बेमेतरा जिला के पिरदा म एक ठन फैक्ट्री म काली होय बिस्फोट के बाद बचाव अउ राहत के काम आज घलो चलत हे। करीबन आठ झन लापता बताय जावत हे। प्लांट के भीतर के खतरनाक स्थिति ल देखत हुए जिला प्रशासन ह सेना ले मदद मांगे हे। मिले जानकारी के अनुसार बिस्फोट के बाद प्लांट के अंदर सरलग गैस रिसाव होवत हे अउ जघा-जघा बारूद कुढ़ाय हे, जेखर ले फेर बिस्फोट होय के खतरा बने हुए हे।
इही बीच, बिस्फोट के बाद कतेक झन के मउत हाये हे, एखर स्पष्ट जानकारी नइ मिल पाय हे। जिला प्रशासन अउ एसडीआरएफ के टीम ह काली ले ही मउका म जुटे हे। ब्लास्ट के बाद फैक्ट्री ह मलबा म बदल गेहे, जेला हटाय बर 12 ठन जेसीबी लगाय गेहे। घटना के जघा म गैस रिसाव अउ खतरनाक समान रखे होय ले मलबा हटाय म सेना के मदद घलो ले जावत हे। सेना के तकनीकी टीम के दस झन सदस्य सावधानी ले मलबा हटाय म एसडीआरएफ टीम के मदद करत हे अउ जरूरी निरदेस घलो देवत हे।
स्थानीय ग्रामीन मनके अनुसार घटना के बाद फैक्ट्री म बुता करइया तीर के गांव के दस ले बारह मनखे मन लापता हे। फैक्ट्री प्रबंधन कोति ले घटना के बेरा म उंहा काम करत लोगन के सही जानकारी नइ देय के कारण स्थानीय ग्रामीन मन गुस्साय हे। एमन फैक्ट्री के बाहर टेंट लगाके धरना प्रदर्सन करत हे अउ फैक्ट्री मालिक के खिलाफ कार्रवाई करे के मांग घलो करत हे।
बेमेतरा विधायक दीपेश साहू ह आज बोरसी पहुंच के बारूद फैक्ट्री म होय घटना म राहत अउ बचाव काम के जानकारी लीन। ओमन ह ग्रामीन मन ले भेंट करके हर तरह के मदद के आस्वासन दीन हे।
सुनइया मन ल बतादन कि बेमेतरा जिला के बोरसी गांव म काली बिस्फोटक बनाय वाले फैक्ट्री म बारूद म बिस्फोट होय ले एक झन मनखे के मउत होगे रिहीस, अउ छै झन घायल होगे रिहीन। मलबा म अभी तक अउ कतकोन मजदूर मनके लदकाय के आसंका जताय जावत हे।
आईईडी विस्फोट-घायल
सुकमा जिला के भीमापुपम गांव के एक घर म आईईडी बम फुटे ले दू झिन माईलोगिन झुलस गे। एमा ले एक के हालत गंभीर बताय जात हे। मिले जानकारी अनुसार माओवादी मन ह गांव के एक ठिन घर म आईईडी बम राखे रिहिन, उही म बिस्फोट होगे। एला सुरक्षाबल मन ल नुकसान पहुंचाय बर राखे गे रिहीस। पुलिस ह मामला के जांच करत हे।
मुख्यमंत्री-नक्सलवाद
मुख्यमंत्री विष्णुदेव साय ह बस्तर म नक्सल मोर्चा उपर मिले सफलता बर पुलिस अउ सुरक्षाबल ल बधई दीन हे। मुख्यमंत्री ह बतइन कि पाछू पांच महिना म सुरक्षाबल ह 120 माओवादी मन ल मार गिराय हे। उहें, 153 माओवादी मन ल गिरफ्तार करे हे। संगेसंग 375 माओवादी मन ह आत्मसमर्पण कर दीन हे। ओमन किहीन कि अब छत्तीसगढ़ ले माओवाद ह खतम होवत हे।
मुख्यमंत्री ह बीजापुर जिला म काली 33 माओवादी मन कोति ले करे गे आत्मसमर्पण उपर खुसी जतात हुए ओमन के पुनरूत्थान बर काम करे के बात किहीन। श्री साय ह किहीन हे कि सरकार ह नियद नेल्लानार याने आपका अच्छा गांव योजना सुरू करे हे, जिहां गांव म ही सब्बो जरूरी सुविधा उपलब्ध कराय जावत हे अउ नक्सल परभावित जघा म बनाय गे सुरक्षा कैंप ह ग्रामीन मन बर सहायता कैम्प के रूप म काम करत हे।
अंतर्राष्ट्रीय शूटर-गिरफ्तार
राजधानी रईपुर के पुलिस ह अंतर्राष्ट्रीय गिरोह के चार झन शूटर ल छत्तीसगढ़ अउ राजस्थान ले पकड़े हे। एमन के तीर ले एक पिस्तोल अउ खाली मैगजीन घलो बरामद करे गेहे। बताय जावत हे कि एमन ह छत्तीसगढ़ के कोनो-कोनो कारोबारी मन ल अपन निसाना बनाय के षडयंत्र रचत रिहीन। योजना पूरा होय ले पहिली ही रईपुर पुलिस ह चारों झन ल गिरफ्तार कर लिन। पुलिस के अनुसार एमन के संबंध झारखंड के एक कुख्यात बदमास गिरोह ले हवय। पुलिस ह खुफिया सूचना के आधार म करीब 72 घंटा के गोपनीय ऑपरेसन चलाके तीन आरोपी ल छत्तीसगढ़ ले अउ एक आरोपी ल राजस्थान ले गिरफ्तार करीन।
तहसीलदार-एफ.आई.आर.
