सपथ ग्रहण समारोह के सोज्झे प्रसारण आकाशवाणी केंद्र मन ले करे जाही अउ एखरे सेति आकाशवाणी केंद्र रईपुर ले प्रसारित होवइया प्रादेसिक हिन्दी समाचार बुलेटिन के प्रसारण आज संझा छै बजके पैंतालिस मिनट के जघा म रतिहा आठ बजके तीस मिनट ले आठ बजके पैंतालिस मिनट म होही।
तोखन साहू-पीएमओ
सूत्र मन ले मिले जानकारी मुताबिक केंद्रीय मंत्रिमंडल म छत्तीसगढ़ ले बिलासपुर सांसद तोखन साहू ल जघा मिल सकत हे। मिले जानबा मुताबिक सपथ ग्रहण के पहिली उंखर तीर प्रधानमंत्री कार्यालय ले फोन आय रिहीस। एखर बाद तोखन साहू प्रधानमंत्री आवास पहुंचिन। किसान परिवार ले अवइया तोखन साहू बछर दू हजार तेरह म पहिली बेर लोरमी विधानसभा सीट ले विधायक निर्वाचित होय रिहीन। उहें, रमण सिंह सरकार म तोखन साहू ल संसदीय सचिव घलो बनाय गे रिहीस। ए बखत दू हजार चौबीस के लोकसभा चुनाव म तोखन साहू ह कांग्रेस प्रत्यासी देवेन्द्र यादव ल करीबन एक लाख चौसठ हजार ले जादा वोट के अंतर ले हराय हे।
इही बीच, बिलासपुर सांसद तोखन साहू ल भाजपा नेता मन नई दिल्ली स्थित छत्तीसगढ़ भवन म बधई दीन हे।
मुख्यमंत्री निर्देश
मुख्यमंत्री विष्णुदेव साय के निरदेस म उत्तर प्रदेस के फिरोजाबाद म होय हादसा म छत्तीसगढ़ के घायल मनखे मन ल बने ट्रीटमेंट देवाय खातिर विधायक प्रबोध मिंज के अगुवई म एक ठिन टीम गठित करके लखनऊ पठोय गेहे। टीम म आने विधायक मन समेत आवासीय आयुक्त श्रुति सिंह सामिल हे। मुख्यमंत्री ह बतइन कि हादसा म घायल मन ल जिला संयुक्त चिकित्सालय फिरोजाबाद मेडिकल कालेज म भर्ती कराय गेहे। जिला प्रशासन ले गोठबात करके डॉक्टर मन ल उचित देखभाल बर निरदेस दे गेहे अउ उच्च अधिकारी मन ल घलो एला लेके जरूरी निरदेस दे गेहे।
इंहा ए बतादन कि छत्तीसगढ़ ले धार्मिक यात्रा म गे हुए श्रध्दालू मन ले भरे बस ह उत्तर प्रदेस के फिरोजाबाद म आगरा-लखनऊ-एक्सप्रेसवे म काली पलट गे रिहीस। ए दुर्घटना म जिहां तीन झिन मनखे के मउत होगे, उहें, चालीस झिन आने मनखे घायल होगे।
मुख्यमंत्री-पत्रकारवार्ता
मुख्यमंत्री विष्णुदेव साय ह नई दिल्ली म पत्रकार मनले गोठबात करत किहीन कि राज्य सरकार ह मोदी की गारंटी के सबो मुख्य वायदा मन ल प्राथमिकता ले पूरा करे हे। जेखर सुघ्घर परिणाम लोकसभा म हमन ल मिलिस। श्री साय ह किहीन कि विधानसभा चुनाव छत्तीसगढ़ के मतदाता मन मोदी की गारंटी, भारतीय जनता पार्टी, प्रधानमंत्री नरेंद्र मोदी उपर विस्वास करीन अउ हमन सरकार बनायन। ओमन किहीन कि जनता के भरोसा उपर खरा उतरत हमन सौ दिन म मोदी के गारंटी के मुख्य वायदा ल पूरा करे हन।
मुख्यमंत्री ह नक्सलवाद के मुद्दा उपर किहीन कि पाछू भाजपा के सासनकाल म पंद्रह बछर म भाजपा सरकार ह नक्सलवाद के खिलाफ मजबूती ले लड़ाई लड़े रिहीस अउ अब एक घांव फेर भाजपा के सरकार बनिस त, केंद्र राज्य के समन्वय ले नक्सलवाद के खिलाफ हमर लड़ाई म अउ तेजी आही।
नक्सल प्रभावित क्षेत्र मन म करीबन पच्चीस ले जादा सुरक्षा कैम्प बनाय गेहे।
मुख्यमंत्री-श्रध्दांजलि
आदिवासी मन ल आगू बढ़ाय बर आजीवन संघर्ष करइया महान क्रांतिकारी जननायक बिरसामुंडा के आज पुण्यतिथि हरय। ए मउका म मुख्यमंत्री विष्णुदेव साय ह उनला सुरता करत अपन श्रध्दांजलि अर्पित करीन हे। मुख्यमंत्री ह किहीन हे कि जननायक बिरसामुंडा आदिवासी चेतना के अगवा नेता म सामिल रिहीन। ओमन आदिवासी मन ल सकेल के जल-जंगल अउ जमीन वाले अधिकार बर आंदोलन चलाय रिहीन। श्री साय ह किहीन कि आदिवासी मन ल उंखर अधिकार देवाना अउ स्वाभिमान के रक्षा करना बिरसामुंडा जी ल सच्चा श्रध्दांजलि होही।
