जगदलपुर अब इंडिगो विमानसेवा के नियमित उड़ान ले जुड़ गेहे। ए विमान हैदराबाद ले जगदलपुर अउ जगदलपुर ले रायपुर बर उड़ान भरही। आज पहलइया दिन इंडिगो विमान के हैदराबाद ले जगदलपुर स्थित मां दंतेश्वरी विमानतल पहुंचे उपर वाटर कैनल ले जोरदार सुवागत करे गीस। पहलइया दिन विमान म हैदराबाद ले सत्तर यात्री जगदलपुर पहुंचिन अउ जगदलपुर ले तिहत्तर झन यात्री मन रायपुर बर उड़ान भरीन।
बतादन कि इंडिगो के ये फ्लाइट सप्ताह म चार दिन सोमवार, मंगलवार, गुरूवार अउ शुक्रवार के निर्धारित समय म रायपुर बर उड़ान भरही अउ बांकी तीन दिन रविवार, बुधवार अउ शनिवार के जगदलपुर ले हैदराबाद बर रवाना होही।
मतदाता जागरूकता कार्यक्रम
प्रदेस म लोकसभा चुनाव के तहत मतदाता जागरूकता अभियान चलाके लोगन मन ल वोट डारे बर प्रेरित करे जात हे। इही कड़ी म राजनांदगांव जिला म स्वीप संगोष्ठी आयोजित करे गीस, जेमा लोगन मन ल मतदान के महत्व के बारे म बताय गीस अउ उनला बिना डर अउ भय के लोकतंत्र के पर्व म भागीदारी सुनिश्चित करे बर प्रेरित करे गीस। एखरे संग राजनांदगांव विकासखंड के ग्राम भेड़िकला, बघेरा अउ कलडबरी म घलो मतदाता जागरूकता अभियान चलाय गीस। कारीकरम म सबो झन ल मतदान करे के सपथ दिलाय गीस।
ओति, सक्ति जिला म अलग-अलग रासन दुकान मन म अनिवार्य मतदान संबंधित बैनर लगाके लोगन मन ल वोट डारे बर प्रेरित करे गीस।
उहें, जांजगीर-चांपा जिला म जिला पंचायत डहार ले आयोजित मतदाता जागरूकता कारीकरम म मुख्य कार्यपालन अधिकारी गोकुल कुमार रावटे ह महात्मा गांधी राष्ट्रीय ग्रामीण रोजगार गारंटी योजना के तहत चलत काम के दौरान वोट डलइया मन ल सपथ दिलाइन। अइसने ग्राम पंचायत बुड़गहन म मनरेगा के श्रमिक मन ल मतदाता जागरूकता अभियान के तहत मतदान करे के सपथ दिलाय गीस।
इही जिला के पीथमपुर म आयोजित मेला म काली एक अप्रैल के मतदाता जागरूकता कारीकरम चलाय जाही। मेला म सेल्फी प्वाइंट बनाके लोगन मन ल मतदान म उंखर सहभागिता सुनिश्चित करे बर जागरूक करे जाही।
इही बीच, रायपुर के जिला निर्वाचन अधिकारी डॉक्टर गौरव सिंह ह कालीबाड़ी स्थित जे.आर.दानी स्कूल म संकुल समन्वयक मनके बइठका लीन अउ उनला अनिवार्य मतदान के सपथ दिलाइन।
मतदाता जागरूकता कार्यक्रम-02
उहें, रायपुर के तेलीबांधा स्थित मरीन ड्राइव म मतदाता जागरूकता कारीकरम के आयोजन करे गीस। ए कारीकरम म सैकड़ों नागरिक सामिल होइन, जेन ल उप जिला निर्वाचन अधिकारी उमाशंकर बंदे ह मतदाता जागरूकता के सपथ दिलाइन।
