बीजापुर जिला म आज तीस झन माओवादी मन ह आत्मसमर्पण कर दीन। एमा ले नौ झन माओवादी मन उपर उनचालीस लाख रूपिया के इनाम घोसित करे गे रिहीस। राज्य सरकार के पुनर्वास नीति ले परभावित होके ए माओवादी मन ह सीआरपीएफ के डी.आई.जी. अउ पुलिस अधीक्षक के आगू म आत्मसमर्पण करीन। खबर के मुताबिक एसो जनवरी महीना ले लेके अब तक बीजापुर जिला म एक सौ अस्सी झन माआवोदी मन ल गिरफ्तार करे गेहे। उहें, छिहत्तर झन माओवादी मन ह आत्मसमर्पण करे हे।
उहें, इही जिला के बोड़गा गांव के एक ठन खेत म माओवादी मन डहार ले लगाय गे आईईडी के चपेट म आय ले दू झिन नान्हें लइका मनके मउत होगे। ए लइका मनके निधन म मुख्यमंत्री विष्णुदेव साय ह दुख जतईन हे।
कांग्रेस नेता-हत्या
नारायणपुर जिला के परिवहन संघ के सचिव अउ कांग्रेस नेता विक्रम बैस के गोली मारके हत्या कर दे गेहे। ए घटना ल काली रतिहा के बताय जात हे। मिले खबर के मुताबिक विक्रम बैस ह बखरूपारा म अपन घर ले घूमे बर निकले रिहीन। उही समे अनजान मनखे मन ह आके ओला गोली मार दीन। विक्रम बैस के मउकाच म परान छूट गे। घटना के बाद आरोपी मन ह उहां ले भाग गे। पुलिस डहार ले मामला के जांच करे जात हे।
माओवादी मुठभेड़-कांग्रेस
छत्तीसगढ़ कांग्रेस ह बीजापुर जिला के पीड़िया इलाका म पाछु सुक्रवार के होय पुलिस अउ माओवादी मनके बीच मुठभेड़ ल फर्जी बताय हे। कांग्रेस डहार ले ए मुठभेड़ के जांच करे खातिर आठ सदस्य वाले एक ठन जांच दल बनाय गेहे। ए जांच दल म चार झन विधायक अउ चार झन पूर्व विधायक सामिल हे। ए जांच दल के अगुवई पूर्व विधानसभा उपाध्यक्ष संतराम नेताम ह करही।
खबर के मुताबिक ए मुठभेड़ म बारह झिन माओवादी मनके मउत होय रिहीस। सनिवार के बीजापुर मुख्यालय म ए माओवादी मनके लास ल लाय गे रिहीस। ए दउरान उंखर परिवार वाले मन ह बीजापुर म जाके माओवादी होय ले इंकार कर दीन।
हाईकोर्ट-ग्रीष्मकालीन अवकाश
छत्तीसगढ़ उच्च न्यायालय म काली ले गर्मी के छुट्टी सुरू होगे हे। छुट्टी के पहिलीच दिन मुख्य न्यायाधीश रमेश सिन्हा ह अपन न्यायालय म सूचीबद्ध मामला के सुनवाई करीन। संगेसंग ज्यूडिशियल साखा मन म चलत प्रकरण मनके सत्यापन काम के निरीक्षण घलो करीन।
पीआईबी-आपराधिक कानून
देसभर म एक जुलाई ले प्रभावी होवइया तीन ठन नवा आपराधिक कानून ‘दंड संहिता ले न्याय संहिता‘ ल लेके आज राजधानी रईपुर म एक ठिन कार्यशाला ‘वार्तालाप‘ राखे गीस। केन्द्रीय गृह मंत्रालय अउ पत्र सूचना कार्यालय रईपुर के सहयोग ले राखे गे ए वार्तालाप म बिलासपुर रेंज के पुलिस महानिरीक्षक संजीव शुक्ला ह सामिल होइन। ए मउका म ओमन किहीन कि नवा कानून ल जनता के हित ल ध्यान म म राख के बनाय गेहे। ओमन बतईन कि ए कानून के मतलब हे – सजा देय के बजाय न्याय देना हे। नवा कानून म सूचना प्रौद्योगिकी के संगेसंग फॉरेंसिंक लैब बनाय म घलो जोर दे गेहे।
ए कार्यसाला म पुलिस मुख्यालय नवा रईपुर के उपनिदेशक अभियोजन अवनिश चौरसिया ह बतईन कि नवा कानून म ई-रिकॉर्ड के प्रावधान करे जात हे, जेखर जीरो एफआईआर, ई-एफआईआर अउ चार्जशीट ल डिजिटल करे जाही। ओमन बतईन कि राजद्रोह कानून ल रद्द करके देसद्रोह करे गेहे। एखर ले भारत के संप्रभुता अउ अखंडता के खिलाफ काम बर सात साल तक के सजा या फेर आजीवन कारावास के प्रावधान करे गेहे।
ए कार्यशाला म प्रिंट, इलेक्ट्रॉनिक अउ ऑनलाइन मीडिया के लीगल के संगेसंग क्राइम बीट कवर करइया संवाददाता मन ह सामिल होइन।
ड्रग्स तस्कर-गिरफ्तार
