प्रदेस म लोकसभा चुनई के दूसरइया चरण के तहत राजनांदगांव, महासमुंद अउ कांकेर संसदीय क्षेत्र मन म आज मतदान सांतिपूर्ण तरीका ले संपन्न होइस। एखरे संग ए टीम लोकसभा क्षेत्र मन म तीनों महिला समेत इकतालीस उम्मीदवार मन के भाग ईवीएम म कैद होगे। समाचार लिखे जाय तक ए तीनों संसदीय क्षेत्र मन म संझा पांच बजे तक औसतन 72 प्रतिसत मतदान दरज करे गेहे। ए अनंतिम आंकड़ा हरय। आखिरी आंकड़ा आना अभी बांचे हे।
मिले जानकारी के अनुसार राजनांदगांव संसदीय क्षेत्र म करीबन 72 प्रतिसत महासमुंद म 71 प्रतिसत अउ कांकेर लोकसभा क्षेत्र म 73.50 प्रतिसत मतदान दरज करे गीस।
दूसरइया चरण के मतदान बर छै हजार पांच सौ सड़सठ मतदान केंद्र बनाय गे रिहीस। एमा तेईस मतदान केंद्र ल संवेदनसील अउ चार सौ अंठावन केंद्र मन ल अति-संवेदनसील घोसित करे गे रिहीस। दूसरइया चरण म स्वतंत्र अउ निष्पक्ष चुनई संपन्न कराय बर सुरक्षा बल के दू सौ बाईस कंपनी तैनात करे गे रिहीस। एखरे संग जम्मों संवेदनसील क्षेत्र मन म सुरक्षा के कड़ा इंतेजाम करे गे रिहीस। उहें, तीन हजार दू सौ तिरालीस केंद्र मन म वेबकॉस्टिंग अउ वीडियोग्राफी के बेवस्था करे गे रिहीस। एखर माध्यम ले निर्वाचन आयोग डहार ले ए केंद्र मन म नजर राखे गीस। दूसरइया चरण म लगभग तैंतीस हजार मतदान कर्मी मन के ड्यूटी लगाय गे रिहीस। राजनांदगांव, महासमुंद अउ कांकेर निर्वाचन क्षेत्र म मतदाता मनके कुल संख्या बावन लाख चौरासी हजार नौ सौ अड़तीस हरय। एमा छब्बीस लाख पांच हजार तीन सौ पचास पुरूष, छब्बीस लाख उनयासी हजार पांच सौ अट्ठाईस महिला अउ तृतीय लिंग के साठ मतदाता हवय।
दूसरा चरण-मतदान-02
दूसरइया चरण के चुनाव बर तीनों संसदीय क्षेत्र म कुल तीन सौ तीस संगवारी मतदान केंद्र बनाय गे रिहीस। जेखर प्रबंधन महिला चुनाव कर्मचारी अउ सुरक्षाकर्मी मन डहार ले करे गीस। उहें, एक सौ सत्रह मतदान केंद्र मनके संचालन युवा मन डहार ले करे गीस। अइसने तीनों लोकसभा क्षेत्र म एक सौ बीस आदर्स मतदान केंद्र अउ पचीस दिव्यांग मतदान केंद्र बनाय गे रिहीस। हरेक केंद्र म मतदाता सहायता बूथ बनाय गे रिहिस, जिहां मौजूद बीएलओ ह मतदाता सूची म उंखर नाव अउ सरल क्रमांक ढूंढे म मदद करीन। एखरे संग एनएसएस, स्काउट गाइड्स के कैडेट मन मतदान केंद्र म दिव्यांग, वरिष्ठ नागरिक मनके मदद करीन।
राजनांदगांव, महासमुंद अउ कांकेर लोकसभा क्षेत्र म मतदान खातिर लोगन मन म बर उछाह देखे गीस। बिहनिया ले ही मतदान केंद्र म लोगन मनके लंबा-लंबा लाइन देखे गीस। युवा अउ महिला मतदाता मनके संघरा सियान मतदाता घलो घाम के परवाह करे बिना वोट डारे बर मतदान केंद्र पहुंचिन। जादा ले जादा मतदाता मन ल मतदान बर प्रेरित करे के उद्देस्य ले मतदान केंद्र मन ल छत्तीसगढ़ी परंपरा अउ संस्कृति के थीम उपर बिसेस रूप ले सजाय गे रिहीस। धमतरी के बिलभदर मतदान केंद्र म बिसेस पिछड़ी कमार जनजाति के कुछ मतदाता पारंपरिक औजार-तीर धनुष, टुकनी अउ सुपा लेके मतदान करे बर पहुंचिन। अइसने कबीरधाम जिला के ओड़ियाकला मतदान केंद्र म चमरू यादव ह पारंपरिक वेसभूषा म मतदान केंद्र पहुंचके वोट डारिन अउ दूसर ग्रामीण मन ल घलो मतदान बर प्रेरित करीन। उहें, इही जिला के भिंभौरी मतदान केंद्र म दिव्यांग मन ल मतदाता रथ ले मतदान केंद्र लाय गीस अउ मतदान के बाद ओमन ल सुरक्षित घर पहुंचाय गीस। ओति, महासमुंद लोकसभा क्षेत्र म बिसेस पिछड़ी कमार जनजाति के युवा मन ल मतदाता अपन दुधमुंही नोनी के संग पहुंचके मतदान करीस। ए जघा म कई झिन मतदाता मन मतदान के बाद सेल्फी घलो लीन।
दूसरा चरण-मतदान-03
