प्रदेस म लोकसभा चुनाव के पहिली चरण म बस्तर लोकसभा क्षेत्र म नामांकन जमा करे के आखिरी दिन आज आठ लोगन ह अपन नामांकन दाखिल करीन। एमा कांग्रेस प्रत्याशी कवासी लखमा अउ भाजपा प्रत्याशी महेश कश्यप प्रमुख हे। ए सीट बर कुल बारह उम्मीदवार मन ह अपन नामांकन दाखिल करे हे। श्री लखमा के नामांकन के दउरान पूर्व मुख्यमंत्री भूपेश बघेल, प्रदेस कांग्रेस अध्यक्ष दीपक बैज संग वरिष्ठ कांग्रेस नेता मौजूद रिहीन। उहें, भाजपा प्रत्याशी श्री कश्यप के नामांकन दाखिल करे के दउरान मुख्यमंत्री विष्णुदेव साय अउ प्रदेस भाजपा अध्यक्ष किरण सिंह देव संग वरिष्ठ मंत्री अउ पार्टी पदाधिकारी उपस्थित रिहीन। काली अट्ठाईस मार्च के नामांकन पत्र मनके जांच होही। उम्मीदवार तीस मार्च तक अपन नाव वापस ले सकही। ए सीट बर उन्नीस अप्रैल के वोट डारे जाही।
उहें, दूसर चरण म प्रदेस के तीन लोकसभा सीट – राजनांदगांव, कांकेर अउ महासमुंद बर काली अट्ठाईस मार्च के अधिसूचना जारी करे जाही। एखरे संग नामांकन पत्र दाखिल करे के सिलसिला सुरू हो जही। नामांकन दाखिल करे के आखिरी तारीख चार अप्रैल हरय। पांच अप्रैल के नामांकन पत्र के जांच करे जाही। उम्मीदवार आठ अप्रैल तक अपन नाम वापस ले सकही। दूसर चरण म छब्बीस अप्रैल के मतदान होही।
इही बीच, राज्य निर्वाचन आयोग ह लोकसभा चुनाव म मतदाता मन ल मतदान बर दू घंटा के ज्यादा बेरा देके घोसना करे हे। मैदान क्षेत्र म मतदान बिहनिया आठ बजे के सेती सात बजे सुरू होही अउ संझा पांच बजे के जघा म छह बजे तक चलही। उहें, माओवाद प्रभावित क्षेत्र म मतदान के बेरा म कोई बदलाव नइ करे गेहे। इहां तय समय के अनुसार बिहनिया सात बजे ले मंझनिया तीन बजे तक ही मतदान होही।
भाजपा-प्रवेश
जगदलपुर के महापौर सफीरा साहू संग कतकोन लोगन आज मुख्यमंत्री विष्णुदेव साय अउ प्रदेस सह प्रभारी नितिन नबीन के उपस्थिति म भाजपा म सामिल होगे हे। ए मउका म प्रदेस भाजपा अध्यक्ष किरण सिंह देव, उप मुख्यमंत्री अरूण साव अउ विजय शर्मा, मंत्री रामविचार नेताम, केदार कश्यप अउ अजय चंद्राकर मौजूद रिहीन।
लखमा-भाजपा सीईओ ज्ञापन
भारतीय जनता पार्टी के प्रदेस इकाई ह आज बस्तर लोकसभा क्षेत्र ले कांग्रेस प्रत्याशी कवासी लखमा डहार ले मतदाता मन ल पइसा बांटे अउ आदर्श आचार संहिता के उल्लंघन के सिकायत मुख्य निर्वाचन पदाधिकारी, रीना बाबा साहेब कंगाले ले करे हे। रायपुर सांसद सुनील सोनी के नेतृत्व म भाजपा के प्रतिनिधिमंडल ह ए संबंध म श्रीमती कंगाले ल एक ठिन ज्ञापन घलो सौंपे हे। ज्ञापन म आरोप लगाय गेहे कि कांग्रेस प्रत्याशी कवासी लखमा ह बीते चौबीस मार्च के जगलदपुर के दंतेश्वरी मंदिर के आगु होलिका दहन कार्यक्रम के दउरान अपन आने सहयोगी के संग लोगन ल पइसा बांटीन। ए मामला म कवासी लखमा के खिलाफ जगदलपुर थाना म एफ.आई.आर. घलो दर्ज करे गेहे।
कांग्रेस-उम्मीदवार
कांग्रेस ह छत्तीसगढ़ के बाकी बाचे चार लोकसभा सीट बर काली संझा अपन उम्मीदवार मनके नाव के घोसना करीन। एमा बिलासपुर लोकसभा क्षेत्र ले देवेन्द्र सिंह यादव, सरगुजा ले शशि सिंह, रायगढ़ ले मेनका देवी सिंह अउ कांकेर लोकसभा क्षेत्र ले बीरेश ठाकुर सामिल हे। कांग्रेस ह पहिली ही सात लोकसभा क्षेत्र बर अपन उम्मीदवार के घोसना कर चुके हे। उहें, भारतीय जनता पार्टी ह छत्तीसगढ़ के सबो ग्यारह लोकसभा क्षेत्र बर अपन उम्मीदवार के घोसना पहिली ले कर चुके हे।
माओवादी-मुठभेड़
बीजापुर जिला म आज सुरक्षा बल अउ माओवादी मनके बीच होय मुठभेड़ म दू झिन माईलोगिन समेत छह झिन माओवादी मारे गेहे। मारे गे सबो माओवादी के सव बरामद कर ले गेहे।
