राज्यपाल विश्वभूषण हरिचंदन ओडिशा के भुवनेश्वर म आयोजित राष्ट्रीय कार्यशाला म शामिल होइन। ए मउका म ओमन कीहिन कि अगर कोई आदिवासी मन ल उंखर जमीन ले बेदखल करथे त ये ह मानवाधिकार के उल्लंघन आय। मिट्टी, मां अउ मानवाधिकार विषय उपर आयोजित राष्ट्रीय कार्यशाला ल संबोधित करत राज्यपाल ह कीहिन कि आदिवासी मन ल अपन अधिकार मनके जानकारी होना चाही।
राज्यपाल ह कीहिन कि हर मनखे के मानवाधिकार होथे। ये हर मनखे ल मिलना चाही। राज्यपाल ह सबो झन ल आह्वान करीन कि कमजोर लोगन ल उंखर मानवाधिकार बर लड़े म मदद करंय। ओमन यहू कीहिन कि मानवाधिकार के रक्षा करना सरकार के जिम्मेदारी आय। एखर बर संविधान के प्रावधान मन ल लागू करे जाना चाही। एखरे संग राज्यपाल ह धरती म तेजी ले बाढ़त अलग-अलग प्रकार के प्रदूषण उपर चिंता जताइन। ओमन कीहिन कि अगर हम अभी ले प्रदूषण ल नही रोक बोन त ये ह महामारी के रूप ले लेही।
छत्तीसगढ़ के मुख्य निवार्चन पदाधिकारी रीना बाबा साहेब कंगाले ह कवर्धा के कृषि उपज मंडी परिसर स्थित मतगणना स्थल के निरीक्षण करीन। ये दौरान श्रीमती कंगाले ह जिला के विधानसभा क्षेत्र पंडरिया अउ कवर्धा बर होवइया मतगणना बर करे जात तैयारी के जायजा लीन । ए मौका म ओमन मतगणना स्थल म सीसीटीवी कैमरा अउ तैनात सुरक्षा बल, मतगणना अउ डाक मतपत्र मनके गणना के तैयारी के संबंध म विस्तार ले जानकारी लीन। ओमन मतगणना तिथि म मतगणना काम म लगे अधिकारी समेत दूसर आवश्यक व्यवस्था म लगे सबो कर्मचारी मन ल घलो पास जारी करे के निर्देश दीन। ओमन मतगणना कक्ष म राजनीतिक दल मनके एजेंट मन बर बइठे के व्यवस्था सुनिश्चित करे के निर्देश दीन।
निरीक्षण के दौरान कबीरधाम कलेक्टर अउ जिला निर्वाचन अधिकारी जन्मेजय महोबे अउ पुलिस अधीक्षक डॅाक्टर अभिषेक पल्लव के संग संबंधित विधानसभा क्षेत्र के रिटर्निंग अधिकारी समेत दूसर अधिकारी मन उपस्थित रीहिन।
प्रदेस म विधानसभा चुनाव बर तीन दिसंबर के बिहनिया आठ बजे ले वोट के गिनती सुरू होही। एखर बर तैयारी करे जात हे। राजधानी रईपुर म सेजबहार के इंजीनियरिंग कॉलेज परिसर म मतगणना बर जरूरी व्यवस्था करे जावत हे।
उंहे मतगणना काम म लगे अधिकारी कर्मचारी मन ल प्रशिक्षण दे जावत हे। कोंडागांव, जिला म कोंडागांव, कांकेर, अउ नारायणपुर जिला के अधिकारी-कर्मचारी मन ल प्रशिक्षण दे गीस। मुख्य निर्वाचन पदाधिकारी कार्यालय ले पहुंचे प्रशिक्षक मन ह अधिकारी कर्मचारी मन ल मतगणना प्रक्रिया के जानकारी दीन। ओमन मतगणना के संबंध म प्रमुख वैधानिक प्रावधान, नियम अउ मतगणना के दौरान बरते जाने वाला जरूरी सावधानी अउ अलग-अलग प्रारूप म दे जाने वाला जानकारी मनके संबंध म बताइन । प्रशिक्षण म बताये गीस कि मतगणना स्थल म मोबाईल ले जाना पूर्णतः वर्जित रीही।
बतादन कि मतगणना बर विधानसभा वार चौदह-चौदह ठन टेबल अउ डाक मतपत्र बर दू ठन टेबल लगाय जाही। हरेक टेबल म एक सुपरवाईजर, गणना सहायक अउ माइक्रो आब्जर्वर होही। रेण्डमाइजेशन प्रक्रिया, स्ट्रांग रूम के खोले जाना, स्ट्रांग रूम ले मतगणना स्थल तक ईवीएम के परिवहन, मतगणना हॉल के व्यवस्था समेत संपूर्ण मतगणना प्रक्रिया के वीडियोग्राफी कराय जाही।
उंहे राजनांदगांव के छत्तीसगढ़ स्टेट वेयर हाउसिंग कार्पोरेशन वसंतपुर स्थ्ति केंद्र म मतगणना करे जाही। मतगणना कार्य म तीन सौ चौरासी अधिकारी-कर्मचारी मनके ड्यूटी लगाय गेहे। सबले पहिली डाक मतपत्र के गिनती करे जाही। जेखर बाद ईवीएम के वोट मनके गिनती करे जाही।
