नारायणपुर -दंतेवाड़ा जिला के सीमा म आज होय मुठभेड़ म सात झन वर्दीधारी माओवादी मन मारे गे हवय।
दंतेवाड़ा के पुलिस अधीक्षक गौरव राय ह घटना के पुष्टि करत बतइन कि ए मुठभेड़ नारायणपुर अउ दंतेवाड़ के सीमा म होय हे। ओमन बतइन कि अबूझमाड़ के जंगल म माओवादी मनके मौजूदगी के सूचना मिले के बाद डिस्ट्रिक्ट रिजर्व गार्ड-डी.आर.जी., बस्तर फाइटर्स अउ स्पेसल टास्क फोर्स- एस.टी.एफ. के मिलेजुले टीम तलासी अभियान म निकले रिहीन। ए दउरान नारायणपुर-दंतेवाड़ा के सीमा ले लगे अबूझमाड़ के जंगल म पहिली ले घात लगाके बइठे रिहीन माओवादी मन ह जवान मन उपर गोलीबारी सुरू कर दिन। जवान मन डहार ले करे गे जवाबी कार्रवाई म सात झिन माओवादी मारे गीन। उहें, सुरक्षा बल ह मुठभेड़ म कतकोन माओवादी मनके घायल होय के दावा करीन हवय। घटनास्थल ले भारी मात्रा म हथियार, गोला बारूद अउ माओवादी जिनिस बरामद करे गे हवय।
कंगाले-स्ट्रांग रूम निरीक्षण
राज्य के मुख्य निर्वाचन पदाधिकारी रीना बाबासाहेब कंगाले ह आज राजनांदगांव के बसंतपुर के छत्तीसगढ़ स्टेट वेयर हाउस कार्पोरेसन कृषि उपज मंडी अउ दुरूग के शंकराचार्य इंजीनियरिंग कॉलेज म बनाय गे स्ट्रांग रूम अउ मतगणना कक्ष के निरीक्षण करीन। ए दउरान ओमन राजनीतिक दल मनके प्रतिनिधि के उपस्थिति म मतगणना के तियारी अउ बेवस्था के समीक्षा करीन। ओमन अधिकारी मन ल राजनांदगांव अउ दुरूग संसदीय क्षेत्र के जम्मों मतदान केंद्र के चुनाव परिणाम समेकित करे के संबंध म जरूरी दिसा-निरदेस दीन।
ए मउका म मुख्य निर्वाचन पदाधिकारी ह विधानसभावार मतगणना कक्ष, राजनीतिक दल के प्रतिनिधि अउ एजेंट के बइठे के बेवस्था, प्रवेस पास, सीसीटीवी कैमरा मॉनिटरिंग, सुरक्षा बेवस्था, उद्घोषक कक्ष अउ मीडिया सेंटर के जायजा घलो लीन। ओमन किहीन कि मतगणना हाल म मोबाइल फोन, आई पैड, लैपटाप, स्मार्ट वाच, कैमरा अउ आने-आने इलेक्ट्रानिक उपकरण मन म रोक रइही। मीडियाकर्मी ल मीडिया सेंटर तक मोबाइल ले जाय के छूट रइही। ओमन पास रखइया अभ्यर्थी, मतगणना अभिकर्ता मन खातिर जरूरी बेवस्था करे ल घलो किहीन हवय। श्रीमती कंगाले ह पोस्टल बैलेट अउ ई.टी.बी.पी.एस. के मत के गणना करे खातिर जरूरी दिसा-निरदेस घलो दीन हवय।
मुख्यमंत्री-आरक्षण स्वागत