उहें, आज छत्तीसगढ़ी लोकसंगीत के पुरोधा स्वर्गीय खुमान साव के पुण्यतिथि घलो हरय। उंखर सुरता करत मुख्यमंत्री विष्णुदेव साय ह किहीन कि खुमान साव ह चंदैनी गोंदा के माध्यम ले छत्तीसगढ़ी लोककला ल संवारे म अपन पूरा जिनगी लगा दीन। लोककला के सेवा बर खुमान साव ल राष्ट्रीय स्तर म संगीत नाटक एकादमी पुरस्कार ले घलो सम्मानित करेगे हवय।
दुर्घटना
रायगढ़ जिला म आज होय सड़क दुर्घटना म तीन झिन मनखे के मउत होगे। मिले जानकारी मुताबिक लैलूंगा थाना क्षेत्र के गोसाईडीह आंगेकेला मोड़ तीर एक ठिन बस ह फटफटी संवार तीन झिन मनखे मन ल अपन चपेट म ले लीस। ए सड़क दुर्घटना म दू झिन मनखे के मउकच म मउत होगे हे। उहें, एक झिन आने जवान लइका ल इलाज खातिर अस्पताल ले जाय गीस। जिहां ओखरो मउत होगे। ए तीनों झिन जवान लइका जशपुर ले रायगढ़ सोज जात रिहीन, बताय जात हे कि मउत होय तीनों जवान लइका मधुबन गांव के रहवइया रिहिन।
तेंदुआ हमला-मौत
कांकेर जिला के नरहरपुर वन परिक्षेत्र के चनार गांव म एक ठिन तेंदुआ के हमला ले एक झिन सियनहिन के मउत होगे। बताय जावत हे कि पाछू रतिहा कच्चा मकान के कपाट ल तोड़के ए तेंदुआ ह पचहत्तर बरिस के माईलोगिन ल उठाके लेगे रिहीस, जिहां ले ए माईलोगिन के लास राही -छाही हालत म घर ले सौ मीटर दूरिहा पहाड़ी उपर मिलिस। घटना के जानकारी मिले बाद मउका म वन विभाग के टीम पहुंचिस अउ जांच म जुटे हे।
इंहा ए बतादन कि कांकेर जिला के नरहरपुर वन परिक्षेत्र के जंगल भीतरी मवेसी मन ल सिकार बनइया तेंदुआ ह अब बस्ती इलाका म अमाके गंवई के मनखे मन उपर घलो हमला करत हे।
ट्रेन रद्द
दक्षिण पूर्व मध्य रेलवे के बिलासपुर मंडल म अवइया मुदरिया टेसन म तीसर लाइन के कनेक्टिविटी बर प्री-एनआई अउ एनआई के काम करे जाही। एखरे सेति कोनो-कोनो गाड़ी के अवई-जवई प्रभावित रइही। बारह ले उन्नीस जून तक बिलासपुर-रीवा-बिलासपुर एक्सप्रेस केंसल रइही। उहें, बारह ले बीस जून तक बिलासपुर-इंदौर-बिलासपुर नर्मदा एक्सप्रेस नइ चलही। अइसने बारह ले बीस जून तक बिलासपुर-भोपाल-बिलासपुर एक्सप्रेस घलो नइ चलय।
उहें, जबलपुर-अंबिकापुर-जबलपुर एक्सप्रेस, नागपुर-शहडोल- नागपुर एक्सप्रेस, रीवा-चिरमिरी-रीवा एक्सप्रेस, लखनऊ-रईपुर-लखनऊ गरीबरथ एक्सप्रेस, सांतरागाछी-जबलपुर -सांतरागाछी एक्सप्रेस, दुर्ग-अजमेर -दुर्ग एक्सप्रेस ल घलो कई ठिन डेट म केंसिल करे गेहे। एखर संगे छै ठिन पैसेंजर स्पेसल ट्रेन घलो नइ चलही।
अउ अब मौसम के हाल…
दक्षिण-पश्चिम मानसून प्रदेस के सुकमा म पहुंच गेहे अउ प्रदेस के कतकोन जघा म प्री-मानसून के असर ले गिरे ल लागिस सिटिर-साटर पानी। । मौसम विभाग के अनुसार काली दस जून के एक-दू जघा म हल्का बरसा होय या गरज-चमक के संग छींटा पड़े के संभावना हे। उहें, एक-दू जघा म आंधी तुफान के संगे करा घलो गिर सकत हे। गर्मी ल लेके मौसम विभाग ह ए बतइन हे कि प्रदेस म अधिकतम तापमान ह नइ बदलही, फेर काली के बाद ले तेरह जून तक तापमान ह मामूली बाढ़ सकत हे।
अउ अब थोरकुन समाचार सार म –
– रईपुर के रेलवे पुलिस ह दू झिन नाबालिक लइका मन ल बारह किलो गांजा के संग गिरफ्तार करे हे। जब्त गांजा के कीमत करीबन दू लाख चालीस हजार बताय जावत हे।
अउ
– राजधानी रईपुर के पुराना पुलिस मुख्यालय के रोजगार कार्यालय म काली दस जून के बिहनिया ग्यारह बजे ले रोजगार मेला राखे जाही। ए कैम्प के जरिया ले पचहत्तर ले जादा पद म भर्ती करे जाही।