प्रदेस म लोकसभा चुनाव के पहिली चरण के तहत बस्तर लोकसभा सीट म नामांकन जमा करे के काली आखिरी तारीख हे। आज भाजपा प्रत्याशी महेश कश्यप अउ हमरराज पार्टी के प्रत्याशी नरेन्द्र बुरका ह अपन नामांकन पत्र दाखिल करीन। श्री कश्यप के नामांकन दाखिल करे के दउरान प्रदेस भाजपा अध्यक्ष अउ जगदलपुर विधायक किरण सिंह देव मौजूद रिहीन। अब तक ए सीट बर चार उम्मीदवार अपन नामांकन दाखिल करे हे। अट्ठाईस मार्च के नामांकन पत्र के जांच होही। उम्मीदवार तीस मार्च तक नाम वापस ले सकही। ए सीट बर उन्नीस अप्रैल के वोट डाले जाही। जानबा के मुताबिक छत्तीसगढ़ के ग्यारह लोकसभा सीट बर तीन चरण म मतदान होही।
कवासी लखमा-एफआईआर
बस्तर लोकसभा क्षेत्र ले कांग्रेस प्रत्याशी कवासी लखमा के खिलाफ आचार संहिता के उल्लंघन करे के मामला म एफआईआर दर्ज करे गेहे। उहें, जगदलपुर के शहर कांग्रेस अध्यक्ष सुशील मौर्य उपर घलो एफआईआर दर्ज करे गेहे। जानबा के मुताबिक पाछु रविवार के जिला कांग्रेस कमेटी डहार ले बाईक रैली के आयोजन करे गे रिहीस। ए दउरान दंतेश्वरी मंदिर म दर्शन के बाद कवासी लखमा होलिका दहन कार्यक्रम म सामिल होइन। ए कार्यक्रम के एक फोटो सोशल मीडिया म वायरल होगे हे, जेमा कवासी लखमा उहां मौजूद लोगन मन ल पइसा बांटत दिखत हे। ए मामला म बस्तर जिला प्रशासन ह आचार संहिता के उल्लंघन मानत हुए ओखर उपर एफआईआर दर्ज करे हे।
इही बीच, भाजपा के प्रदेस महामंत्री संजय श्रीवास्तव ह कहिन कि आचार संहिता के दउरान कवासी लखमा ह नोट बांटके आचार संहिता के उल्लंघन करे हे। ओमन ह कहिन कि कांग्रेस के नोट बांटके वोट खरीदे के साजिश कभू पूरा नइ होही। ओमन कहिन कि भाजपा ए मामला के केन्द्रीय चुनाव आयोग ले सिकायत करके कवासी लखमा के नामांकन रद्द करे के मांग करही।
चुनाव आयोग-परामर्श
निर्वाचन आयोग ह राज्य अउ केन्द्रसासित प्रदेस के मुख्य निर्वाचन अधिकारी मन ल भीषण गर्मी अउ लू के संबंध म परामर्श जारी करे हे। एमा केहे गेहे कि मौसम विभाग ह गर्मी के मौसम के दउरान सामान्य ले जादा तापमान रेहे के संभावना व्यक्त करे हे, जेखर कारण मार्च ले जून के बीच लंबा समय तक भीषण गर्मी अउ लू के स्थिति हो सकत हे। आयोग ह ए सिलसिला म गर्मी के असर ले बचाव बर राष्ट्रीय आपदा प्रबंधन अधिकरण डहार ले दिसा-निरदेस के प्रति साझा करे गेहे। अधिकरण के परामर्श के अनुसार लोगन मन ल धूप म निकले, बिसेस रूप ले दोपहर बारह ले तीन बजे के बीच बाहर निकले ले बचे के सलाह दे गेहे। संगेसंग ओमन ल जादा मात्रा म पानी पीये बर केहे गेहे। लोगन मन ल बासी खाना खाय ले परहेज करे के सलाह घलो दे गेहे। आयोग ह मुख्य निर्वाचन अधिकारी मन ल मतदान केन्द्र मन म पेयजल अउ छाया के न्यूनतम बुनियादी सुविधा सुनिश्चित करे के निरदेस देहे।
मतदाता जागरूकता कार्यक्रम
लोकसभा चुनई के दउरान मतदाता मन ल शत-प्रतिशत वोट डाले बर प्रदेसभर म ए बेरा आने-आने जागरूकता कार्यक्रम आयोजित करे जात हे। इही कड़ी म कोरिया जिला के बैकुंठपुर जनपद पंचायत म राष्ट्रीय ग्रामीण आजीविका मिशन के अंतर्गत पंजीकृत स्व-सहायता समूह के सदस्य मनके उपस्थिति म नवा मतदाता मन ल चिन्हांकित करे गीस। संगेसंग लोगन मन ल वोट डाले बर प्रेरित करके सपथ घलो दिलाय गीस। उहें, महिला समूह के सदस्य मनके बीच स्वीप कार्यक्रम के थीम म मेंहदी, रंगोली के संग आने-आने प्रतियोगिता के आयोजन करे गीस।
दीपक बैज-महालक्ष्मी योजना
