योजना, आर्थिक अउ सांख्यिकी मंत्री ओ.पी. चौधरी ह आज विधानसभा म छत्तीसगढ़ राज्य के आर्थिक सर्वेक्षण बछर 2023-24 ल सदन के पटल म रखीन। एखर अनुसार राज्य म प्रति व्यक्ति आय म सात दशमलव तीन एक के प्रतिशत के बढ़ोत्तरी अनुमानित हे। बछर 2022-23 के त्वरित अनुमान के अनुसार एक लाख सैंतीस हजार तीन सौ उनतीस रूपिया रीहिस, जउन ह बछर 23-24 के अग्रिम अनुमान म एक लाख सैंतालिस हजार तीन सौ इकसठ रूपिया होना संभावित हे।
उपमुख्यमंत्री अउ गृहमंत्री विजय शर्मा ह आज राज्य विधानसभा म कीहिन कि महादेव ऑनलाईन सट्टा ऐप मामला म जउन ल भी शामिल पाय जाही, ओखर खिलाफ कड़ा कार्रवाई करे जाही। श्री शर्मा ह बताइन कि ये मामला म शामिल लोगन के संपत्ति के जानकारी इकट्ठा करे जावत हे।
प्रश्नकाल के दौरान भाजपा विधायक राजेश मूणत के सवाल के जवाब म उपमुख्यमंत्री ह बताइन कि महादेव सट्टा ऐप मामला म दू हजार बाईस ले अभी तक नब्बे ठन एफआईआर दर्ज करे गेहे। एमा ले छब्बीस रायपुर, तेईस दुर्ग, चार सूरजपुर अउ बिलासपुर अउ जांजगीर म दू-दू ठन एफआईआर शामिल हे। अइसने संदिग्ध लेनदेन वाले पांच सौ सात बैंक खाता के पहचान करे गे हवय। ए खाता मन ले लगभग दू सौ इकतीस करोड़ रूपिया के ट्रांजेक्शन होय हे। अभी एमा जमा एक करोड़ सोला लाख रूपिया ल फ्रीज करे जावत हे। ए मामला के जांच प्रवर्तन निदेशालय ईडी डहार ले करे जावत हे, जांच ह आखरी चरण म हवय।
विस-आत्मानंद स्कूल
स्कूल शिक्षा मंत्री बृजमोहन अग्रवाल ह स्वामी आत्मानंद स्कूल के संबंध म आज विधानसभा म कीहिन कि अवइया शिक्षा सत्र म कलेक्टर के अध्यक्षता वाले सबो समिति मन ल भंग करे जाही। ये स्कूल मन ल शिक्षा विभाग के अंतर्गत लाये जाही। ओमन कीहिन कि शिकायत मिले म ओखर जांच कराय जाही, संगेसंग विद्यार्थी मनके भविष्य सुरक्षित रहय यहू घलो निश्चित करे जाही।
छत्तीसगढ़ लोक सेवा आयोग के परीक्षा म अनियमितता अउ भ्रष्टाचार के जांच केंद्रीय जांच एजेंसी-सीबीआई ले कराय जाही। ए प्रकरण के जांच सीबीआई ले कराय जाय के राज्य सरकार के फैसला के परिपालन म राज्य आर्थिक अपराध अन्वेषण ब्यूरो-ईओडब्लू डहार ले छत्तीसगढ़ लोक सेवा आयोग के पूर्व अध्यक्ष टामन सिंह सोनवानी संघरा दूसर अधिकारी अउ राजनेता मनके खिलाफ अपराध पंजीबद्ध कर ले गेहे।
खबर के मुताबिक राज्य सरकार डहार ले ए मामला के सीबीआई ले जांच कराय जाय के फैसला करे गेहे।
ओमन बताइन कि पाछू छै जनवरी के मतदाता सूची के प्रारंभिक प्रकाशन करे गे रीहिस। कुछएक महीना पहिली होय विधानसभा चुनाव के दौरान राज्य म मतदाता मनके कुल संख्या दू करोड़ तीन लाख तिरानबे हजार एक सौ साठ रीहिस। अंतिम प्रकाशन के बाद मतदाता मनके संख्या म एक लाख बीस हजार बयानबे के बढ़ोत्तरी होय हे।
