केन्द्र सरकार ह चौदह फसल मन बर न्यूनतम समर्थन कीमत बढ़ाय के फइसला लेहे। नई दिल्ली म मीडिया ले गोठबात करत सूचना अउ प्रसारण मंत्री अश्विनी वैष्णव ह बतइन हे कि सरकार ह कैबिनेट बइठका म कई ठिन अहम फैसला लेहे। ओमन बतइन कि कैबिनेट ह चौदह फसल मन उपर चालू विपणन सत्र बर खरीफ फसल मन के न्यूनतम समर्थन कीमत-एमएसपी ल मंजूरी देहे। धान, कपास, बाजरा, दलहन, तिलहन मन बर न्यूनतम समर्थन कीमत म बढ़ोत्तरी ले किसान मन ल फायदा होही। ओमन बतइन कि सरकार देसभर म दू लाख गोदाम बनाय बर घलो काम करत हे। एक ठिन आने फैसला के जानकारी देवत श्री वैष्णव ह किहीन कि कैबिनेट ह राष्ट्रीय फोरेंसिक बुनियादी ढांचा संवर्धन योजना ल घलो मंजूरी दे दीन हे।
प्रधानमंत्री नरेंद्र मोदी ह केंद्रीय मंत्रिमंडल के फैसला के बड़ई करत सोसल मीडिया पोस्ट म ओमन किहीन कि सरकार किसान मन के कल्याण बर सरलग कदत उठावत हे। श्री मोदी ह किहीन कि सरकार देसभर म संपर्क सुविधा बढ़ाय बर प्रतिबध्द हे।
केंद्र सरकार डहार ले खरीफ फसल मनके समर्थन मूल्य म करे गे बढ़ोत्तरी के फइसला के भारतीय जनता पार्टी के प्रदेस इकाई ह स्वागत करे हे।
अंतर्राष्ट्रीय योग दिवस
दसवां अंतर्राष्ट्रीय योग दिवस काली मनाय जाही। राज्य स्तरीय कारीकरम रईपुर के साईंस कॉलेज मैदान म आयोजित होही। कारीकरम के माई पहूना मुख्यमंत्री विष्णुदेव साय होही। उहें, कारीकरम के अध्यक्षता समाज कल्याण मंत्री लक्ष्मी राजवाड़े करही।
कारीकरम के आयोजन केंद्रीय आयुष मंत्रालय डहार ले निर्धारित प्रोटोकॉल के मुताबिक बिहनिया सात बजे ले आठ बजे तक के बीच होही। एमा छत्तीसगढ़ योग आयोग के प्रशिक्षित अउ अनुभवी योग प्रसिक्षक मन डहार ले योगाभ्यास के प्रसिक्षण दे जाही। ए कारीकरम म जनप्रतिनिधि, शासकीय अधिकारी-कर्मचारी, पंतजलि योग संस्थान, प्रजापिता ब्रम्हकुमारी संस्थान समेत आने-आने संस्थान मन के योग साधक के संगेसंग करीबन पैंतीस हजार आम नागरिक सामिल होही। कारीकरम के मुख्य उद्देस्य ‘योग‘ ल जनसामान्य के दिनचर्या के अंग बनाय अउ राज्य के हरेक मनखे मन ल स्वस्थ्य जीवनसैली अपनाय बर योग ले परिचित करवाना हे।
अंतर्राष्ट्रीय योग दिवस के मउका म कारीकरम उप मुख्यमंत्री अरूण साव कोरबा म अउ विजय शर्मा ह दुरूग म राखेगे कारीकरम म सामिल होही। उहें, बिलासपुर म केंद्रीय राज्यमंत्री तोखन साहू, कांकेर म रईपुर सांसद बृजमोहन अग्रवाल के संगेसंग कैबिनेट के सबो मंत्री, सांसद अउ विधायक अलग-अलग जिला म होवइया योगाभ्यास कारीकरम म भाग लिही।