महासमुंद के कलाबाई स्कूल म बनाय गे मतदान केंद्र म एक दुल्हिन ह बिहाव के नेगजोक के बीच अपन परिजन मन संग वोट डारे बर पहुंचिस। उहें, राजनांदगांव के डोंगरगांव विधानसभा क्षेत्र के खरकटोला गांव म दुल्हा शोभित चंद्रवंशी ह बारात जाय के पहिली मतदान करीस। कांकेर लोकसभा क्षेत्र के विश्रामपुरी-रोगाडीह गांव के रहइया भोजराज सोनी ह बारात जाय के पहिली लोकतंत्र के प्रति अपन कर्तव्य के पालन करत पहिली परिवार के संग मतदान करीस। ओखर बाद बारात बर रवाना होइस। अइसने बालोद जिला के गुण्डरदेही विकासखंड अंतर्गत कंचादूर म दुर्गेश चंद्राकर पहिली पिता के संग वोट डारे बर मतदान केंद्र म पहुंचिस, उंखर बाद बारात बर प्रस्थान करीस। अइसने राजनांदगांव के छुरिया मतदान केंद्र म भगवती यादव बिहाव के नेगजोक के बीच समय निकाल के मतदान करे बर पहुंचिस।
उप मुख्यमंत्री विजय शर्मा कवर्धा स्थित आदर्स मतदान केंद्र आत्मानंद हिन्दी माध्यम स्कूल म पहुंच के मतदान करीन।
इही बीच, सुरक्षा बेवस्था ल देखत नक्सल प्रभावित नवागांव अउ बागडोंगरी के मतदान केंद्र मन ल मोरचुल गांव म सिफ्ट करे गे रिहीस, जिहां बनाय गे तीन मतदान केंद्र म ग्यारह गांव के ग्रामीण मतदान करे बर पहुंचिन।
विशेष कार्यक्रम
राजनांदगांव, महासमुंद अउ कांकेर लोकसभा क्षेत्र म आज होय मतदान म प्रादेसिक समाचार एकांस डहार ले बिसेस कारीकरम प्रसारित करे जाही। आकाशवाणी केंद्र रईपुर डहार ले ए बिसेस कारीकरम ल आज रतिहा आठ बजे ले प्रसारित करे जाही, जेला छत्तीसगढ़ स्थित आकाशवाणी के जम्मों केंद्र एके संघरा रिले करही।
चुनाव प्रचार-अभियान
छत्तीसगढ़ म लोकसभा चुनाव के तीसरइया चरण के तहत सात ठिन संसदीय सीट म होवइया चुनाव ल लेके प्रचार अभियान चरम म हे। भाजपा के वरिष्ठ नेता अउ केंद्रीय गृहमंत्री अमित शाह आज दुरूग लोकसभा क्षेत्र के प्रत्यासी विजय बघेल के पक्ष म बेमेतरा म एक जनसभा ल संबोधित करीन। ओमन किहीन कि यदि केंद्र म भाजपा के सरकार बनही, त अवइया दू साल म छत्तीसगढ़ ले नक्सलवाद ल खतम कर दे जाही। उहें, श्री साय ह कांग्रेस उपर तुष्टिकरण के आरोप लगावत किहीन कि तुष्टिकरण के राजनीति अब नइ चलन देबो।
ओति, महिला कांग्रेस के राष्ट्रीय अध्यक्ष अलका लांबा आज छत्तीसगढ़ के दउरा म पहुंचिन। ए मउका म ओमन रईपुर स्थित प्रदेस कांग्रेस मुख्यालय म पत्रकारवार्ता ल संबोधित करत भाजपा उपर जमके निसाना साधिन। ओमन किहीन कि देस म कहू कोति भाजपा के लहर नइ हे। ओमन के चार सौ पार के झूठ साबित होही। ओमन केंद्र सरकार उपर महंगाई अउ बेरोजगारी बढ़ाय के आरोप लगइन। महिला कांग्रेस अध्यक्ष ह किहीन कि ओमन अपन छत्तीसगढ़ प्रवास के दौरान रईपुर, बिलासपुर, दुर्ग अउ कोरबा लोकसभा क्षेत्र के दउरा करही।
पीएससी परीक्षा-सीबीआई जांच
छत्तीसगढ़ लोकसेवा आयोग पीएससी परीक्षा दू हजार इक्कीस म होय कथित अनियमितता के जांच सीबीआई डहार ले करे जाही। ए संबंध म केंद्र सरकार कोति ले अधिसूचना जारी कर दे गेहे।
बतादन कि पीएससी परीक्षा दू हजार इक्कीस म राज्य के बारह विभाग मन म एक सौ सत्तर पद उपर भर्ती बर चयन सूची जारी करे गे रिहीस। चयन सूची जारी होय के बाद बहुत झन प्रतिभागी मन चयन प्रक्रिया म कथित गड़बड़ी ल लेके सिकायत करे रिहीन। एखरे संग ए मामला म एफआईआर घलो दरज करे गे रिहीस। एखर अलावा एंटी करप्सन ब्यूरो-एसीबी अउ आर्थिक अपराध अन्वेसन ब्यूरो- ईओडब्ल्यू ह घलो ए मामला म अपराध दरज करे रिहीस।
उहें, विधानसभा चुनई के बाद मुख्यमंत्री विष्णुदेव साय ह ए मामला के सीबीआई ले जांच कराय के निर्णय ले रिहीस। राज्य सरकार के सहमति मिले के बाद केंद्र सरकार ह सीबीआई जांच बर अधिसूचना जारी कर दे हे।
बातों-बातों में