माइक्रो सॉफ्ट सर्वर गड़बड़ी
माइक्रोसॉफ्ट सॉफ्टवेयर म बड़का स्तर म गड़बड़ी के सेति दुनिया भर म लाखों लोगन मन प्रभावित होय हे। एहा विश्व भर म कई ठिन व्यवसाय, बैंकिंग सेवा अउ अंतर्राष्ट्रीय एयर लाइन के आईटी नेटवर्क ल प्रभावित करे हे। भारत म इंडिगो, आकासा अउ स्पाइसजेट एयरलाइंस के चेक-इन सिस्टम देसभर म बंद हे। मुंबई हवाई अड्डा म एखर सबले जादा असर पड़े हे, जबकि दिल्ली हवाई अड्डा म कम प्रभाव रिहीस।
ऐति छत्तीसगढ़ के रईपुर एयरपोर्ट ले उड़ान भरइया पांच फ्लाइट मन ल माइक्रोसॉफ्ट सर्वर के ठप्प पड़े के सेति रद्द कर दे गीस, जेखर सेति एयरपोर्ट म यात्री मनके भीड़े देखे गीस।
इही बीच, केंद्रीय मंत्री अश्विनी वैष्णव ह किहीन कि उंखर मंत्रालय ए संबंध म माइक्रोसॉफ्ट अउ ओखर सहयोगी मन करा संपर्क म हे। ओमन किहीन कि ए रूकावट के कारण के पहिचान कर ले गेहे अउ समस्या के समाधान बर अपडेट जारी कर दे गेहे। ओमन बतइन कि राष्ट्रीय सूचना विज्ञान केंद्र के नेटवर्क प्रभावित नइ होय हे।
जवान-घायल
बीजापुर जिला म माओवादी मन डहार ले लगाए गे आईईडी म ब्लास्ट होय ले डिस्ट्रिक्ट रिजर्व गार्ड-डीआरजी के दू जवान घायल होगे हे।
मिले जानकारी अनुसार बीजापुर, दंतेवाड़ा अउ सुकमा जिला के सीमावर्ती क्षेत्र म माओवादी मनके मौजूदगी के सूचना म एसटीएफ, डीआरजी, सीआरपीएफ अउ कोबरा बटालियन के संयुक्त टीम ल बिसेस अभियान म रवाना करे गे रिहीस। लहुटे के दउरान गंगालूर थाना क्षेत्र के ग्राम मुतवेंडी अउ पीडिया के जंगल म माओवादी मन कोती ले लगाए गे आईईडी म ब्लास्ट होय ले दू जवान घायल होगिन। घायल जवान मन ल बीजापुर के जिला अस्पताल म भर्ती कराए गेहे, जहां प्रारंभिक उपचार के बाद ओमन ल अच्छा इलाज खातिर हायर सेंटल भेजे जाही।
जवान-श्रद्धांजलि
मुख्यमंत्री विष्णुदेव साय और उपमुख्यमंत्री विजय शर्मा ह आज रईपुर के माना स्थित चौथा बटालियन में बीजापुर जिला म माओवादी हमला म मारे गए जवान भरतलाल साहू के पार्थिव शरीर म फूल अर्पित करके श्रद्धांजलि दीन। मुख्यमंत्री अउ उपमुख्यमंत्री ह जवान के पार्थिव शरीर ल कंधा देके मोवा स्थित निवास बर रवाना करीन। मुख्यमंत्री ह ए दउरान जवान के परिजन मन करा गोठबात करके ओमन सांत्वना दीन।
बतादन कि बीजापुर जिला म काली माओवादी मन डहार ले करे गे हमला म स्पेसल टास्क फोर्स-एसटीएफ के दू जवान मनके मउत होगे रिहीस। ए घटना म चार जवान घायल होय हे। एसटीएफ के आरक्षक भरतलाल साहू रईपुर जिला के रहवासी रिहीन।
