लोकसभा चुनाव के दूसरइया चरण के तहत प्रदेस के राजनांगांव, कांकेर अउ महासमुंद सीट बर आज संबंधित जिला के निर्वाचन अधिकारी डहार ले अधिसूचना जारी कर दे गेहे। एखरे संग नामांकन के प्रक्रिया घलो सुरू हो गेहे। नामांकन दाखिल करे के आखिरी तारीख चार अप्रैल आय। पांच अप्रैल के नामांकन पत्र मनके जांच करे जाही। उम्मीदवार आठ अप्रैल तक अपन नाम वापिस ले सकहीं। दूसरइया चरण म छब्बीस अप्रैल के मतदान होही।
कांकेर लोकसभा क्षेत्र के निर्वाचन अधिकारी अभिजीत सिंह ह बतईन कि ए लोकसभा सीट के अंतर्गत सिहावा, संजारी-बालोद, डौंडीलोहारा, गुंडरदेही, अंतागढ़, भानुप्रतापपुर, कांकेर अउ केशकाल समेत आठ विधानसभा क्षेत्र आथे। उंहे, राजनांदगांव लोकसभा क्षेत्र के निर्वाचन अधिकारी संजय अग्रवाल ह बतईन के ए क्षेत्र के अंतर्गत पंडरिया, कवर्धा, खैरागढ़, डोंगरगढ़, राजनांदगांव, डोंगरगांव, खुज्जी अउ मोहला-मानपुर समेत आठ विधानसभा क्षेत्र सामिल हवय। ओमन बतईन कि पंडरिया, कवर्धा, खैरागढ़, डोंगरगढ़, राजनांदगांव, डोंगरगांव अउ खुज्जी म बिहनिया सात बजे से संझा छह बजे तक वोटिंग होही। अइसने, मोहला-मानपुर विधानसभा क्षेत्र म बिहनिया सात बजे ले मंझनिया तीन बजे तक वोट डाले जाही। महासमुंद लोकसभा क्षेत्र के निर्वाचन अधिकारी प्रभात मलिक ह बतईन कि ए क्षेत्र के अंतर्गत सरायपाली, बसना, खल्लारी, महासमुंद, राजिम, बिंद्रानवागढ़, कुरूद अउ धमतरी समेत आठ विधानसभा क्षेत्र सामिल हवय।
बस्तर लोकसभा क्षेत्र म आज नामांकन पत्र मनके जांच म बारह नामांकन पत्र म ले एक ठिन नामांकन पत्र रद्द करे गीस। उहें, ग्यारह नामांकन वैध पाय गेहे। उम्मीदवार तीस मार्च तक नाम वापस ले सकही। ए सीट बर उन्नीस अप्रैल के वोट डाले जाही।
पंजीयन कार्यालय
प्रदेस म जमीन अउ आने-आने अचल संपत्ति के पंजीयन के काम उनतीस ले इकतीस मार्च तक सरकारी छुट्टी के दउरान घलो करे जाही। खबर के मुताबिक ए बेरा राज्य के जम्मों पंजीयन दफ्तर म कम्प्यूटर आधारित एन.जी.डी.आर.एस. प्रणाली ले पंजीयन के काम करे जावत हे। चालू वित्त बछर के दउरान ए महीना के उनतीस ले इकतीस तारीख तक सरकारी छुट्टी रइही। फेर, अचल संपत्ति के खरीदी-बिक्री ले जुड़े पंजीयन बर पक्षकार मन ल असुविधा ले बचाय बर राज्य के जम्मों पंजीयन आफिस ए तीन दिन म घलो खुल्ला रइही। संगेसंग पंजीयन ले जुड़े दस्तावेज तैयार करइया ई-स्टाम्प काउंटर घलो ए दउरान सामान्य दिन असन सेवा उपलब्ध कराय बर खुले रइही।
मतदाता जागरूकता
