इही बीच, मुख्यमंत्री विष्णुदेव साय ह लोगन मन ले कोनो भी प्रकार के अफवाह के बहकावा नइ आय के अपील करे हे।
उहें, केन्द्र सरकार ह स्पष्ट करे हे कि हिट एंड रन मामला बर लाय गे कानून ल अभी लागू नइ करे गेहे। केन्द्रीय गृह सचिव अजय भल्ला ह कहिन हे कि नवा कानून ल लागू करे ले पहिली अखिल भारतीय मोटर ट्रांसपोर्ट कांग्रेस के प्रतिनिधि मन ले बातचीत करे जाही, जेखर बाद ही कोनों फइसला ले जाही। गाड़ी चालक मन ल कोनों भी प्रकार के बहकाव म आय अउ डरे के जरूरत नइ हे। ए संबंध म मंत्रालय ह गाड़ी चालक मन ल कोनों प्रकार के अफवाह उपर ध्यान नइ देके अपील करे हे।
ऐति, आज हिंदुस्तान पेट्रोलियम कॉर्पोरेशन लिमिटेड के रिटेल अउ एलपीजी डिवीजन के मुख्य क्षेत्रीय प्रबंधक पंकज रत्नपारखी अउ उप महाप्रबंधक नितिन श्रीवास्तव ह रईपुर म पत्रकारवार्ता म बतईन कि हिट एंड रन कानून ल लेके चालक मन म होवइया गलतफहमी के कोई औचित्य नइ हे। ओमन ह कहिन कि केन्द्रीय गृह मंत्रालय डहार ले ऑलइंडिया मोटर ट्रांसपोर्ट कांग्रेस ल पत्र जारी कर दे गेहे अउ ओमन ह बतईन कि हिट एंड रन कानून लागू नइ होय हे। फेर, अभी भी कुछ ड्राईवर कानून लागू होय के बात ल लेके गलतफहमी म हे। अइसे म ओमन ल बताय जात हे कि ओमन कोनों आने चालक मन ल गुमराह नइ करय, नइ त उंखर मनके खिलाफ कार्रवाई करे जाही। पेट्रोलियम मुख्यालय के बाहिर आज कुछ चालक मन ल गाड़ी अंदर ले जाय ले मना करीन, जिखर खिलाफ कार्रवाई करे गीस। ओमन ह कहिन कि पेट्रोलियम के आपूर्ति नियमित हे अउ जेन भी हड़ताल ल प्रोत्साहित करही, उंखर खिलाफ कार्रवाई करे जाही।
परीक्षा पे चर्चा
‘परीक्षा पे चर्चा‘ कार्यक्रम के सातवां चरण के आयोजन जनवरी माह के आखिरी सप्ताह म करे जाना प्रस्तावित हे। ए कार्यक्रम म कक्षा छठवीं ले बारहवीं तक छात्र, सिक्षक अउ अभिभावक पांच वस्तुनिष्ठ प्रश्न के उत्तर देके अपन नामांकन करा सकत हे। छात्र मनके नामांकन समूह म सिक्षक डहार ले घलो करे जा सकत हे। नामांकन करे के आखिरी तारीख बारह जनवरी हे। नामांकन के संगेसंग छात्र, सिक्षक अउ अभिभावक प्रधानमंत्री ले पूछे जाने वाला प्रश्न घलो प्रेषित कर सकत हे। नामांकन काम म व्यवसायिक सिक्षा के प्रसिक्षक अउ आईसीटी के डिजी मित्र के घलो सहयोग ले जा सकत हे। परीक्षा पे चर्चा कार्यक्रम म सबो नामांकित प्रतिभागी ल सहभागिता प्रमाण पत्र दे जाही। स्कूल सिक्षा विभाग डहार ले सबो जिला सिक्षा अधिकारी ल निरदेसित करे गेहे कि सबो विद्यालय के छात्र, सिक्षक अउ अभिभावक के सत-प्रतिसत नामांकन करवाय।
