छत्तीसगढ़ के मुख्यमंत्री विष्णुदेव साय ह आज नई दिल्ली म केन्द्रीय श्रम, रोजगार, युवा अउ खेल मामला के मंत्री डॉक्टर मनसुख मांडविया ले भेंट करीन।
एमा श्री साय ह डॉक्टर मांडविया ले छत्तीसगढ़ म रोजगार बढ़ाय, श्रमिक कल्याण अउ खेल सुविधा के विस्तार बर केन्द्र सरकार ले अउ जादा सहायता देहे के आग्रह करीन। मुख्यमंत्री ह केन्द्रीय मंत्री ल राज्य म श्रम, रोजगार अउ खेल के क्षेत्र म होवत तरक्की के जानकारी घलो दीन। ओमन बतईन कि छत्तीसगढ़ सरकार ह श्रमिक मन बर बने सारा काम करे हे। एमा न्यूनतम मजदूरी दर म बढ़ोतरी, श्रमिक कल्याण योजना के क्रियान्वयन अउ रोजगार के नवा-नवा मउका बनाना सामिल हे। मुख्यमंत्री ह राज्य म बेरोजगारी दर ल कम करे बर केन्द्र सरकार ले अउ जादा सहयोग के मांग करीन।
उहें, मुख्यमंत्री श्री साय ह आज नई दिल्ली के रेल भवन म केन्द्रीय रेल मंत्री अश्वनी वैष्णव ले घलो भेंट करीन। ए दउरान मुख्यमंत्री ह राज्य के सामाजिक अउ आर्थिक विकास बर रेल नेटवर्क के विस्तार के जरूरत बर जोर दीन अउ आने-आने परियोजना के महत्ता के बारे म बतईन। ए मउका म उप मुख्यमंत्री विजय शर्मा घलो मौजूद रिहीन।
विधानसभा अध्यक्ष-मानसून सत्र
छत्तीसगढ़ विधानसभा के मानसून सत्र अवइया 22 जुलाई ले सुरू होही। एखर बर तियारी पूरा होगे हे। विधानसभा अध्यक्ष डॉक्टर रमन सिंह ह आज दुरूग म पत्रकार मन से गोठबात करत हुए बतईन कि विधानसभा म प्रश्न अउ ध्यानाकर्षण बर अइसन व्यवस्था करे जावत हे, जेमा कागज के इस्तेमाल नइ करना पड़ही। ए पूरा प्रक्रिया ह डिजिटल तरीका ले संपन्न कराय जाही। ओमन बतईन कि विधानसभा म पहिली पइत ए नवा प्रयोग करे जावत हे। अभी तक ध्यानाकर्षण अउ आने-आने विषय म जेन प्रश्न आवत रिहीस, ओला विधायक मन ल खुद प्रस्तुत होके देना पड़त रिहीस। फेर, अब एमा नवा प्रक्रिया सुरू होय हे। एखर तहत ध्यानाकर्षण सूचना ह घलो डिजिटल तरीका ले उपलब्ध रइही। विधायक अपन कोति ले ध्यानाकर्षण के सूचना विधानसभा सचिवालय म कोनों जघा ले भी दे सकत हे, जेला माने जाही कि ओ ह विधायक कोति ले ही दे गे प्रश्न या ध्यानाकर्षण हवय। डॉक्टर सिंह ह कहिन कि मानसून सत्र के दिन भले कम हवय, फेर एमा लोगन मन ले जुड़े आने-आने मुद्दा उपर सार्थक गोठबात खच्चित होही।
छत्तीसगढ़-पुरस्कार
छत्तीसगढ़ ल दीनदयाल अंत्योदय योजना-राष्ट्रीय शहरी आजीविका मिशन म बढ़िया काम करे बर काली 18 जुलाई के नई दिल्ली म पांच ठन राष्ट्रीय पुरस्कार दे जाही। केन्द्रीय आवासन और शहरी कार्य मंत्री मनोहर लाल खट्टर अउ केन्द्रीय राज्यमंत्री तोखन साहू ह ए इनाम प्रदान करही। केन्द्र सरकार कोति ले राज्य शहरी विकास अभिकरण-सूडा अउ प्रदेस के चार नगरीय निकाय -बिलासपुर, रायगढ़, चांपा अउ भाटापारा ल ए स्पार्क पुरस्कार बर चुने गेहे।
सुनइया मन ल बतादन कि राज्य म सहरी गरीब परिवार ल ससक्त बनाय अउ उंखर कमाई के मउका बढ़ाय म बढ़िया काम करे बर ए इनाम दे जावत हे।
छत्तीसगढ़-विजन डॉक्यूमेंट
मुख्यमंत्री विष्णुदेव साय ह किहीन हे कि विकसित छत्तीसगढ़ बनाय बर विजन डॉक्यूमेंट सबो झन के सहयोग ले तियार करे जावत हे। मुख्यमंत्री ह काली रईपुर म छत्तीसगढ़ विजन-2047 तैयार करे बर राज्य नीति आयोग कोति ले राखे गे संवाद कार्यक्रम ल संबोधित करत हुए ए बात किहीन। श्री साय ह किहीन कि प्रधानमंत्री नरेन्द्र मोदी ह बछर 2047 तक हमर देस भारत ल विकसित देस बनाय के संकल्प लेहे। एखर बर छत्तीसगढ़ के विजन डॉक्यूमेंट अउ नवा उद्योग नीति ल अवइया 01 नवंबर के जारी करे जाही। संवाद कार्यक्रम म प्रदेस के युवा, किसान, माईलोगिन अउ सियान मन ह अपन-अपन विचार साझा करीन।