रईपुर के एंटी क्राइम एंड साइबर यूनिट के टीम डहार ले ‘निजात अभियान‘ के तहत ड्रग्स के सप्लाई करे के आरोप म पांच झन तस्कर मन ल गिरफ्तार करे गीस। ए तस्करी टीम म एक झन जवान नोनी घलो सामिल हे। बताय जात हे कि एमन ह दिल्ली ले ड्रग्स लेके रईपुर म सप्लाई करत रिहीन। खम्हारडीह पुलिस ल सूचना मिले रिहीस कि कुछ जवान लइका मन ह ड्रग्स के सेवन करत हे, जेखर बाद पुलिस के टीम ह ओमन ल हिरासत म लेके पूछताछ करीन। जेखर बाद दिल्ली के चारों झन ड्रग्स तस्कर मन ल गिरफ्तार करे गीस। इंखर मनके तीर ले छह हजार छह सौ मिलीग्राम कोकीन, इक्कीस सौ मिलीग्राम एम.डी.एम.ए. अउ एक ठन कार घलो बरामद करे गेहे। पुलिस ह बतईन हे कि ए आरोपी मन ल सहर म होवइया पार्टी मन म सामिल होके ए ड्रग्स के सप्लाई करत रिहीन।
उहें, बिलासपुर के सरकंडा इलाका ले पुलिस के टीम ह एक युवक अउ दू झन नाबालिग मन ल प्रतिबंधित नसीला इंजेक्शन के संग गिरफ्तार करे हे। पुलिस के टीम ह उंखर मन तीर ले करीबन तीन सौ पचहत्तर ठन नसीला इंजेक्शन जब्ती करे हे।
आईपीएल सट्टा-आरोपी गिरफ्तार
सरगुजा पुलिस के टीम ह ‘‘ऑपरेशन विश्वास‘‘ के तहत आईपीएल क्रिकेट मैच म सट्टा खेलइया तीन झन सटोरीयां मन ल गिरफ्तार करीन हे। खबर के मुताबिक साइबर रेंज थाना अउ कोतवाली पुलिस के टीम डहार ले करे गे संयुक्त कार्रवाई म ए आरोपी मनके तीर ले ओन्न्ईस ठन मोबाइल, तीन ठन पासबुक, दू ठन चेक बुक, इक्कईस ठन एटीएम कार्ड अउ बीस हजार रूपिया नगदी जब्ती करे गीस। आरोपी मनके तीर ले जब्ती करे गे मोबाइल ले लेनदेन के पुष्टि करे गेहे।
मधुमक्खी हमला
खैरागढ़-छुईखदान-गंडई जिला के ठाकुरटोला जंगल के बीच म मंडीप खोल गुफा ल काली श्रद्धालु मन बर खोले गीस। गुफा के भीतर शिवलिंग के पूजा करे खातिर अब्बड़ झन भगत मन ह गे रिहीन। इही समय कुछेक मनखे मन ह मधुमक्खी के छाता ल पथरा म मार दीन, जेखर ले मधुमक्खी मन ह दर्सन करे बर गे मनखे मन चाबे बर धर लीस। ए दउरान बारह झिन मनखे मन ह घायल होगे हे।
खबर के मुताबिक मंडीप खोल गुफा ल साल म एक घांव अक्षय तृतीया के बाद पड़इया पहिला सम्मार के खोले जाथे।
कर्मचारी लापरवाही-कार्रवाई
खैरागढ़-छुईखदान-गंडई जिला म लोकसभा चुनाव के दूसरइया चरण के तहत चुनई काम म छुट्टी मारे के सेती जिला प्रसासन डहार ले एक झन सिक्षक ल निलंबित कर दे गेहे। उहें, चार झन सिक्षक मन ल निलंबित करे के प्रस्ताव ल संचालनालय सिक्षा विभाग रईपुर ल भेजे गेहे। एखर अलावा तीन झन कर्मचारी मनके वेतन-वृद्धि ल रोके अउ आठ कर्मचारी मन ल चेतावनी दे गेहे।
समर कैम्प
स्कूल सिक्षा विभाग डहार ले गर्मी के छुट्टी म पढ़ईया लइका मन बर समर कैंप राखे जाही। ए कैम्प म लइका मन ल रचनात्मक गतिविधि ले जोड़े जाही। स्कूल सिक्षा विभाग के सचिव सिद्धार्थ कोमल सिंह परदेशी ह राज्य के जम्मों जिला कलेक्टर मन ल निरदेस जारी करत किहीन कि पन्द्रह जून तक स्कूल मन म गर्मी के छुट्टी राखे गेहे। ए दउरान लइका मन बर स्कूल के संगेसंग गांव अउ सहर के सामुदायिक भवन मन म समर कैंप राखे जाय। ए कैम्प म चित्रकला, गायन, वादन, निबंध, कहानी-लेखन, हस्तलिपि लेखन, नृत्य, खेलकूद के संगेसंग गांव अउ सहर के जुन्ना ऐतिहासिक गतिविधि के बारे म जानकारी दे जाही।
खबर के मुताबिक गर्मी के सेती ए समर कैम्प ल बिहनिया सात बजे ले साढ़े नौ बजे तक राखे जाही।
– कोरबा जिला के पुटा गांव के तीर एक ठिन तेज रफ्तार फटफटी ह अनियंत्रित होके पेड़ ल टकरा गे। ए दउरान दू झिन मनखे मनके मउकाच म परान छूट गे। उहें, एक झिन मनखे के हालत ल गंभीर बताय जात हे।
अउ
– जांजगीर-चांपा के जिला रोजगार कार्यालय म सत्रह मई के प्लेसमेंट कैम्प के आयोजन करे जाही।