सर्वोच्च न्यायालय ह भारतीय स्टैट बैंक ल आज चुनावी बॉन्ड ले जुड़े जम्मों प्रकार के जानबा ल देके निरदेस दीन। न्यायालय ह एसबीआई ल इक्कीस मार्च तक क्रेता अउ प्राप्तकर्ता राजनीतिक पार्टी के बीच के संपर्क ल बताय वाले यूनिक बॉन्ड नंबर के घलो जानबा देबर केहे हे। मुख्य न्यायाधीस डीवाई चन्द्रचूड़ के अध्यक्षता वाले पांच न्यायाधीस मनके संविधान पीठ ह किहीन कि एसबीआई ल बॉन्ड के पूरा जानबा देके जरूरत ल लेके कोनो प्रकार के संसो नइ हे। सर्वोच्च न्यायालय ह एसबीआई के अध्यक्ष ल इक्कीस मार्च के संझा पांच बजे तक न्यायालय के आगू एक ठिन हलफनामा दाखिल करे बर केहे हे, जेमा बताय जाना चाही कि एसबीआई ह बॉन्ड ले जुड़े जम्मों जानबा के खुलासा कर देहे।
लोकसभा चुनाव-नाम निर्देशन
प्रदेस म तीन चरण म होवइया लोकसभा चुनई के प्रशासनिक तियारी पूरा हो चुके हे। पहिली चरण म बस्तर लोकसभा क्षेत्र बर तेईस अप्रैल के होवइया मतदान बर बीस मार्च के अधिसूचना जारी करे जाही अउ जेखर बाद नामांकन पत्र भरे के काम सुरू हो जही। नामांकन सत्ताइस मार्च तक भरे जाही। अट्ठाईस मार्च के नामांकन पत्र मनके जांच होही अउ उम्मीदवार मन तीस मार्च तक नांव वापिस ले सकथे।
मुख्य निर्वाचन पदाधिकारी रीना बाबा साहेब कंगाले ह बतइन कि नाम निर्देसन पत्र लोकसभा के रिटर्निंग अधिकारी डहार ले अधिसूचित जघा म ले जही। नाम निर्देसन बर अभ्यर्थी मन सिरिफ तीन गाड़ी म ही नामांकन केंद्र के सौ मीटर के दायरा म जा सकथे। नाम निर्देसन बर जमानत के रासि आरक्षित वर्ग -अनुसूचित जाति-जनजाति बर बारा हजार पांच सौ रूपिया अउ सामान्य वर्ग बर पच्चीस हजार रूपिया होही। नामांकन कक्ष म कुल पांच मनखे मन जा सकथे। श्रीमती कंगाले ह बतइन कि एक अभ्यर्थी ह जादा ले जादा नाम निर्देसन के चार सेट भरके दे सकथे। अभ्यर्थी मन ल अपन नाम निर्देसन वाले पत्र के संग अभी के फोटू देबर पड़ही अउ संगेसंग अपन संपत्ति देनदारी अउ अपराधिक प्रकरण के बारे म सपथ पत्र घलो देबर पड़ही।
भाजपा प्रवेश
बहुजन समाज पार्टी के पूर्व विधायक केशव चन्द्रा ह आज भाजपा म सामिल होगे। आज जैजैपुर म होय भाजपा कार्यकर्ता सम्मेलन म पार्टी के प्रदेस अध्यक्ष किरण सिंह देव अउ वित्त मंत्री ओ.पी.चौधरी ह एमन ल भाजपा के सदस्यता देवाइन। श्री चंद्रा ह जैजैपुर विधानसभा क्षेत्र ले दू बार विधायक रही चुके हे।
उहें काली, पाली विधानसभा क्षेत्र म भाजपा के राष्ट्रीय उपाध्यक्ष अउ कोरबा लोकसभा सीट के प्रत्यासी सरोज पांडेय अउ उद्योग मंत्री लखन लाल देवांगन के उपस्थिति म कतकोन लोगन मन ह भाजपा म प्रवेश करही। भाजपा पार्टी म प्रवेस करइया म जिला अउ जनपद पंचायत के सदस्य के संगेसंग कांग्रेस पदाधिकारी मन घलो सामिल हे।