माशिमं-द्वितीय मुख्य परीक्षा
छत्तीसगढ़ माध्यमिक शिक्षा मंडल डहार ले हाईस्कूल अउ हायर सेकेंडरी स्कूल दूससरइया मुख्य परीक्षा 23 जुलाई ले 12 अगस्त तक ले जाही। परीक्षा के सुघ्घर संचालन बर रायपुर म राज्य स्तरीय ऑनलाइन प्रशिक्षण उन्मूखीकरण कार्यक्रम घलो आयोजित करे गीस। एमा सबो उत्तर पुस्तिका म द्वितीय मुख्य परीक्षा लिखाय वाले सील खच्चित लगाय बर कहे गीस।
व्यापमं-परीक्षा तिथि
छत्तीसगढ़ व्यावसायिक परीक्षा मंडल-व्यापमं ह आने-आने पद म भर्ती बर लिखित परीक्षा के संभावित तिथि घोषित कर देहे। एखर अनुसार छत्तीसगढ़ उच्च न्यायालय म सहायक ग्रेड-तीन बर 28 जुलाई अउ राज्य न्यायालयिक विज्ञान प्रयोगशाला म सहायक अउ टेक्निशियन बर 25 जुलाई के परीक्षा ले जाही। एखरे अइसन अउ आने-आने विज्ञापित पद मन बर परीक्षा के संभावित तिथि तय कर दे गेहे। एखर बर अभ्यर्थी मन व्यापमं के वेबसाइट के अवलोकन कर सकत हे।
कवर्धा-स्वच्छता अभियान
कबीरधाम जिला म सबो सार्वजनिक अउ निजी जल स्त्रोत म क्लोरीन दवई डाले अउ सफई अभियान सुरू होगे हे। ए अभियान के उद्देश्य गंवई म साफ पानी के आपूर्ति पक्का करना हे। अभियान म विशेष पिछड़ी जनजाति बैगा अउ आदिवासी क्षेत्र म घलो सफई काम करे जावत हे। जिला कलेक्टर ह एखर बर पंचायत अउ ग्रामीण विकास, स्वास्थ्य अउ लोक स्वास्थ्य यांत्रिकी विभाग ल काम जोंगे हे। जिला के सबो विकासखंड म पांच-पांच दल बनाय गेहे, जेन ह क्लोरिनेशन के काम करत हे।
गौ-तस्करी-सजा
छत्तीसगढ़ म गाय-गरू के तस्करी अउ उंखर मांस के बिक्री म कड़ा कार्रवाई होही। गृह विभाग ह ए बारे म आदेस जारी कर देहे। आदेस के अनुसार गाय-गरू अउ आने दुधारू पशु के अवैध परिवहन म 7 बछर के सजा अउ पचास हजार रूपिया के अर्थदंड लगाय जाही। ए अपराध ल अब गैर जमानती बना दे गेहे।
उपमुख्यमंत्री विजय शर्मा ह बतईन कि राज्य सरकार ह गौवंश के अवैध परिवहन उपर कड़ाई ले कार्रवाई करत हे। सरकार ह सजा अउ जुर्माना तय करके ए पक्का करे हे कि कोनों भी ए कानून के उल्लंघन झन कर सकय। ओमन बतईन कि सक्षम अधिकारी के मजूंरी के बिना गौवंश ल एक जघा ले दूसरइया जघा नइ ले जाय जा सकय। परिवहन वाले गाड़ी म फ्लेक्स घलो लगाय बर पड़ही। तस्करी करत पाय जाय म गाड़ी ल राजसात करे जाही अउ गाड़ी मालिक उपर घलो कार्रवाई होही। ए अपराध ले अर्जित संपत्ति ल कुर्क घलो करे जाही।
बलौदाबाजार घटना-आरोपी गिरफ्तार
बलौदाबाजार जिला मुख्यालय म पाछु महीना होय तोड़फोड़ अउ आगजनी के घटना म सामिल पांच झन अउ आरोपी मन ल पुलिस ह पकड़ लीस हे। एमा भीम रेजीमेंट के प्रदेश अध्यक्ष दिनेश चतुर्वेदी ह घलो सामिल हे।
सुनइया मन ल बतादन कि पाछु 10 जून के बलौदाबाजार जिला कलेक्ट्रेट अउ पुलिस अधीक्षक कार्यालय अउ उहां खड़े गाड़ी मन म तोड़फोड़ करे गे रिहीस अउ आगी घलो लगाय गे रिहीस। ए मामला म अब तक एक सौ अड़सठ आरोपी मन ल गिरफ्तार करे गेहे।
मुहर्रम
मुहर्रम आज देस के आने-आने जघा म श्रद्धा अउ आस्था संग मनाय जावत हे। करबला म सत्या अउ न्याय के रक्षा बर पैगम्बर मोहम्मद के नाती हजरत इमाम हुसैन अउ उंखर संगी मनके सहादत के सुरता म मुहर्रम मनाय जाथे। ए मउका म ताजिया निकाले जाथे अउ करबला के सहीद मनके बलिदान ल सुरता करे बर धार्मिक बइठका यानि मजलिस के आयोजन करे जाथे।
ऐति, छत्तीसगढ़ म घलो मुहर्रम के मउका म राजधानी रायपुर समेत आने-आने सहर म ताजिया निकाले जावत हे। ए बेरा म ताजिया के संगेसंग मातमी जुलूस घलो निकलत हे।