जिओ रिफ्रेंसिंग-भू-सर्वे
प्रदेस म जियो रिफ्रेंसिंग अउ डिजिटाईजेशन परियोजना के अंतर्गत बीस हजार ले जादा ग्राम पंचायत मन म भूमि सर्वेक्षण के काम होही। अब तक महासमुंद, धमतरी, कबीरधाम, मुंगेली, बिलासपुर, जांजगीर-चांपा, सक्ती, बलौदाबाजार, कोरबा समेत नौ जिला मनके चार हजार तीन सौ पचहत्तर गांव मनके भूंईया के जियो रिफ्रेंसिंग के काम होगे हे। ए परियोजना ल भू-सर्वे ल त्रुटिरहित बनाय बर करे जावत हे। जियो रिफ्रेंसिंग ले सीमांकन काम म भूमि संबंधी विवाद मनके सही-सही निराकरण करे जा सकही। संगेसंग अभी म पटवारी नक्सा अउ जघा म भिन्नता के आंकलन करके उंखर निराकरण घलो करे जा सकही। ए तकनीक के बउरे ले राज्य के पूरा हिस्सा सर्वेक्षित हो जही अउ एक डिजिटल डेटा बेस तइयार करे जा सकही।
यूजीसी-नेट परीक्षा-रद्द
केन्द्र सरकार ह जून दू हजार चौबीस यूजीसी-नेट परीक्षा रद्द कर देहे। ए परीक्षा बाद म नवा सिरा ले राखे जाही, जेखर जानकारी अलग ले दे जाही। भारतीय साइबर अपराध समन्वय केंद्र डहार ले देगे खबर के बाद यूजीसी-नेट परीक्षा रद्द करे गीस, काबर ए परीक्षा के विश्वसनीयता ले समझौता नइ हो सकय। ए मामला गहन जांच बर केंद्रीय जांच ब्यूरो ल सौंपे जावत हे।
राष्ट्रीय परीक्षा एजेंसी ह अट्ठारह जून के देस के आने-आने सहर मन म दू पारी म यूजीसी-नेट परीक्षा राखे रिहीस हे। गृह मंत्रालय के भारतीय साइबर अपराध समन्वय केन्द्र के राष्ट्रीय साइबर अपराध विस्लेषण इकाई ल काली परीक्षा म गड़बड़ी के कुछ खबर मिले रिहीस हे, जेखर बाद एला रद्द कर देगे हे।
दुर्घटना
झारखंड के सीमा ले लगे पुंदाग अउ भुताही के बीच छत्तीसगढ़ सशस्त्र बल-सीएएफ के जवान मन ल लेके जावत एक ठिन पिकअप गाड़ी के खाई म गिरे ले दू झिन जवान मनके मौत होगे। उहे, एक झिन आने जवान गंभीर रूप ले घायल होगे। बलरामपुर के पुलिस अधीक्षक डॉक्टर लाल उम्मेद सिंह ह बतइन कि ए हादसा कैंप शिफिटिंग के दौरना होइस।
ओति, जगदलपुर म पाछू रतिहा एक कार के अनियंत्रित होय ले दलपत सागर म गिरे ले तीन युवक मन के मउत होगे। ए मामला जगदलपुर के सिटी कोतवाली थाना क्षेत्र के आय।
उहें, कोरबा जिला के कुकदा-आमानारा के बीच एक ठिन कार के पेड़ के टकराय ले एक झिन मनखे के मउत होगे। उहें, तीन झिन आने लोगन घायल होगे हे।
माओवादी सामग्री-बरामद