प्रदेस कांग्रेस अध्यक्ष दीपक बैज ह कहिन कि केन्द्र म कांग्रेस के सरकार बने म पार्टी ह माईलोगिन मन बर महालक्ष्मी योजना लागू करे के वादा करे हे। एखर तहत सबो महिला मन ल हर महीना आठ हजार तीन सौ तैंतीस रूपिया दे जाही। श्री बैज ह किहीन कि माईलोगिन मन ल हर बछर एक लाख रूपिया देके निर्णय ल पार्टी कार्यकर्ता, बैनर, पाम्पलेट अउ प्रचार फॉर्म के माध्यम ले प्रदेस के सबो ग्यारह लोकसभा क्षेत्र के सबो माईलोगिन मतदाता तक पहुंचाही। ओमन यहू किहीन कि केन्द्र म कांग्रेस के सरकार बने म केन्द्रीय नौकरी म आधा भर्ती माईलोगिन बर करे जाही। एखर संग आशावर्कर, आंगनबाड़ी अउ मिड-डे-मील के कार्यकर्ता के केन्द्रीय सहायता दुगुना करे जाही। उहें, माईलोगिन के कानून अधिकार के रक्षा बर हर पंचायत म कानूनी सहायक के नियुक्ति घलो करे जाही। एखर अलावा देस के जिला मुख्यालय म काजकाजी माईलोगिन बर हॉस्टल बनाय जाही।
्ट्रेन-परिचालन
रेल प्रसासन ह यात्री मनके सुविधा ल ध्यान म राखत हुए दुर्ग-हटिया द्वि-साप्ताहिक सुपरफास्ट स्पेशल ट्रेन के परिलचान उनतीस मार्च ले बढ़ाके अट्ठाईस जून तक कर देहे। ए ट्रेन दुर्ग ले हटिया बर हर बुधवार अउ सुक्रवार के अवइया तीन अप्रैल ले अट्ठाईस जून तक चलही। अइसने, ए ट्रेन हटिया ले हर मंगलवार अउ गुरूवार के दू अप्रैल ले सत्ताईस जून तक चलाय जाही।
इही बीच, दक्षिण पूर्व मध्य रेलवे के बिलासपुर मंडल म अवइया बाराद्वार अउ सक्ती स्टेसन के बीच स्थित सकरेली फाटक ल सुरक्षागत कारण ले एक अप्रैल ले स्थाई रूप ले बंद करे के निर्णय ले गेहे। सड़क यातायात बर वैकल्पिक मार्ग के व्यवस्था राष्ट्रीय राजमार्ग-उनचास म नवा रोड ओवरब्रिज ले करे गेहे।
दुर्घटना
सक्ती जिला म आज होय एक सड़क दुर्घटना म एक युवक अउ युवती के मउत होगे। उहें, दू आने युवती गंभीर रूप ले घायल होगे हे। जानबा के मुताबिक जांजगीर-चांपा जिला के बरगांव ले तीन भाई-बहिनी अउ कुकदा गांव के रहवइया एक आने युवती कार म सवार होके रायगढ़ जावत रिहीन। इही दउरान सक्ती जिला के पतेरपाली अउ मसनियाकला गांव के बीच उंखर कार अनियंत्रित होके खेत म जाके पलट गीस। ए हादसा म दू लोगन के मउका म ही मउत होगीस। फेर, दू आने युवती मन ल गंभीर हालत म अस्पताल म भर्ती कराय गेहे।
राष्ट्रीय योगासन चैंपियनशिप
राष्ट्रीय योगासन चैंपियनशिप के आयोजन अट्ठाईस ले तीस मार्च तक भिलाई म करे जाही। राष्ट्रीय योग फेडरेशन ऑफ इंडिया अउ छत्तीसगढ़ प्रेम निरंजन योगासन खेल संघ अउ योग लंगर भिलाई डहार ले होवइया ए प्रतियोगिता म पांच सौ ले जादा खिलाड़ी हिस्सा लीहीं। प्रतियोगिता म छत्तीसगढ़ के अलावा असम, त्रिपुरा, तमिलनाडु अउ केरल के संग आने-आने राज्य मनके प्रतिभागी सामिल होही।
अउ अब थोरकुन समाचार सार म –
– बीजापुर जिला म बासागुड़ा थाना क्षेत्र म काली अज्ञात लोगन मन डहार ले करे गे हमला म गंभीर रूप ले घायल एक आने मनखे के घलो अस्पताल म इलाज के दउरान मउत होगे। ए हादसा म दू लोगन के मउत पहिली ही हो चुके हे।
– बिलासपुर जिला के मस्तुरी म होली के मउका म काली आपसी विवाद के चलत एक मनखे ह दूसर मनखे उपर गोली चला दीस। ए घटना म घायल मनखे ल मस्तुरी के एक अस्पताल म भर्ती कराय गेहे। उहें, पुलिस ह आरोपी ल गिरफ्तार करके ओखर तीर ले राइफल घलो जब्त कर लेहे।
– मनेन्द्रगढ़-चिरमिरी-भरतपुर जिला के गोदरीपारा बी.टाईप म मधुमक्खी के हमला ले एक माईलोगिन के मउत होगे।