ओति, मुंगेली जिला के दाउपारा स्थित स्वामी आत्मानंद शासकीय उत्कृष्ट अंग्रेजी माध्यम स्कूल के विद्यार्थी मन ह स्वीप कार्यक्रम के तहत मतदाता जागरूकता रैली निकालिन। जिला निर्वाचन अधिकारी ह ए रैली ल हरा झंडा दिखाके रवाना करीन। रैली म मतदाता जागरूकता संबंधी स्लोगन के संग तख्ती लेके आस-पास के लोगन मन ल लोकसभा चुनाव म सत-प्रतिसत मतदान बर प्रेरित करे गीस। कारीकरम म कलेक्टर ह अस्सी बछर ले जादा उमर के वरिष्ठा नागरिक, दिव्यांग जन अउ उभयलिंगी समुदाय के लोगन मन ल सम्मानित करीन।
लोकसभा चुनाव-नामांकन
लोकसभा चुनाव के दूसरइया चरण के चलत छत्तीसगढ़ के तीन ठन लोकसभा क्षेत्र कांकेर, राजनांदगांव अउ महासमुंद म नामांकन के प्रक्रिया जारी हे। कांकेर लोकसभा क्षेत्र बर आंबेडकराइट पार्टी ऑफ इंडिया के अभ्यर्थी सोनसिंह ह अपन नामांकन दाखिल करीन। अभ्यर्थी अपन नामांकन पत्र सार्वजनिक अवकाश दिवस ल छोड़के कार्यालयीन दिवस म बिहनिया 11 बजे ले मंझनिया 3 बजे तक जमा कर सकत हे। नामांकन दाखिल करे के आखिरी तारीख 4 अप्रैल आय। 5 अप्रैल के नामांकन पत्र के जांच करे जाही। उम्मीदवार 8 अप्रैल तक अपन नाव वापस ले सकही। दूसरइया चरण म 26 अप्रैल के मतदान होही।
उहें, लोकसभा चुनाव के पहलइया चरण के चलत बस्तर लोकसभा क्षेत्र म 11 झन अभ्यर्थी चुनाव मैदान म हे। ए सीट बर 19 अप्रैल के वोट डारे जाही।
लालकृष्ण अडवाणी-भारत रत्न
राष्ट्रपति द्रौपदी मुर्मू ह भारतीय जनता पार्टी के संस्थापक सदस्य अउ पूर्व उप प्रधानमंत्री लालकृष्ण आडवाणी ल सर्वोच्च नागरिक सम्मान ‘‘भारत रत्न‘‘ ले सम्मानित करीन। ए मउका म प्रधानमंत्री नरेंद्र मोदी, उप राष्ट्रपति जगदीप धनखड़ अउ पूर्व उप राष्ट्रपति एम. वेकैया नायडू उपस्थित रिहीन।
श्री अडवाणी ल भारत रत्न ले सम्मानित करे जाय उपर प्रदेस के मुख्यमंत्री विष्णुदेव साय ह उनला बधाई अउ सुभकामना दीन।
ईस्टर
ईसाई समाज के ईस्टर पर्व ल आज पूरा दुनिया म हर्षोल्लास के संग मनाय जात हे। मान्यता के अनुसार सलीब म चढ़ाय जाय के बाद प्रभु ईसा मसीह ह आजे के दिन पुनर्जीवित होय रिहीन। ए अवसर म राज्य के सब्बों गिरिजाघर म बिहनिया ले श्रध्दालु मनके भीड़ लगे रिहीस। इंहा बिसेस प्रार्थना सभा आयोजित करे गीस।
राष्ट्रपति द्रौपदी मुर्मू, उप राष्ट्रपति जगदीप धनखड़ अउ प्रधानमंत्री नरेंद्र मोदी ह ईस्टर म लोगन मन ल बधाई अउ सुभकामना दीन।
भाजपा-चुनाव समिति
