इही बीच विधानसभा चुनाव के चलत राज्य के नब्बे ठिन विधानसभा क्षेत्र ले अब तक सबो श्रेणी के एक लाख तीन हजार ले जादा डाक मतपत्र प्राप्त होय हे। ऐमा सेवा मतदाता मनके ईटीपीबी, निर्वाचन ड्यूटी कर्मचारी के सुविधा केंद्र मन ले प्राप्त डाक मतपत्र अउ अनुपस्थित श्रेणी के अस्सी बछर ले जादा आयु वर्ग के मतदाता, दिव्यांग अउ अनिवार्य सेवा मतदाता मनले मिले डाक मतपत्र सामिल हे।
मुख्य निर्वाचन पदाधिकारी रीना बाबासाहेब कंगाले ह बताइन कि सेवा मतदाता मन ल जारी करे गे ईटीबीपी हर दिन मिलत हे। जेखर संख्या छै हजार ले जादा हे। सेवा मतदाता के ईटीपीबी तीन दिसंबर के मतगणना सुरू होय के पहिली तक मिल जही। हर दिन मिले ईटीपीबी ल जिला स्तर म अभ्यर्थी अउ उंखर प्रतिनिधि मनके आगू म जिला मुख्यालय के ट्रेजरी स्थित स्ट्रांग रूम म सुरक्षित रखे जाथे अउ एखर संख्यात्मक जानकारी ले सबो ल अवगत कराय जात हे। उहें, डाक मतपत्र मन म निर्वाचन ड्यूटी म तैनात अधिकारी, कर्मचारी मनके इंक्यान्वे हजार ले जादा डाक मतपत्र सामिल हे। अइसने अस्सी बछर ले जादा उमर के मतदाता अउ दिव्यांगजन के घर-घर जाके प्राप्त करे गे डाक मतपत्र के संख्या छै हजार ले जादा हे। एखर अलावा अनिवार्य सेवा श्रेणी के अनुपस्थित मतदाता मनले मिले डाक मतपत्र के कुल संख्या एक सौ पैंसठ हे।
मतगणना तैयारी /डाक मतपत्र-02
मुख्य निर्वाचन पदाधिकारी ह बताइन कि मिले डाक मतपत्र के संख्यात्मक जानकारी हर दिन भारत निर्वाचन आयोग ल निर्धारित प्रारूप म प्रेषित करे जात हे अउ जिला स्तर म घलो एखर जानकारी ले सबो अभ्यर्थी मन ल अवगत कराय जात हे। ओमन बताइन कि मतगणना के दिन दिसंबर के सबले पहिली बिहनिया आठ बजे ले डाक मतपत्र के गणना करे जाही अउ ओखर आधा घंटा बाद ईवीएम मसीन के मत के गणना सुरू होही।
बातों-बातों में
सुनईया मन ल बतादन कि प्रादेसिक समाचार एकांश ले समसामयिक विषय उपर आधारित कारीकरम ‘‘बातों-बातों में‘‘ ए बार राज्य विधानसभा चुनाव के चलत मतगणना के तइयारी उपर केंद्रित रइही। ए संबंध म छत्तीसगढ़ के मुख्य निर्वाचन पदाधिकारी रीना बाबासाहेब कंगाले ले लेगे भेंटवार्ता प्रसारित करे जाही। एखर प्रसारण आकाशवाणी केंद्र रईपुर ले काली दू दिसंबर के बिहनिया साढ़े दस बजे ले करे जाही। एला छत्तीसगढ़ स्थित आकाशवाणी के सब्बों केंद्र ले रिले करही।
उपराष्ट्रपति-छत्तीसगढ़ प्रवास
उपराष्ट्रपति जगदीप धनखड़ अवईया तीन दिसंबर के छत्तीसगढ़ के एक दिवसीय प्रवास म रईपुर आही। श्री धनखड़ के ए ह पहिली छत्तीसगढ़ यात्रा हरय। उपराष्ट्रपति रईपुर के हिदायतुल्ला नेशनल लॉ युनिवर्सिटी म विद्यार्थी अउ संकाय सदस्य के संग गोठबात करही। श्री धनखड़ के इही दिन राजभवन के दौरा करे के कारीकरम घलो प्रस्तावित हे।
माओवादी समाचार
कंाकेर जिला के पखांजूर इलाका म माओवादी मन ह ग्राम पंचायत कंदाड़ी के उप सरपंच रामसू कचलानी के हत्या कर दीस। माओवादी मन ह ग्राम अचिनपुर के तीर पर्चा फेंक के ए घटना के जिम्मेदारी लेहे।
उंहे माओवादी मन ह पखांजूर क्षेत्र के गांव अचिनपुर अउ बुरका म रद्दा ल खोद देहे। जेखर सेती ए रद्दा म अवई जवई बाधित होगे हे। संगेसंग बुरका गांव म ही माओवादी मनह निजी कंपनी के एक मोबाइल टावर म आगी लगा दीन।
ट्रेन परिचालन
पश्चिम मध्य रेलवे भोपाल मंडल के भोपाल-ईटारसी रेलखंड म बुदनी-बरखेड़ा के बीच प्री नॉन-नॉन इंटरलॉकिंग के काम करे जाही। एखर सेती दक्षिण पूर्व मध्य रेलवे ले जवइया कुछएक गाड़ी अवइया छै ले दस दिसंबर तक रद्द रीही। एमा निजामुद्दीन-रायगढ़ गोंडवाना एक्सप्रेस, कोरबा अमृतसर छत्तीसगढ़ एक्सप्रेस, अमृतसर-बिलासपुर छत्तीसगढ़ एक्सप्रेस अउ बिलासपुर-केारबा पैसेंजर शामिल हे।