नारायणपुर जिला के छोटेडोंगर थाना क्षेत्र म सुरक्षा बल मन ह भारी मात्रा म माओवादी जिनिस बरामद करे हे। मिले खबर के मुताबिक जिला के कड़ेनार ले जिला पुलिस बल, डीआरजी अउ आईटीबीपी के समलात टीम तलासी अभियान म निकले रिहीस हे। इही दौरान कावानार इलाका ले सुरक्षा बल मन ह ग्यारह ठिन कुकर, दु ठिन प्लास्टिक ड्रम, बिजली वायर, डेटोनेटर, कोडेक्स वायर समेत रोजमर्रा के आने-आने समान बरामद करे हे।
आईटी कंपनी-निवेश
मुख्यमंत्री विष्णुदेव साय ह आज मंत्रालय म इन्द्रप्रस्थ गैस लिमिटेड-आईजीएल अउ आईटी क्षेत्र के बहुराष्ट्रीय कंपनी टेलिपरफॉर्मेंस के निवेसक मन ले भेंट करके छत्तीसगढ़ म निवेस के इच्छा जतइन हे। इन्द्रप्रस्थ गैस लिमिटेड ह जशपुर म ग्रीन फील्ड सोलर प्लांट के स्थापना अउ नवा रईपुर म मल्टी मॉडल लॉजिस्टिक हब स्थापित करे म रूचि दिखाय हे, संगेसंग कंपनी के योजना जशपुर म चार सौ मेगावाट क्षमता के सोलर प्लांट स्थापित करे के हे। अइसनेह, टेलिपरफॉर्मेंस कंपनी ह नवा रईपुर म पांच सौ सीटर क्षमता के बीपीओ सेंटर स्थापित करे के बात किहीन हे।
मुख्यमंत्री ह निवेसक मन ले गोठबात के दौरान किहीन कि कंपनी मन के जरूरत के मुताबिक छत्तीसगढ़ के युवा मन ल प्रसिक्षण देके उंखर कौसल बढ़ाय जाही अउ ओमन ल स्थापित करइया इकाइ मन म रोजगार के जादा ले जादा मउका उपलब्ध कराय जाय। मुख्यमंत्री ह किहीन कि राज्य सरकार के औद्योगिक नीति के तहत छत्तीसगढ़ म निवेस करइया उद्यमि अउ कंपनी मनके हरसंभव मदद दे जाही।
कांग्रेस-प्रदर्शन
छत्तीसगढ़ युवा कांग्रेस, महिला कांग्रेस अउ एनएसयूआई के कार्यकर्ता मन ह आज रईपुर म गृहमंत्री विजय शर्मा के निवास के घेराव करे के कोसिस करीन। प्रदेस म बिगड़े कानून बेवस्था, निरदोस लोगन मनके गिरफ्तारी अउ सरलग बाढ़त अपराध के आरोप लगावत प्रदर्सनकारी मन ह गृह मंत्री ले इस्तीफा के मांग करे हे। जिला कांग्रेस भवन गांधी मैदान ले निकले प्रदर्सनकारी मन ल पुलिस ह महिला थाना तीर रोक दीस।
मौसम विभाग के मुताबिक दक्षिण-पश्चिम मानूसन राजनांदगांव, दुरूग, धमतरी अउ गरियाबंद के कुछेक जघा तक आ गेहे। एखर अवइया दू ले तीन दिन म उत्तर कोति बाढ़े के संभावना हे।
मौसम विभाग के मुताबिक एक ऊपरी हवा चक्रीय चक्रवाती घेरा बिहार अउ उंखर तीर-तखार बने हुए हे। इखर संगेसंग मध्य बंगाल के खाड़ी ओखर ले लगे उत्तर-पूर्व बंगाल के खाड़ी के ऊपर घलो चक्रवाती घेरा विस्तारित हे। एखर असर ले प्रदेस म कई ठिन जघा म हल्का ले मध्यम बरसा होय या गरज-चमक के संग छींटा पड़े के संभावना हे। उहें, एक-दू जघा म भारी बरसा होय, गाज गिरे अउ हवा गरेर चले के चेतावनी दे गेहे। प्रदेस म अवइया पांच दिन तक बरसा के स्थिति अइसने ही बने रहे के संभावना हे।