छत्तीसगढ़ म लोकसभा चुनाव ल देखत मतदाता मन ल जागरूक करे बर आने-आने कार्यक्रम के आयोजन करे जावत हे। इही कड़ी म रईपुर जिला के तिल्दा स्थित सामुदायिक स्वास्थ्य केन्द्र म बाह्य रोगी विभाग-ओपीडी के रसीद म लगइया सील म मतदाता जागरूकता के संदेस लिखे गेहे। अइसने सामान्य इलाज बर अवइया मरीज मन ल देवइया रसीद के माध्यम ले लोगन मन ल वोट डाले के अपील करे गेहे।
उहें, बेमेतरा म जिला प्रसासन डहार ले राखे गे मतदाता जागरूकता कार्यक्रम ल गोल्डन बुक ऑफ वर्ल्ड रिकॉर्ड म सामिल करे गेहे। ए बारे म जिला निर्वाचन अधिकारी रणबीर शर्मा ह बतईन कि जिला मुख्यालय के कृषि उपज मंडी परिसर के संगेसंग साजा, नवागढ़ अउ बेरला म जागरूकता कार्यक्रम के आयोजन करे गीस। ए कार्यक्रम म एके बखत म एक लाख ले जादा माईलोगिन मन ह मतदान करे के सपथ लीन।
अइसने, सक्ती जिला म घलो राष्ट्रीय ग्रामीण आजीविका मिशन के कार्यकर्ता मन ह स्थानीय लोगन मन ल मतदान के प्रति जागरूक करीन। ए बारे म सक्ती जिला निर्वाचन अधिकारी अमृत विकास तोपनो अउ परियोजना निदेशक बी.पी. भारद्वाज ह जिला के मतदाता मन ल अपन मताधिकार के प्रयोग जरूर करे के अपील करीन। निर्वाचन आययोग डहार ले चलाय जात स्वीप अभियान के तहत अइसने जागरूकता कार्यक्रम बासीन अउ नगरदा समेत आने-आने ग्राम पंचायत म घलो करे गीस। एमा बिसेस रूप ले माईलोगिन मतदाता मन ल अपन वोट डारे बर प्रोत्साहित करे गीस।
राष्ट्रीय सांख्यिकीय कार्यालय
राष्ट्रीय सांख्यिकीय कार्यालय के क्षेत्रीय कार्यालय डहार ले आज रईपुर म प्रशिक्षण शिविर के आयोजन करे गीस। एखर तहत हर बछर वार्षिक उद्योग सर्वेक्षण के काम करे जात हे। एमा चुने गे औद्योगिक इकाई मन डहार ले निर्धारित विवरणी भरके आने-आने जानकारी प्रस्तुत करे जाथे। सिविर म सामिल अधिकारी मन ल उद्योग सर्वेक्षण के महत्व अउ उंखर कार्यप्रणाली के बारे म विस्तार ले जानकारी दे गीस। कार्यक्रम के पगरइति राष्ट्रीय सांख्यिकीय कार्यालय के उपमहानिदेशक अल्ताफ हुसैन हाजी ह करीन। ओमन औद्योगिक इकाई ले आह्वान करीन कि ओमन सर्वेक्षण प्रक्रिया ल समझे बर अपन संस्थान ले जुड़े जानकारी सांख्यिकी कार्यालय के पोर्टल म खुदे दर्ज करे के परयास करयं।
एमओयू
रईपुर के भारतीय प्रबंध संस्थान ह डिजिटल हेल्थ एसोसिएट्स के संग एक ठन समझौता करे हे। एखर तहत प्रधानमंत्री जन-आरोग्य योजना अउ आयुष्मान भारत अभियान समेत आने-आने स्वास्थ्य कार्यक्रम के समीक्षा करे जाही। संगेसंग ए योजना के लागू होय ले हितग्राही मन ल मिलइया लाभ के मूल्यांकन घलो करे जाही।
नीट परीक्षा-कोचिंग