जानबा के मुताबिक परीक्षा पे चर्चा कार्यक्रम म प्रधानमंत्री नरेन्द्र मोदी ह छात्र मन ल परीक्षा संबंधी तनाव ले दूर रखे बर संवाद करथे।
मुख्यमंत्री-केन्द्रीय मंत्री मुलाकात
मुख्यमंत्री विष्णुदेव साय ले काली राज्य अतिथि गृह ‘पहुना‘ म केन्द्रीय कृषि अउ किसान कल्याण मंत्री अर्जुन मुंडा ह मुलाकात करीन। मुख्यमंत्री ल केन्द्रीय मंत्री ह छत्तीसगढ़ के मुख्यमंत्री के पदभार ग्रहण करे बर सुभकामना दीन। ए दउरान श्री साय ह श्री मुंडा ल स्मृति चिन्ह भेंट करके सम्मानित करीन। ए बेरा म केन्द्रीय मंत्री ह कहिन कि श्री साय के नेतृत्व म छत्तीसगढ़ प्रगति के पथ म लगातार आगू बाढ़त हे।
विकसित भारत संकल्प यात्रा
विकसित भारत संकल्प यात्रा के तहत बिलासपुर जिला के गमजू गांव म सिविर के आयोजन करे गीस। सिविर म केन्द्र सरकार के आने-आने योजना के जानकारी दे गीस। तखतपुर विकासखंड म लगाय गे सिविर म अब तक अट्ठारह हजार ले जादा लोगन मन ह योजना के लाभ लीन।
उहें, रईपुर जिला के नवागांव अउ बेलदार सिवनी गांव म आयोजित संकल्प यात्रा सिविर म सांसद सुनील सोनी सामिल होइन।
विकसित भारत संकल्प यात्रा के तहत लाभार्थी मेरी-कहानी-मेरी जुबानी के माध्यम ले अपन अनुभव साझा करत हे। रईपुर जिला के ग्राम गुखेरा के प्रकाश कुमार रात्रे ह बतईन कि किसान सम्मान निधि योजना के अंतर्गत ओमन ल हर बछर छह हजार रूपिया तीन किश्त म मिलथे। ए रूपिया ले ओमन ल खाद, कीटनासक अउ सिंचाई बर नलकूप खरीदे म मदद मिलीस।
राज्यपाल-तीरंदाजी प्रतियोगिता
राज्यपाल विश्वभूषण हरिचंदन रायपुर म होवइया चालीसवां एनटीपीसी राष्ट्रीय सब-जूनियर तीरंदाजी प्रतियोगिता के पुरस्कार वितरण समारोह म सामिल होइन अउ खिलाड़ी मन ल पुरस्कार प्रदान करीन। उहें, भारतीय तीरंदाजी संघ के अध्यक्ष अर्जुन मुंडा ह कहिन कि तीरंदाजी के प्रति लोगन मनके रूझान बाढ़त हे।
पीएम-जनमन योजना
प्रधानमंत्री जनजाति आदिवासी न्याय महाभियान-पीएम जनमन योजना के तहत विशेष पिछड़ा जनजाति परिवार मन ल आने-आने योजना के लाभ दे बर लगातार सिविर लगाय जात हे। संगेसंग ए परिवार के समस्या के समाधान घलो करे जात हे। महासमुंद जिला के बागबाहरा, पिथौरा अउ महासमुंद म विशेष पिछड़ा जनजाति के लोगन रहिथे। जिला प्रसासन डहार ले चिन्हांकित ए समूह के लोगन मन ल योजना के लाभ दिलाय बर अब तक छब्बीस सिविर लगाय जा चुके हे। सिविर म विशेष पिछड़ा जनजाति के करीब सत्ताई सौ हितग्राही सामिल होइन।
कांग्रेस-बैठक
