प्रधानमंत्री नरेंद्र मोदी ह आज भिलाई स्थित भारतीय प्रौद्योगिकी संस्थान आईआईटी के स्थायी परिसर ल राष्ट्र ल समर्पित करीन। ये आईआईटी भवन करीब चार सौ एकड़ म विकसित करे जावत हे। प्रधानमंत्री ह जम्मू ले देश बर बत्तीस हजार करोड़ रूपिया के दू सौ बीस विकास परियोजना के लोकार्पण, शिलान्यास अउ उद्घाटन करीन। एमा छत्तीसगढ़ आईआईटी भिलाई के संग कुरूद अउ कवर्धा म केंद्रीय विद्यालय के नवा भवन घलो शामिल हे। लोकार्पण कार्यक्रम के दौरान मुख्यमंत्री विष्णुदेव साय अउ सांसद विजय बघेल भिलाई आईआईटी ले ऑनलाईन जुड़ीन।
ए बेरा म मुख्यमंत्री ह प्रधानमंत्री के आभार जतात कीहिन कि ये आईआईटी उच्च शिक्षा के उत्कृष्ट केंद्र बनही। जानबा के मुताबिक आईआईटी भिलाई म अभी एक हजार ले जादा छात्र-छात्रा इंजीनियरिंग के ग्यारा शाखा म पढ़ाई करत हे। प्रधानमंत्री ह चौदा जून दू हजार अठारा के भिलाई म आईआईटी परिसर के निर्माण के आधारशिला रखे रीहिन।
केंद्रीय गृहमंत्री अमित शाह
केंद्रीय गृहमंत्री अमित शाह बाईस फरवरी के छत्तीसगढ़ के एक दिवसीय दौरा म रीही। ए बेरा श्री शाह कोंडागांव बर रवाना होही, जिहां लोकसभा चुनाव के तैयारी ल लेके भाजपा के क्लस्टर बैठक म शामिल होही। एखर बाद जांजगीर-चांपा जिला के हाईस्कूल मैदान म आमसभा ल संबोधित करही। उंहे गृहमंत्री बिलासपुर म आयोजित प्रबुद्धजन के संगोष्ठी म घलो शामिल होही।
पीएमश्री योजना
केंद्रीय शिक्षा मंत्री धर्मेन्द्र प्रधान ह काली रायपुर म आयोजित एक कार्यक्रम म छत्तीसगढ़ के दू सौ ग्यारा स्कूल म पीएमश्री योजना के शुभारंभ करीन। एखर तहत हर स्कूल ल दू-दू करोड़ रूपिया दे जाही। कार्यक्रम ल संबोधित करत श्री प्रधान ह कहिन कि प्रधानमंत्री स्कूल फॅार राईजिंग इंडिया प्रधानमंत्री नरेंद्र मोदी के विकसित भारत के परिकल्पना के प्रमुख आधार हे।
ओमन ह कहिन कि नवा शिक्षा नीति म आठवीं कक्षा तक के लईका मन ल मातृभाषा अउ स्थानीय भाषा म शिक्षा दे जाही। एखर बर केंद्र सरकार चैनल शुरू करही, जेमा छत्तीसगढ़ी के संग हल्बी, गोण्डी, भतरी, सरगुजिया जइसन भाषा घलो शामिल होही। ए मौका म श्री प्रधान ह केंद्रीय विद्यालय डोंगरगढ़ म डिजिटल लाइब्रेरी, रामानुज मैथ्स पार्क अउ नवोदय विद्यालय म वचुअर्ल रियलटी के शुभारंभ करीन।
कार्यक्रम म मुख्यमंत्री विष्णुदेव साय के संग स्कूल शिक्षा मंत्री बृजमोहन अग्रवाल, रायपुर सांसद सुनील सोनी, जनप्रतिनिधि, अधिकारी अउ स्कूली लईका मन मौजूद रीहिन।
प्रधानमंत्री आवास रेत