सरगुजा म जिला प्रशासन ह नीट परीक्षा के अभ्यर्थी मनके तैयारी बर निःसुल्क आवासीय कोचिंग सुरू करे हे। कलेक्टर विलास भोस्कर ह बतईन कि ए कोचिंग म बारहवीं पढ़इया छात्र-छात्रा मन ल सामिल करे गेहे। कलेक्टर ह आज पुलिस लाइन स्थित शासकीय उच्चतर माध्यमिक विद्यालय म पहुंच के ए कोचिंग म सामिल होवइया लइका मन ल सुभकामना दीन। ए कोचिंग म अब तक एक सौ बत्तीस विद्यार्थी मन ह पंजीयन कराय हे। कलेक्टर ह बतईन कि विद्यार्थी मन ल हॉस्टल ले कोचिंग स्थल तक लाने-लेगे बर निःशुल्क बस के व्यवस्था घलो करे गेहे।
आश्रम-छात्रावास
बिलासपुर जिला म आदिम जाति अउ अनुसूचित जाति विकास विभाग डहार ले जम्मों आश्रम छात्रावास मनके सीसीटीवी ले निगरानी करे जाही। ए बारे म कलेक्टर अवनीश शरण ह अधिकारी मन ल निरदेस जारी करे हे। आज कलेक्टोरेट परिसर म होय छात्रावास अधीक्षक मनके बइठका म कलेक्टर ह किहीन कि छात्रावास म रहइया लइका मन ल घर जइसे वातावरण देवाय जाना चाहिए। एखर बर आने-आने तहसील के एसडीएम मन ल बेरा-बेरा म छात्रावास के निरीक्षण करे बर घलो केहे गेहे।
रेलवे स्टेशन-आगजनी
रईपुर रेलवे स्टेसन के प्लेटफॉर्म नंबर-सात के दू दुकान म पाछु रतिहा आग लग गे। ए घटना म मिल्क पार्लर अउ ओखर बाजू के कैंटीन पूरा जलके राख होगे। रेलवे पुलिस अउ स्थानीय कर्मचारी मनके मदद ले आगी ल बुझाय के प्रयास करे गीस। ए घटना म कोनों मनखे ल नुकसान नइ पहुंचे हे। शॉर्ट सर्किट होय के सेती ए घटना होय के कारण बताय जावत हे।
वन विभाग-कार्रवाई
बलौदाबाजार-भाटापारा जिला के बारनवापारा अभ्यारण्य म वन विभाग के अधिकारी मन ह बाघ के सिकार करे के मामला म एक झिन आरोपी ल गिरफ्तार करे हे। वन विभाग के दल ह आरोपी के तीर ले पांच गोला बम, पैंगोलिंन के छाल, अउ जंगली सुअर के दांत के संगेसंग आने-आने दुर्लभ प्रणाली के खाल बरामद करे हे। आरोपी के खिलाफ मामला दर्ज करके वन विभाग ह जांच सुरू कर देहे।
अउ अब थोरकुन समाचार सार म –
– प्रदेस म हिन्दी अउ अंग्रेजी शीघ्रलेखन के परीक्षा इकतीस मार्च के होही। उहें, हिन्दी अउ अंग्रेजी मुद्रलेखन के परीक्षा सात अप्रैल के ले जाही। लोक शिक्षण संचालनालय के मुताबिक परीक्षा कार्यक्रम के पूरा जानकारी वेबसाइट म हवय।
– दुरूग म रेलवे पुलिस ह पुरी-अहमदाबाद एक्सप्रेस के बोगी म तलासी बेरा एक यात्री के बैग ले करीबन छह लाख रूपिया के अवैध गांजा जब्त करे हे। पुलिस के मुताबिक आरोपी ह पान मसाला के झोला म गांजा लुका के राखे रिहीस।
– मुंगेली पुलिस ह चोरी अउ लूट के वारदात ल अंजाम देवइया अंतर्राज्यीय गिरोह के तीन झिन सदस्य मन ल गिरफ्तार करे हे। इंखर तीर ले करीबन एक लाख अठहत्तर हजार रूपिया नगद घलो बरामद करे गेहे।