अखिल भारतीय कांग्रेस कमेटी के महासचिव और पार्टी डहार से छत्तीसगढ़ के नवनियुक्त प्रभारी सचिन पायलट काली रईपुर आवत हे। ओमन काली रईपुर म आयोजित पार्टी के प्रदेस इकाई के बइठका म भाग लीहीं। प्रदेस कांग्रेस मुख्यालय म होइवया ए बइठका म प्रदेस कार्यकारिणी के सदस्य के संगेसंग पार्टी के सबो विधायक, जिला अध्यक्ष, मोर्चा अउ प्रकोष्ठ के प्रदेस अध्यक्ष घलो सामिल होही। ए बइठका म अवइया लोकसभा चुनाव के तैयारी ल लेके चर्चा करे जाही।
नीट परीक्षा
राष्ट्रीय पात्रता सह प्रवेस परीक्षा स्नातकोत्तर-नीट दू हजार चौबीस सात जुलाई के होही। नेशनल बोर्ड ऑफ एग्जामिनेशन इन मेडिकल साइंसेस ह नीट पीजी के संसोधित कार्यक्रम जारी कर देहे। पहिली ए परीक्षा तीन मार्च के होवइया रिहीस। नीट पीजी म प्रवेस के पात्रता निर्धारित करे के समय-सीमा पन्द्रह अगस्त निर्धारित करे गेहे।
इही बीच, राष्ट्रीय स्तर के मेडिकल परीक्षा, नेशनल एक्जिट टेस्ट एक बछर बर विलंबित रइही अउ बछर दू हजार पच्चीस म होही। नेशनल एक्जिट टेस्ट के उद्देश्य देस म मेडिकल लाइसेंसिंग अउ प्रवेस ल व्यवस्थित करना हे।
माओवादी-समाचार
बीजापुर जिला म माओवादी मन डहार ले लगाय गे आईईडी के चपेट म आय ले आठ बछर के एक छात्रा गंभीर रूप ले घायल होगे हे। उहें, ओखर मां ल घलो जादा चोट लगे हे। जानबा के मुताबिक गंगालूर थाना क्षेत्र के चेरपाल-पालनार रद्दा म ए हादसा ओ समय होइस, जब बच्ची अउ ओखर मां रासन सामान लेके लहुटत रिहीन। घायल बालिका बीजापुर पोटाकेबिन म तीसरी कक्षा के छात्रा हे।
ऐति, गरियाबंद जिला के कुल्हाड़ीघाट-मटाल के पहाड़ी म चालीस ले जादा माओवादी मनके होय के सूचना मिले ले सुरक्षा बल के टीम कार्रवाई बर रवाना होइस। जिला के पुलिस अधीक्षक अमित तुकाराम कांबले ह बतईन कि सुरक्षा बल ल आवत देख माओवादी मन उहां ले भाग गीस। घटनास्थल के तलाशी के दउरान पुलिस ह पिट्टू बैग अउ माओवादी मनके रासन बरामद करे हे।
पदस्थापना
राज्य सासन ह भारतीय प्रशासनिक सेवा के अधिकारी सुनील कुमार जैन ल उंखर वर्तमान कर्तव्य के संग छत्तीसगढ़ राज्य खनिज विकास निगम के प्रबंध संचालक के अतिरिक्त प्रभार सौंपे हे।
जितेन्द्र सिंह मीणा ल केन्द्रीय प्रतिनियुक्ति म केन्द्रीय अन्वेषण ब्यूरो-सीबीआई के उप महानिरीक्षक नियुक्त करे गेहे। उहें, छत्तीसगढ़ सशस्त्र बल जगदलपुर म सेनानी पांचवीं वाहिनी म पदस्थ शशि मोहन सिंह ल उंखर वर्तमान कर्तव्य के संग बस्तर जिला के पुलिस अधीक्षक के अतिरिक्त प्रभार अस्थाई रूप ले अवइया आदेस तक सौंपे गेहे।