अट्ठारहवीं लोकसभा के पहिली सत्र ए महीना के चौबीस तारीख ले सुरू होही। ए सत्र म नवा बने सदस्य मन ल सपथ देवाय जाही अउ लोकसभा अध्यक्ष के चुनाव होही। राष्ट्रपति द्रौपदी मुर्मू संसद के दूनों सदन ल संबोधित करही अउ उंखर अभिभाषण म गोठबात होही।
उहें, राज्यसभा के सत्र घलो इही महीना के सत्ताईस तारीख के सुरू होही। संसद सत्र अवइया महीना के तीन तारीख के सिराही। संसदीय कार्यमंत्री किरेन रिजिजू ह एक सोसल मीडिया पोस्ट म ए जानकारी दीन। ओमन किहीन कि देस के जनता फइसला ले लेहे अउ अब देस के सेवा बर काम करना हमर कर्तव्य हरय। श्री रिजिजू ह किहीन कि एक सौ चालीस करोड़ भारतीय मनके सोच, मंसा ल पूरा करे खातिर अउ गोठबात बर संसद एक आदर्स मंच हवय।
मुख्यमंत्री-प्रतिनिधिमंडल मुलाकात
मुख्यमंत्री विष्णुदेव साय ले काली रईपुर म सतनामी समाज के प्रतिनिधिमंडल ह भेंट करीन अउ बलौदाबाजार जिला म होय घटना के संबंध म सांतिपूर्ण वातावरण बनाय राखे बर गोठबात करीन अउ मिलके काम करे के संकलप लीन।
ए मउका म मुख्यमंत्री ह किहीन कि बाबा गुरूघासीदास के संदेस समाज म सांति अउ सद्भाव के रेहे हे। आप सबके जिम्मेवारी हे कि समाज म भरम झन होवय अउ सांति बनाय राखे के दिसा म संग मिलके आगू बढ़य। ओमन किहीन कि पाछु दिन असामाजिक तत्व कोति ले जैतखाम के अपमान करे गीस। सासन ह एखर संज्ञान लेवत न्यायिक जांच के घोसना घलो करीन हे। गोठबात के बेरा उप मुख्यमंत्री विजय शर्मा ह पवित्र अमर गुफा म जैतखाम ल नकसान पहुंचाय के घटना के संबंध म सासन कोति ले अब तक करे गे कार्रवाई के जानकारी दीन। ए दउरान प्रगतिशील छत्तीसगढ़ सतनामी समाज के प्रदेस अध्यक्ष राजेन्द्र प्रसाद भतपहरी ह किहीन कि हमर समाज परमपूज्य बाबा गुरू घासीदास जी के अनुयायी हवय। हमन सत्य, अहिंसा अउ सद्भाव ल मानथन। समाज प्रमुख ह किहीन कि समाज के सबो झन ए घटना ले दुखी हवय अउ जउन लोगन मन प्रदर्सन के बेरा हिंसा अउ तोड़फोड़ करीन हे, ओमन प्रतिनिधिमंडल के हिस्सा नइ रिहीन, भलूक असामाजिक तत्व रिहीन हे।
बलौदाबाजार कलेक्टर/एसपी
राज्य सरकार ह बलौदाबाजार म होय तोड़फोड़ अउ आगजनी के बाद जिला के कलेक्टर कुमार लाल चौहान अउ पुलिस अधीक्षक सदानंद कुमार ल हटा देहे। कुमार लाल चौहान के जघा म दू हजार ग्यारह बैच के भारतीय प्रसासनिक सेवा के अधिकारी दीपक सोनी ल बलौदाबाजार के नवा कलेक्टर बनाय गेहे। उहें, सदानंद कुमार के जघा म दू हजार बारह बैच के भारतीय पुलिस सेवा के अधिकारी अउ सरगुजा के पुलिस अधीक्षक विजय अग्रवाल ल बलौदाबाजार के नवा एसपी नियुक्त करे गेहे।
बलौदाबाजार घटना-आरोप
प्रदेस के खाद्य मंत्री दयालदास बघेल ह किहीन हे कि बलौदाबाजार घटना म जउन आरोपी सामिल हे, उंखर खिलाफ राज्य सरकार कड़ा कार्रवाई करही। काली रईपुर म पत्रकार मन ले गोठबात करत श्री बघेल ए घटना म अभी तक दू सौ लोगन ल गिरफ्तार करे गेहे। ओमन आरोप लगईन कि कांग्रेस नेता मन ह बलौदाबाजार सहर म प्रदर्सन के बेरा सरकारी संपत्ति ल नकसान पहुंचाय बर लोगन ल उकसाय के साजिस रचे रिहीन। एखरे बादे सरकारी कार्यालय म तोड़फोड़ करे गीस अउ गाड़ी म आगी लगा दे गीस। खाद्य मंत्री ह किहीन कि विरोध के दउरान कम से कम डेढ़ सौ फटफटी अउ चउपहिया गाड़ी म आगी लगा दे गीस।
दूसर कोति, प्रदेस कांग्रेस संचार प्रमुख सुशील आनंद शुक्ला ह किहीन कि राज्य सरकार के नाकामी छिपाए बर मंत्री दयालदास बघेल विपक्ष म आरोप लगावत हे। ओमन सवाल उठईन कि करीबन महीना भर पहिली पवित्र जैतखाम म असामाजिक तत्व मन ह तोड़फोड़ करे रिहीन, तभे ले लोगन गुस्साय रिहीन अउ जांच के मांग करत रिहीन हे। ओमन किहीन कि बेरा रहत जैतखाम ल नकसान पहुंचइया लोगन उपर कार्रवाई करे जाय रहितीस त अइसन स्थिति नइ होतिस।
