प्रदेस म लोकसभा चुनाव के पहिली चरण के तहत आज बस्तर संसदीय क्षेत्र म छिटपुट घटना मन ल छोड़के मतदान सांतिपूर्ण संपन्न होइस। एखरे संग ए सीट ले कांग्रेस के कवासी लखमा अउ भाजपा के महेश कश्यप समेत ग्यारा झिन उम्मीदवार मनके भाग आज ईवीएम म बंद होगे। समाचार लिखे जाय तक मिले जानकारी के अनुसार बस्तर क्षेत्र म तीरसठ प्रतिसत ले जादा मतदान दरज करे गीस। ए अनंतिम आंकड़ा हरय, आखिरी आंकड़ा आना अभी बांचे हे।
बस्तर विधानसभा म लगभग तिहत्तर, बीजापुर म करीबन बयालीस, चित्रकोट म तिहत्तर, दंतेवाड़ा म सड़सठ, जगदलपुर म पैंसठ, कोंडागांव म बहत्तर, कोंटा म इंक्यावन अउ नारायणपुर विधानसभा क्षेत्र म बासठ प्रतिसत मतदान दरज करे गीस।
बस्तर संसदीय क्षेत्र म ए दरी एक हजार नौ सौ इकसठ मतदान केंद्र बनाय गे रिहीस। एमा ले इकसठ ल संवेदनसील अउ एक सौ छियानवे मतदान केंद्र मन ल अति संवेदनसील घोसित करे गे रिहीस। मतदान बर सात हजार आठ सौ चौवालीस मतदान कर्मी मन ल तैनात करे गे रिहीस। बस्तर संसदीय क्षेत्र म मतदान बर एक सौ इंक्यानवे संगवारी मतदान केंद्र बनाय गे रिहीस। एखर अलावा आठ मतदान केंद्र के संचालन दिव्यांगजन अउ छत्तीस केंद्र के संचालन युवा मन डहार ले करे गीस। अइसने बियालीस आदर्स मतदान केंद्र घलो बनाय गे रिहीस। बस्तर लोकसभा क्षेत्र के आठ सौ ग्यारा मतदान केंद्र मन म वेबकॉस्टिंग के सुविधा उपलब्ध कराय गे रिहीस, जेखर माध्यम ले निर्वाचन आयोग ह ए केंद्र मनके निगरानी करीन।
पहला चरण मतदान-02
बस्तर संसदीय क्षेत्र के कोंडागांव, नारायणपुर, चित्रकोट, दंतेवाड़ा, बीजापुर अउ कोंटा विधानसभा क्षेत्र म आज बिहनिया सात बजे ले मंझनिया तीन बजे तक मतदान होइस। उहें, बस्तर विधानसभा क्षेत्र म बिहनिया सात बजे ले संझा पांच बजे तक वोट डारे गीस। अइसने जगदलपुर विधानसभा क्षेत्र के एक सौ पचहत्तर मतदान केंद्र मन म घलो बिहनिया सात बजे ले संझा पांच बजे तक वोट डाले गीस, जबकि बहत्तर मतदान केंद्र मन म बिहनिया सात बजे ले मंझनिया तीन बजे तक मतदान होइस। जम्मों संवेदनसील क्षेत्र मन म सुरक्षा के कड़ा इंतेजाम करे गे रिहीस।
बस्तर संसदीय क्षेत्र म मतदान बर आज लोगन मन म बड़ उछाह देखे गीस। बिहनिया ले ही पोलिंग बूथ मन के बाहिर लंबा-लंबा लाइन देखे गीस। युवा, महिला अउ सियान मतदाता मन गर्मी के परवाह करे बिना वोट डारे बर मतदान केंद्र पहुंचिन।
उहें, नारायणपुर म बिहा के तुरते बाद दुल्हा-दुल्हीन वोट डारे बर मतदान केंद्र पहुंचिन। वोट डारे के बाद ओमन किहीन कि लोकतंत्र के ए महापरब म हिस्सा लेना हम सबके कर्तव्य हरय। एखरे सेति, बिहाव के बाद पहला काम बूथ म जाके मतदान करीन।
बतादन कि बस्तर लोकसभा सीट क्षेत्र म कुल चौदा लाख बहत्तर हजार दू सौ सात मतदाता हे। एमा करीबन सात लाख इकहत्तर हजार महिला अउ लगभग सात लाख पुरूष मतदाता सामिल हे। उहें, तृतीय लिंग के बावन मतदाता हे।
विस्फोट-जवान मौत/घायल
बीजापुर जिला म आज एक बिस्फोट म केंद्रीय रिजर्व पुलिस बल-सीआरपीएफ के एक झन जवान के मौत होगे। मिले जानकारी के अनुसार जिला के उसूर थाना क्षेत्र म गलगम इलाका म स्थित सुरक्षा कैम्प ले एरिया डोमिनेसन बर सीआरपीएफ के एक टीम आज बिहनिया रवाना होय रिहीस। कार्रवाई के दउरान दुर्घटनावस यूजीबीएल म बिस्फोट होगे। एखर ले सीआरपीएफ के एक सौ छियानवां वाहिनी के आरक्षक देवेन्द्र कुमार घायल होगिन। घायल जवान ल अच्छा इलाज बर हेलीकाप्टर ले जगदलपुर मेडिकल कालेज लाए गीस, जिहां इलाज के दउरान उंखर मउत होगे। देवेन्द्र कुमार बस्तर जिला के धोबीगुड़ा गांव के रहवासी रहीस। उंखर अंतिम संस्कार काली उंखर गृहग्राम म करे जाही।
