प्रदेस म लोकसभा चुनाव के दूसर चरण म राजनांदगांव, महासमुंद अउ कांकेर लोकसभा क्षेत्र मन म नामांकन के प्रक्रिया चलत हे। अब तक बीस अभ्यर्थी मनके इकतीस नामांकन मिले हे। एमा राजनांदगांव क्षेत्र ले आठ, महासमुंद ले चौदह अउ कांकेर ले नौ नामांकन सामिल हे। आज राजनांदगांव लोकसभा क्षेत्र ले कांग्रेस उम्मीदवार के रूप म पूर्व मुख्यमंत्री भूपेश बघेल अउ भाजपा उम्मीदवार के रूप म सांसद संतोष पांडेय ह कलेक्टोरेट परिसर पहुंच के नामांकन पत्र दाखिल करीन। उहें, महासमुंद लोकसभा सीट ले कांग्रेस उम्मीदवार ताम्रध्वज साहू ह घलो अपन नामांकन पत्र दाखिल करीन। अइसने, कांकेर लोकसभा क्षेत्र ले भाजपा उम्मीदवार भोजराज नाग ह नामांकन पत्र भरीन। ए मउका म भाजपा के वरिष्ठ नेता अउ मुख्यमंत्री विष्णुदेव साय घलो मौजूद रिहीन। दूसर चरण म नामांकन दाखिल करे के आखिरी तारीख चार अप्रैल हरय। पांच अप्रैल के नामांकन पत्र मनके जांच होही। अभ्यर्थी आठ अप्रैल तक अपन नाव वापस ले सकही। दूसर चरण म छब्बीस अप्रैल के मतदान होही।
खबर के मुताबिक पहिली चरण के तहत बस्तर लोकसभा क्षेत्र म नामांकन के प्रक्रिया पूरा हो चुके हे। नाम वापसी के बाद ए सीट ले ग्यारह उम्मीदवार चुनाव मैदान म हे। बस्तर लोकसभा क्षेत्र म उन्नीस अप्रैल के वोट डारे जाही। अइसने, तीसरा चरण म राज्य के सात लोकसभा क्षेत्र – रायपुर, दुर्ग, बिलासपुर, कोरबा, रायगढ़, सरगुजा अउ जांजगीर-चांपा बर निर्वाचन के अधिसूचना बारह अप्रैल के जारी करे जाही अउ एखरे संग नामांकन भरे के काम घलो सुरू हो जही। तीसरा चरण म सात मई के मतदान होही।
आचार संहिता कार्रवाई
प्रदेस म लोकसभा चुनाव बर आदर्श आचार संहिता के प्रभावी होय के बाद ले अब तक तीस करोड़ सैंतालीस लाख रूपिया के अवैध धन राशि अउ आने सामान जब्त करे गेहे। एमा नौ करोड़ ग्यारह लाख रूपिया के नगद राशि घलो सामिल हे। मुख्य निर्वाचन पदाधिकारी कार्यालय ले मिले जानकारी के अनुसार प्रवर्तन एजेंसी डहार ले निगरानी के दउरान चौबीस हजार लीटर सराब जब्त करे गेहे, जेखर कीमत छप्पन लाख रूपिया बताय गेहे। उहें, एक करोड़ साठ लाख रूपिया के नसीला पदार्थ घलो जब्त करे गेहे। एखर संगेसंग एक करोड़ चौसठ लाख रूपिया कीमत के चौबीस किलोग्राम आभूषण अउ सत्रह करोड़ रूपिया ले जादा के आने सामग्री बरामद करे गेहे।
माओवादी-मुठभेड़