जांजगीर-चांपा पुलिस ह जमीन धोखधड़ी के एक मामला म छै राजस्व अधिकारी समेत दस झन के खिलाफ जुर्म दर्ज करे हे। जेन अधिकारी मन के खिलाफ मामला दर्ज करे गेहे, ओमा दू तहसीलदार, एक उप पंजीयक अउ तीन पटवारी सामिल हे।
ए मामला चांपा तहसील के कुरदा गांव के हरय, जिहां एक मनखे के पन्द्रह डिसमिल जमीन ल जमीन मालिक के सरनेम बदलके अफसर अउ पटवारी के मिलीभगत ले फर्जी ऋण पुस्तिका बनवा के बछर दू हजार सत्रह म ही बेच दे ेगे रिहीस। एमा जमीन मालिक ह चांपा के कोरट म परिवाद दायर करे रिहीस, जेखर बाद कोर्ट ह धोखाधड़ी के रिपोर्ट दर्ज करे के आदेस दे रिहीस। कोर्ट के आदेस उपर अब चांपा पुलिस ह ओ समय के तहसीलदार डीएस उइके, सरस्वती बंजारे, उपपंजीयक विजय कुमार, पटवारी अरविंद साहू, युवराज पटेल अउ भूषण मरकाम समेत दस झन के खिलाफ एफआईआर दर्ज करे हे।
ठगी आरोपी-गिरफ्तार
सक्ती पुलिस ह सेयर मार्केट म पइसा लगाय के नाव म धोखाधड़ी करइया गुट के एक झन मनखे ल खरसिया ले गिरफ्तार करे हे।
मिले जानकारी अनुसार ए आरोपी मन ह एक सेंटर संचालक ले लगभग पांच लाख रूपिया के ठगी करे हे। मामला म पुलिस ह धोखाधड़ी करइया आरोपी मनके खिलाफ धारा 420 अउ 34 म जुर्म दरज करे हे। पकड़ाए आरोपी ल न्यायिक रिमांड म भेज दे गेहे, फेर ओखर एक अउ साथी ह फरार हे।
इही बीच, बेलासपुर पुलिस ह साइबर फ्राड म बउरे जावत दू हजार ले जादा संदिग्ध बैंक खाता के पहिचान करके लगभग सोलह करोड़ रूपिया ले जादा के रकम ल रोकवाय हे। जिला साइबर सेल के अधिकारी एडिसनल एसपी अनुज कुमार ह बतइन कि साइबर फ्राड म बउरे गे करीब 1400 सौ सिमकार्ड ल घलो ब्लॉक करवाय गेहे।
खेल-समाचार
छत्तीसगढ़ के श्रीमंत झा ह उज्बेकिस्तान म राखेगे एशिया पैरा आर्म रेसलिंग चैंपियनशिप म स्वर्ण पदक जीते हे। श्रीमंत ह 85 किलोग्राम श्रेणी म आखिरी मैच ल जीत के ए पदक अपन नाव करिस। ए जीत ले श्रीमंत ह मोलदोवा म होवइया विश्व पैरा आर्म रेसलिंग चैंपियनशिप बर क्वालीफाई घलो कर लीस हे। श्रीमंत झा ह अपन ए जीत ल भारतीय सैनिक मन ल समर्पित करे हे।
मुख्यमंत्री विष्णुदेव साय ह श्रीमंत के ए जीत बर उंहला बधई दीन हे। अपन संदेस म मुख्यमंत्री ह किहीन हे कि श्रीमंत ह अपन ए उपलब्धि ले सब्बो प्रदेसवासी मन ल गौरवन्वित करे हे।
धमतरी जिला के दुगली बिरनपारा गांव म एक घर के बारी म लगभग तीन बछर के मादा तेंदुआ के शव मिले हे। सूचना उपर वन विभाग के अधिकारी मन मउका म पहुंचके तेंदुआ के शव ल कब्जा म ले लीन अउ मामला के जांच सुरू कर देहे। एसडीओ एसएस नाविक ह बतइन के तेंदुआ के मउत कोन परिस्थिति म होय हे, एखर जानकारी तो पोस्ट मार्टम रिपोर्ट आय के बाद ही मिल पाही।
अउ अब मौसम के हाल…
छत्तीसगढ़ के बीच के हिस्सा म अवइया दू दिन म गरम हवा चले के आसंका हे। मौसम विज्ञान एच.पी.चन्द्रा के अनुसार प्रदेस म अवइया दू दिन म अधिकतम तापमान ह बाढ़ सकत हे।
इही बीच, चक्रवात रिमाल ह उत्तर बंगाल के खाड़ी के उपर ले उत्तर दिसा म आगू बाढ़त हे। एखर असर ले ओडिसा राज्य के सीमा ले लगे जिला मन म अवइया चौबीस घंटा म बादर छाय रह सकथे अउ थोरकुन बरसा घलो हो सकथे। फेर राज्य के आने क्षेत्र म अउ ओतको म खासकर मध्य छत्तीसगढ़ म उनतीस मई तक लू चले के संभावना बने हुए हे।