एक दूसर घटना म बीजापुर जिला के ही भैरमगढ़ इलाका म होय आईईडी बिस्फोट म केंद्रीय रिजर्व पुलिस बल-सीआरपीएफ के एक सहायक सेनानी घायल होगे। मिले जानकारी के अनुसार सीआरपीएफ के दल चिहका क्षेत्र म स्थित पोलिंग बूथ करा एरिया डॉनिनेशन के कार्रवाई करत रिहीस, तभे प्रेसर आईईडी म बिस्फोट होय ले सहायक सेनानी मनु एचसी ल हाथ अउ गोड़ म चोट आइस। घायल जवान ल प्राथमिक उपचार के बाद बेहतर इलाज के बाद रायपुर लाए के तियारी चलत हे।
तीसरा चरण-नामांकन
लोकसभा चुनाव के तीसरा चरण के तहत प्रदेस के सात संसदीय क्षेत्र म दू सौ नौ अभ्यर्थी मन नामांकन दाखिल करे हे। राज्य निर्वाचन पदाधिकारी कार्यालय ले मिले जानकारी के अनुसार नामांकन दाखिल करे के आखिरी दिन आज अट्ठासी अभ्यर्थी मन नामांकन पत्र जमा करीन। सरगुजा लोकसभा क्षेत्र बर तेरह, रायगढ़ ले पंद्रह, जांजगीर-चांपा ले उनतीस अउ बिलासपुर लोकसभा क्षेत्र ले छियालिस उम्मीदवार मन नामांकन पत्र भरीन। उहें, दुरूग लोकसभा क्षेत्र ले सत्ताईस, रईपुर लोकसभा म पैंतालीस अउ कोरबा लोकसभा क्षेत्र म चौंतीस उम्मीदवार मन नामांकन पत्र दाखिल करीन।
तीसरइया चरण के तहत काली बीस अप्रैल ल नामांकन पत्र के जांच करे जाही। बाईस अप्रैल तक उम्मीदवार मन अपन नाम वापस ले सकही। तीसरा चरण म सात मई के वोट डारे जाही।
मतदाता जागरूकता-01
प्रदेस म लोकसभा चुनाव के मद्देनजर लोगन मन ल मतदान करे बर जागरूक करे के सेति बहुत अकन कारीकरम राखे जात हे। एखर तहत राजनांदगांव जिला म स्थित कांफ्लुएंस कालेज म मतदाता जागरूकता कारीकरम के आयोजन करे गीस। कारीकरम म जिला पंचायत सीईओ अउ स्वीप के नोडल सुरूचि सिंह ह कालेज के युवा विद्यार्थी मन समेत पूरा स्टाफ ल मतदान के सपथ दिलाइस। ए दउरान कालेज के बीएड, बीसीए अउ नर्सिंग के विद्यार्थी मन नुक्कड़ नाटक के माध्यम ले मतदाता मन ल मतदान बर जागरूक करीस। एखरे संग विद्यार्थी मन रंगोली अउ पोस्टर बनाके लोगन मन ल छब्बीस अप्रैल के अनिवार्य रूप ले मतदान करे के अपील करीन।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत हाथी-मानव द्वंद पर अतिरिक्त प्रधान मुख्य वन संरक्षक प्रेम कुमार ले लेगे भेंटवार्ता प्रसारित करे जाही। एखर प्रसारण आकाशवाणी केन्द्र रायपुर डहार ले काली बीस अप्रैल के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
अउ अब थोरकुन समाचार सार म –
– भारतीय जनता पार्टी के वरिष्ठ नेता अउ उत्तर प्रदेस के मुख्यमंत्री योगी आदित्यनाथ इक्कीस अप्रैल के राजनांदगांव लोकसभा क्षेत्र के डोंगरगांव अंतर्गत ग्राम सागर म चुनावी सभा ल संबोधित करही।
– राजनांदगांव जिला के छुरिया थाना क्षेत्र म तेज रफ्तार मोटर साइकिल के अनियंत्रित होके गिरे ले एक युवक के मउत होगे।
अउ
– सड़सठवां राष्ट्रीय सालेय क्रीडा प्रतियोगिता के तहत नेटबॉल स्पर्धा बर मुंगेली जिला के शासकीय विद्यालय मदकू के दू झिन विद्यार्थी मनके चयन होय हे। कृष्णा कुमार कुर्रे अउ केवरा यादव हरियाणा राज्य के रेवारी म छब्बीस ले तीस अप्रैल तक राखे गे स्पर्धा म भाग लेहे।