छत्तीसगढ़ विधानसभा के मानसून सत्र काली ले सुरू होही। छब्बीस जुलाई तक चलइया ए सत्र म कुल पांच बइठका होही। सत्र के बेरा वित्तीय अउ शासकीय काम संपादित करे जाही। पहिली दिन यानी काली प्रश्नोत्तर काल के बाद राज्य सरकार ह ए सत्र के पहिली अनुपूरक बजट पेस करही। विधानसभा के सचिव दिनेश शर्मा ह बतइन कि ए सत्र म अब तक नौ सौ छियासी प्रश्न लगाय गेहे।
संसद-सत्र
संसद के बजट सत्र काली ले सुरू होही। ए बजट सत्र म सरकार ह छै नवा विधेयक पेस कर सकत हे। केंद्रीय वित्तमंत्री निर्मला सीतारमण तेइस जुलाई के लोकसभा म आम बजट पेस करहीं। नरेंद्र मोदी सरकार के तीसर कार्यकाल के ए पहिली बजट होही।
इही बीच, संसद के बजट सत्र के पहिली आज नई दिल्ली म सर्वदलीय बैठक राखे गीस। ए बेरा सरकार ह संसद के दूनों सदन के सुचारू संचालन सुनिश्चित करे बर जम्मों राजनीतिक दल मन ले सहयोग के अपेक्षा करे हे।
पंचायत सचिव-समिति गठित
प्रदेस के पंचायत सचिव मनके शासकीयकरण के मांग अउ ओखर क्रियान्वयन के बिचार बर समिति के गठन करे गीस। पंचायत अउ ग्रामीण विकास विभाग के सचिव राजेश सिंह राणा ल समिति के अध्यक्ष नियुक्त करे गेहे। उहेंं, पंचायत संचालनालय के संचालक प्रियंका ऋषि मोहबिया ल सदस्य सचिव अउ विकास आयुक्त कार्यालय के वित्त नियंत्रक मोहम्मद युनूस ल सदस्य बनाय गेहे। ए समिति तीस दिन के भीतर अपन प्रतिवेदन शासन ल प्रस्तुत करहीं।
बतादन कि मुख्यमंत्री विष्णुदेव साय ह पंचायत सचिव दिवस के अवसर म प्रदेस पंचायत सचिव संघ डहार ले आयोजित सम्मान समारोह म पंचायत सचिव संघ के शासकीयकरण के मांग म समिति गठन के घोसना करे रिहीस।
मुख्यमंत्री-मलेरिया/डायरिया-नि
बिलासपुर कलेक्टर अवनीश शरण ह आज वीडियो कॉन्फ्रेंसिंग के माध्यम ले अधिकारी मन के बइठका लेके जिला म मलेरिया अउ डायरिया के हालात के समीक्षा करीन। ओमन अवइया दू दिन म पेयजल के जम्मो स्त्रोत म क्लोरिनेशन के निरदेस दीन, अउ गांव के जम्मो बोरिंग म अवइया पंद्रह दिन म जिला पंचायत मद ले प्लेटफार्म बनाय बर किहीन। ओमन ह जम्मो डॉक्टर अउ स्वास्थ्य कर्मी मन ल अपन मुख्यालय म उपस्थित रेहे के निरदेस दीन हे। संगेसंग ओमन किहीन कि अस्पताल मन म दवा अउ बेड के कमी नइ होना चाही। कलेक्टर ह किहीन कि लोगन मन ल बीमारी के बारे म सावधान अउ जागरूक करे के जरूरत हे, संगेसंग एसडीएम अउ तहसीलदार ल प्रभावित गांव मन म निरीक्षण करे के निरदेस दीन। कलेक्टर ह सामुदायिक स्वास्थ्य केंद्र अउ प्राथमिक स्वास्थ्य केंद्र मन म अतिरिक्त बेड तियार राखे बर किहीन।