बीजापुर जिला म आज सुरक्षा बल के संग होय मुठभेड़ म दस झिन माओवादी मारे गेहे, जिखर सव बरामद कर ले गेहे। बस्तर रेंज के पुलिस महानिरीक्षक सुंदरराज पी. ह घटना के पुष्टि करत बतईन कि गंगालूर थाना क्षेत्र म माओवादी मनके होय के सूचना मिले म केन्द्रीय रिजर्व पुलिस बल-सीआरपीएफ, कोबरा बटालियन, डिस्ट्रिक्ट रिजर्व गार्ड-डीआरजी अउ स्पेशल टॉस्क फोर्स-एसटीएफ के संयुक्त टीम ह तलाशी अभियान म निकले रिहीन। ए दउरान कोरचोली अउ लेंड्रा के जंगल म पहिली ले घात लगाके बइठे माओवादी मन ह सुरक्षा बल उपर फायरिंग सुरू कर दीस। जवान मन ह घलो जवाबी कार्रवाई करीन। ए मुठभेड़ म दस झिन माओवादी मारे गीस। घटनास्थल के तलासी के दउरान सुरक्षा बल मन ह मृत माओवादी के सव बरामद कर लेहे। उहें, मउका ले एक ठिन इंसास एल.एम.जी. अउ एके-फोर्टी सेवन राइफल संग बड़का मात्रा म हथियार अउ विस्फोटक सामान घलो बरामद करे गेहे।
हाईकोर्ट-सहायक शिक्षक नियुक्ति
छत्तीसगढ़ उच्च न्यायालय ह बीएड उत्तीर्ण सहायक शिक्षक मनके नियुक्ति ल निरस्त करे के आदेस देहे। हाईकोर्ट ह स्पष्ट करे हे कि प्राथमिक सिक्षक मन बर सिरिफ डी.एड. पास अभ्यर्थी ही मान्य होही। न्यायालय ह यहू निरदेस देहे कि बी.एड. उत्तीर्ण सहायक सिक्षक, जिखर ज्वाइनिंग हो चुके हे, उंखर नियुक्ति निरस्त करत छह सप्ताह म सिरिफ डी.एल.एड. पास अभ्यर्थी मनके नियुक्ति करे जाय। न्यायलय ह डी.एल.एड. अभ्यर्थी मन ल सामिल करत पुनरीक्षित चयन सूची बनाय के निरदेस घलो देहे।
भाजपा प्रवेश
आम आदमी पार्टी-आप के पूर्व प्रदेस अध्यक्ष कोमल हूपेंडी अपन समर्थक मन संग भाजपा म सामिल होगे हे। ओमन आज कांकेर म राखे गे कार्यक्रम म मुख्यमंत्री विष्णुदेव साय के आगू भाजपा के सदस्यता लीन। खबर के मुताबिक कोमल हूपेंडी ह पाछु विधानसभा चुनाव म आप उम्मीदवार के रूप म भानुप्रतापपुर ले चुनाव लड़े रिहीन।
मतदाता जागरूकता-01
लोकसभा चुनाव के दउरान मतदाता मन ल जागरूक करे बर प्रदेसभर म आने-आने कार्यक्रम आयोजित करे जात हे। अइसने, आज रायपुर कलेक्टर अउ जिला निर्वाचन अधिकारी डॉक्टर गौरव सिंह के नेतृत्व म बाईक रैली निकाले गीस। बाईक रैली ल छत्तीसगढ़ लोक आयोग के प्रमुख लोक आयुक्त जस्टिस टी.पी. शर्मा ह झंडा दिखाके रवाना करीन। ए रैली कलेक्ट्रेट परिसर ले सुरू होइस, जउन ह आने-आने रद्दा ले होवत अनुपम गार्डन पहुंचीस। ए मउका म कलेक्टर ह मतदाता मन ले जादा ले जादा संख्या म मतदान करे के संगेसंग तीर-तखार के लोगन अउ अपन परिजन ल मतदान करे बर प्रेरित करे के अपील करीन। बाइक रैली म सामिल लोगन ल मतदाता जागरूकता के शपथ दिलाय गीस। एखर संगेसंग नुक्कड़ नाटक के घलो आयोजन करे गीस।