राज्यपाल-रेडक्रॉस कार्यक्रम
राज्यपाल विश्वभूषण हरिचंदन ह आज राजभवन म भारतीय रेडक्रॉस सोसाइटी के छत्तीसगढ़ साखा डहार ले राखे गे कारीकरम म प्रदेस के आने-आने जिला के उनतीस झिन एमबीबीएस डॉक्टर मन ल ले-लेक्चरर प्रसिक्षण पूरा करे के बाद प्रमाण पत्र दे गीस। राज्य साखा डहार ले ग्यारा ले सत्रा मार्च तक पहिली घांव होय ले-लेक्टरर प्रसिक्षण कारीकरम म डॉक्टर मन ल प्राथमिक अउ आपातकालीन इलाज के प्रसिक्षण दे गीस। ए मउका म राज्यपाल ह किहीन कि ए समाज म डॉक्टर मन के बड़का भूमिका हे।
रेडक्रॉस सोसाइटी छत्तीसगढ़ के सीईओ एम.के. राउत ह किहीन कि प्रदेस म पहिली घांव एमबीबीएस डॉक्टर मन ल प्राथमिक उपचार बर ले-लेक्चरर के प्रसिक्षण दे गीस। ए डॉक्टर मन ह जिला म जाके जूनियर रेडक्रॉस अउ यूथ रेडक्रॉस के स्वयं सेवक मन ल प्रसिक्षण दीही।
बृजमोहन-पत्रकारवार्ता
रईपुर लोकसभा क्षेत्र के भाजपा उम्मीदवार बृजमोहन अग्रवाल ह किहीन हे कि महादेव सट्टा ऐप मामला म पूर्व मुख्यमंत्री भूपेश बघेल ल जांच के सामना करना चाही। ओमन किहीन कि मुकदमा दरज होय के बाद श्री बघेल ह हार के डर ले सहानुभूति लेके परयास करत हे, फेर ओमन ल कोनो प्रकार के फायदा नइ मिलय। आज रईपुर स्थित भाजपा कार्यालय एकात्म परिसर म होय पत्रकार वार्ता म श्री अग्रवाल ह किहीन कि कानून अपन काम करत हे अउ श्री बघेल ल जांच म मदद करना चाही।
सेना भर्ती-आवेदन
भारतीय सेना म भर्ती बर ए बेरा अर्जी भरे के काम चलत हे। सेना भर्ती कार्यालय रईपुर ले मिले जानबा के मुताबिक सेना म भर्ती बर इंडियन आर्मी के वेबसाइट म बाईस मार्च तक ऑनलाइन अर्जी भरे जा सकथे। प्रदेस ले अब तक पंद्रह हजार ले जादा युवा मन ह अपन पंजीयन करा लेहे। कोनो भी प्रकार के मदद बर नवा रईपुर के सहीद वीर नारायण सिंह अंतर्राष्ट्रीय क्रिकेट स्टेडियम म स्थित ऑफिस ले संपर्क करे जा सकथे।
सीआरपीएफ-पुरस्कार
माओवादी मनके खिलाफ सफल अउ बढ़िया ऑपरेसन बर सुकमा जिला म पदस्थ केंद्रीय रिजर्व पुलिस बल सीआरपीएफ के दू सौ तेइसवां बटालियन ल सम्मानित करे गेहे। उत्तर प्रदेस के प्रयागराज म होय ए समारोह म सीआरपीएफ के महानिदेसक दयाल सिंह ह बटालियन के कमांडेंट नवीन कुमार ल ए पुरस्कार दीन। जानबा के मुताबिक सीआरपीएफ के ए बटालियन ह माओवादी मनके गढ़ वाले सुकमा जिला के चिंतलनार जघा म तैनात हवय।
सामान्य ज्ञान प्रतियोगिता
