प्रदेस म लोकसभा चुनई के पहिली चरण म बस्तर संसदीय क्षेत्र म आज संझा पांच बजे चुनाव प्रचार थम गे, अब उम्मीदवार घर-घर जाके प्रचार करत हे। ए सीट म परनदीन उन्नीस अप्रैल के वोट डारे जाही।
इही बीच निर्वाचन आयोग ह बस्तर संसदीय क्षेत्र बर मतदान के बेरा तय कर देहे। एमा कोंडागांव, नारायणपुर, चित्रकोट, दंतेवाड़ा, बीजापुर अउ कोंटा विधानसभा क्षेत्र म बिहनिया सात बजे ले मंझनिया तीन बजे तक मतदान होही। उहें, बस्तर विधानसभा क्षेत्र म बिहनिया सात बजे ले संझा पांच बजे तक वोट डारे जाही। अइसने जगदलपुर विधानसभा क्षेत्र के एक सौ पचहत्तर मतदान केंद्र मन म बिहनिया सात बजे ले संझा पांच बजे तक अउ बहत्तर मतदान केंद्र म बिहनिया सात बजे ले मंझनिया तीन बजे तक वोट डाले जाही। मतदान के दिन उन्नीस अप्रैल के कोंडागांव, नारायणपुर, बस्तर, दंतेवाड़ा, बीजापुर अउ सुकमा जिला म सार्वजनिक अउ सामान्य अवकास के घोसना करे गेहे।
मतदान दल-रवानगी
प्रदेस म लोकसभा चुनाव के पहिली चरण म उन्नीस अप्रैल के होवइया मतदान बर माओवाद समस्या ले प्रभावित बस्तर संसदीय क्षेत्र के संवेदनसील जघा बर हेलीकाप्टर ले मतदान दल ल भेजे जावत हे। बीजापुर, सुकमा, दंतेवाड़ा, कोंडागांव अउ नारायणपुर जिला के दुर्गम अउ संवेदनसील क्षेत्र म बने करीबन डेढ़ सौ पोलिंग बूथ बर मतदान दल ल तीन दिन पहिलीच ले हेलीकाप्टर ले भेजना सुरू कर दे गेहे। काली छप्पन मतदान दल ल भेजे गीस। उहें, आज सौ मतदान दल ल हेलीकाप्टर ले भेजे गीस। ए संवेदनसील क्षेत्र मन म सांतिपूर्ण ढंग ले मतदान कराय बर सुरक्षा के चाक-चौबंद व्यवस्था के संग। बस्तर लोकसभा क्षेत्र म केंद्रीय ससस्त्र पुलिस बल के करीबन तीन सौ पचास अतिरिक्त कंपनी तैनात करे गेहे।
चुनाव प्रचार
छत्तीसगढ़ म लोकसभा चुनाव के पहिली चरण म बस्तर संसदीय क्षेत्र म आज चुनाव प्रचार थम गे, उहें, दूसर अउ तीसर चरण बर चुनाव प्रचार जोरदरहा होवत हे। राजनीतिक दल संग आने-आने उम्मीदवार चुनाव जीते बर जोर लगावत हे। कतकोन पार्टी स्टार प्रचारक मन के सभा करावत हे।
राजनांदगांव म उत्तर प्रदेस के मुख्यमंत्री योगी आदित्य नाथ इक्कीस अप्रैल के रोड-सो करही। उही दिन कांग्रेस के महासचिव प्रियंका वाड्रा घलो इही लोकसभा सीट के डोंगरगांव क्षेत्र के मोहड़ गांव म आमसभा करही। इही बीच जांजगीर-चांपा लोकसभा क्षेत्र के सक्ति जिला के गांव जेठा म तेईस अप्रैल के भाजपा के बड़का नेता अउ प्रधानमंत्री नरेंद्र मोदी के जनसभा प्रस्तावित हवय। भजपा प्रत्यासी कमलेश जांगड़े के पक्ष म होवइया श्री मोदी के जनसभा ल लेके भारतीय जनता पार्टी ह तियारी सुरू कर देहे।
