प्रदेस म लोकसभा चुनई के तीसर चरण म रईपुर के संगेसंग सात लोकसभा क्षेत्र मन म नामांकन पत्र दाखिल करे के काम चलत हे। आज प्रदेस म पंद्रह झिन प्रत्यासी मन के बत्तीस नामांकन दाखिल होय हे, जेमा सरगुजा ले चार, रायगढ़ ले दू, जांजगीर-चांपा ले तीन, बिलासपुर ले चार, दुरूग ले नौ अउ रईपुर ले दस नामांकन मिले हे। भाजपा के बड़का नेता अउ मुख्यमंत्री विष्णुदेव साय ह आज रईपुर अउ दुर्ग म भाजपा प्रत्यासी बृजमोहन अग्रवाल अउ विजय बघेल के नामांकन रैली म सामिल होइन। ए दौरान दूनों प्रत्यासी मन ह अपन-अपन नामांकन पत्र जमा करीन।
दुरूग म राखेगे नामांकन रैली ल संबोधित करत श्री साय ह किहीन कि ए चुनाव ह बछर दू हजार सैंतालीस तक देस ल विकसित भारत अउ बछर दू हजार उनतीस तक विश्व के तीसर बड़का आर्थिक सक्ति बनाय के चुनाव हरय। ओमन किहीन कि प्रधानमंत्री नरेंद्र मोदी के अगुवई म पूरा दुनिया म भारत के मान-सम्मान ह बाढ़े हे। श्री साय ह भाजपा डहार ले जारी संकलप पत्र के बारे म किहीन कि अवईया पांच साल म तीन करोड़ नवा प्रधानमंत्री आवास बनाय, सत्तर साल ले जादा उमर के सियन्हा मन ल आयुष्मान भारत योजना म मुफत म ईलाज के सुविधा दे के संगेसंग तीन करोड़ लखपति दीदी बनाय के लक्ष्य हे।
ए मउका म कांग्रेस के सीमा बघेल ह भाजपा के सदयस्ता ले लेहे। श्रीमती बघेल ह बछर उन्नीस सौ अंठानवे ले दू हजार तीन तक अहिवारा नगर-पालिका के अध्यक्ष रिहीन।
जानबा के मुताबिक तीसर चरण म नामांकन पत्र जमा करे के आखिरी तारीख उन्नीस अप्रैल राखेगे हे। बीस अप्रैल के नामांकन पत्र के जांच होही। उम्मीदवार मन बाईस अप्रैल तक अपन नांव वापिस ले सकथे। तीसर चरण म सात मई के वोट डारे जाही।
संगवारी मतदान केंद्र
प्रदेस म लोकसभा चुनई के तहत माईलोगिन मतदान दल मनके भागीदारी ल पूरा करे बर बिसेस पहल करे जात हे। इही कड़ी म गौरेला-पेण्ड्रा-मरवाही जिला म नगरीय निकाय क्षेत्र मन के जम्मों सैंतीस संगवारी मतदान केंद्र मन म सिरिफ माईलोगिन मतदान दल मन डहार ले सात मई के मतदान कराय जाही। एमा नगरीय क्षेत्र गौरेला-म सोला, पेण्ड्रा म ग्यारा अउ मरवाही म दस ठिन संगवारी मतदान केंद्र बनाय गेहे।
होम वोटिंग
कोंडागांव जिला म होम वोटिंग सुविधा के तहत केसकाल विधानसभा क्षेत्र के छप्पन मतदाता मन ह काली मतदान करीन, जेमा पंदह झिन दिव्यांग अउ इकचालीस झिन सियनहा मतदाता सामिल हे। कांकेर लोकसभा क्षेत्र के कुल एक सौ सोला मतदाता मन ह ए सुविधा के फायदा लेबर अर्जी करे रिहीन, जेमा ले अब तक छप्पन मतदाता मन ह मतदान करे हे। बांचे मतदाता मन ल मतदान करवाय बर मतदान दल ह काली उंखर मनके घर जाही।
मतदाता जागरूकता
उहें, स्वीप कारीकरम के तहत दुर्ग के पद्मनाभपुर मिनी स्टेडियम म जिला प्रशासन डहार ले लोगन मन ल मतदान के महत्ता बताय बर ‘‘सेंचुरी वोटिंग‘‘ मैत्री क्रिकेट मैच होइस।
भाजपा के प्रदेस अध्यख किरण सिंह देव ह किहीन हे कि भाजपा के संकलप पत्र अउ ओमा करे गे वादा ह मोदी के गारंटी हरय। ओमन किहीन कि भाजपा डहार ले जारी संकलप पत्र म ज्ञान माने गरीब, युवा अन्नदाता अउ नारी सक्ति उपर जोर दे गेहे। ओमन किहीन कि अवईया पांच साल म नारी सक्ति मनके बड़का भागीदारी होही।