स्थानीय अवकाश
छत्तीसगढ़ शासन के सामान्य प्रशासन विभाग ह रईपुर अउ नवा रईपुर अटल नगर बर स्थानीय अवकाश नौ अगस्त के जघा म बारह नवंबर घोसित करे हे। ए संबंध म संशोधन आदेस जारी कर दे गेहे। सामान्य प्रसासन विभाग के अधिकारी मन बतईन कि नौ अगस्त के प्रदेस म विश्व आदिवासी दिवस म पहिली ले ही सामान्य अवकाश घोसित हवय।
नगरीय निकाय-परिसीमन
नगरीय प्रशासन अउ विकास विभाग ह अवइया नवंबर-दिसंबर महीना म नगरीय निकाय म आम चुनाव ल देखत सबो नगरीय निकाय म वार्ड के नवा सिरा ले परिसीमन करे के निरदेस दीन हे। विभाग के सचिव डॉक्टर बसवराजू एस. ह ए संबंध म जिला कलेक्टर मन ल परिपत्र जारी कर देहे। ओमन परिसीमन के काम ल प्राथमिकता देवत एला जल्दी पूरा करे बर किहीन हे।
जियो रिर्फेंसिंग
छत्तीसगढ़ म भुईंया संबंधी होवइया विवाद ल दुरिहाय बर जियो रिर्फेंसिंग तकनीक बउरे जाही। ए तकनीक ले भूईंया के नक्सा बर खसरा के जघा म यू.एल.-पिन नंबर दे जाही। संगेसंग भू-आधार कार्ड मिलही। राज्य सरकार ह ए नवा तकनीक ल बउरे के मंजूरी दे देहे अउ एखर बर बजट म डेढ़ सौ करोड़ रूपिया के प्रावधान करे गेहे। जियो रिर्फेंसिंग तकनीक के उपयोग बर राजस्व ले जुड़े लोगन ल प्रसिक्षण दे जाही। उहें, जियो रिर्फेंसिंग के काम ल बने ढंग ले चलाय बर तहसील अउ नायब तहसीलदार के नवा पद मंजूर करे जाही।
अमृतकाल छत्तीसगढ़ विजन
छत्तीसगढ़ के वित्तमंत्री ओ.पी. चौधरी ह विकसित छत्तीसगढ़ के सोच ल साकार करे ‘‘अमृतकाल छत्तीसगढ़ विजन-दू हजार सैंतालीस‘‘ बर जनप्रतिनिधि अउ आम लोगन ले सुझाव मांगे हे। ओमन सबो मंत्री अउ विधायक ल चिट्ठी लिखके विजन डाक्यूमेंट तैयार करे बर सुझाव दे बर किहीन। ए सुझाव तीस जून तक मंगाय गेहे। सुझाव लिखित म या फेर वेबपोर्टल ‘‘मोर सपना-मोर विकसित छत्तीसगढ़‘‘ ले दे जा सकथे।
‘‘ई-संविक्षा पोर्टल‘‘
छत्तीसगढ़ जीएसटी विभाग कोति ले ई-संविक्षा पोर्टल के सुरूवात करे गीस। एखर ले विभागीय अधिकारी मन कोति ले करे जात काम के मॉनिटरिंग करे जा सकही। संगेसंग अधिकारी मन कोति ले देखाय जवइया मासिक डायरी घलो ऑनलाइन होही अउ एखर ले मिलइया आंकड़ा के राजस्व हित म उपयोग करे जाही। उहें, व्यापारी मन ल होवइया परेसानी ल सुलझाय बर ए पोर्टल मददगार होही।
कृषि मंत्री-खाद बीज
कृषि मंत्री रामविचार नेताम ह अवइया खरीफ मौसम ले पहिली अधिकारी मन ल बने किसम के खातू अउ प्रमाणिक बीज पर्याप्त मात्रा म राखे गे निरदेस दीन हे। श्री नेताम ह काली मंत्रालय म कृषि अउ ओखर ले जुड़े विभाग के अधिकारी मनके बइठका लीन। ओमन किहीन कि किसान मन ल उंखर मांग के मुताबिक खातू-बीजा देवाना विभागीय अधिकारी मनके जिम्मेवारी हे। एमा कोनों किसम के कोताही नइ होना चाही। ओमन अधिकारी मन ल सरलग अपन-अपन क्षेत्र के दउरा करके खातू-बीजा के भंडारण अउ उठाव म निगरानी राखे के संगेसंग एखर गुणवत्ता के जांच-पड़ताल करे के निरदेस दीन।
अउ अब मौसम के हाल…
मौसम विभाग के मुताबिक मानसून के अभी छत्तीसगढ़ पहुंचे म थोरिक अबेर हवय। फेर, बस्तर संभाग म अवइया एक-दू दिन म दक्षिण-पश्चिम मानसून आ सकत हे। काली प्रदेस म एक-दू जघा म छिटपूट बरसा होय अउ कुछेक जघा म अंधड़ संग गाज गिरे के चेतावनी दे गेहे। प्रदेस के अधिकतम तापमान म कोनों किसम के फेरबदल होय के संभावना नइ हे।
इही बीच, मोहला-मानपुर अंबागढ़ चौकी जिला के कोरलदंड नर्सरी म काली मंझनिया गाज गिरे ले पन्द्रह झिन झुलस गे, जेमा तीन झन के हालत गंभीर बताय जात हे।
उहें, कबीरधाम जिला के ग्राम पंचायत तितरी म गाज गिरे ले एक मनखे के मउत होगे अउ तीन झन झुलस गे। घायल मन ल सामुदायिक स्वास्थ्य केन्द्र म भर्ती कराय गेहे।