मुख्य निर्वाचन पदाधिकारी ह यहू घलो बताइन कि मतदाता मन ह वोटर सर्विस पोर्टल म जाके ई-इपिक ल डाउनलोड कर सकत हे। मतदाता सूची म नवा नाम जोड़े अउ शिफ्टिंग श्रेणी के आवेदन ल लोकसभा चुनाव म नामांकन दाखिल करे के अंतिम तिथि के दस दिन पहिली तक प्रस्तुत करे जा सकत हे। लोकसभा चुनाव कार्यक्रम के घोषणा होय के संगेच नाम विलोपन के कार्यवाही बंद कर दे जाही। आम नागरिक मन ह वोटर हेल्पलाईन ऐप के माध्यम ले अपन मतदान केंद्र क्रमांक अउ मतदाता सूची म अपन सरल क्रमांक ल जांच सकत हे। मुख्य निर्वाचन पदाधिकारी ह लोकसभा चुनाव के दौरान सामान्य जानकारी लेबर जादा ले जादा ये ऐप के उपयोग करे के अपील करीन हे।
राष्ट्रीय रोजगार मेला के आयोजन अवइया बारा फरवरी के देशभर के छियांलिस ठन जगा म करे जाही। ए दौरान प्रधानमंत्री नरेंद्र मोदी ह वीडियो कॉन्फ्रेसिंग के माध्यम ले नवा नियुक्त केंद्रीय कर्मी मन ल नियुक्ति पत्र दीहीं।
इही कड़ी म ग्रुप केन्द्र केंद्रीय रिजर्व पुलिस बल, आरंग रायपुर म होवइया रोजगार मेला म केंद्रीय वाणिज्य अउ उद्योग राज्य मंत्री अनुप्रिया सिंह पटेल, केंद्रीय सशस्त्र बल अउ दूसर विभाग म चुने गे अभ्यर्थी मन ल नियुक्ति पत्र दीहीं।
भारतीय जनता पार्टी चुनाव समिति के बइठका थोरकुन देर बाद रायपुर के कुशाभाउ ठाकरे परिसर के पार्टी कार्यालय म होही। बइठका म अवइया लोकसभा चुनाव के तैयारी के बारे म चर्चा करे जाही । ए मौका म भाजपा के प्रदेश प्रभारी ओम माथुर, प्रदेश सह प्रभारी नीतिन नबिन, मुख्यमंत्री विष्णुदेव साय अउ भाजपा के प्रदेश अध्यक्ष किरण सिंहदेव संघरा चुनाव समिति के सदस्य मन मौजूद रीहीं।
सुकमा अउ दंतेवाड़ा जिला के सीमा म सुरक्षा बलके संग होय मुठभेड़ म एक झन इनामी माओवादी मारे गेहे। एखर उपर आठ लाख रूपिया के इनाम घोषित रीहिस।
मिले जानकारी के अनुसार गोंदपल्ली, परलागट्टा, अउ बड़ेपल्ली गांव के जंगल म बड़ संख्या म हथियारबंद माओवादी मनके मौजूद होय के सूचना म डीआरजी, सीआरपीएफ अउ बस्तर फाईटर के संयुक्त टीम ल दंतेवाड़ा ले रवाना करे गे रीहिस। इही दौरान माओवादी मन ह सुरक्षा बल उपर अचानक फायरिंग शुरू कर दीन। जवान मन डहार ले करे गे जवाबी कार्रवाई के बाद माओवादी मन ह जंगल के फायदा उठाके भाग गीन। मउका म तलाशी के दौरान एक झन माओवादी के शव ल बरामद करे गीस। मृत माओवादी के पहचान जगरगुण्डा एरिया कमेटी म सक्रिय माओवादी चंद्रन्ना उर्फ सत्यम के रूप म होय हे।
उंहे सुकमा जिला के किस्टाराम-टेटेमड़गु इलाका म घलो सुरक्षा बल अउ माओवादी मनके बीच मुठभेड़ होय हे। जिला के पुलिस अधीक्षक किरण चौहान ह बताइन कि ए मुठभेड़ म कुछु नुकसान होय के खबर नइ हे। मउका ले बड़े मात्रा म माओवादी सामग्री बरामद करे गेहे।
आकाशवाणी के समाचार सेवा प्रभाग रायपुर ह अपन आने-आने क्षेत्रीय समाचार इकाई मन म पूर्णकालिक अनुबंध के आधार म संपादकीय कार्यकारी अउ समाचार वाचक सह अनुवादक के रूप म नियुक्ति बर अनुभवी उम्मीदवार ले अर्जी मंगावत हे। एखर जम्मों जानकारी न्यूज ऑन एआईआर डॉट जीओवी डॉट इन/वैकेंसीज म हवय। आज रतिहा बारा बजे तक ऑनलाईन आवेदन करे जा सकत हे।
ए अनुबंध ह दू बछर बर हवय। आवेदक के उमर अंठावन बछर ले जादा नइ होना चाही। उंखर मन तीर पत्रकारिता म स्नातकोत्तर उपाधि या फेर स्नातकोत्तर डिप्लोमा के संगेसंग कोनों समाचार संगठन म तीन बछर के काम-काज के अनुभव होना जरूरी हे।