योग दिवस-01
दुनिया भर म आज अंतर्राष्ट्रीय योग दिवस मनाय जात हे। देस म मुख्य समारोह जम्मू कश्मीर के श्रीनगर म शेर-ए-कश्मीर अंतर्राष्ट्री सम्मेलन केंद्र म आयोजित करे गीस। प्रधानमंत्री नरेंद्र मोदी ह श्रीनगर ले समारोह के अगुवई करे। ए मउका म प्रधानमंत्री योग सत्र म सामिल होइन। ओमन जनसभा ल घलो संबोधित करीन। ए सत्र म सारीरिक मानसिक अउ आध्यात्मिक विकास म योग के महत्व उपर जोर दे गीस। ओमन किहीन कि दुनिया भर म योग अपनाय वाला मनके संख्या बाढ़त जात हे, अउ एखर उपयोगिता ल घलो लोगन मन पहिचानत हे।
पाछू दस बछर म योग के विस्तार म प्रधानमंत्री ह एक नवा योग अर्थव्यवस्था के बारे म गोठबात करीन अउ योग पर्यटन बर बाढ़त आर्कषण अउ लोगन मन के योग सिखे बर भारत आय के इच्छा के उल्लेख करीन।
ए बछर के अंतर्राष्ट्रीय योग दिवस के बिसय हे – ‘स्वयं और समाज के लिए योग‘। प्रधानमंत्री ह किहीन कि पूरा दुनिया योग ल वैश्विक कल्याण के एक सक्तिसाली तंत्र के रूप म देखत हे। योग लाभ के समग्रता अउ जादा बढ़ाय बर प्रधानमंत्री नरेंद्र मोदी ह जम्मों ग्राम प्रधान मन ल पत्र लिखके जमीनी स्तर म ग्रामीण क्षेत्र म योग के प्रचार-प्रसार ल बढ़ावा देके आह्वान करीन।
योग दिवस-02
अंतर्राष्ट्रीय योग दिवस के मउका म छत्तीसगढ़ के आने-आने जघा म बहुतअकन कारीकरम राखे जात हे। राज्यपाल विश्वभूषण हरिचंदन आज राजभवन म अंतर्राष्ट्रीय योग दिवस के मउका म आयोजित योग सिविर म सामिल होइन। ए मउका म राज्यपाल ह किहीन कि योग एक प्राचीन भारतीय परंपरा हे जउन अब वैश्विक संस्कृति के हिस्सा बन गेहे। योग के माध्यम ले देस-विदेस के योगी एक-दूसर ले जुड़त हे, अउ सांस्कृतिक एकता ल बढ़ावा देत हे। कारीकरम म योग-आयोग ले आय प्रसिक्षक मनके मार्गदर्सन म राजभवन के जम्मों अधिकारी अउ कर्मचारी मन योगाभ्यास करीन।
उहें, मुख्यमंत्री विष्णुदेव साय आज दसवां अंतर्राष्ट्रीय योग दिवस के मउका म राजधानी रईपुर के साईंस कॉलेज मैदान म राखेगे सामूहिक योगाभ्यास कारीकरम म सामिल होइन। इंहा ओमन हजार के संख्या म आय लोगन मन संग सामूहिक योग करीन अउ स्वस्थ्य जीवन सैली बर नियमित योगाभ्यास करे संदेस लोगन मन ल दीन।
योग दिवस-03
अंतर्राष्ट्रीय योग दिवस के मउका म आज कोरबा जिला के सीएसईबी मैदान म राखेगे योगाभ्यास कारीकरम म उप मुख्यमंत्री अरूण साव सामिल होइन। श्री साव के संग कटघोरा विधायक प्रेमचंद पटेल ह घलो योग करीन।
उहें, दुरूग के रविशंकर स्टेडियम म राखेगे योगाभ्यास कारीकरम म मुख्य अतिथि के रूप म उप मुख्यमंत्री विजय शर्मा सामिल होइन। श्री शर्मा के संग विधायक गजेन्द्र यादव ह घलो योगाभ्यास करीन।
उहें, जगदलपुर सहर के इंदिरा प्रियदर्सनी स्टेडियम म भाजपा के प्रदेस अध्यक्ष अउ जगदलपुर विधायक किरण सिंह देव मुख्य अतिथि के रूप म मौजूद रिहीन अउ सहरवासी मन संग योगाभ्यास करीन।
ऐति, छत्तीसगढ़ विधानसभा परिसर स्थित सेंट्रल हाल म विधानसभा सचिव दिनेश शर्मा के अगुवई म छत्तीसगढ़ विधानसभा के अधिकारी अउ कर्मचारी मन योगाभ्यास करीन। सचिवालय म ए योगाभ्यास मृत्युंजय योग समूह के योग गुरू आशी कश्यप अउ सीमा टण्डन के मार्गदर्सन म संपन्न होइस।
माओवादी-गिरफ्तार
बीजापुर जिला म सुरक्षा बल मन एक इनामी समेत नौ माओवादी मन ल गिरफ्तार करीन। बताय जात हे कि माओवादी मनके गिरफ्तारी बासागुड़ा, उसूर अउ तर्रेम क्षेत्र म अलग-अलग कार्रवाई के दौरान करे गेहे। एमा ले एक माओवादी उपर एक लाख रूपिया के इनाम घोसित रिहीस। गिरफ्तार इनामी माओवादी ल उसूर एलओएस के सदस्य बताय जात हे। ए माओवादी मन उपर पुलिस पार्टी उपर फायरिंग, आईईडी लगाय, रोड कांटे अउ पाम्पलेट लगाय जइसे आने-आने घटना म सामिल रहे के आरोप हे।
अजय सिंह-राज्य निर्वाचन आयुक्त
