासा ल बढ़ावा दे बर उंखर डहार ले कुछुक पुस्तक घलो बनाय गेहे। हिन्दी ले छत्तीसगढ़ी, अंग्रेजी ले हिन्दी अउ स्थानीय बोली हल्बी म घलो पुस्तक बनाय हे। एखर माध्यम ले लइका मन ल बस्तर के संस्कृति के जानकारी मिलत हे।
खबर के मुताबिक के. शारदा सारीरिक रूप ले अस्सी प्रतिसत दिव्यांग हवय अउ उंखर एक हाथ काम नइ करय। एखर बाद घलो अपन मजबूत इरादा ले ओमन ए सफलता हासिल करे हे, जेखर बर ओमन ल सिक्षक दिवस के दिन राष्ट्रपति सम्मानित करही।
एक पेड़ मां के नाम
‘‘एक पेड़ मां के नाम‘‘ अभियान के तहत देसभर म अब तक बावन करोड़ ले जादा पौधा लगाए गेहे। एक ठिन सोसल मीडिया पोस्ट म केन्द्रीय पर्यावरण, वन अउ जलवायु परिवर्तन मंत्री भूपेन्द्र यादव ह किहीन कि ए अभियान मील के पत्थर साबित होय हे। खबर के मुताबिक विश्व पर्यावरण दिवस के मउका म प्रधानमंत्री नरेन्द्र मोदी ह ए अभियान के सुरूआत करे रिहीन।
अरूण साव-पुस्तिक विमोचन
उपमुख्यमंत्री अरूण साव ह आज रईपुर म राज्य के जाने-माने तीर्थस्थल महामाया धाम रतनपुर म आधारित पुस्तिका ‘‘छत्तीसगढ़ के प्रसिद्ध तीर्थस्थल रतनपुर‘‘ के विमोचान करीन। ए मउका म ओमन किहीन कि ए पुस्तिका बाहिर ले अवइया तीर्थयात्री अउ पर्यटक मन बर मार्गदर्सिका के रूप म काम करही। ओमन रतनपुर के तीर्थस्थल अउ पर्यटन स्थल के रूप म प्रचार-प्रसार बर घलो एला उपयोगी बतईन हे।
कांग्रेस प्रदर्शन
प्रदेस म माईलोगिन मन उपर होवत अपराध के विरोध म कांग्रेस ह आज प्रदेसभर म मौन प्रदर्शन करीन। रईपुर म नेता प्रतिपक्ष चरणदास महंत अउ बिलासपुर म प्रदेस कांग्रेस अध्यक्ष दीपक बैज के अगुवई म कांग्रेस कार्यकर्ता मन ह करिया पट्टी लगाके मौन धरना दीन। ए दउरान नेता प्रतिपक्ष चरणदास महंत ह किहीन कि राज्य म भाजपा के सरकार बने के बाद माईलोगिन मनके खिलाफ अपराध के मामला बाढ़े हे।
स्वाईन फ्लू
दुरूग जिला म स्वाइन फ्लू ले एक अउ मरीज के मउत होगे। जिला म अब तक स्वाईन फ्लू ले चार झिन लोगन के मउत होगे हे। उहें, तेरह मरीज मनके इलाज जिला के आने-आने अस्पताल म चलत हे। जिला कलेक्टर ऋचा प्रकाश चौधरी ह लोगन मन ल स्वाईन फ्लू ले सतर्क रेहे के अपील करीन हे। ओमन बतईन कि स्वाइन फ्लू के बाढ़त मामला ल देखत जिला अस्पताल म दस अउ चंदूलाल चंद्राकर मेडिकल कालेज म तीस बिस्तर आरक्षित करे गेहे।
देवेन्द्र यादव-रिमांड
कांग्रेस विधायक देवेन्द्र यादव के न्यायिक रिमांड अवधि सात दिन बर अउ बढ़ा दे गेहे। आज बलौदाबाजार जिला न्यायालय म वीडियो कॉन्फ्रेंसिंग के माध्यम ले होय पेसी म पुलिस ह देवेन्द्र यादव के रिमांड बढ़ाय के मांग करीन, जेमा अदालत ह देवेन्द्र यादव ल सात दिन बर पुलिस रिमांड म भेज दीन। खबर के मुताबिक बलौदाबाजार म पाछु दस जून के होय हिंसा अउ आगजनी के घटना के मामला म देवेन्द्र यादव सत्रह अगस्त ले जेल म बंद हवय।?
सक्ती-खाकी किड्स
सक्ती जिला म पुलिस डहार ले ‘‘खाकी किड्स‘‘ नामक एक नवा पहल सुरू करे गेहे। पुलिस अधीक्षक अंकिता शर्मा के अगुवाई म ए अभियान के तहत स्कूली लइका मन ल ‘‘साइबर बडी‘‘ अउ ‘‘ट्रैफिक बडी‘‘ के रूप म प्रसिक्षित करे जावत हे। एखर उद्देश्य लइका मन ल साइबर सुरक्षा अउ ट्रैफिक नियम के बारे म जागरूक करना हे। ए मउका म लइका मन ल साइबर फ्रॉड ले बांचे अउ ट्रैफिक नियम के पालन करे के सपथ देवईन।
ओपीएस-प्रशिक्षण
ओल्ड पेंशन स्कीम-ओपीएस चुनइया सासकीय सेवक के पेंसन निर्धारण प्रक्रिया के कार्यशाला अउ प्रसिक्षण काली चार सितंबर के रईपुर स्थित सासकीय कन्या पॉलिटेक्निक कॉलेज म राखे जाही। कलेक्टर डॉक्टर गौरव सिंह ह ए प्रसिक्षण म जिला के जम्मों आहरण संवितरण अधिकारी मन ल सामिल होय के निरदेस दीन हे। ए दउरान कार्यशाला के जुन्ना पेंशन योजना लागू होय के बाद मृत्यु होय अउ आशक्त सरकारी नौकरी वाले मनके प्रकरण म रासि समायोजन अउ पेंशन निर्धारण के प्रक्रिया के पूरा जानकारी वित्त विभाग के अधिकारी मन डहार ले दे जाही।
नंदकुमार साय-भाजपा
आदिवासी नेता नंदकुमार साय ह फेर ले भाजपा म प्रवेस कर लेहे। ओमन आज ऑनलाइन भाजपा के सदस्यता लीन। सोशल मीडिया म पोस्ट करके श्री साय ह ए जानकारी साझा करीन। श्री साय ह अपन पोस्ट म लिखे हे कि देस के सबले बड़े पार्टी भारतीय जनता पार्टी के सदस्यता ग्रहण करना गौरव के बात हे। खबर के मुताबिक श्री साय ह मई दू हजार तेईस म भाजपा ले इस्तीफा देके कांग्रेस म प्रवेस कर ले रिहीन। नंदकुमार साय कांग्रेस म करीबन आठ महीना रिहीन।