कबीरधाम जिला म बाहपानी गांव तीर काली होय सड़क दुर्घटना म मउत होय परिवार वाले मन ल राज्य सरकार डहार ले पांच-पांच लाख रूपिया के मुआवजा राशि देके घोसना करे गेहे। उहें, घायल मन ल पचास-पचास हजार रूपिया के अतिरिक्त सहायता राशि देके ऐलान करे हे। ए रासि प्रसासन डहार ले उपलब्ध कराय गे सहायता अउ बीमा ले मिलइया रासि के अतिरिक्त हवय। प्रशासन ल घलो ए निरदेस दे गेहे कि सड़क सुरक्षा खातिर अउ जादा सावधानी बरते जाय।
इही बीच, उप मुख्यमंत्री विजय शर्मा ह मउत होय मनखे अउ घायल मनके परिवार वाले ले उंखर घरे म जाके भेंट करीन।
इहां ए बतादन कि काली कबीरधाम जिला के कुकदूर थाना क्षेत्र म बाहपानी गांव तीर होय रोड एक्सीटेंड म ओन्न्ईस झिन मनखे के मउत होगे रिहीस। उहें, तीन झन घायल होगे रिहीन।
माओवादी गिरफ्तार
सुकमा जिला म सुरक्षा बल मन ल दस झिन माओवादी ल गिरफ्तार करे म सफलता मिले हे। एमा ले एक झिन माओवादी उपर एक लाख रूपिया के इनाम घोसित रिहीस। मिले जानकारी मुताबिक माओवादी मनके मौजूदगी के सूचना मिले बाद जिला पुलिस बल, डीआरजी अउ कोबरा बटालियन के संघरा टीम ल दुलेड़, बोट्टेतोंग, रासापल्ली, पीनाचंदा, ईरापल्ली, मेट्टामुड़ेम अउ तीर-तखार के जघा बर पठोय गीस। इही दउरान दुलेड़ के जंगल भीतरी घेराबंदी करके दस झिन माओवादी ल पकड़े गीस।
उहें, दंतेवाड़ा जिला के अरनपुर थाना क्षेत्र म घलो पुलिस ह दू झिन माओवादी ल गिरफ्तार करे हे। ए माओवादी मन तीर ले एक ठिन टिफिन बम दू ठन डोटोनेटर, बिजली वायर अउ माओवादी परचा बरामद करे गेहे। दंतेवाड़ा पुलिस अउ सीआरपीएफ के संघरा टीम ह ए कार्रवाई करे हे।
शराब दुकान-कैशलेस भुगतान
अब्बड़ बेरा ले राज्य के सराब दुकान मन म निर्धारित मूल्य ले जादा म सराब बेचे के सिकायत मिलत रिहीस। एखर बाद राज्य सरकार ह सराब दुकान मन म कैशलेस भुगतान के सहुलियत सुरू करे के फैसला करे हे। ए बेरा सराब के बोतल म छपे क्यू.आर. कोड ल स्कैन करके नगद भुगतान के जरिए बेचे जात हे। अब ऑनलाइन पेमेंट अउ यूपीआई के माध्यम ले कैशलेस पेमेंट के सहुलियत सुरू होय ले सराब दुकान मन म जउन रेट रइही ओखर ले जादा पइसा नइ ले जाय जा सकही।
राजकीय शोक
ईरान के दिवंगत राष्ट्रपति डॉक्टर सैय्यद इब्राहिम रईसी अउ विदेश मंत्री हुसैन अमीर अब्दुल्ला हियन के सम्मान म आज देसभर म एक दिन के राजकीय सोक घोषित करे गेहे। राजकीय सोक के अवधि म छत्तीसगढ़ म घलो सबो सरकारी भवन मन म राष्ट्रीय झंडा ह आधा नवे रइही अउ सरकारी स्तर म कोनों भी मनोरंजन अउ नाच-गाना वाले सांस्कृतिक कार्यक्रम नइ होही।
महादेव सट्टा-गिरफ्तार
महादेव ऑनलाइन सट्टा ऐप मामला म कोरबा पुलिस ह गोवा ले आईपीएल क्रिकेट मैच म सट्टा खेलवइया सात झिन अंतर्राज्यीय सटोरिया मन ल गिरफ्तार करे हे। एमा छत्तीसगढ़ के चार झिन, महाराष्ट्र के दू झिनी अउ हरियाणा के एक झिन आरोपी हरय।