एसीबी-गिरफ्तार
एंटी करप्शन ब्यूरो-एसीबी के टीम ह आज दंतेवाड़ा अउ रईपुर म आने-आने कार्रवाई म दू झिन कर्मचारी मन ल रिस्वत लेवत गिरफ्तार करीन हे।
एसीबी के टीम ह आज दंतेवाड़ा के विकासखंड चिकित्सा अधिकारी डॉक्टर वेणु गोपाल राव ल पन्द्रह हजार रूपिया के रिस्वत लेवत रंगे हाथ गिरफ्तार करीन हे। आरोप हे कि विकासखंड चिकित्सा अधिकारी ह वाहन बिल के भुगतान के एवज म एक मनखे ले पंद्रह हजार रूपिया के रिस्वत मांगे रिहीस।
उहें, दूसर मामला म एसीबी ह रईपुर स्वास्थ्य संचालनालय म पदस्थ सहायक अधीक्षक सूरज कुमार नाग ल बीस हजार रूपिया के रिस्वत लेवत गिरफ्तार करे हे। आरोपी ह अध्ययन अवकास स्वीकृति बर गरियाबंद के सामुदायिक स्वास्थ्य केंद्र म पदस्थ एक स्टाफ नर्स करा रिस्वत मांगे रिहीस।
राज्यपाल-बाल अधिकार संरक्षण आयोग
राज्यपाल विश्वभूषण हरिचंदन ले आज राजभवन म छत्तीसगढ़ राज्य बाल अधिकार संरक्षण आयोग के सदस्य मन सौजन्य भेंट करीन। ओमन लईका मन ल नसा के प्रवृत्ति के प्रभावी रोकथाम बर राज्य के जम्मों जिला मन म नसामुक्ति केन्द्र खोले बर राज्यपाल ले अनुरोध करीन।
कलेक्टर-दौरा
बिलासपुर जिला के कलेक्टर अवनीश शरण ह मलेरिया प्रभावित कुरदर, छुईहा, टेंगनमाड़ा समेत कई ठिन गांव के दौरा करीन। कलेक्टर ह कुरदर गांव के चौक म चौपाल लगाके खुद अपन मलेरिया जांच करवा के लोगन मन ल प्रेरित करीन। कलेक्टर ह स्वास्थ्य विभाग के टीम ल रोज संझा जन-चौपाल लगाके लोगन मन म जागरूकता फैलाय बर किहीन। ओमन एक ठिन बाईक एम्बुलेंस ल कुरदर म चौबीस घंटा तैनात रखे के निरदेस दीन।
एखर बाद कलेक्टर ह टेंगनमाड़ा प्राथमिक स्वास्थ्य केंद्र के घलो निरीक्षण करीन। ओमन निरदेस दीन कि यदि फेल्सिफेरम मेलरिया के पुष्टि होथे त, स्थानीय स्तर म इलाज न करके मरीज ल सीधा जिला अस्पताल या सिम्स म भर्ती बर रिफर करे जाय।
उहें, जांजगीर-चांपा कलेक्टर आकाश छिकारा ह आज वीडियो कॉन्फ्रेंसिंग के माध्यम ले जिला म डायरिया ले बचाव बर जम्मों जिला अउ विकासखंड स्तरीय अधिकारी मनके बइठका लीन। बइठका म ओमन डायरिया रोके बर अधिकारी मन ल जन-जागरूकता बर व्यापक प्रचार-प्रसार करे के निरदेस दीन।
मिर्जा मसूद-निधन
प्रख्यात रंगकर्मी अउ आकासवाणी के वरिष्ठ उद्घोषक मिर्जा मसूद के आज मध्यप्रदेश के इंदौर म निधन होगे। ओमन अस्सी साल के रिहीन।