दूसर कोति, नेता प्रतिपक्ष डॉक्टर चरणदास महंत ह किहीन हे कि भाजपा के चुनावी संकल्प पत्र निरासाजनक हे। ओमन किहीन कि संकल्प पत्र म महंगाई अउ बेरोजगारी ले राहत देके बारे म कोनो उपाय नइ बताय गे हे। डॉक्टर महंत ह किहीन कि पाछू दस साल म भाजपा सरकार ह कुछू नइ कर पाय हे अउ अब लोगन मन ल बछर दू हजार सैंतालीस तक विकसित भारत के सपना देखावत हे।
राज्यपाल-ओड़िया नववर्ष उत्सव
राज्यपाल विश्वभूषण हरिचंदन ह अपन ओडिसा दौरा के दउरान ‘‘नमामि दुनाकिनी अनुकुल्या‘‘ म राखेगे उड़िया नववर्ष उत्सव म सामिल होइन। ए मउका म राज्यपाल ह ओड़िसा के इतिहास, परंपरा, संस्कृति अउ वीरता के जिकर करीन। ओमन ओड़िसा के लोगन मन ल भाषा, साहित्य अउ संस्कृति के रक्षा बर आगू आके राष्ट्र के भलाई बर काम करे के विनती करीन।
अग्नि सुरक्षा सप्ताह
अग्नि सुरक्षा सेवा सप्ताह के मउका म जांजगीर-चांपा जिला मुख्यालय म रैली राखे गीस। रैली ह नगर सेना अउ अग्निसमन आफिस ले सुरू होइस, जउन ह कचहरी चौक वीटीआई चौक अउ नेताजी चौक ले होवत वापिस अग्निसमन कार्यालय पहुंचिन। ए दौरान बैनर पोस्टर के माध्यम ले आम लोगन मन ल अग्नि सुरक्षा के बारे म जानबा देके जागरूक करे गीस।
जानबा के मुताबिक काली ले सुरू होय अग्निसुरक्षा सप्ताह ह बीस अप्रैल तक चलही।
ट्रांसजेंडर दिवस समारोह
दुरूग म आज ट्रांसजेंडर दिवस समारोह के आयोजन करे गीस। ए समारोह म दुरूग, बेमेतरा अउ बालोद के ट्रांसजेंडर समुदाय के लोगन मन सामिल होइन। कारीकरम म भारतीय विश्वविद्यालय के रजिस्टार डॉक्टर विरेंद्र कुमार स्वर्णकार अउ उच्च शिक्षा विभाग के अतिरिक्त संचालक डॉक्टर राजेश पांडेय अतिथि के रूप म आय रिहीन। ए मउका म ओमन किहीन कि जिला म अइसन कारीकरम होना खुसी के बात हरय। कारीकरम म ‘‘उनकी कहानी, उन्हीं की जुबानी‘‘ के तहत ट्रांसजेंडर कंचन सेन्द्रे अउ विकास मेश्राम ह अपन बिचार अउ अनुभव ल साझा करीन।
अष्टमी
काली चैत नवरात्रि के अठवाही माने महाअष्टमी मनाय जाही। ए दिन आदिसक्ति मां दुर्गा के आठवां स्वरूप महागौरी के पूजा-पाठ करे जाथे। राज्य के जम्मों सक्तिपीठ अउ देवी मंदिर मन म महाअष्टमी के पूजा अउ हवन के कारीकरम काली होही। संगेसंग कतकोन जघा म भंडारा के घलो आयोजन करे जाही। उहें, महाअष्टमी के दूसर दिन रामनवमी के मउका म ज्योति कलस अउ जंवारा के विसर्जन करे जाही।
अउ अब थोरकुन समाचार सार म –
– नारायणपुर जिला बर नियुक्त सामान्य प्रेक्षक डॉक्टर जे. गणेशन अउ जिला निर्वाचन अधिकारी बिपिन मांझी ह आज माइक्रो ऑब्जर्वर मनके बइठका लीन। बइठका म जिला के एक सौ सत्ताईस मतदान केंद्र के पचीस झिन माइक्रो ऑब्जर्वर मन सामिल होइन।
– गौरेला-पेण्ड्रा-मरवाही जिला के गांव बस्तीबगरा के रहइया सेना के जवान महेन्द्र सिंह के सड़क दुर्घटना म मउत होगे। अंतिम संस्कार म बिलासपुर आर्मी कैंप के जवान मन ह सामिल होके ओमन ल सम्मान बिदाई दीन।
– बिलासपुर पुलिस ह चाइल्ड पोर्नोग्राफी अपलोड करे के मामला म स्कूल के एक झिन शिक्षके संगेसंग ग्यारा झिन लोगन मन ल गिरफ्तार करे हे।
– बेमेतरा जिला के गांव हाड़गांव म गाज गिरे ले एक झिन माईलोगिन के मउत होगे।
अउ
– धमतरी जिला के सिहावा पुलिस अउ साइबर सेल के टीम ह पाछू रतिहा गांव सांकरा स्थित फारेस्ट नाका चेक पोस्ट के गाड़ी चेकिंग के दउरान ग्यारा किलो गांजा के संग तीन झिन लोगन मन ल गिरफ्तार करे हे।