प्रदेस म बनइया अठारा लाख प्रधानमंत्री आवास बर राज्य सरकार निशुल्क रेत देवाही। ये घोषणा आज विधानसभा म वित्त मंत्री ओ.पी. चौधरी ह करीन। ओमन कीहिन कि रेत खदान म अवैध उत्खनन ल रोके बर राज्य सरकार नीति बनाही। प्रश्नकाल म सदस्य धरमजीत सिंह ह रेत अउ राख ले जुड़े सवाल करीन कि क्या राज्य सरकार रेत खदान के सर्वे हेलिकॉप्टर ले कराही। ओमन ह रेत खदान ल ग्राम पंचायत ल वापिस करे के मांग करीन।
स्वास्थ्य विभाग-हड़ताल वेतन
स्वास्थ्य विभाग के कर्मचारी मन ल हड़ताल अवधि के वेतन दे जाही। ए निरदेस स्वास्थ्य विभाग ह जारी करे हे। आदेस के अनुसार विभाग के अधिकारी अउ कर्मचारी डहार ले पाछु चार ले नौ जुलाई के बीच करे गे हड़ताल के दिन ल अर्जित अवकाश के रूप म मंजूर करे गेहे। जानबा के मुताबित छत्तीसगढ़ प्रदेस स्वास्थ्य कर्मचारी संघ के आह्वान म स्वास्थ्य विभाग ले जुड़े अधिकारी-कर्मचारी चार ले नौ जुलाई के बीच हड़ताल म रिहीन।
दीक्षांत समारोह
पंडित रविशंकर शुक्ल विश्वविद्यालय रायपुर के सत्ताईसवां दीक्षांत समारोह आज संपन्न होइस। ए मौका म राज्यपाल अउ कुलाधिपति विश्वभूषण हरिचंदन ह प्रख्यात कवि माधव कौशिक ल मानद उपाधि दे गीस। संगेसंग पैंतालिस हजार ले जादा विद्यार्थी मन ल स्नातक, स्नातकोत्तर अउ पीएचडी समेत आने आने उपाधी दे गीस।
पीएससी जांच प्रतिवेदन
छत्तीसगढ़ लोक सेवा आयोग ह राज्य प्रारंभिक सेवा परीक्षा- दू हजार तेईस के संबंध म जारी करे गे मॉडल उत्तर के संबंध म सोश्ल मीडिया अउ ईमेल के माध्यम ले कुछ प्रश्न के उत्तर गलत होय के संबंध म परीक्षार्थी मनले मिले आपत्ति ल संज्ञान म लीन। ए संबंध म आयोग डहार ले कहे गेहे कि ओमन विषय विशेषज्ञ ले एखर परीक्षण कराके परिणाम जारी करही।
जानबा के मुताबिक राज्य सेवा प्रारंभिक परीक्षा के आयोजन पाछू ग्यारा फरवरी के करे गे रीहिस। आयोग ह ये परीक्षा के मॉडल उत्तर जारी कर देहे। एमा ले कुछ उत्तर के गलत होय के जानकारी सोशल मीडिया अउ ईमेल के माध्यम ले आयोग ल मिले हे। परीक्षा नियंत्रक ह केहे हे कि अभ्यर्थी मनले सत्ताईस फरवरी तक ऑनलाईन आपत्ति मंगाय गेहे, जेखर निराकरण परीक्षण के बाद करे जाही।
प्रतियोगी परीक्षा
छत्तीसगढ़ व्यावसायिक परीक्षा मंडल-व्यापमं ह आने आने व्यावसायिक पाठ्यक्रम बर होवइया प्रवेश परीक्षा के तारीख घोषित कर देहे। एखर तहत आने आने व्यावसायिक विषय म प्रवेश बर परीक्षा मई अउ जून महीना म आयोजित करे जाही। उंहे व्यापमं डहार ले मंडी बोर्ड म आने आने पद बर भर्ती परीक्षा पच्चीस फरवरी के प्रदेश के आठ जिला मुख्यालय म होही।