भारतीय जनता पार्टी के राष्ट्रीय अध्यक्ष जगत प्रकाश नड्डा ह लोकसभा चुनाव बर रक्षा मंत्री राजनाथ सिंह के अध्यक्षता म चुनाव घोषणा समिति के गठन करे हे। ए समिति म अध्यक्ष समेत कुल 27 सदस्य हे। केंद्रीय मंत्री निर्मला सीतारमण ल चुनाव घोषणा समिति के संयोजक अउ पीयूष गोयल ल सह-संयोजक बनाय गेहे। उहें, छत्तीसगढ़ के मुख्यमंत्री विष्णुदेव साय ल चुनाव घोसना समिति के सदस्य बनाय गेहे।
‘‘वन स्टेशन वन प्रोडक्ट‘‘
स्थानीय उत्पाद मन ल देसभर म लोकप्रिय बनाय के उद्देश्य ले रेलवे स्टेसन मन म ‘वन स्टेशन वन प्रोडक्ट‘ स्टॉल स्थापित करे गेहे। एखर तहत बिलासपुर सहित मंडल के कोरबा, जांजगीर-नैला, अकलतरा, चांपा-रायगढ़ अउ ब्रजराज नगर रेलवे स्टेसन मनके प्लेटफॉर्म म स्थानीय उत्पाद के बिक्री बर सत्रह ठन स्टॉल मनके सुविधा रेलवे प्रशासन डहार ले उपलब्ध कराय गेहे। एखर ले स्थानीय उत्पाद मन ल पहिचान मिले के संगेसंग कारीगर अउ हस्तशिल्पकार मन ल रोजगार घलो मिलत हे।
माओवादी-आगजनी
नारायणपुर जिला म माओवादी मन ह लौह अयस्क ले भरे चार ठन ट्रक म आग लगा दीन। मिले जानकारी के अनुसार पाछू रतिहा छोटेडोंगर थाना क्षेत्र के मुख्य मार्ग म तीस ले पैंतीस के संख्या म माओवादी मन पहुंचिन अउ उंहा अपन काम म लगे चार ठन ट्रक ल आग के हवाले कर दीन।
भाजपा-प्रवेश
प्रदेस म लोकसभा चुनाव के तहत राजनीतिक दल मनके गतिविधि तेज होगे हे। इही बीच, वरिष्ठ नेता मनके भाजपा म प्रवेस घलो जारी हे। जांजगीर-चांपा के पामगढ़ म आयोजित भाजपा के सम्मेलन म पूर्व जनपद अध्यक्ष समेत कांग्रेस के कई झन कार्यकर्ता भाजपा म सामिल होइन। ए अवसर म आरंग विधायक खुशवंत साहेब, भाजपा जिलाध्यक्ष गुलाब सिंह चंदेल अउ कई झन भाजपा पदाधिकारी मौजूद रिहीन।
उहें, बहुजन समाज पार्टी के केंद्रीय समन्वयक नर्मदा प्रसाद अहिरवार जांजगीर पहुंचिन। ए दौरान पत्रकार मनले चर्चा करत हुए श्री अहिरवार ह किहीन कि देस म लोगन मनके सुरक्षा के गारंटी होना चाही। संगेसंग महंगाई अउ भ्रष्टाचार उपर घलो नियंत्रण होना चाही।
विश्व क्रॉस कंट्री चैंपियनशिप
विश्व क्रॉस कंट्री प्रतियोगिता के आयोजन बेलग्रेड, सर्बिया म तीस मार्च ले करे जात हे। ए प्रतियोगिता म भारतीय टीम डहार ले खेले बर दक्षिण पूर्व मध्य रेलवे के खिलाड़ी हेमराज गुर्जर के चयन करे गेहे। हेमराज गुर्जर के ए उपलब्धि बर दक्षिण पूर्व मध्य रेलवे के महाप्रबंधक अउ अधिकारी मन ह उनला अपन बधाई अउ सुभकामना देहे।