मुख्यमंत्री विष्णुदेव साय ह धर्म आधारित आरक्षण उपर कलकत्ता उच्च न्यायालय के निर्णय के सुवागत करीन हवय। आज रईपुर म पत्रकार मन ले गोठबात करत श्री साय ह किहीन के हाइकोर्ट के निर्णय धर्म आधारित वोट बैंक के राजनीति करइया मनखे मन खातिर एक ठन बड़का सबक हवय। ओमन किहीन कि कांग्रेस अउ इंडिया गठबंधन सरलग संविधान के हत्या के साजिस करत हवय। धर्म आधारित आरक्षण के भारतीय संविधान म कोनो जघा नइ हवय।
गौरतलब हवय कि काली कलकत्ता उच्च न्यायालय ह बछर दू हजार दस के बाद पश्चिम बंगाल म जारी करे गे धर्म आधारित जम्मों ओ.बी.सी. प्रमाण पत्र ल रद्द करे के आदेस दीन हवय।
मुख्यमंत्री-छात्र बातचीत
मुख्यमंत्री विष्णुदेव साय ह हिंसा परभावित किर्गिस्तान म फंसे छत्तीसगढ़ के पढ़इया लइका मन ले फोन म गोठबात करत ओमन ल हरेक मदद करे के भरोसा दिलाइन हे। ओमन पढ़इया लइका मन ल खुद के ख्याल रखे अउ जरूरत पड़े म राज्य सरकार ले संपर्क करे बर किहीन हे। श्री साय ह किहीन हे कि ए विषम परिस्थिति म राज्य अउ केंद्र सरकार उंखर मन के संग खड़े हवय। मुख्यमंत्री ह बिलासपुर जिला के मस्तुरी निवासी छात्र विजय अउ जांजगीर-चांपा जिला के शिवानी ले बात करत किहीन कि केंद्र सरकार, किर्गिस्तान सरकार के संग संपर्क म हवय।
जानबा के मुताबिक किर्गिस्तान के राजधानी बिस्केक म उहां रइहया लोगन अउ दूसर देस ले पढ़ई करे खातिर पहुंचे पढ़इया लइका मन के बीच लड़ई के बात सरलग तनाव के स्थिति बने हुए हे। किर्गिस्तान म छत्तीसगढ़ के तकरीबन 70 पढ़इया लइका समेत जम्मों देस के तकरीबन 15 हजार पढ़इया लइका मन मेडिकल अउ आने-आने बिसय के पढ़ई करत हवय।
रानू साहू/सौम्या चौरसिया-रिमांड
कोयला घोटाला मामला म निलंबित होय आई.ए.एस. रानू साहू अउ सौम्या चौरसिया ल आज रईपुर के बिसेस अदालत ह 4 दिन के रिमांड म ई.ओ.डब्ल्यू ल सौंप दीन हवय। ए दूनों झन ल प्रोडक्सन वारंट म रिमांड म ले खातिर न्यायाधीश अतुल श्रीवास्तव के वोट म पेस करे गे रिहीस।
एखर ले पहिली ई.ओ.डब्ल्यू ह रईपुर के केंद्रीय जेल म रानू साहू अउ सौम्या चौरसिया ले पूछताछ करे रिहीस। एखर अलावा ई.ओ.डब्ल्यू ह कोयला घोटाला मामला सेति जेल म बंद निलंबित आई.ए.एस. समीर बिश्नोई अउ कारोबारी शिवशंकर नाग अउ सूर्यकांत तिवारी ले पूछताछ घलो कर चुके हवय।
जशपुर पुलिस-नशा कार्रवाई
जशपुर पुलिस ह स्वास्थ्य विभाग के सहयोग ले नसा के खिलाफ अभियान सुरू करे हवय। ए संबंध म बीते दिन पुलिस अधीक्षक कार्यालय म बइठका होइस। बइठका म पुलिस अधीक्षक शशिमोहन सिंह, मुख्य चिकित्सा अउ स्वास्थ्य अधिकारी व्ही.के. इंदवार ह नसा के खतरा के बारे म बिस्तार ले जानकारी दिन। ए दउरान कोटपा एक्ट के तहत कार्रवाई खातिर पिलस अउ स्वास्थ्य विभाग डहार ले एक ठिन बिसेस टीम के गठन करे गीस। ए टीम लोगन मन ल नसा के खतरा के बारे म जानकारी देवय संगेसंग पुलिस अधीक्षक डहार ले अभिनीत अउ निर्मित शॉर्ट फिलिम दिखाही।