नारायणपुर जिला म माओवादी मन डहार ले लगाये गे आईईडी के चपेट म आय ले एके परिवार के दू झनके मौत होगे। उंहे एक दूसर मनखे ह गंभीर रूप ले घायल होगे।
पुलिस अधीक्षक पुष्कर शर्मा ह बताइन कि ये घटना जिला के छोटे डोंगर थाना क्षेत्र के आय। ओमन बताइन कि आज बीहनिया मजदूर मन काम करे बर आमदई खदान जात रीहिन, ए दौरान ओमन माओवादी मन डहार ले लगाये गे आईईडी के चपेट म आगे। मृत मजदूर मनके शव ल घटना स्थल ले पोस्टमार्टम बर जिला मुख्यालय नारायणपुर लाये गीस। घायल मजदूर ल छोटे डोंगर म प्राथमिक उपचार बर रायपुर लाय गेहे।
उत्तर मध्य रेलवे के आगरा रेलमंडल म मथुरा यार्ड के आधुनिकीकरण के काम सत्ताईस नवंबर ले तेईस मार्च तक करे जाही। एखरे सेती कुछ यात्री गाड़ी मनके परिचालन प्रभावित रीही।
रेलवे प्रशासन ले मिले जानकारी के अनुसार अंबिकापुर-निजामुद्दीन- अंबिकापुर स्पेशल जनवरी माह के पहिली सप्ताह ल छोड़के रद्द रीही। अइसने तेईस, पच्चीस अउ तीस जनवरी अउ एक फरवरी के दुर्ग-शहीद कैप्टन तुषार महाजन-दुर्ग एक्सप्रेस रद्द रीही। एखर अलावा जनवरी अउ फरवरी महीना के कुछ तिथी मन म विशाखापट्नम-निजामुद्दीन-विशाखा
उंहे ग्यारा जनवरी ले छै फरवरी सिवनी-फिरोजपुर सिवनी एक्सप्रेस के परिचालन रद्द कर दे गेहे। अइसने कोरबा-अमृतसर कोरबा छत्तीसगढ़ एक्सप्रेस विशाखापट्नम-अमृतसर, हीराकुंड-विशाखापट्नम एक्सप्रेस, रायगढ़-निजामुद्दीन रायगढ़ गोंडवाना एक्सप्रेस अलग-अलग तिथि मन म रद्द रीही। उंहे कुछ एक्सप्रेस गाड़ी मन ल परिवर्तित मार्ग म चलाये जाही। एमा सिवनी-फिरोजपुर सिवनी, उत्कल एक्सप्रेस, दुर्ग-शहीद कैप्टन तुषार महाजन एक्सप्रेस शामिल हे।
इही बीच रद्द करे गे चिरिमिरी-चंदिया रोड-चिरमिरी पैंसेजर स्पेशल के परिचालन चिरमिरी-अनूपपुर-चिरमिरी के मध्य करे जाही। बतादन कि रेलवे ह पच्चीस नवंबर ले चार दिसंबर तक ए गाड़ी मनके परिचालन रद्द कर दे रीहिस।
भारत अउ ऑस्ट्रेलिया के बीच आगामी एक दिसंबर के टी-20 अंतर्राष्ट्रीय क्रिकेट मैच राजधानी रायपुर के शहीद वीर नारायण सिंह अंतर्राष्ट्रीय क्रिकेट स्टेडियम म खेले जाही। एखर बर आज ले टिकट मिलना शुरू होगे हे। पेटीएम अउ एंसाइडर मोबाइल ऐप के जरिया टिकट के बुकिंग करे जा सकत हे। टिकट लेबर रायपुर के इंडोर स्टेडियम म घलो केंद्र बनाय गेहे। विद्यार्थी मन बर सामान्य टिकट के अलावा एक हजार अउ डेढ़ हजार रूपिया के टिकट घलो उपलब्ध रीही। मैच ल लेके छत्तीसगढ़ के क्रिकेट प्रेमी मन म भारी उछाह के माहौल हे।
अवइया चौबीस घंटा के दौरान प्रदेश के बस्तर संभाग के जिला म एक दू जगा म हल्का बरसा हो सकत हे।
मौसम विभाग ले मिले जानकारी के अनुसार प्रदेश म लगातार हवा के दिशा पूर्व बने रेहे अउ वातावरण म नमी के संभावना हे। एखरे सेती प्रदेश के न्यूनतम तापमान म तीस नवंबर तक कोई विशेष परिवर्तन होय के संभावना नइ हे। हालाकि मौसम विभाग ह यहू केहे हे कि तापमान म कुछ उतार-चढ़ाव के स्थिति बन सकत हे।
– सक्ती जिला के बाराद्वार रेलवे स्टेशन करा ट्रेन के चपेट म आय ले रेलवे के एक झन कर्मचारी के मौत होगे।
– दुर्ग जिला के छावनी करा एक ठन फर्नीचर फैक्ट्री म काली रात आगी लग गे । सूचना म पहुंचे दमकल गाड़ी मनके मदद ले आगी उपर काबू पा ले गेहे। ए घटना म बड़ मात्रा म फर्नीचर जलगे।
अउ
– जांजगीर-चांपा जिला के नवागढ़ पुलिस ह नौकरी लगाये के नाम म बीस लाख रूपिया के ठगी करे के मामला म एक झन आरोपी ल गिरप्तार करे हे।