मतदाता जागरूकता
छत्तीसगढ़ चेंबर ऑफ कॉमर्स ह अवइया सात मई के मतदान दिन म एक बजे तक बाजार बंद रखे के निर्णय लेहे। चेंबर कोति ले जारी विज्ञप्ति अनुसार ‘‘पहले मतदान फिर दुकान‘‘ अभियान के तहत सब के तहत व्यापारी मन ले ए विनती करे गेहे कि, ओमन खुद मतदान करे अउ अपन संस्थान के करमचारी अउ परिवार जन ल घलो मतदान करे बर प्रेरित करय।
मतदान प्रतिसत ल बढ़ाय अउ लोगन मन ल वोट डाले बर प्रेरित करे के उद्देस्य ले राज्य के आने-आने जिला म बने सारा काम करे जावत हे। गौरेला-पेण्ड्रा-मरवाही जिला म प्रसासन ह कैंडल रैली निकालके लोगन मन ल मतदान करे बर जागरूक करीस। जिला निर्वाचन अधिकारी लीना कमलेश मंडावी के अगुवई म ए रैली म स्व-सहायता समूह के दीदी मन अउ जिला प्रसासन के अधिकारी करमचारी समेत आम नागरिक मन भाग लीन।
उहें, इही जिला म चेंबर ऑफ कॉमर्स कोति ले आने-आने दुकान मन म वोटिंग करके उंगली म लगे अमिट स्याही ल दिखाय म सामान के कीमत म दस प्रतिसत के छूट देके निर्णय ले गेहे।
होम वोटिंग
प्रदेस म पचासी बछर ले जादा उमर के सियान अउ दिव्यांग मतदाता मन बर होम वोटिंग के सुविधा सुरू करे गेहे। एखर तहत कोरिया के जिला निर्वाचन अधिकारी विनय कुमार लंगेह ह होम वोटिंग बर मतदान दल ल हरियर झंडी देखाके रवाना करीन। बैकुंठपुर अउ सोनहत म मतदान दल कोति ले घर-घर जाके सियान अउ दिव्यांग मतदाता मन ले वोटिंग कराय जावत हे। बैकुंठपुर म पचासी बछर ले जादा उमर के साठ अउ सड़सठ दिव्यांग मतदाता हवय।
ऐति, सारंगढ़-बिलाईगढ़ जिला म घलो होम वोटिंग सुविधा के तहत एक अउ तीन मई के मतदान दल कोति ले सियान अउ दिव्यांग मतदाता मन के घर पहुंच के वोटिंग कराय गीस। ए सुविधा ले तरेकेला गांव के एक सौ दस बछर के डालमो महार ह घलो मतदान करीन।
इही बीच, रईपुर जिला प्रशासन कोति ले अस्सी बछर ले जादा उमर के सियान अउ दिव्यांग मतदाता मन बर सात मई मतदान के दिन घर ले मतदान केंद्र तक आय-जाय बर गाड़ी के सुविधा उपलब्ध कराय जाही। एखर बर जिला प्रशासन कोति ले ए दू ठन मोबाईल नंबर जारी करे गेहे – 7 2 4 7 7 5 3 2 1 2 अउ 9 3 2 9 9 3 1 4 6 4, एमा फोन अउ व्हाट्सअप करके गाड़ी सुविधा के लाभ ले जा सकथे।
हल्बी/गोण्डी-समाचार बुलेटिन
काली ईतवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन परसारित करे जाही। ए दूनों बुलेटिन आकाशवाणी केंद्र, जगदलपुर ले परसारित होही। जेला बस्तर संभाग म सुने जा सकही। हल्बी म समाचार बुलेटिन बिहनिया साढ़े सात बजे अउ गोण्डी म समाचार बुलेटिन संझा साढ़े छै बजे ले परसारित करे जाही।
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के सब्बो आकाशवाणी केंद्र एके संघ रिले करही। ए बखत के अंक म ‘‘रईपुर‘‘ जिला के काम-काज के बारे म जानकारी दे जाही।
आओ जाने अपना बूथ
प्रदेस म लोकसभा चुनई बर सात मई के होवइया मतदान के पहिली ही मतदाता मन ल अपन बूथ के आने-आने सुविधा ल देखे के मउका मिलही। रईपुर कलेक्टर अउ जिला निर्वाचन अधिकारी डॉक्टर गौरव सिंह के पहल उपर ‘‘आओ जाने अपना बूथ‘‘ अभियान के सुरूआत काली पांच मई के होही। एखर तहत मतदाता मन ह बिहनिया आठ बजे ले ग्यारा बजे तक अपन बूथ के निरीक्षण करके उंहा दे जाने वाले सुविधा के अवलोकन कर सकथे। ए बारे म कलेक्टर ह सबो जोन कमीसनर के बइठका लेके मतदान केंद्र म जरूरी सुविधा पक्का करे के निरदेस देहे। ओमन किहीन कि मतदान केंद्र म मतदाता मन ल कोनो प्रकार के असुविधा नइ होना चाही। डॉक्टर सिंह ह बतइन कि तेज घाम ल देखत हुए पोलिंग बूथ म मतदाता मन बर नीबू पानी, शरबत अउ ठंडा पानी उपलब्ध रइही। संगेसंग बइठे बर बेंच अउ कुर्सी के व्यवस्था घलो करे जाही। एखर अलावा मतदान दल ल मेडिकल कीट दे जावत हे। जेमा दवई अउ ओआरएस रइही।