कांकेर मुठभेड़ बयान
मुख्यमंत्री विष्णुदेव साय ह कांकेर जिला म काली होय मुठभेड़ म सुरक्षा बल ल बधई देत किहीन कि केंद्र अउ राज्य सरकार के प्राथमिकता बस्तर संभाग ल नक्सल समस्या ले मुक्त कराना हे। ओमन किहीन कि सुरक्षा बल ह चुनाव ल परभावित करे के माओवादी मनके बड़े कोसिस ल नकाम कर दीन। खबर के मुताबिक काली कांकेर जिला के छोटेबेठिया क्षेत्र म होय मुठभेड़ म उनतीस माओवादी मारे गेहे।
इही बीच, पूर्व मुख्यमंत्री भूपेश बघेल के कांकेर मुठभेड़ ल कथित रूप ले फर्जी एनकाउंटर वाले बयान म उप मुख्यमंत्री विजय बघेल ह आज राजधानी म पत्रकार मनले गोठबात करत किहीन कि माओवादी संगठन ह अपन चिट्ठी म पचास माओवादी के मारे जाय के बात कबूले हे। अइसन म भूपेश बघेल के बयान दुर्भाग्य जनक हे। श्री शर्मा ह किहीन कि भूपेश बघेल ल अपन बयान म जवान मन ले माफी मांगना चाही।
उहें, पूर्व मुख्यमंत्री अउ राजनांदगांव लोकसभा सीट ले कांग्रेस प्रत्यासी भूपेश बघेल ह किहीन कि ओमन बयान पहिली घटे नक्सल घटना ल लेके दे रिहीन, फेर उंखर बयान ल काली के मुठभेड़ ले जोड़ दे गीस, जउन दुर्भाग्य जनक हवय। श्री बघेल ह काली कांकेर जिला म होय मुठभेड़ ल सुरक्षा बल के बड़े कामयाबी बतात जवान मन ल बधई दीन हे।
भाजपा/कांग्रेस-पत्रकारवार्ता-
प्रदेस म थोरिक बेरा पहिली कांग्रेस ले भारतीय जनता पार्टी म सामिल होय बिलासपुर के पूर्व महापौर वाणी राव महिला कांग्रेस के पूर्व राष्ट्रीय सचिव अउ महासमुंद के पूर्व नगर-पालिका अध्यक्ष अनिता रावटे, महासमुंद के जिला पंचायत अध्यक्ष उषा पटेल अउ अरूणा शुक्ला ह आज रईपुर के भाजपा कार्यालय म एक पत्रकारवार्ता म बोलत किहीन कि कांग्रेस ह माईलोगन मन संग हमेसा छल करे हे। भाजपा नेत्रृ ह किहीन कि कांग्रेस ह माईलोगिन मन बर जतका वादा करीन, ओमा एक्को ल पूरा नइ करे हे। ओमन किहीन कि कांग्रेस ह अपन घोसना पत्र म माईलोगिन मन ल एक लाख रूपिया सलाना देके बात केहे हे, फेर कांग्रेस ल देस ल ए बताना चाही कि ओमन माईलोगन मन ल पचास लाख करोड़ रूपिया सलाना कइसे दीही। देस के कुल बजट के अतकेच रासि के होथे। ओमन किहीन कि कांग्रेस ह महतारी सम्मान योजना म हरेक महिना पांच सौ रूपिया अउ विधवा अउ सियान माईलोगिन ल एक हजार रूपिया देके वादा करे रिहीस, फेर प्रदेस म अपन सासनकाल के बेरा एक्को रूपिया नइ दे गीस।
कांग्रेस-पत्रकारवार्ता