हेलमेट जागरूकता रैली
बिलासपुर के पुलिस अधीक्षक रजनेश सिंह डहार ले हेलमेट बैंक अभियान चलाय जावत हे। इही कड़ी म आज सैक्षणिक संस्थान स्मार्ट वैल्यू के पढ़इया लइका मन ह रैली निकाल के लोगन मन ल हेलमेट पहिरे खातिर जागरूक करीन। ए मउका म सब इंस्पेक्टर उमाशंकर पांडेय ह पढ़इया लइका मन ल बतावत किहीन कि अगर युवा मन दूपहिया गाड़ी चलाय के बेरा हेलमेट के उपयोग करही, त मृत्यू दर म 70 प्रतिसत कमी हो सकत हे।
शीघ्रलेखन/मुद्रलेखन परीक्षा-स्थगित
शीघ्रलेखन अउ मुद्रलेखन कम्प्यूटर कौसल परिषद, लोक सिक्षण संचालनालय छत्तीसगढ़ डहार ले हिन्दी अउ अंग्रेजी कम्प्यूटर मुद्रलेखन के कौसल परीक्षा कोनो कारण ले स्थगित कर दे गे हवय। ए परीक्षा रईपुर, दुरूग, बिलासपुर अउ बस्तर संभाग म 26 मई, दू, 9 अउ 16 जून के होवइया रिहीस। परीक्षा के फेर राखे जाय के संबंध म नवा तिथि निर्धारित कर परीक्षार्थी मन ल मीडिया अउ परिषद के वेबसाइट के जरिया ले जानकारी दे जाही।
राजनांदगांव-जागरूकता अभियान
राजनांदगांव जिला म पुलिस डहार ले ग्रामीण मन ल अपराध ले बचाय खातिर जागरूकता अभियान चलाय जावत हे। ए दउरान पुलिस डहार ले गांव मन म बइठका लेके सरपंच, सचिव अउ कोटवार मन ल चोरी, ठगी अउ साइबर अपराध ले कइसन बांचे जाय, एखर बर ओमन ल जागरूक करे जावत हे। संगेसंग ओमन ल कोनो तरह के अपराध ल लेके पुलिस के सहयोग करे के अपील करे जावत हे। एखर अलावा गांव म घूमइया अउ फेरी लगइया लोगन मनके नांव-पता कोटवारी पंजी म दर्ज करे अउ थाना म सूचना देबर केहे गे हवय।
बुध्द पूर्णिमा
भगवान बुध्द के जयंती ‘‘बुध्द पूर्णिमा‘‘ आज छत्तीसगढ़ समेत देसभर म मनाय जावत हे। आज ही के दिन गौतम बुध्द के जनम होय रिहीस। ओमन ल ज्ञान के प्राप्ति होइस अउ आज ही के दिन उंखर परिनिर्वाण होय रिहीस।
ए अवसर म राष्ट्रपति द्रौपदी मुर्मु, उप राष्ट्रपति जगदीप धनखड़ अउ प्रधानमंत्री नरेंद्र मोदी ह देसवासी मन ल अपन सुभकामना दीन हवय। राष्ट्रपति मुर्मु ह किहीन हे कि भगवान बुध्द ह सत्य, अहिंसा, सद्भाव, मानवता अउ जम्मों प्राणी मन के प्रति प्रेम के संदेस दीन हे।
उहें, छत्तीसगढ़ के राज्यपाल विश्वभूषण हरिचंदन अउ मुख्यमंत्री विष्णुदेव साय ह घलो प्रदेसवासी मन ल बुध्द पूर्णिमा के बधई अउ सुभकामना दीन हवय।