उहें, मुंगेली जिला के खेढ़ा, चिरौंटी, बोधापारा, झाफल संग आने-आने गांव म स्वीप कार्यक्रम म लोगन ल सत-प्रतिशत मतदान करे बर प्रेरित करे गीस। ए दउरान ग्राम खेढ़ा म स्कूली लइका मन डहार ले मतदाता जागरूकता रैली निकाले गीस। उहें, चिरौंटी अउ पण्डरभट्ठा गांव म पंचायत स्तरीय स्वीप समिति अउ महिला समूह के सदस्य डहार ले घर-घर जाके लोगन ल मतदान बर जागरूक करे गीस। अइसने, ग्राफ झाफल म मेंहदी प्रतियोगिता के माध्यम ले मतदाता जागरूकता अभियान चलाय गीस।
इही जिला के दुल्लापुर-सोनपुरी अउ भीमपुरी गांव म मनरेगा कार्यस्थल म काम करइया श्रमिक मन ल मतदान करे बर जागरूक करे गीस। संगेसंग ओमन ल सपथ दिलाय गीस।
मतदाता जागरूकता-02
राजनांदगांव जिला के ग्राम सुरगी म कृषि अउ सहकारिता विभाग डहार ले स्वीप संगोष्ठी के आयोजन करे गीस। एमा बड़का संख्या म किसान मन घलो सामिल होइस। संगोष्ठी म किसान मन ल मतदान के महत्व बताय गीस अउ उंखर ले अपन परिवार, रिश्तेदार अउ पड़ोसी मन ल मतदान करे बर प्रेरित करे बर अपील करे गीस।
उहें, बिलासपुर जिला म लाखासार, कोटा, जांजी, लोखंडी, बहतराई अउ जूनापारा हायर सेकेंडरी स्कूल मन म विद्यार्थी मन ह मतदाता जागरूकता रैली निकाल के लोगन ल मतदान करे बर प्रेरित करीन। ए दउरान मतदाता जागरूकता बर रंगोली, मेंहदी अउ चित्रकला प्रतियोगिता घलो आयोजित करे गीस।
दुर्घटना
खैरागढ़-छुईखदान-गंडई जिला म बढ़ईटोला के तीर मोटर साइकिल के दुर्घटनाग्रस्त होय के सेती दू झिन छात्रा के मउत होगे। ए छात्रा मन एक झिन युवक के संग मोटर साइकिल म सवार होके परीक्षा दे बर खैरागढ़ जात रिहीस। तभे छात्रा के दुपट्टा चक्का म फंस गे, जेखर ले मोटर साइकिल अनियंत्रित होके दुर्घटनाग्रस्त होगे। ए हादसा म घायल युवक अउ एक झिन आने छात्रा के इलाज अस्पताल म चलत हे।
अउ अब थोरकुन समाचार सार म –
– भाजपा के वरिष्ठ नेता अउ स्टेसन रोड गुरूद्वारा के पूर्व अध्यक्ष दिलीप सिंह होरा के आज निधन होगे। मुख्यमंत्री विष्णुदेव साय ह उंखर निधन म सोक जताय हे।
– मोहला-मानपुर जिला पुलिस ह सर्व आदिवासी समाज के प्रदेस उपाध्यक्ष सुरजू टेकाम ल बिलासपुर स्थित एन.आई.ए. कोर्ट म पेस करीस, जिहां ले ओला जेल भेज दे गेहे। पुलिस ह छापा म उंखर घर ले बारूद, डेटोनेटर, बैटरी, वायर, माओवादी साहित्य अउ अन्य सामान बरामद करे हे।
– सक्ती जिला के हरदीगांव के एक झिन माईलोगिन के बैंक खाता खोलके करीबन पौने दू करोड़ रूपिया के धोखाधड़ी करे के मामला म तीन आरोपी के खिलाफ पुलिस ह अपराध पंजीबद्ध करे हे।
अउ
– सक्ती जिला के सकरेली रेलवे समपार फाटक बंद करे के निर्णय ल रेलवे प्रशासन ह गांव वाले मनके मांग उपर स्थगित कर देहे। फिलहाल ए फाटक ले अवई-जवई जारी रइही।