भारतीय प्रशासनिक सेवा के सेवानिवृत्त अधिकारी अजय सिंह ल छत्तीसगढ़ राज्य निर्वाचन आयोग के नवा राज्य निर्वाचन आयुक्त नियुक्त करे गेहे। श्री सिंह उन्नीस सौ तिरासी बैच के आईएएस अधिकारी रइही चुके हे। ए संबंध म मुख्य सचिव अमिताभ जैन ह आदेस जारी कर देहे।
तबादला
राज्य सरकार ह आज भारतीय प्रशासनिक सेवा के तीन अधिकारी मनके नवा पदस्थापना करे हे। ए संबंध म सामान्य प्रशासन विभाग ह आदेस जारी कर देहे। जारी आदेस के अनुसार वाणिज्यिक कर जीएसटी आयुक्त अउ प्रधानमंत्री आवास योजना-ग्रामीण के संचालक रजत बंसल ल मनरेगा आयुक्त के अतिरिक्त प्रभार दे गेहे। उहें, राज्य पाठ्य पुस्तक निगम के प्रबंध संचालक अउ खाद्य अउ औषधी के प्रशासन के नियंत्रक कुलदीप शर्मा ल सहकारी संस्था के रजिस्टार के अतिरिक्त प्रभार सौंपे गेहे। एखर अलावा राष्ट्रीय ग्रामीण आजीविका मिसन रईपुर के मिसन संचालक नम्रता जैन ल जिला पंचायत सुकमा के नवा मुख्य कार्यपालन अधिकारी नियुक्त करे गेहे।
संगीत विश्वविद्यालय-कुलपति
खैरागढ़ स्थित इंदिरा कला संगीत विश्वविद्यालय के कुलपति मोक्षदा चन्द्राकर ल पद ले हटा दे गेहे। ए संबंध म राजभवन ले पत्र जारी कर दे गेहे। संगीत विश्व विद्यालय खैरागढ़ म नवा कुलपति के नियुक्ति होय तक दुरूग के संभागायुक्त ल अस्थाई रूप ले अवइया आदेस तक इंदिराकला संगीत विश्व विद्यालय खैरागढ़ के कुलपति के दायित्व सौंपे गेहे।
बतादन कि मोक्षदा चन्द्राकर ल बछर दू हजार बीस म इंदिरा कला संगीत विश्वविद्यालय के कुलपति नियुक्त करे गे रिहीस।
करंट-मौत
राजनांदगांव जिला के ग्राम बांकल म करंट लगे ले एक लइका के मौत होगे। मिले जानकारी के अनुसार पाछू शुक्रवार के आंधी तुफान म बिजली खंभा के तार टूट के गिर गे रिहीस। परिवार वाला मन शनिवार के एखर जानकारी विद्युत कंपनी के कर्मचारी मन ल दे रिहीन, फेर बिजली के सफलाई बंद नइ करे गीस। टूटे तार के चपेट म आय ले लइका के मौत होगे।
उहें, एक दूसर घटना म करंट लगे ले चार मवेसी मनके घलो मौत होगे। ग्रामीण मन जिला पंचायत सदस्य के संग पुलिस ल लिखित सिकायत करके बिजली कंपनी के अधिकारी मन उपर कार्रवाई करे के मांग करीन हे।
ओति, जांजगीर-चांपा जिला के शिवरीनारायण म घलो करंट के चपेट म आय ले पांच मवेसी मनके मौत होगे।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ म ए बखत एक जुलाई ले प्रभावी होवइया तीन ठन नवा आपराधिक कानून उपर सहायक अभियोजन अधिकारी शुभम तोमर ले लेगे भेंटवार्ता प्रसारित करे जाही। एक कारीकरम के पहिली कड़ी आकाशवाणी केन्द्र रायपुर डहार ले काली बाईस जून के बिहनिया साढ़े दस बजे ले प्रसारित करे जाही। एला छत्तीसगढ़ के जम्मों आकाशवाणी केन्द्र मन एके संगरा रिले करही।
अउ अब मौसम के हाल…
प्रदेस म अवइया तीन-चार दिन म मानसून के अउ जादा जघा मन म सक्रिय होय के संभावना हरय। उहें, कवर्धा, राजनांदगांव, गरियाबंद अउ रईपुर म काली मानसून पूर्व बारिस के बाद गर्मी ले थोरकुन राहत मिलिस।
मौसम विभाग के अनुसार काली प्रदेस म आने-आने जघा म हल्का ले मध्यम बरसा होय या गरज-चमक के संग छींटा पड़े के संभावना हे। उहें, एक-दू जघा म गाज गिरे अउ अंधड़ चले के चेतावनी दे गेहे।
अउ अब थोरकुन समाचार सार म –
– मुख्यमंत्री विष्णुदेव साय ह धमतरी म पचपन करोड़ रूपिया के आने-आने कार्यो के लोकार्पण अउ सिलान्यास करीन। ए मउका म सांसद रूपकुमारी चौधरी, विधायक अजय चंद्राकर अउ सुपर 30 के ंस्थापक आनंद कुमार घलो मौजूद रिहीन।
– राज्यपाल विश्वभूषण हरिचंदन ले आज सेवक कबीर पंथ दामाखेड़ा के महंत लीलाधर दास ह सौजन्य भेंट करीन। ओमन राज्यपाल ल कबीर जयंती के मउका म आयोजित कारीकरम बर आमंत्रण दीन।
अउ
– सक्ति जिला के गढ़वा गांव म ट्रैक्टर के इंजन पलटे ले एक लइका के मौत होगे। पुलिस ह ट्रैक्टर चालक के खिलाफ जुर्म दरज करे हे।