वन मंत्री केदार कश्यप ह काली रईपुर के रोहिणीपुरम स्थित वनवासी कल्याण आश्रम म जनजातीय नायक मन उपर आधारित सामान्य ज्ञान प्रतियोगिता के पुरस्कार वितरण समारोह म सामिल होइन। ए मउका म प्रतियोगिता म जीतइया छात्र-छात्रा मन ल ईनाम दे गीस।
ट्रेन-परिचालन
रेलवे प्रसासन ह होली तिहार के दौरान रेलगाड़ी म यात्री मनके भीड़ ल देखत हावड़ा मुंबई सेंट्रल अउ संतरागाछी-हुबली के बीच होली स्पेसल रेलगाड़ी एक फेरा बर चलाय के फइसला लेहे। हावड़ा- मुंबई सेंट्रल रेलगाड़ी पच्चीस मार्च के मुंबई ले निकलही। ए ह बिलासपुर, रईपुर, दुरूग अउ गोंदिया स्टेसन म रूकही। अइसने संतरागाछी-हुबली रेलगाड़ी ह सत्ताईस मार्च के संतरागाछी ले छुटही।
दुर्घटना
खैरागढ़-छुईखदान-गंडई जिला के धमधा रद्दा उपर पाछू रतिहा एक ठिन सड़क दुर्घटना म तीन झिन लोगन के मउत होगे। हमर संवाददाता ले मिले जानबा के मुताबिक जिला मुख्यालय खैरागढ़ के बाजार अतरिया के तीर जोरातराई म एक ठिन ट्रक अउ फटफटी के बीच होय टक्कर म फटफटी म बइठे तीन झिन लोगन के मउकच म प्राण छूटगे। मृतक म एक झिन माईलोगिन घलो सामिल हे।
हॉकी प्रतियोगिता
राउरकेला म होय अखिल भारतीय सब जूनियर महिला ग्रास रूट हॉकी प्रतियोगिता के खिताब छत्तीसगढ़ के टीम ह जीत ले हे। फाइनल मैच छत्तीसगढ़ अउ ओड़िसा के बीच खेले गीस। रोमांचक मुकाबला म दूनों टीम ह आखिरी बेरा तक एक-एक गोल के बराबरी म रिहीन। फेर आखिर म सडनडेथ के आधार म छत्तीसगढ़ के टीम ल विजेता घोसित करे गीस। प्रतियोगिता म छत्तीसगढ़ के टीम ह एको मैच नइ हारिस बीस सदस्य ए टीम म राजनांदगांव के तेरा खिलाड़ी अउ प्रसिक्षक सामिल रिहीस। छत्तीसगढ़ के टीम म श्रेया, तहजीब, सिमरन, केसर,वसुंधरा, खुवाइश, राशि, परिधि, श्यामली, सुरेखा, माउली, गीतू, प्रियांशी, काजल, सुधा, गीताश्री अउ पल्लवी सामिल रिहीन। टीम के कोच के रूप म अंतर्राष्ट्रीय हॉकी खिलाड़ी मृणाल चौबे ल सामिल करे गे रिहीस।
अउ अब थोरकुन समाचार सार म –
– राज्यपाल विश्व भूषण हरिचंदन ले आज राजभवन म पंडित दीनदयाल उपाध्याय स्वास्थ्य विज्ञान अउ आयुष विश्वविद्यालय के नव-नियुक्त कुलपति डॉक्टर पी.के. पात्रा ह मिलिन।
– छत्तीसगढ़ राज्य सूचना आयोग म दू झिन आयुक्त के नियुक्ति करे गेहे। सामान्य प्रसासन विभाग डहार ले जारी आदेस के मुताबिक रिटायर आईएएस नरेंद्र कुमार शुक्ला अउ आलोक चंद्रवंशी के आयोग म आयुक्त के पद म नियुक्ति करे गेहे।
– जांजगीर-चांपा जिला के गांव बनारी के तीर चुनाव आयोग डहार ले बनाय गे उड़नदस्ता के टीम ह एक ठिन कार ले सात लाख अंठानबे हजार रूपिया के जब्ती करे हे। कार म बइठे लोगन मन ह ए बारे म कोनो प्रकार के दस्तावेज नइ दिखाइन, जब्ती रकम के संग मामला ल जीएसटी के तीर भेजे जाही।