मुख्यमंत्री विष्णुदेव साय ह मिर्जा मसूद जी के निधन म गहरा सोक जतईन हे। ओमन किहीन कि मिर्जा मसूद ह अपन पूरा जीवन रंगमंच ल समर्पित कर दीन। उंखर निधन कला जगत बर अपूर्णनीय क्षति हरय। मुख्यमंत्री क किहीन कि मिर्जा मसूद के आवाज अउ अंदाज ओमन ल अद्वितीय बनावय। ओमन कई ठिन अंतर्राष्ट्रीय खेल प्रतियोगिता मन म हिन्दी ब्रॉडकास्ट कमेंटेटर के रूप म घलो अमन बिसेस पहिचान बनाइन। छत्तीसगढ़ सरकार डहार ले दू हजार उन्नीस म ओमन ल चक्रधर सम्मान से नवाजे गे रिहीस। मिर्जा मसूद के कला अउ संस्कृति के क्षेत्र म योगदान ल हमेसा सुरता करे जाही।
आकाशवाणी के रईपुर म जम्मो अधिकारी अउ कर्मचारी मन मिर्जा मसूद के निधन उपर दू मिनट के मौन रखके ओमन ल श्रध्दांजलि दीन।
खूबचंद बघेल-जयंती
मुख्यमंत्री विष्णुदेव साय आज राजधानी रईपुर म राखे गे डाक्टर खूबचंद बघेल के एक सौ चौबीसवां जयंती समारोह म सामिल होईन। ओमन डाक्टर खूबचंद बघेल के मूर्ति म फूल-माला चढ़ाके ओमन ल नमन करीन। ए मउका म मुख्यमंत्री ह किहीन कि ओमन छत्तीसगढ़ के स्वप्नदृष्टा रिहीन। एक अच्छा डाक्टर अउ साहित्यकार के रूप म उंखर अलग पहिचान रिहीस। मुख्यमंत्री ह किहीन कि हमर पुरखा मन जउन छत्तीसगढ़ के सपना देखे हे ऐला आकार देबर हमन जम्मों झन काम करत हन।
राजस्व मंत्री टंकराम वर्मा ह किहीन कि डाक्टर खूबचंद बघेल ह समाज म भेदभाव ल मिटाए बर अउ गरीब तबका ल उपर उठाए बर जीवनभर संघर्ष करीन। ओमन समाज म सामाजिक समरसता ल बढ़ाए के काम करीन।
ए मउका म पूर्व मुख्यमंत्री भूपेश बघेल अउ छत्तीसगढ़ मनवा कुर्मी क्षत्रिय समाज के कार्यकारी अध्यक्ष के.के. नायक मौजूद रिहीन।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ म ए बखत केंद्रीय नीति आयोग के मार्गदर्शन म चलाय जात संपूर्णता अभियान म योजना, आर्थिक अउ सांख्यिकीय विभाग के सचिव अंकित आनंद ले लेगे भेंटवार्ता प्रसारित करे जाही। ए कारीकरम आकाशवाणी केन्द्र रायपुर डहार ले काली बीस जुलाई के बिहनिया साढ़े दस बजे ले प्रसारित करे जाही। एला छत्तीसगढ़ स्थित आकाशवाणी के जम्मो केन्द्र मन रिले करही।
पुलिस अधीक्षक-तबादला
राज्य सरकार ह भारतीय पुलिस सेवा के दू अउ राज्य पुलिस सेवा के एक अधिकारी ल तबादला कर देहे। जारी आदेस क अनुसार राजेश अग्रवाल ल बलरामपुर-रामानुजगंज जिला के नवा पुलिस अधीक्षक नियुक्त करे गेहे। उहें, बलरामपुर-रामानुजगंज के पुलिस अधीक्षक लाल उमेद सिंह ल मुख्यमंत्री सुरक्षा ल पुलिस अधीक्षक बनाय गेहे। उहें, मुख्यमंत्री सुरक्षा के पुलिस अधीक्षक प्रफुल्ल ठाकुर ल चौथा बटालियन माना रईपुर म पदस्थ करे गेहे।