भारतीय जनता पार्टी के बड़का नेता अउ प्रधानमंत्री नरेंद्र मोदी आठ अप्रैल के छत्तीसगढ़ के एक दिवसीय दउरा म बस्तर आही। ए दउरान श्री मोदी भानपुरी क्षेत्र के छोटे आमाबाल म राखे गे चुनावी जनसभा ल संबोधित करही। प्रधानमंत्री के दउरा ल लेके पार्टी के प्रदेस प्रभारी नितिन नबीन अउ प्रदेस अध्यक्ष किरण सिंह देव ह आज सभा स्थल के जांच करीन। ए बेरा म ओमन पार्टी के बड़का पदाधिकारी मन के बइठका लेके जरूरी दिसा-निरदेस दीन। प्रधानमंत्री के चुनावी सभा के प्रभार के दायित्व वनमंत्री केदार कश्यप ल सौंपे गेहे।
खबर के मुताबिक बस्तर लोकसभा सीट म उन्नीस अप्रैल के मतदान होही।
रायपुर-आगजनी
राजधानी रईपुर के गुढ़ियारी के रामगनर क्षेत्र म बिजली विभाग के सब डिवीजन परिसर म आज भीषण आग लग गे, ए आग करीबन डेढ़ एकड़ क्षेत्र म फैल गेहे। फायर ब्रिगेड के दस ले जादा गाड़ी आगी बुताय म जुटे हे। खबर के मुताबिक ए आग ट्रांसफार्मर म सार्टसर्किट के सेति लगे हे। घटना के जघा ले सरलग ब्लास्ट के आवाज आवत हे। परिसर म बड़ संख्या म ट्रांसफार्मर रखाय हे। ए आगी के धुंगिया सहर के आसमान म फैल गेहे। क्षेत्र म अफरा-तफरी के माहौल बने हे। मउका म मुख्यमंत्री विष्णुदेव साय के सचिव पी.दयानंद, कलेक्टर गौरव द्विवेदी अउ पुलिस अधीक्षक मौजूद हे। आगी म अभी तक काबू नइ पाय गेहे। प्रशासन कोति ले घटना स्थल के तीर-तखार म रहवइया परिवार ल सुरक्षित जघा म अमराय जात हे।
भाजपा-प्रेवश
प्रदेस कांग्रेस कमेटी के पूर्व महासचिव इंजीनियर रवि पांडेय ह अपन सहयोगी अउ समर्थक मन संग भाजपा म सामिल होगे हे। ओमन पार्टी के प्रदेस अध्यक्ष किरण सिंह देव अउ पूर्व नेता प्रतिपक्ष नारायण चंदेल के आगू भाजपा के सदस्यता लीन।
खबर के मुताबिक इंजीनियर रवि पांडेय जांजगीर-चांपा जिला के रहइया हरय। ओमन कांग्रेस के डिजीटल सदस्यता अभियान म प्रदेस म टॉपर रिहीन हे।
लोकसभा चुनाव-आकाशवाणी/दूरदर्शन
अवईया लोकसभा चुनाव बर आकाशवाणी अउ दूरदर्सन म हरेक राष्ट्रीय पार्टी ल पैंतालीस-पैंतालीस मिनट दे जाही। छै राष्ट्रीय पार्टी ल साढ़े पांच घंटा के प्रसारण के अतिरिक्त बेरा दे गेहे। राष्ट्रीय पार्टी बर प्रसारण समय आबंटन करे के काम के आयोजन काली नई दिल्ली के आकाशवाणी भवन म आयोजित करे गीस। ए प्रसारण ए महिना के सोलह अउ तेइस तारीख के अउ अवइया महिना म तीन, दस,सत्रह, बाइस अउ उनतीस तारीख के करे जाही।
समाचार-समय बदलाव
आकाशवाणी रईपुर ले प्रसारित होवइया हिंदी प्रादेसिक समाचार बुलेटिन के बेरा म अवइया सात अप्रैल ले फेरबदल करे जात हे। सात अप्रैल ले ए प्रादेसिक समाचार बुलेटिन संझा सात बजके पांच मिनट के जघा म संझा छै बजके पैंतालीस मिनट म सुने जा सकही।
बातों-बातों में
सुनइया मन ल बतादन कि प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत वन क्षेत्रों में आगजनी के कारण और उनकी रोकथाम म मुख्य वन संरक्षक सतर्कता वी.पी.सिंह ले लेगे भेंटवार्ता प्रसारित करे जाही। एखर प्रसारण आकाशवाणी केन्द्र रायपुर डहार ले काली छै अप्रैल के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
माओवादी मुठभेड़-समर्पण
दंतेवाड़ा अउ बीजापुर जिला के सीमावर्ती क्षेत्र के जंगल म आज सुरक्षाबल संग होय मुठभेड़ म एक माओवादी मारे गेहे। उहें, जवान मन ह ए मुठभेड़ म कई आने माओवादी के घायल होय के दावा करे हे। खबर के मुताबिक किरंदुल थाना क्षेत्र ले आज बिहनिया डीआरजी बस्तर फाइटर्स अउ सीआरपीएफ के संयुक्त टीम ह तलासी अभियान म निकले रिहीन। ए दउरान पुरंगेल, बड़े पल्ली, दोड़ीतुमनार अउ गंपुर के जंगल म माओवादी मन ह सुरक्षाबल उपर फायरिंग सुरू कर दीन। जवान मन कोति ले जवाबी कार्रवाई करे गीस। ए दउरान एक माओवादी मारे गीस। घटना के जघा ले माओवादी के सव के संग हथियार गोला बारूद अउ आने जिनिस बरामद करे गेहे।