दूसर कोति, प्रदेस कांग्रेस के संचार विभाग के अध्यक्ष सुशील आनंद शुक्ला ह केहे हे कि केंद्र म कांग्रेस के सरकार बने म माईलोगिन मन ल एक लाख रूपिया दे जाही। ओमन किहीन कि कांग्रेस ह अपन न्याय पत्र म प्रमुखता ले ए वादा करे हे, अउ एखर बर कांग्रेस माईलोगन मन ले फारम घलो भरवावत हे। कांग्रेस के कार्यकर्ता पार्टी के ए घोसना ल राज्य के सबो लोकसभा क्षेत्र के महिला मतदाता मन तक पहुंचावत हे।
मतदाता जागरूकता
लोकसभा चुनाव ल देखत लोगन ल वोट डारे बर जागरूक करे खातिर प्रदेस भर म कतकोन कारीकरम होवत हे। एमा काली रईपुर के सुभाष स्टेडियम म अंतर्राविभागीय स्वीप क्रिकेट प्रतियोगिता म स्मार्ट सिटी रईपुर अउ खेल युवा कल्याण के बीच सेमी फाइनल मैच खेले गीस। ए मउका म नगर-निगम आयुक्त अविनाश मिश्रा ह खिलाड़ी मन ल मतदाता जागरूकता के सपथ देवाइन। ए बेरा म जिला पंचायत सीईओ विश्व दीप समेत कतकोन अधिकारी अउ कर्मचारी के संग आम नागरिक मौजूद रिहीन।
ओति, रईपुर नगर-निगम आयुक्त के निरदेस म जोन चार के टीम ह कैनोइंग क्लब के संग बूढ़ा तरिया के विवेकानंद सरोवर म जागरूकता कारीकरम करके ‘‘बोट पर वोट‘‘ के संदेस दीन। ए मउका म जोन कमीश्नर राकेश शर्मा अउ सहायक अभियंता पद्माकर श्रीवास ह बिहनिया घूमे बर निकले लोगन ल मतदान के सपथ देवइन।
अइसने कोरिया जिला के ग्राम पंचायत पुसला मेंड्रा अउ तंजारा के माईलोगन अउ युवा मन ह मसाल रैली निकाल के ‘‘मतदान करबो-कराबो‘‘ के संदेस देत लोगन ल वोट डारे खातिर जागरूक करीन।
रामनवमीं
उहें, छत्तीसगढ़ के राज्यपाल विश्वभूषण हरिचंदन ह प्रदेसवासी मन ल रामनवमीं के बधई अउ सुभकामना देवत खुसहाली के मानता मानिन।
रामनवमीं के मउका म आज प्रदेस भर के राम मंदिर म पूजा-पाठ बिहनियच ले होवत हे। जघा-जघा रामायण पाठ घलो करे जात हे। राजधानी रईपुर के दुधाधारी मठ म भगवान राम के दर्सन बर भिनसरहच ले भक्त मनके लाइन लगे रिहीस।
इही बीच आज देवी मंदिर मन ले ज्योत-जंवारा के विर्सजन होवत हे। जसगीत के धुन म झूमत कतकोन मन अपन मानता पूरा होय म बाना धरके निकलीन। जघा-जघा कन्या भोज अउ भंडारा राखेगे रिहीस।
भाजपा-बैठक
भारतीय जनता पार्टी के क्षेत्रीय संगठन महामंत्री अजय जामवाल ह राजधानी रईपुर म विधानसभावार पार्टी के कोर कमेटी के सदस्य मनके बइठका लीन। ए मउका म पार्टी के संगठन महामंत्री पवन साय मौजूद रिहीन। बइठका म रईपुर जिला के सबो पांच विधानसभा क्षेत्र के कोर कमेटी के सदस्य अउ लोगसभा चुनाव प्रबंधन समिति के सदस्य सामिल होइन। ए मउका म श्री जामवाल ह चुनावी रणनीति बनाय के संगेसंग एला कोन कीसम ले चलाय जाही। एखर दिसा निरदेस पदाधिकारी मन ल दीन।