अइसने, व्यापमं डहार ले ग्रामीण कृषि विस्तार अधिकारी भर्ती परीक्षा के आखरी परिणाम दावा-आपत्ति के निराकरण के बाद जारी कर दे गेहे। अभ्यर्थी परीक्षा परिणाम मंडल के वेबसाइट म देख सकत हे।
ड्रोन टेक्नोलॉजी
यूज ऑफ ड्रोन टेक्नोलॉजी इन हेल्थ सर्विस डिलीवरी बर छत्तीसगढ़ के अंबिकापुर स्थित राजमाता देवेन्द्र कुमारी सिंहदेव शासकीय चिकित्सा महाविद्यालय के चयन करे गेहे, जेखर तहत ड्रोन के माध्यम ले सामुदायिक स्वास्थ्य केन्द्र उदयपुर ले ब्लड सैंपल लेके सासकीय चिकित्सा महाविद्यालय भेजे जाही, जहां उंखर जांच होही। जेखर बाद जांच रिपोर्ट सामुदायिक स्वास्थ्य केन्द्र उदयपुर भेजे जाही। एला चलाय बर राजमाता देवेन्द्र कुमारी सिंहदेव शासकीय चिकित्सा महाविद्यालय म काली पहिली ड्रोन ट्रायल करे गीस। ए दउरान मेडिकल कॉलेज ले चालीस किलोमीटर दूर स्थित उदयपुर सामुदायिक स्वास्थ्य केन्द्र म ब्लड सैम्पल अउ ओटी कल्चर सैंपल, ड्रोन के माध्यम ले भेजे गीस।
जानबा के मुताबिक सरगुजा अउ बस्तर जइसन दूरस्थ क्षेत्र के सामुदायिक स्वास्थ्य केन्द्र म लैब नइ होय के कारण ब्लड सैंपल ल आसपास के केन्द्र मन म भेजे ल पड़थे। अइसन स्थिति म ए ड्रोन सुविधा मरीज मन बर वरदान साबित होही। ए प्रोजेक्ट बर दू स्व-सहायता समूह के ड्रोन दीदी मन ल ड्रोन संचालन के प्रसिक्षण बर दिल्ली भेजे गे रिहीस।
किरण सिंह देव-ज्योतिरादित्य सिंधिया
भारतीय जनता पार्टी के प्रदेस अध्यक्ष किरण सिंह देव ह केन्द्रीय नागरिक अउ उड्डयन मंत्री ज्योतिरादित्य सिंधिया ले दिल्ली म मुलाकात करीन। ए दउरान ओमन ह श्री सिंधिया ल पत्र देके रायपुर ले अयोध्या हवाई सेवा के सुरू करे के अनुरोध करीन।
रामविचार नेताम-केंद्रीय मंत्री मुलाकात
छत्तीसगढ़ के कृषि मंत्री रामविचार नेताम ह आज नई दिल्ली म केंद्रीय कृषि अउ जनजाति कार्य मंत्री अर्जुन मुण्डा ले मुलाकात करीन। ए दौरान ओमन ह प्रदेश के किसान मनके आय दुगुना करे बर केंद्रीय मंत्री ले आने आने पहलु म विचार-विमर्श करीन।
अउ अब थोरकुन समाचार सार म –
– लैलूंगा के भाजपा नेता अउ रायगढ़ राजपरिवार के देवेंद्र सिंह आज राज्यसभा बर निर्विरोध निर्वाचित घोषित कर दे गीस।
अउ
– बिलासपुर जिला के तखतपुर नगर पालिका परिषद म भाजपा डहार ले लाये गे अविश्वास प्रस्ताव म कांग्रेस ल हार के सामना करना पड़ीस। विश्वास मत खोये के बाद अब पुष्पा श्रीवास ल अध्यक्ष पद ले हटना पड़ही।