जिला के पुलिस अधीक्षक जितेन्द्र कुमार यादव ह बतईन कि कोरबा बटालियन सीआरपीएफ अउ डीआरजी के संयुक्त टीम ह बासागुड़ा थाना क्षेत्र ले तलाशी अभियान म निकले रिहीस। ए दउरान चिपुरभट्टी इलाका म तालपेरू नदी के तीर पहिली ले घात लगाय बइठे माओवादी मन ह प्लाटून नंबर दस के सदस्य मन ह सुरक्षा बल उपर फायरिंग सुरू कर दीस। जवान मन डहार ले करे गे जवाबी कार्रवाई म छह माओवादी मारे गीस। श्री यादव ह बतईन कि मारे गे माओवादी म ले चार झिन के पहिचान कर ले गेहे। एमा डिप्टी कमांडर नागेश अउ उंखर पत्नी सोनी के संग सदस्य गंगी अउ आयतू सामिल हे। घटनास्थल के तलासी के दउरान भारी मात्रा म हथियार, गोलाबारूद अउ दैनिक उपयोग के सामग्री जब्त करे गेहे। क्षेत्र म सर्चिंग अभियान जारी हे।
भाजपा-स्टार प्रचारक
भारतीय जनता पार्टी ह छत्तीसगढ़ म लोकसभा चुनाव बर चालीस स्टार प्रचारक मनके सूची जारी कर देहे। स्टार प्रचारक म प्रधानमंत्री नरेन्द्र मोदी, राष्ट्रीय अध्यक्ष जगत प्रकश नड्डा, रक्षामंत्री राजनाथ सिंह, गृह मंत्री अमित शाह अउ परिवहन मंत्री नितिन गडकरी सामिल हे। एखर संग केन्द्रीय मंत्री स्मृति ईरानी, धर्मेन्द्र प्रधान, अर्जुन मुंडा, ज्योतिरादित्य सिंधिंया घलो छत्तीसगढ़ म प्रचार करही। उहें, उत्तरप्रदेश के मुख्यमंत्री योगी आदित्यनाथ, असम के मुख्यमंत्री हेमंत बिस्वा शर्मा, मध्यप्रदेश के मुख्यमंत्री मोहन यादव, फग्गन सिंह कुलस्ते, शिवराज सिंह चौहान, नितिन नबीन, सतपाल महाराज, मनोज तिवारी, हेमा मालिनी, नवल किशोर यादव अउ बाबूलाल मंराडी घलो छत्तीसगढ़ म भाजपा प्रत्याशी के पक्ष म प्रचार करही।
संगेसंग प्रदेस म मुख्यमंत्री विष्णुदेव साय, प्रदेस भाजपा अध्यक्ष किरण सिंह देव, उप मुख्यमंत्री अरूण साव अउ विजय शर्मा, अजय जामवाल, पवन साय, लता उसेंडी, रामविचार नेताम, केदार कश्यप, ओपी चौधरी, धरमलाल कौशिक, विक्रम उसेंडी, मोहन मंडावी, शिवरतन शर्मा, अजय चंद्राकर, दिनेश कश्यप, महेश गागड़ा, मधुसूदन यादव, गुरू बाल दास अउ श्रीनिवास राव मद्दी ल स्टार प्रचारक बनाय गेहे।
मतदाता जागरूकता कार्यक्रम
लोकसभा चुनाव के दउरान मतदाता मन ल मतदान बर जागरूक करे खातिर प्रदेसभर म आने-आने कार्यक्रम आयोजित करे जात हे। इही कड़ी म बस्तर जिला के लोहंडीगुड़ा, बकावंड अउ छिंदवाड़ा म महिला स्व-सहायता समूह मनके दीदी मन ह मेहंदी अउ रंगोली प्रतियोगिता के आयोजन करीन अउ मतदाता जागरूकता रैली निकाले के लोगन ल मतदान बर प्रेरित करीन। अइसने, सिक्षक-सिक्षिका अउ आने कर्मचारी मन ह घलो मतदाता जागरूकता रैली निकाल के मतदान करे के सपथ लीन।
ऐति, जांजगीर-चांपा जिला के सबो विकासखंड मन म आज मैराथन दउड़ के आयोजन करे गीस। ए दउरान सबो उमर के मतदाता मन ह दउड़ लगाके मतदान करे के सपथ लीन। मैराथन दउड़ म प्रथम, द्वितीय अउ तृतीय अवइया प्रतिभागी मन ल मेडल देके सम्मानित करे गीस। काली स्वीप कार्यक्रम के तहत चांपा स्थित डॉक्टर भीमराव अंबेडकर भवन म थर्ड जेंडर सम्मेलन के आयोजन करे जाही।
उहें, सक्ती जिला म होली मिलन उत्सव अउ स्वच्छता अभियान के माध्यम ले स्व-सहायता समूह डहार ले गांव-गांव म मतदान के प्रति जागरूकता लाने बर आने-आने कार्यक्रम आयोजित करे जात हे। इही कड़ी म आज जनपद पंचायत मालखरौदा अउ जैजेपुर म मैराथन दउड़ के आयोजन करे गीस।
दुर्घटना
दुरूग जिला मुख्यालय म तेज रफ्तार एक ठिन कार के अनियंत्रित होके पलटे ले दू झिन युवक के मउत होगे। उहें, दू झिन आने युवक गंभीर रूप ले घायल होगे हे, जउन मन ल अस्पताल म भर्ती कराय गेहे।
खबर के मुताबिक बीते रतिहा सिकोलाभाटा निवासी चार युवक कार म सवार होके घूमे बर निकले रिहीस। इही दउरान उंखर कार अनियंत्रित होके डिवाइडर ले जा टकरईस। कार के रफ्तार बहुत तेज रिहीस, जेखर ले कतकोन फीट उपर हवा म उछलीस अउ पलट गे। ए हादसा म कार चालक संग दू लोगन के मउका म ही मउत होगे।