इही बीच, रईपुर के समाजसेवी अउ निजी प्रतिष्ठान मतदान केंद्र म जरूरी सुविधा दे बर आगू आवत हे। कई संगठन के पदाधिकारी मन ह जिला निर्वाचन अधिकारी ले भेंट करीन। ओमन मतदान केंद्र म कूलर, पंखा, मतदान दल बर नास्ता अउ खाना के व्यवस्था करे के बात किहीन हे। एखर अलावा बने सारा दुकान मन म सात मई के उंगली म स्याही के निसान देखाय म सामान के कीमत म दस प्रतिसत तक छूट देके घोसना होय हे।
महादेव सट्टा ऐप-आरोपी गिरफ्तार
रईपुर पुलिस ह आईपीएल सट्टा मामला म पुणे ले छब्बीस झिन आरोपी मन ल गिरफ्तार करे हे। रईपुर के वरिष्ठ पुलिस अधीक्षक संतोष कुमार सिंह ह आज एक पत्रकारवार्ता म बतइन हे कि पकड़ाए आरोपी मन छत्तीसगढ़, मध्यप्रदेस अउ उत्तर प्रदेस के रहइया हरय। ए सब्बों आरोपी मन पुणे ले महादेव अउ अन्ना रेड्डी ऐप के माध्यम ले सट्टा खेलावत रिहीन। उंखर तीर ले पुलिस ह ग्यारा ठन लैपटाप, अंठानवे मोबाइल अउ बने सारा पासबुक एटीएम कार्ड समेत करीब पच्चीस लाख रूपिया के सामान बरामद करे हे। रईपुर पुलिस ल एमन तक पहुंचे बर अपन भेष बदल के सब्जी, दूध बेचइया अउ धोबी घलो बने बर पड़िस। पुलिस ह एमन के ठिकाना म सरलग निगरानी राखे रिहीन।
अनवर ढेबर-याचिका
रईपुर के विसेस अदालत ह सराब घोटाला मामला म गिरफ्तार अनवर ढेबर के जमानत याचिका ल खारिज कर देहे। एखर अलावा अदालत ह ए मामला म गिरफ्तार पूर्व आईएएस अधिकारी अनिल टुटेजा के ईडी रिमांड अवधि ल दू दिन याने छै मई तक बढ़ा देहे।
दुर्घटना-मुआवजा
बेमेतरा जिला म पाछू अट्ठाईस अप्रैल के होय सड़क हादसा म मारेगे मनखे मन के परिवार ल केंद्र सरकार ह दू-दू लाख रूपिया मुआवजा देके घोसना करे हे। उहें, घायल मन ल पचास-पचास हजार रूपिया के मुआवजा दे जाही। ए पइसा प्रधानमंत्री राष्ट्रीय सहायता कोष ले दे जाही। सुनइया मन ल बतादन कि बेमेतरा के कठिया गांव म होय सड़क दुर्घटना म नौ झन मनखे के मउत होगे रिहीस, अउ बाईस झन घायल होगे रिहीन।
इही बीच, बिलासपुर जिला के रतनपुर थाना क्षेत्र म पाछू रतिहा तेजी ले चलत बस ह सड़क के तीर खड़े ट्रेलर ल टक्कर मार दीस। जेखर ले बस म बइठे पंद्रह यात्री मन घायल होगे, एमन ल इलाज बर रतनपुर के सामुदायिक स्वास्थ्य केंद्र म भर्ती कराय गीस। घायल मन म सात झन के स्थिति गंभीर बताय जात हे। एमन ल बिलासपुर रेफर कर दे गेहे। बस ह अंबिकापुर ले रईपुर जावत रिहीस।
ट्रेन परिचालन
दक्षिण पूर्व रेलवे के चक्रधरपुर मंडल के राऊरकेला-झारसुगड़ा स्टेसन के बीच गर्डर लॉन्चिंग के काम करे जाही। एखर सेति आज टाटानगर-नेताजी सुभाषचंद्र बोस (ईतवारी) एक्सप्रेस ट्रेन ह रद्द रइही। उहें, दुरूग-आरा साउथ बिहार एक्सप्रेस दुरूग ले करीबन चार घंटा के देरी ले छुटही।
अउ अब सुनव मौसम के हाल...
राज्य म अधिकतम तापमान बाढ़े के दउर बने रहे के संभावना हे। मौसम विभाग के अनुसार छत्तीसगढ़ के बीच भाग के कुछेक इलाका म अवइया तीन दिन म अधिकतम तापमान चवालिस डिग्री के आसपास पहुंच सकथे। फेर, बस्तर संभाग के आने-आने जिला म अवइया तीन दिन म अधिकतम तापमान म थोरकुन गिरावट आ सकथे।