इही बीच, कलेक्टर अवनीश शरण ह बिलासपुर के जिला अस्पताल अउ सिम्स म भर्ती मलेरिया अउ डायरिया ले पीड़ित मरीज मन ले मुलाकात करीन। ए बेरा म ओमन ह लोगन मन ले झाड़ फूक अउ झोला छाप डॉक्टर मन ले बांचे के अपील करीन हे।
खबर के मुताबिक मुख्यमंत्री विष्णुदेव साय ह मलेरिया अउ डायरिया ले निपटे बर जिला प्रशासन ले हरसंभव उपाय सुनिश्चित करे के निरदेस दीन हे।
आयुष्मान कार्ड-कार्रवाई
ए बछर आयुष्मान कार्ड के गलत उपयोग करइया प्रदेस के अड़तालिस अस्पताल म कार्रवाई करे गेहे, जेमा ले ग्यारा अस्पताल म जुर्माना लगाय गेहे। उहें, एक अस्पताल के पंजीयन निरस्त करे गेहे। ए अस्पताल के विरूध्द आयुष्मान कार्ड ले इलाज करे के बाद घलो हितग्राही ले जादा नगद रासि ले, आर्थिक लाभ पाय बर मरीज मन ल योजना अंतर्गत भर्ती करे जाय अउ अवैधानिक ढंग ले योजना के तहत गर्भाशय के ऑपरेसन करे के सिकायत मिले रिहीस। स्वास्थ्य विभाग ह अड़तालिस अस्पताल म ले सेष तैंतीस अस्पताल ल कारण बताओ नोटिस घलो जारी करे गेहे, जेखर स्पष्टीकरण के बाद नियमानुसार कार्यवाही करे जाही।
गुरू पूर्णिमा
आज गुरू पूर्णिमा हे ए मउका म प्रदेस भर म आने-आने कारीकरम के आयोजन करे गीस। मुख्यमंत्री विष्णुदेव साय ह आज बालोद जिला के जामड़ी पाटेश्वरधाम म आयोजित गुरू पूर्णिमा महोत्सव म सामिल होइन। मुख्यमंत्री ह उंहा सत्संग स्थल कौसल्या धाम म संत योगी बालक दास ले मुलाकात करीन अउ उंखर ले आसिर्वाद लीन। ए बेरा म सांसद भोजराज नाग के संग कतकोन जनप्रतिनिधि उपस्थित रिहीन।
मुख्यमंत्री ह ब्रम्हलीन संत रामजानकी दास जी के समाधी स्थल म पुष्पांजलि अर्पित करीन अउ सत्संग स्थल परिसर म रूद्राक्ष के पौधा लगाइन। मुख्यमंत्री ह शिव मंदिर म पूजा अर्चना करके प्रदेसवासी मनके सुख-समृध्दि अउ खुशहाली के कामना करीन।
ए बेरा म मुख्यमंत्री ह पाटेश्वरधाम म ब्रम्हलीन गुरूदेव रामजानकी दास के समाधी के निर्माण कराय अउ मंदिर परिसर के जीर्णोध्दार के संग जुंगेरा म प्री मैट्रिक बालक छात्रावास के सीट पचास ले बढ़ाके के सौ करे के घोसना करीन।
उहें, उप मुख्यमंत्री अरूण साव घलो आज गुरू पूर्णिमा के अवसर म राजधानी रईपुर के बोरिया खुर्द म आयोजित वृक्षारोपण कारीकरम म सामिल होके पीपल के पौधा लगाइन। ए वृक्षारोपण कारीकरम म दू सौ तीस एकड़ म फैले गजराज बांध के चारों कोति पौधा लगाय जाही।
शिक्षा-सप्ताह
