मुख्यमंत्री विष्णुदेव साय ह किसान मन ल भरोसा दिवाय हे कि प्रदेस म पाछू दिन होय बेमौसम बरसा अउ करा गिरे के सेति फसल मन ल जउन नुकसान होय हे, ओखर आंकलन करे जात हे। ए संबंध म मुख्यमंत्री ह राज्य के सबो कलेक्टर मन ल निरदेस जारी कर ओमन ल अपन-अपन क्षेत्र मन म फसल मनके होय नुकसान के रिपोर्ट देबर किहीन हे। अपन सोसल मीडिया पोस्ट म मुख्यमंत्री ह किहीन हे कि प्रदेस म बेमौसम बरसा होय अउ करा गिरे ले फसल के हानि होय हे, फेर एखर ले किसान मन ल निरास होय के जरूरत नइ हे।
खबर के मुताबिक पाछू सोलह ले उन्नीस मार्च के बीच प्रदेस के आने-आने जघा मन म तेज बरसा अउ करा गिरे ले खड़े फसल ल नुकसान होय के खबर मिले हे।
निर्वाचन आयोग-विकसित भारत
निर्वाचन आयोग ह इलेक्ट्रॉनिकी अउ सूचना प्रौद्योगिकी मंत्रालय ल व्हाट्सएप म विकसित भारत संदेस ल उपर तुरतेच प्रभाव ले रोके के निरदेस देहे। आयोग ह बतइन कि आम चुनाव के घोसना के बावजूद नागरिक मन के फोन म अइसने संदेस मिले के कई ठन सिकायत मिले हे। एखर जवाब म, मंत्रालय ह आयोग ल सूचना करे रिहीस हे, हलांकि चिट्ठी आदर्स आचार संहिता लागू होय के पहिली भेजे गे रिहीस हे, फेर नेटवर्क के परेसानी के सेति ए चिट्ठी देरी ले मिले होही, एखरे सेति चुनाव घोसित होय के बाद घलो नागरिक मन के फोन म विकसित भारत के संदेस प्रसारित होय होही।
संपत्ति विरूपण-कार्रवाई
राज्य म लोकसभा चुनाव बर आदर्श आचार संहिता के लगे के बाद ले संपत्ति विरूपण अधिनियम के तहत प्रशासन डहार ले सार्वजनिक अउ निजी संपत्ति ले दीवाल लेखन ल मिटाय के संगेसंग पोस्टर अउ बैनर हटाय के कार्रवाई करे जावत हे। राज्य म अब तक करीबन तीन लाख पंद्रह हजार प्रचार सामग्री हटाय गेहे। एमा सार्वजनिक संपत्ति ले जुड़े करीबन दू लाख अउ निजी संपत्ति ले जुड़े एक लाख पंद्रह हजार प्रकरण उपर कार्रवाई करे गेहे। राज्य के मुख्य निर्वाचन पदाधिकारी रीना बाबा साहेब कंगाले ह बतइन कि सबो जिला निर्वाचन अधिकारी मन डहार ले संपत्ति विरूपण अधिनियम के तहत प्रदेसभर म तीन लाख सत्ताईस हजार ले जादा प्रकरण मन के पहिचान करे गेहे।
मुख्यमंत्री-दंतेवाड़ा
बस्तर क्षेत्र ले लोकसभा चुनाव के प्रचार अभियान के सुरूआत करत मुख्यमंत्री अउ भाजपा के वरिष्ठ नेता विष्णुदेव साय ह काली दंतेवाड़ा म कार्यकर्ता मन ल संबोधित करीन। ए मउका म श्री साय ह किहीन कि भाजपा म एक सामान्य कार्यकर्ता घलो प्रधानमंत्री जइसन सबले प्रमुख पद तक पहुंच सकथे। ओमन किहीन कि सबका साथ-सबका विकास-सबका विश्वास अउ सबका प्रयास भाजपा के नीति आय। श्री साय ह कार्यकर्ता मन ले किहीन कि ओमन ह भाजपा उम्मीदवार मन ल जीत देवाय बर पूरा मेहनत के संग एकजुट होके काम करय। ओमन किहीन कि प्रदेस के जनता ह मोदी के गारंटी उपर विश्वास जतावत छत्तीसगढ़ म भाजपा के सरकार बनाय के मउका दे हे। श्री साय ह किहीन कि उंखर सरकार ह आदिवासी बहुल क्षेत्र होय के सेति बस्तर अउ सरगुजा संभाग ल अपन प्राथमिकता म राखे हे। ए क्षेत्र मन म विकास के बड़ संभावना हे।
कार्यकर्ता मन ल संबोधित करत प्रदेस भाजपा अध्यक्ष किरण सिंह देव ह किहीन हे कि केंद्र अउ राज्य म डबल इंजन के सरकार होय के सेति अब इंहा विकास काम ल गति मिलही। ओमन कार्यकर्ता मन ल किहीन हे कि ओमन भाजपा ल लोकसभा चुनाव म बड़ सफलता देवाय बर पूरा ऊर्जा के संग काम करय।
सम्मेलन ल राज्य के वन मंत्री अउ पार्टी के आदिवासी नेता केदार कश्यप अउ वित्त मंत्री ओ.पी. चौधरी ह घलो संबोधित करीन।
भाजपा कोर कमेटी-बैठक