पुलिस अधीक्षक सिद्धार्थ तिवारी अउ अतिरिक्त पुलिस अधीक्षक यू.बी.एस. चौहान ह बतईन कि गिरफ्तार आरोपी मनके आने-आने बैंक खाता मन ले सौ करोड़ रूपिया ले जादा के लेनदेन पाय गेहे। उहें, तीस लाख रूपिया के लेनदेन ल पुलिस डहार ले होल्ड कराय गेहे। पुलिस ह सट्टा के खुलासा करत बतईस कि एक झिन स्थानीय सटोरिया ले पूछताछ म पता चले हे कि आरोपी अउ उंखर आने संगी गोवा म बइठ के महादेव ऐप पैनल के माध्यम ले सट्टा चलावत रिहीस। पुलिस डहार ले एक टीम गठित करके गोवा बर पठोय गीस, जिहां ले आरोपी मनके गिरफ्तार होइस। आरोपी मन तीर ले तेरह ठिन लैपटॉप, अड़तालीस ठिन मोबाइल, छब्बीस बैंक पासबुक, चौदह ठिन चेकबुक अउ चालीस ठिया ए.टी.एम. कार्ड बरामद करे गेहे।
आरटीई-प्रवेश
निःशुल्क अउ अनिवार्य बाल शिक्षा अधिकार अधिनियम-आरटीई के तहत चालू शैक्षणिक बछर म प्राईवेट स्कूल मन म एडमिशन बर ऑनलाइन लॉटरी के प्रक्रिया चालू होगे हे। लोक शिक्षण संचालनालय-डीपीआई ले मिले जानकारी के मुताबिक प्रदेस म संचालित साढ़े छह हजार ले जादा प्राईवेट स्कूल मनके प्रारंभिक कक्षा म कुल आरक्षित बावन हजार ले जादा सीट मन म एडमिशन बर एक लाख बाईस हजार ले जादा आवेदन मिले हवय। प्राईवेट स्कूल मन म प्रवेस बर पहिली चरण म रईपुर, दुरूग, बिलासपुर, राजनांदगांव, कवर्धा, जशपुर अउ जगदलपुर जिला म सोलह हजार छत्तीस झिन पढ़ईया लइका के चयन होय हे। चुने गे ए विद्यार्थी मन ल उंखर मोबाइल नंबर म एसएमएस के माध्यम ले जानकारी पठोय जाही। एखर बाद ए पढ़ईया लइका मन ल एक जून ले तीस जून भीतर चुने गे स्कूल मन म एडमिशन ले बर रइही। बाकी बांचे सीट मन म आवेदक मन एक ले आठ जुलाई भीतर आवेदन कर सकही। उहें, द्वितीय चरण के लॉटरी के प्रक्रिया सत्रह ले बीस जुलाई के बीच होही।
शराब घोटाला मामला
कथित सराब घोटाला मामला म चौदह दिन के रिमांड सिराय के बाद रिटायर्ड आईएएस अधिकारी अनिल टुटेजा अउ पूर्व आबकारी विशेष सचिव अरूणपति त्रिपाठी ल काली रईपुर के बिसेस अदालत म पेस करे गीस। कोर्ट ह अनिल टुटेजा के न्यायिक रिमांड ल अवइया तीन दिन तक बढ़ा देहे। उहें, अरूण पति त्रिपाठी के जमानत याचिका ल खारिज कर दे गेहे।
मतगणना-तैयारी
चुनाव आयोग ह छत्तीसगढ़ समेत देसभर म अवइया चार जून के होवइया मतगणना के तैयारी सुरू कर देहे। एखर बर आयोग ह विधानसभावार आब्जर्वर मनके नियुक्ति कर देहे। जेमा देसभर के अखिल भारतीय अउ राज्य सेवा के अधिकारी घलो सामिल हे। उहें, छत्तीसगढ़ के चौंतीस झिन अधिकारी मन ल मतगणना बर दूसर राज्य म आब्जर्वर बनाय गेहे। छत्तीसगढ़ म मतगणना कराय बर एडिशनल कलेक्टर रैंक के इकचालीस झिन अधिकारी आवत हे। चुनाव आयोग ह सबो अधिकारी मन ल दू जून तक निर्धारित विधानसभा क्षेत्र म पहुंचे के निरदेस देहे।