राष्ट्रीय शिक्षा नीति के चार बछर पूरा होय के उपलक्ष्य म काली बाईस जुलाई ले प्रदेस म शिक्षा सप्ताह मनाय जाही। एखर माध्यम ले शिक्षक अउ स्थानीय सामग्री के प्रदर्सन अउ कक्षा म एखर उपयोग बर प्रोत्साहित करे जाही। एखल अलावा छत्तीसगढ़ के जम्मो स्कूल म सत्ताईस जुलाई के मिसन लाईफ घलो मनाय जाही। एखर तहत पर्यावरण के संरक्षण के महत्व ल लेके लइका म जागरूकता बर स्कूल मन म इको क्लब के गठन करे जाही। इको क्लब के माध्यम ले ‘एक पेड़ मां के नाम‘ अभियान के तहत वृक्षारोपण करे जाही।
माओवादी-आत्मसमर्पण
दंतेवाड़ा जिला म पांच लाख रूपिया के एक इनामी माओवादी ह आत्मसमर्पण करे हे। लोन वर्राटू अभियान ले प्ररित होके ए माओवादी ह दंतेवाड़ा के पुलिस उप महानिरीक्षक कमलोचन कश्यप अउ पुलिस अधीक्षक गौरव राय के आघू आत्मसमर्पण करे हे। ए माओवादी, प्लाटून पार्टी कमेटी के उत्तर सब जोनल ब्यूरो के राजनैतिक टीम के कमाण्डर रिहीस।
खबर के मुताबिक जिला म लोन वर्राटू अभियान के तहत अब तक एक सौ नब्बे इनामी समेत कुल आठ सौ इंक्यावन माओवादी आत्मसमर्पण कर समाज के मुख्यधारा म लहूटे हे।
ओल्ड लिसनर्स ग्रुप-परिचर्चा
ओल्ड लिसनर्स ग्रुप ऑफ छत्तीसगढ़ जोन अउ अहिंसा रेडियो श्रोता संघ डहार ले आज रईपुर के वृंदावन हॉल म ‘‘वर्तमान संदर्भ में आकाशवाणी व दूरदर्शन की प्रासंगिकता‘‘ बिसय म एक परिचर्चा आयोजन करे गीस। कारीकरम के माई पहूना रईपुर-दूरदर्शन केंद्र के अभियांत्रिकी विभाग के निदेशक संतोष कुमार देवहरे रिहीन। ए मउका म आकाशवाणी केंद्र रईपुर के उप निदेशक अउ कारीकरम प्रमुख लखनलाल भौर्य, कारीकरम अधिशासी शशिप्रकाश पांडेय के संग मोहनलाल देवांगन अउ झावेन्द्र कुमार धु्रव समेत कतकोन श्रोता उपस्थित रिहीन।
अउ अब थोरकुन समाचार सार म –
– छत्तीसगढ़ विधानसभा के अध्यक्ष डॉक्टर रमन सिंह अउ उप मुख्यमंत्री अरूण साव ह राजनांदगांव म नगर-निगम डहार ले कराय जाय वाले तेरह करोड़ इक्यासी लाख रूपिया के लागत के छियान्वे विकास कार्य के भूमिपूजन करीन।
– उप मुख्यमंत्री अउ नगरीय प्रशासन मंत्री अरूण साव ह रईपुर स्थित अपन निवास कार्यालय म केंद्र सरकार डहार ले ‘स्पार्क‘ पुरस्कार ले नवाजे गे, नगरीय निकाय के अधिकारी अउ लाभार्थी मन ल सम्मानित करीन।
– उप मुख्यमंत्री अरूण साव ह आज रईपुर के डॉक्टर भीमराव अम्बेडकर स्मृति चिकित्सालय म मेगा ब्लड डोनेसन कैंप के सुभारंभ करीन। कारीकरम म ओमन रक्तदान करइया मन ल प्रमाण पत्र घलो बांटिन।
अउ
– गौरेला-पेंड्रा-मरवाही कलेक्टर लीना कमलेश मंडावी ह काली कन्या आश्रम अउ बालक आश्रम बेलझीरिया के औचक निरीक्षण करीन। ए बेरा अनुपस्थित रहवइया आश्रम के अधीक्षक अउ अधीक्षिका ल निलंबित कर देहे।