प्रदेस म लोकसभा चुनाव ल धियान म राखत आने-आने राजनीतिक दल मन के पदाधिकारी बइठका लेके रणनीति बनाय म जुट गेहे। इही कड़ी म कोरबा म प्रदेस भाजपा के चुनाव प्रबंधन अउ कोर कमेटी के बइठका होइस। एमा पार्टी के प्रदेस सह प्रभारी नितिन नबीन ह हालेच म होय विधानसभा चुनाव म कार्यकर्ता मन के मेहनत ले भाजपा ह पूरा बहुमत के संग सरकार बनाय म सफलता हासिल करे हे। ओमन उम्मीद जतइन कि कार्यकर्ता मन के उत्साह ल देखत लोकसभा चुनाव म घलो भाजपा ल प्रदेस के ग्यारह ले ग्यारह सीट म जीत हासिल होही।
कार्यकर्ता मन ल संबोधित करत कोरबा लोकसभा सीट ले भाजपा प्रत्यासी डॉक्टर सरोज पांडेय ह किहीन कि प्रदेस के मतदाता प्रधानमंत्री नरेंद्र मोदी ल तीसरइया घांव केंद्र सरकार के नेतृत्व सौंपे बर संकल्पित हे। ओमन किहीन कि कोरबा लोकसभा सीट ले ओ अकेला चुनाव नइ लड़त हे, फेर भाजपा के प्रत्येक कार्यकर्ता चुनाव लड़त हे। ए बइठक म कोरबा जिला भाजपा के स्थानीय पदाधिकारी घलो सामिल होइन।
कांग्रेस इस्तीफा/भाजपा प्रवेश
जांजगीर के कांग्रेस नेता अउ पार्टी के संयुक्त प्रदेस महासचिव रवि पांडेय ह पार्टी ले इस्तीफा दे देहे।
उहें, प्रदेस महिला कांग्रेस के सचिव अउ कमरीद गांव के सरपंच पुनिता प्रजापति ह अपन समर्थक मनके संग भाजपा म प्रवेस करे हे।
प्रदेश अध्यक्ष-प्रचार रथ
लोकसभा चुनाव म भाजपा के प्रचार बर पार्टी के प्रदेस अध्यक्ष किरण िंसंह देव ह बाईस एलईडी प्रचार रथ मन ल झंडा दिखाके रवाना करीन। ए रथ मनके माध्यम ले प्रदेस के ग्यारह लोकसभा क्षेत्र मन म केंद्र अउ राज्य सरकार के कल्याणकारी योजना मनके बारे म मतदाता मन ल जानकारी दे जाही। ए प्रचार रथ ल रवाना करत प्रदेस भाजपा अध्यक्ष ह किहीन कि ए प्रचार रथ नोहय, बल्कि विस्वास के रथ आय।
एखर पहिली, विष्णुदेव साय ह घलो पाछू दिन पार्टी के ग्यारह एलईडी प्रचार रथ ल रवाना करे रिहीस।
सचिन पायलट/नितिन नबीन
कांग्रेस के प्रदेस प्रभारी सचिन पायलट ह आरोप लगाय हे कि केंद्र सरकार लोकसभा चुनाव म पार्टी के प्रचार ल रोके बर उंखर बैंक खाता मन ल बंद करत हे। अपन दू दिवसीय प्रवास म छत्तीसगढ़ पहुंचे श्री पायलट ह माना विमान तल म पत्रकार मन ले गोठबात करत आरोप लगइन हे कि आयकर विभाग ले नोटिस जारी होना जानबूझ के प्रतिसोध के भावना ले करे गे कार्रवाई आय। श्री पायलट ह निर्वाचन आयोग ले ए मामला उपर तुरते संज्ञान लेके कार्रवाई करे के मांग करीन। ओमन किहीन हे कि छत्तीसगढ़ म बांचे पांच सीट मन म कांग्रेस प्रत्यासी मनके घोसन जल्दी करे जाही।
श्री पायलट ह आज रायपुर ले जांजगीर रवाना होइन, जिहां ओमन कार्यकर्ता सम्मेलन ल संबोधित करीन। काली ओमन रायपुर म पार्टी कार्यकर्ता अउ पदाधिकारी मन के बइठका लिही।
उहें, भाजपा के प्रदेस सह-प्रभारी नितिन नबीन ह आज जांजगीर म पार्टी के लोकसभा स्तरीय बइठक लीन। बइठका म चुनाव प्रबंधन अउ व्यवस्था ल लेके गोठबात करे गीस। ए बइठका म उप मुख्यमंत्री विजय शर्मा, संकुल प्रभारी राजेश मूणत, सांसद गुहाराम अजगले अउ पूर्व विधायक नारायण चंदेल घलो सामिल होइन।
हाईकोर्ट-याचिका खारिज
छत्तीसगढ़ उच्च न्यायालय ह रामलला दर्शन योजना के खिलाफ लगाय गे जनहित याचिका ल खारिज कर दे हे। अदालत के ए फैसला म खुसी जतावत प्रदेस भाजपा अध्यक्ष किरण सिंह देव ह किहीन कि प्रदेस म रामभक्त मन के इच्छा अउ भावना ल धियान म राखत राज्य सरकार ह ए योजना सुरू करे हे। ओमन किहीन कि भाजपा ह विधानसभा चुनाव के पहिली अपन संकल्प पत्र म रामभक्त मन ल रामलला के दर्सन कराय के गारंटी दे रिहीस।
अग्निवीर भर्ती रैली-आवेदन
अग्निवीर भर्ती रैली बर आवेदन करे के काली आखिरी तारीख आय। ए रैली म सामिल होय बर प्रदेस भर म अब तक अट्ठारह हजार ले जादा उम्मीदवार मन ह अपन पंजीयन करा डरे हे। इच्छुक उम्मीदवार भारतीय सेना के अधिकारिक वेबसाइट म जाके काली बाईस मार्च के पंजीयन करा सकत हे। ए संबंध म जादा जानकारी बर नवा रईपुर स्थित सेना भर्ती कार्यालय ले संपर्क करे जा सकत हे।