इही बीच, छत्तीसगढ़ के मुख्य निर्वाचन पदाधिकारी रीना बाबा साहेब कंगाले ह सबो जिला निर्वाचन अधिकारी मन ल चार जून मतगणना के दिन बर केन्द्र मन म जरूरी व्यवस्था तय राखे के निरदेस देहे।
सिरपुर-पुरातत्व सर्वेक्षण दल
महासमुंद जिला म स्थित सिरपुर के जुन्ना लक्ष्मण मंदिर अउ तीर-तखार के पुरा अवशेष मन ल यूनेस्को के विश्व धरोहर स्थल के सूची म सामिल कराय बर भारतीय पुरातत्व सर्वेक्षण के संयुक्त महानिदेशक डॉक्टर प्रवीण कुमार मिश्रा ह सिरपुर के दउरान करीन। ए दउरान डॉक्टर मिश्रा के टीम ह क्षेत्र म चलत अनुसंधान अउ दस्तावेजीकरण काम के अवलोकन प्रस्तुत करीन। एमा पुरातात्विक खनई, ऐतिहासिक अनुसंधान, वास्तुशिल्प अध्ययन, सांस्कृतिक संरक्षण, मानव विकास, जैव विविधता मूल्यांकन अउ सामाजिक-आर्थिक मूल्यांकन समेत कई ठिन पहलु ल राखे गेहे। डॉक्टर मिश्रा ह सिरपुर साडा के नेवता म इहां पहुंचीन अउ एक ठिन डोजियर के तियारी बर बिसेस मार्गदर्सन दीन। ए मउका म ओमन सिरपुर म कई ठिन मुख्य पुरातात्विक अउ ऐतिहासिक जघा के दउरान करीन, जेमा प्रसिद्ध सिरपुर लक्ष्मण मंदिर, गंधेश्वर मंदिर अउ बौद्ध विहार सामिल हे।
आतंकवाद विरोधी-शपथ
आज देसभर म आतंकवाद विरोधी दिवस मनाय जात हे। ए दिवस ल पूर्व प्रधानमंत्री स्वर्गीय राजीव गांधी के पुण्यतिथि इक्कीस मई के दिन राखे जाथे। ए दिवस के बेरा म आज छत्तीसगढ़ के सबो जिला मनके सरकारी आफिस मन म अधिकारी अउ कर्मचारी मन आतंकवाद विरोधी सपथ लीन।
कोंडागांव म जिला कलेक्टर कुणाल दुदावत अउ बस्तर म कलेक्टर विजय दयाराम के. ह अधिकारी अउ कर्मचारी मन ल सपथ देवईन।
फुटबॉल
नारायणपुर के रामकृष्ण मिशन आश्रम म खेले जावत अंडर-ट्वेंटी राष्ट्रीय फुटबॉल प्रतियोगिता म दिल्ली अउ कर्नाटक के टीम फाइनल म पहुंच गेहे। दूनों टीम बीच काली मंझनिया साढ़े तीन बजे फाइनल मुकाबला खेले जाही।
एखर पहिली, काली पहला सेमीफाइनल मैच कर्नाटक अउ मणिपुर के बीच खेले गीस, जेमा कर्नाटक ह मणिपुर ल जीरो के मुकाबला एक गोल ले हराके फाइनल म जघा पोगरियालीस। उहें, दिल्ली अउ मिजोरम बीच खेले गे दूसर सेमी फाइनल मैच म दिल्ली ह मिजोरम ल हराके फाइनल म पहुंचीस।
अउ अब पेस हे मौसम के हाल…
मौसम विभाग के मुताबिक हरियाणा ले पूर्वी बांग्लादेश तक एक ठिन द्रोणिका बने हुए हे। उहें, तटीय आंध्रप्रदेश अउ बंगाल के खाड़ी तक ऊपरी हवा के चक्रवाती घेरा के सेती एक ठिन निम्नदाब के क्षेत्र मध्य बंगाल के खाड़ी के उपर बन सकत हे। एखर असर ले प्रदेस के बस्तर संभाग म काली एक-दू जघा म थोरकुन ले जादा बरसा हो सकत हे। उहें, कोनों-कोनों जघा म तेज आंधी अउ करा गिर सकत हे, एखरो चेतावनी दे गेहे।