पोस्ट मैट्रिक छात्रवृत्ति
प्रदेस के सबो सैक्षणिक संस्था मन म पढ़ईया अनुसूचित जाति, जनजाति अउ अन्य पिछड़ा वर्ग के पढ़ईया लइका जउन पोस्ट मैट्रिक छात्रवृत्ति के पात्रता रखथे ओमन छात्रवृत्ति बर अवईया तीस दिसंबर तक ऑनलाइन आवेदन कर सकथे। उहें, ड्राफ्ट प्रस्ताव लॉक करे बर अवईया साल बीस जनवरी अउ स्वीकृति आदेस लॉक करे बर चौबीस जनवरी तक के बेरा निर्धारित करे गेहे। निर्धारित बेरा के बाद चालू शिक्षा सत्र के पोस्ट मैट्रिक छात्रवृत्ति बर ऑनलाइन आवेदन के पोर्टल बंद कर दे जाही।
भारत अउ आस्ट्रेलिया के बीच राजधानी रईपुर के शहीद वीरनारायण सिंह अंतर्राष्ट्रीय क्रिकेट स्टेडियम म आज चौथा टी-ट्वेंटी अंतर्राष्ट्रीय क्रिकेट मैच अब ले कुछेक देरी म सुरू होवइया हे। एखर पहिली आज बिहनिया भारत अउ आस्टेªेलिया के खिलाड़ी मन ह स्टेडियम म नेट प्रैक्टिस करीन। मैच ल लेके लोगन म भारी उछाह दिखत हे। मैच के दौरान स्टेडियम म सुरक्षा बनाय रखे बर पुलिस बल तैनात करे गेहे।
उहें, रईपुर यातायात पुलिस ह राज्य के अलग-अलग जिला मन ले अवईया दर्सक मन बर सुगम अउ सुरक्षित अवई-जवई बर रद्दा अउ पार्किंग बेवस्था निर्धारित करे हे।
आज विश्व एड्स दिवस मनाय जात हे। ए मउका म राजधानी रईपुर संग प्रदेसभर म आने-आने कारीकरम करे जात हे। ए दौरान कतकोन जघा म चर्चा, संगोष्ठी अउ रैली निकाल के लोगन ल एचआईवी एड्स के प्रति जागरूक करे गीस। ए बखत विश्व एड्स दिवस के बिषस हरय- सामुदायिक नेतृत्व। ए दिवस विश्व भर म लोगन ल एचआईवी वायरस के प्रति जागरूक करे अउ एकजुट होके एखर ले निपटे बर मनाय जात हे। ए दिन ह एचआईवी ले ग्रसित लोगन ल समर्पित हे। विश्व स्वास्थ्य संगठन के अनुसार तीन करोड़ नब्बे लाख ले जादा लोगन एचआईवी ले पीड़ित हे। ए बछर विश्व भर म एचआईवी ले ग्रस्त छै लाख तीस हजार लोगन के मउत होय हे।
खेल
हरियाणा के गुरूग्राम म पाछू महिना होय राष्ट्रीय खेलकूद प्रतियोगिता म कोंडागांव के छात्रा लेखा नेताम ह जुडो म कांस्य पदक जीते हे। लेखा नेताम ह चौदह बछर ले कम आयु वर्ग के चवालीस किलो ग्राम वर्ग म उत्कृष्ट प्रदर्सन करत ए उपलब्धि पाय हे। लेखा नेताम के कोंडागांव पहंुचे म कलेक्टर दीपक सोनी ह उंखर सम्मान करीस। ए मउका म कलेक्टर ह ओला सुभकामना देत अवईया खेल प्रतियोगिता म घलो अच्छा प्रदर्सन करे बर प्रोत्साहित करीन। ए मउका म जुडो प्रसिक्षक नारायण सोरेन ह बताइन कि तीन ले छै दिसंबर तक गुजरात के अहमदाबाद म होवईया खेलो इंडिया वुमन लीग रैंकिंग प्रतियोगिता म जिला के चार माईलोगिन खिलाड़ी जुडो प्रतियोगिता म सामिल होही। जेमा हेमावती नाग , राजेश्वरी मरकाम, गीता हिड़को अउ निर्मला सोरी सामिल हे। कलेक्टर ह ए सबो खिलाड़ी मन ल सुभकामना दीन।
खबर के मुताबिक कोंडागांव म जिला प्रशासन अउ आईटीबीपी के इकतालीसवां बटालियन डहार ले निःसुल्क जुडो प्रसिक्षण केंद्र संचालित करे जात हे। ए केंद्र म अब तक दू ले जादा लइका मन ल प्रसिक्षण दे जा चुके हे।
केशकाल घाट-मरम्मत कार्य
कोंडागांव जिला के केशकाल घाटी म चलत मरम्मत काम के बेरा तीस दिसंबर तक बढ़ा दे गेहे। अइसे म मालवाहक वाहन मनके अवई-जवई पहिली ले निर्धारित चुने रद्दा ले होही। अनुविभागीय अधिकारी ह बताइन कि केशकाल घाटी म चलाय जात पेंच मरम्मत काम ल पाछू अट्ठारा नवंबर के सुरू करे गे रिहीस। जेला तीस नवंबर तक पूरा करना रिहीस। फेर निर्धारित बेरा तक काम पूरा नइ होय के सेति काम के बेरा तीन दिन बढ़ाय गेहे।