ओति, सुकमा जिला म आज एक माओवादी दंपत्ति ह पुलिस अधीक्षक किरण चव्हाण के आगू आत्मसमर्पण कर दीन। एमा एक माओवादी मन उपर आठ लाख रूपिया के ईनाम घोसित रिहीस। आत्म समर्पित माओवादी दंपत्ति मन उपर जिला के कतकोन बड़े माओवादी घटना म सामिल रेहे के आरोप हवय।
ऐति, मोहला-मानपुर-अंबागढ़ चौकी जिला म सीतागांव थाना क्षेत्र के गांव पीटेमेटा म माओवादी मन ह पाछू रतिहा गांव के एक मनखे हत्या कर दीन हे। संगेसंग गांव म लगे टावर म घलो आगी लगा दीन।
एसीबी-गिरफ्तार
एंटी करप्शन ब्यूरो-एसीबी के टीम ह काली खैरागढ़-छुईखदान-गंडई जिला के लोक स्वास्थ्य यांत्रिकी विभाग के अनुविभागीय अधिकारी राजेश मडावे ल डेढ़ लाख रूपिया के रिस्वत ले रंगे हाथ गिरफ्तार करे हे। अनुविभागीय अधिकारी ह ठेकेदार प्रवीण कुमार तिवारी ले बिल भुगतान के नांव म डेढ़ लाख रूपिया के मांग करे रिहीस। ठेकेदार ह एखर सिकइत एसीबी ले करीस, एसीबी ह एखर बर ग्यारा सदस्य के टीम बनाके सहायक अभियंता ल उंखर कार्यालय म ही रिस्वत लेत पकड़िस।
ओति, सूरजपुर जिला म रामानुजनगर विकासखंड के तेलईमुड़ा के पटवारी रामगोपाल साहू ल एसीबी के टीम ह सूरजपुर स्टैट बैंक परिसर म तीन हजार रूपिया के रिस्वत लेत गिरफ्तार करीन हे। पटवारी ह नामांत्रण के नाव म गोविंदपुर निवासी सुनील सिंह ले पांच हजार रूपिया के मांग करे रिहीस।
मतदाता जागरूकता-01
लोकसभा चुनई म मतदाता मन ल जागरूक करे बर प्रदेस म स्वीप कारीकरम चलाय जात हे। काली राजधानी रईपुर के शासकीय विज्ञान महाविद्यालय म जागरूकता रैली निकाले गीस, अउ रंगोली प्रतियोगिता होइस। ए बेरा म छात्र-छात्रा मन ह लोगन ल सत-प्रतिसत मतदान करे बर प्रेरित करीन। उहें, कलेक्टर अउ जिला निर्वाचन अधिकारी डॉक्टर गौरव सिंह ह रईपुर के बाल गोपाल अस्पताल के कर्मचारी मन ल मतदान के सपथ देवाइन। ए दउरान छत्तीसगढ़ी गीत ‘‘लोकतंत्र के ताकत बर अपन वोट ल पहिचान साथ मिलके जम्मों झन करबो मतदान‘‘ ले मतदाता मन ल जागरूक करे गीस।
ऐति, गोबरा-नवापारा के महानदी, पैरी अउ सोंढूर नदिया के त्रिवेणी संगम म दीपदान के संग स्वीप कारीकरम राखे गीस। कारीकरम म अभनपुर के अनुविभागीय अधिकारी ह उहां मौजूद लोगन ल वोट डारे के महत्ता बतात मतदान करे के सपथ देवाइन।
जांजगीर-चांपा जिला के पीथमपुर मेला म यूनिसेफ के मदद ले हसदेव के हीरो वालेंटियर्स कोति ले नुक्कड़ नाटक देखाके लोगन ल वोट डारे बर जागरूक करे गीस। जिला निर्वाचन अधिकारी अउ कलेक्टर आकाश छिकारा के निरदेस म ‘‘कोसा कांसा कंचन वोट करेगा जनजन‘‘ थीम ले लोगन ल मतदान बर जागरूक करे जात हे। उहें, इहां सेल्फीजोन घलो बनाय गेहे।
अइसने गौरेला-पेण्ड्रा-मरवाही जिला म सत-प्रतिसत मतदान बर स्वीप कारीकरम चलाय जात हे।
नवरात्र-ट्रेन ठहराव
दक्षिण पूर्व मध्य रेलवे ह चैइत नवरात्रि परब म मां बम्लेश्वरी के दर्सन बर अवइया श्रध्दालु मनके भीड़ ल देखत डोंगरगढ़ म कुछेक एक्सप्रेस ट्रेन के अस्थाई ठहराव देहे। उहें, गोंदिया-दुरूग-गोंदिया मेमू पैसेंजर स्पेसल ट्रेन के रईपुर तक बढ़वार करे गेहे। संगेसंग आठ ले सत्रह अप्रैल तक रईपुर-डोंगरगढ़ मेमु पैसेंजर स्पेसल अउ गोंदिया-डोंगरगढ़ मेमु पैसेंजर स्पेसल ल फेर ले चलाय जाही।
उहें, बिलासपुर-भगत के कोठि, बिलासपुर-बीकानेर, बिलासपुर-चेन्नई, बिलासपुर-पुणे अउ रईपुर-सिकंदराबाद ट्रेन घलो डोंगरगढ़ म रूकही।